Basketo - 2014 BSE (NT) Drama

Basketo - 2014 BSE (NT) Non Drama

ዬሱ̈ሲ ያ̈ሪኮ ካታሚን ጋርታ̇ ዬላ̇ሪ ኢዝባር ኣ̈̇ርዶ̈ን፥ ኢና ዛኮ̇̈ሳ ጌይዝ ፔቲ̇ ዱር ኣሲ ዎ። ኢያሬ ቃራጻ ቃጺሲዛንቦ ኣላቃዶ̈ሪ፥ ዬሱ̈ሳ ጌይዝ ና̈ሳ ኢ ዎ̈ዳኮ ቤቃ̇ንዳብ ኮዪ̈ርዶ̈ን ዎርዣ ዎይሊን ኢ ቃቢን ማ̈ቂ̇ኖኮታ̇ቦ ቤቃ̇ንዳ̇ብ ዳንዳኣካ̇ይ ኣቲ̇ዴ። ዬሱ̈ሲ ጎይ ኢዝባር ኣ̈̇ዛኮታ̇ቦ ኢ ኢቲ̈ን ቲ̈ኒን ዎጻ̇ሪ ኢያ ቤቃ̇ንዳ̇ብ ፔቲ̇ ሚ ኤዶ̈ን ኢዝ ጋልዳ ኬስኪ̇ዴ። ዬሱ̈ሲ ቤስ̇ ኢዝ ጋል ዬላ̇ሪ ሾክ ጋ̈ር ቤቃ̇ሪ “ዛኮ̇̈ሶ! ዓታ̇̈ብ ቴ ኔ ኣ̈ል ፌ̈ሽካ̇ንዳብ ታ̈ብ ኮሺ̈ሬ፤ ዪዚ ኤሊ̇ ሶ̈ባቤ” ጌይዴ። ኢያሬ ኤሊ̇ ሶ̈ባሪ ኡፋይስባራ ኢያ ኤኪ̇ ፌ ኣ̈ል ሉኪ̇ዴ። ኢና ዎ ኣሳንር ዎይ ዪኖ̇ ቤቃ̇ሪ “ዬሱ̈ሲ ና̈ሳ ናጋራንቻ̇ ኣ̈ል ጌሊ ኢባር ሞ̈ንዳ ባያ?” ጋ̈ሪ ዎይሊን ጉንዱሚ ኤ̈̇ዴ። ዛኮ̇̈ሲ ኤቃ̇ሪ ጎዳ̈ኮ “ጎዳ̈ዶ! ቴ ታ̈ብ ዎ ቆሊንን ዎይን ጋርታ̇ፖ̇ ባጊ̇ን ዎርባያንቦ ኢማ̇ንዳ̇። ቴ ኦጋልዳፕካሬ ማቃባር ኤኪ̇ኖ ባዝ ዎኮ ኦይዲ̇ ኩሽ ጉጃ̇ራ ማሃ ኢማ̇ንዳ̇” ጌይዴ። ዬሱ̈ሲ ኢ̈ኮ “ዓ ና̈ሳዳር ማ ኣብራሃ̈ማ ዜር ማ̈ቂ̇ኖኮታ̇ቦ ዓታ̇ብ ፋቲ ዓና̇ ኣ̈ሊን ጋርታ̇ ጌሊኔ። ኣባ ጌይን ታ̈ኒ ኣሳ ናኣ̈ዲ ዪኖ ኮያንዳ̇ብኬ ፋንዳቦ ዬይኔ” ጋ̈ር ሶ̈ሊዴ።


ዎርዣ ዪኖ̇ ሲስኪሙታ ዎን ጋርታ ኢ ዬሩሳ̈ላም ዬላ̇ንዳ̇ብ ኡኪ̇ኖምቢኬ ኣሳንሬ ጾ̈ሳ̇̇ ካቲቲን ዓት ዪዚ ዬ̈ንዳ̇ብ ዬሊ̇ኖ ኢንታ̇ክ ማይጺኖኮታ̇ቦ ኢ ፔቲ̇ ሚሳ̈̇ሊ ኢንታ̇ብ ሶ̈ሊዴ። “ፔቲ̇ ቦንቺ̇ንቲኖ ኣስዶ̈ሪ፥ ኢ ካ̈ት ማ̈ቃ̇ር ዬ̈ንዳ̇ብ ጋ̈ሪ ፔቲ̇ ጎት̇ ጋዳ ሉኪ̇ዴ። ኢ ሉካ̇ናፖ ቲ̈ን ፌ ኣይላን ጋርታ̇ፖ̇ ታጳ̇ን