Recording of Inuinnaqtun Scripture Portions from the Prayer Book and a New Translation of Mark

Translation: Canadian Bible Society, 2021; Audio Recording: Hosanna, 2024

Inuinnaqtun Scripture Recording

Upluk malruk avaliiqtuq Qaangiutivingmit Puplaittut Muqpaujallu upluanit. Hivulliuqtiit minihittaqpait ilihaijillu maliganik iiraqturlutik tiguhivikhamingnik Jesusmik tuqutaujangani. “Kihimi tiguhiumanngittut quviahuutauvingmi Qaangiutinianik,” angiqatigiiktut, “inuit ningalaqinakhangmata.”
Talvuuna, Bethanymi, Jesus pulaaqhimatillugu Simon igluani kilaarutiqaqpakhimajugaluaq. Niritilluni, arnaq qaijuq tigumiaqtuq hikuliamik tipigikhautiliuhimajumik akituqpiaqtumik nardmit. Ahiruqhugu angmaqtaa kuviplugulu tipigikhaut niaquanut.
Ilangit ikpanmiittut ihuigijaat. “Huuq uqhuqtirun akitujuq kuvijauva?” apiqhiut. “Niuvrutauttaaqtuq ukiuraalungmi maniqautikhaugaluaq man'ngillu tunijaulutik maniilliuqtunut!” Taniqtuqtaat.
Jesusim kiujait, “Hugihuiqhiuk. Huuq qinugivihiuk uvamnut nakuujumik pijuq? Ilingajuqainnarniaqtuq akuniffingni, ikajuqtaaqtaqhi qujaginnaq pijumaguffi. Iliffingniinginarunaittunga. Pijuq pittaarami uqhuqtiqhugu timiga iluviqtautinanga. Ilumuuqtumik uqautigiffi, humiliqaak Tuharnaarnaqtuq unipkarijaukpata nunarjuami, uuma arnaup pivakhimajaa itqaumajauniaqtuq uqarijaulunilu.”

Judas Iscariot, atauhiq malirutaa 12nit, hivulliuqtiinnut minihittaqpait tuniniaqhimaliqhugu Jesus tapkununga. Quviattaktut tuharamikku qaitjutaa, uqariijaqtut akilirniaqhugu maningnik. Talvangaanit ihumakhaqhiuliqtuq tunihivikhaminik Jesusmik.

Hivulliup upluani Puplaittum Muqpaujam Upluanni, Qaangiutivingmi imnaim nurraa tunijaukpat, Jesusip malirutaita apirijaat, “Humi niriqatigiikniaqqita Qaangiutivingmi?”
Jesusim malruk tilijaik Jerusalemut: “Igluqpaqarvingmut itiliruffi, angut tigumiaqtuq imaqarvingmik paarniaqtaahi. Maliglugu. Igluqpangmut itiqqat uqallaglutik igluqaqtumut, ‘Ilihaiji apiqhiuk: Nauk inikhara nirivikhara Qaangiutivingmi niriqatiginiaqtillugit malirutitka?’ Qullirmut angijumut igluamut aggitiniaqtatit upalungaiqhimajumut. Talvani niriqatigivikhaqqut upalungaijaqhiuk.” Talvanga malruk malirutaik igluqpaqarvingmugaujuk naniplugit tamaita Jesus uqarijait upalungaijaqhugu Qaangiutivingmi nirivikhaa talvani.
Unnuliqtumi Jesus tikittuq 12lu malirutait. Ikpanmi niriliqtillugit, Jesus uqallaktuq, “Ilumuuqtumik uqautigiffi, atauhiq niriqataujuq uvamni uvani niuvrutiginiaqtaanga.”
Quglukhutik, atuni apiqhiut, “Uvangaa?”
Kiujait, “Atauhiq 12nit iliffingnit niriqatigijanga uvanga urviujamit. Irnia Inuum tuqujukhaungman, titiraqhimajut uqaqhimangmata qangaraaluk. Ihuilitjutauniaqpiaqtuq taffumunga niuvrutiqarniaqtumut. Nakuutqijauniaqtugaluaq inuuhimanngitkumi!”
Niritillutik, Jesus muqpaujamik tiguhiuq qin'ngautiplugu. Avguqhugu tuniuqqaijuq malirutiminut, uqaqhuni, “Pilugu, timigigapku.”
Qallut wainimik imalik tigujaa qujatjutigiplugu Godmun. Tunijaa tamainnut niuqqaqvigijaat. “Una auga, naunaitkutaujuq uqariijautauhimajumut Godmin inungminut. Kuvijaujuq pitjutigiplugit amihut. Ilumuqtumik uqautigiffi, waintutqigunaiqtunga waintuqtiliqqaaqtinanga Atan'nguviani Godim.”
Ahiit atuqqaqhutik Kinginnirmut Olivesmungaujut.