ጼይጋሪ ኢንታቦ ታጳ̇ ሚና̈ና ኢማ̇ሪ “ቴ ማ̈ቃ̇ ዬይዝ ዲራ̈ስ ዓና̇ ሚ̈ሺ̇ንባራ ዛልኢብቴ̇” ጌይዴ። ኢና ጋዶ̇ ኣሳን ኢያ ኢጺ̇ኖኮታ̇ ዓ̈ ና̈ሳ ኑ ጋልዳ̇ ካ̈ቲ ማ̈ቃ̇ምፔ̈ን ኑ ኮዪባ̈ሴ ጋ̈ሪ ኢ ሉኪ̇ኖፖ ዓኒ ኢ ዎሃ ኣስ ኪ̈ቲ̇ ሚሺዴ። ዎቲናካሬ ዪ ና̈ሳ ካ̈ት ማ̈ቃ̇ር ፌ ኣ̈ል ማ̈ቂ̇ ዬይኖፖ̇ ዓኒ ኢ ኢሚ̇ኖ ሚ̈ሺ̇ንባር ኢንቲ ዛልኣር ኣ̈ፊን ታራ̇ፊሲኖኮ ኤራንዳ̇ብ ኮያሪ ታጳ̇ ኣይላን ፌ̈ክ ጼይጊሲዴ። “ቲ̈ን ዬይኖ ኣይላ ኢ̈ክ ሺ̈ቃሪ ‘ላ̈! ኔ ታ̈ብ ኢሚ̇ኖ ሚ̈ሺ̇ንባር ዛልኣራ ዓ̈ዲሼ ኢዝ ጋልዳ̇ ታጳ̇ ሚና̈ና ታራ̇ፊሳዴ’ ጌይዴ።
“ኢ ላ̈̈ዲ ኢ̈ኮ ‘ኔ̈ኒ ታ̈ቦ ኣማ̇ኒንቲ̇ኖ ኣይላ፤ ኔ ኮሽ ኦ̈ኔ፤ ኔ ጊላ̇ ሚ̈ሺ̇ን ዓኒ̇ባር ኣማ̇ኒንቲ̇ኖኮታ̇ቦ ቴ ኔ̈ና ታጳ̇ ካታማን ጋርታ̇ ዎ ዎርዣጋልዳ̇ ኣላቃ ማሂኔ’ ጌይዴ።
“ኢናፖ ናምኢ ኣይላ̈ዲ ፌ ላ̈̈ኮ ዬ̈ሪ ‘ላ̈! ኔ ታ̈ብ ኢሚ̇ኖ ሚ̈ሺ̇ንባር ቴ ዛልኣራ ኢዝ ጋልዳ ኣፋ ኢሺ̇ን ሚና̈ና ታራ̇ፊሲኔ’ ጌይዴ።
“ላ̈̈ዲ ዪ ኣይላ̈ኮ ‘ኔ̈ናር ማ ኢሺ̇ን ካታማን ጋርታ̇ ዎ ዎርዣን ጋልዳ̇ ኣላቃ ማ̈ቃ̇ቤ’ ጌይዴ። ሜላ ዓይዚ̇ ኣይላ̈ዲ ፌ ላ̈ክ ሺ̈ቃሪ ‘ላ̈! ኔ ታ̈ብ ኢሚ̇ኖ ሚ̈ሺ̇ን ዓኒ̇ሼ። ቴ ኢዞ ጫርቃ̇ባር ቃቻ̇ ጋዲ̇ኔ። ቴ ዪኖ̇ ዎቲኖንዳ̇፥ ኔ ጋዳካ̇ዮ ባዝ ኤካ̇ንዳ̇ ጌይዝ ኣስኬ ኣሳ ዎልቃ̇ ሜላ̇ ሞ̈ንዳ̇ ጌይዝ ኢ̈ታ ኣስ ማ̈ቂ̇ኖን ኤራራ ኢ̈ጫ̇ዴ’ ጌይዴ።
“ኢ ላ̈ ኢ̈ኮ ‘ኔ ኢ̈ት ኣይላዲ! ኔ ሶ̈ሊኖ ሶ̈ሊንባራ ቴ ኔ ጋል ፊርዳ̈ሬ። ታ̈ኒ ጋዳካ̇ዮ ባዝ ኤካ̇ዚንዲኬ ኣሳ ዎልቃ̇ ሜላ̇ ሙይዝ ኢ̈ታ ኣስ ማ̈ቂ̇ኖን ኤራ̈ርኮ፥ ቴ ሚ̈ሺ̇ን ዬሊንታ̇ር ዎይላምፔ̇̈ን ሚ̈ሺ ታልቂ̇ ዬሊሲዝ ኣሳንቦ ኣባብ ኢማ̇ካይ ኣቲ̇? ታ ማ̈ቃ̇ ዬ̈ራ ዬሊንባር ዎልኣ ኤካ̇̈ርዶ̈ን’ ጌይዴ።
ኢ ላ̈̈ዲ ኢና ቡጊድባር ኤቂ̇ ዎ ኣሳንኮ ‘ኢ ኩሽቶ ሚና̈ኒን ኤካ̇ሪ ታጳ̇ ሚና̈ና ዎ ና̈ሳ̈ቦ ኢሚ̇ብቴ’ ጌይዴ።
ኣሳንሬ ‘ላ̈! ኢ̈ቦ ታጳ̇ ሚና̈ና ዎሽዋ’ ጌይዴ።
ኢያር ኢንታ̇ኮ ‘ቴ ዪንታ̇ብ ሶ̈ላዚንዳ̇፥ ዎ ኣስ ዎይ̈ቦ ጉጂንቲ̈ሬ፤ ባዮ̇ ጋልዳፖ̇ ኢ̈ብ ዎ ጊሊ̇ንዳሬ ጌዳ ኤኪንታ̇̈ሬ። ዓት ዪዚ ቴ ኢንታ̇ ጋልዳ̇ ካ̈ቲ ማ̈ቃካ̇ይፌ̈ን ኮዪኖ ኣሳን ዪን ቴ ጻላ̈ታን ኢንታ̇ ዓይ ኤካ̇ር ዬ̈ር ቴ ቲ̈ን ኢንታ̇ ዎብቴ! ጌይዴ’ ” ጌይዴ።


ዬሱ̈ሲ ዪኖ̇ ሚሳ̇̈ሊን ኢንታ̇ብ ሶ̈ሊኖፖ̇ ዓኒ ኢንታ̇ፖ̇ ቲ̈ኒታሪ ዬሩሳ̈ላም ሉኪ̇ዴ። ኢያኬ ኢ ታማ̈ራንኬ ዎልኣ ዳብራዛይታ ኢንዲ̇ን ቡጊድባር ዎ ቤ̈ቴፋ̈ጋኬ ቢታ̈ና ጌይዝ ቤሳ̇ን ዬላ̇ንዳ ዎታሪ ፌ ታማ̈ራን ጋርታ̇ፖ ናምኣንኮ፥ “ዪንቲ̇ ዪንታ̇ ቲ̈ን ሴክ ዎ ሳፋሪን ጋርታ̇ ሉኪ̇ብቴ። ዪንቲ̇ ኢና ዬላ̇ዚምባራ ኦ̈ናካር ቢርት ቶጋ̇ካዮ ዲጫ̇ ኬስኪ̇ኖ ዬራ ናኣ ቃቺንታ̇ር ዎ ዪንቲ̇ ዲጚ̈ሬ፤ ኢዞ ቢላ̇ር ዓይ ኤካ̇ር ዬብቴ̇። ኦ̈ናካር ዪንታ̇ ‘ዪንቲ̇ ዬራ ናኢን ኣባብ ቢሊ̇̈ራ’ ጌዪ ኦይጬ̈ጌይንዶ̇ ‘ጎዳ ኢዞ ኮዪኔ’ ጌብቴ̇” ጋ̈ር ኢንታ̇ ሚሺዴ። ኪ̈ቲንቲ̇ኖ ናምኢ ታማ̈ራን ሉካ̇ምባራ ዎይ ባዚ ካኣ ዬሱ̈ሲ ጌይኖንዲፌ̈ኒ ማ̈ቂ̇ ቤንቲ̇ዴ። ኢንቲ̇ ዬራ ናኢን ቢላ̇ዚምባራ ዬሪን ላ̈ ቤቃ̇ሪ “ቴ ዬሪን ዪንቲ̇ ኣባብ ቢሊ̇̈ራ” ጋ̈ር ኢንታ̇ ኦይጪ̇ን፥ ኢንታሬ “ጎዳ ኢዞ ኮዪኔ” ጌይዴ።
ኢናፖ̇ ዬራ ናኢን ዬሱ̈ሳክ ኤሄ̈ሪ ኢዝ ኡንኪን ጋልዳ ኣፊላ ጋዳ̇ሪ ኢያ ኢዝ ጋል ቶጊሲዴ። ኢ ሉካ̇ዝ ጎይን ጋልዳ̇ ኣሳን ፌ ኣፊላ ዎይ ዪ̈ጺ̇ዴ።
ኢ ዳብራዛይታ ኢንዲ̇ን ጋልባር ጎርጎራ ዬሩሳ̈ላም ኤ̈ጛዝ ጎይሚንኮ ዬላ̇ዚምባራ ኢ ዎሂን ዬ̇ዝ ኣሳን ዎይ ዓኒ̇ፖ̇ ቲ̈ን ኢ ኦ̈ኖ ታ̈ሚ̇ራ̈ቲን ቤቂ̇ኖኮታ̇ቦ ፌ ቆ̈ ሾክ ዎታር፥ “ጎዳ ጾ̈ሳ̇̇ ሱምባር ዬይዝ ካ̈ታ ኢ ኣንጂንቲኖ ካ̈ቴ። ኣፋ ሳሪቲ፥ ቦንቻ̇ሬ
ኣፋ ሾክ̇ጌይኖ ቤሳ ጋልዳ̇ ዎ ጾ̈ሳ̇̇̈ቦ ማ̈ቆ̇” ዪዝ ጋ̈ር ጾ̈ሳ̇̇ ጋላቲ ኤ̈̇ዴ።
ዎርዣ ጊዳ̇ ዎ ፔቲ̇ ፔቲ̇ ፋራሳ̈ዋን ዬሱ̈ሳኮ “ኣስታማ̈ራ̈ዶ! ኔ ታማ̈ራን ፌ ጋ̈ዝ ባዚን ኣሻ̇ምፔ̈ኒ ኢንታ̇ ጎይላቤ” ጌይዴ።
ኢያሬ ኣሳንኮ “ኢንቲ̇ ዚምዶኤ̈ጌይናሬ ሹቻ̇ን ዉይሳዚን ቴ ዪንታ̇ብ ሶ̈ላ̈ሬ” ጌይዴ። ዬሱ̈ሲ ዬሩሳ̈ላም ዬላ̇ንዳብ ዎቲ̈ርዶሪ ካታሚን ቤቃ̇ር ኢዝቦ ሚጪንታ̇ር ዬኪ̇ዴ። ኢያሬ “ኔ̈ቦ ሳሪቲ ማ̈ቃ̇ዝ ጎይን ዓታ̇ብ ኔ ኤሪኖኮ ኔ̈ብ ኮሽ̇ዶ̈ን። ዪና̇ ዓት ኔ ጋልዳፖ ጌ̈ሚቲኔ። ኔ ጻላ̈ታን ኔ ቡጊድባር ኣጺራ ኣጺራሪ ኔ̈ና ጊዳ̇ ጋዲ̇ ሜቲዝ ቃሚ̇ ዬይሬ። ኔ̈ናኬ ኔ ጋርታ̇ ዶኢዝ ኣሳን ዎይ ይሲ̇̈ሬ። ላ̈ሊ̇ንታ̇ካ̇ይ ዎልጋል ኬ̈ሊንቲኖንዲፌ̈ን ኣቲ̇ዝ ፔቲ̇ ሹቻ̇ር ባዬ̇። ዪና̇ር ማ̈ቃ̇ዚንዳ̇ ጾ̈ሲ̇ ኔ̈ና ፋንዳቦ ዬይኖ ኬሊ̇ን ኔ ኤራካ̇ይ ኣቲ̇ኖኮታ̇ቦ” ጌይዴ።


ኢናፖ̇ ዓኒ ዬሱ̈ሲ ጾ̈ሳ̇̇ ኬ̈ ጋርታ̇ ጌላሪ ኢና ዎ̈ማ ዎ̈ጚዝ ኣሳን ዳኪ̇ ኬሲ̇ዴ። ኢናፖ “ ‘ቴ ኬ̈ንዳ̇ ዎ̈ሳ ኬ̈ ማ̈ቃ̇̈ሬ’ ጋ̈ር ጌ̈ሻ̇ ማጻ̈ፋ ጋልዳ̇ ጻ̈ፊንቲ̇ንዶ̈ን ዪንቲ̇ ማ ኢዞ ሶላ ባዪዝ ጋዊ ማሂዴ” ጌይዴ። ዬሱ̈ሲ ዎርዣ ዎይ ጋላስ ጾ̈ሳ̇̇ ኬ̈ ጋርታ̇ ታማ̈ርሲ̈ርዶ̈ን፥ ቄ̈ስ ኣላቃን፣ ሙ̈ሳ ሂጋ̇ ታማ̈ርሲዛንኬ ዎርዣ ኣላቃን ኢያ ዎንዳብ ኮዪሬ። ዎቲናካሬ ዎርዣ ዎይ ኢ ጋልዳፖ̇ ዱጳካ̇ይዶ̈ር ኢ ታማ̈ርሳዝ ቲሚርቲ̇ን ሲስኪ̇ዛ̈ኮታ̇ቦ ኢ ጋልዳ ኣባክ ፔቲ̇ ኢ̈ታ ባዝ ዎታንዳ̇ቦ ዳንዳኣካ̇ዬ።

Poslouchat ሉቃ̈ሳ 19