Jesusim uqautijait, “Tamaffi qimangniaqtaffinga. Uqaqhimangmata titiraqhimajut,
‘Godim anauniaraa Imnailik
imnait hiaminniaqtut.’
Kihimi makitkuma tuqunirmit, hivuniqhurniaqtaffi Galileemut tikinnariglunga tikitinnahi talvani takuniaqtaffi.”
Peterm uqautijaa, “Qimaktauguvit tamainnit, qimagunaitagit.”
Jesusim kiujaa, “Ilumuuqtumik uqautijagit, Peter—unnugiaq, qupanuaq nivjaaqtinnagu malruiqturluni, iqquniaqtutit pingahuiqturlutit ilihimanginnirarlunga.”
“Imannaq!” Peterm uqallautingmijaa. “Tuquqatigijariaqarupkit, iqqutigijunaittagin!” Tamaita ilait taimaatun uqariijaqtun.

Oliveqarnirmungaujut Gethsemanemut, Jesus uqallaktuq, “Ikhivagitti hamani qin'ngariaqtuqtillunga.” Peter, James, Johnlu maliktitait, ihumallakpalliapluni in'ngumakhunilu. Uqautijait, “Uummatiga uqqumaiguhuktuq tuqujuqittutut. Hamaniilluhi tupaumagitti.”
Ungahikhivjakhuni inminik ingittuq nunamut. Qin'ngaqtuq ajurnaitpat tikittumanngitani ikaarniq qaangiutiquplugu. “Aappak, Angutiga,” tuqhulajuq, “hunaliqaak pillajat. Una qallun naglighaarut uvamnit piiruq. Huli pijumagaluaqhunga ilingnut, uvamnuunngittuq.”
Utirami hiniktut malirutini takujait. Uqallaktuq Petermun, “Simon, hiniliqqiit? Munarilimaitpingaa atauhiugaluamik ikaarnirmiik? Munaqhilutin qin'ngarit, uktuqtauqunahi. Uummat pijumajugaluaq kihimi timi hakuittuq.”
Jesusim qimangmijait atauhiinnaq qin'ngaut qin'ngautigiplugu. Utirmigami nanijait hinilirmiut, uitalimairamik. Uqauhikhaiqhutik.
Utirvigigamigit pingahuanik, uqautijait, “Taki hinigitti. Unaguiqhiritti. Kihimi—imannaq ikaarniq tikinmat. Irnia Inuum tunijaujuq algainnut huinniqqijinut. Makititti, aullaqta. Takkuuk, uvamnik tunihiuq hamaniittuq!”

Taimaa Jesus uqaruiraaqtillugu, Judas malirutaa qaiqatigijait angutip anautilgiaqtut havikpagjuaniglu. Qaitqujauhimajut hivulliuqtinit minihittaqpait, ilihaijinit maliganik inutuqanillu. Iqujuq Judas uqariihimajuq: “Ilihimaniaqtuhi kitu tigujakhaqhi kunikupku. Talvanga tiguniaqtaqhi.” Tikinnamik, Judas upaktaa Jesus. “Ilihaijii!” uqaqtuq kunikhugulu.
Ilaita tigujaat Jesus. Atauhiup angutip Jesusmiittuq amujaa havikpagjuani aktuqhugu minihittaqpait hivulliuqtiata havaktia hiutaiqhugu.
Jesusim apirijait, “Iqhinaqqiik, qaivihi havikpagjualgiaqhuhi anautalgiaqhuhilu tigujaqtuqhunga? Huuq tigunngitpinga angaatjuvikpagjuami? Upluq tamaat angaatjuvikpagjuamiittunga ilihautjiplunga. Godim uqauhiinni titiraqtauhimajut atuqtauliqqut uvamnut.”
Malirutaita tamaita ikhinnaqtaat qimaaplutik. Atauhiq inuuhuktuq malingniktuq aannuraqhimajuq takijumik akuvruamik. Tigujaulrajarami, akuvruani mattakhugu qimaajuq uviniinnaaliqhuni.

Aggitijaat Jesus aimavianut angaatjuvigpagjuam ataniata talvani hivulliuqtiit minihittaqpait inutuqaillu ilihaijillu maliganik katilviani. Peterm maliktait qanitpallaanngittumit igluata avaluanut itiqqataupluni. Ikhivaqatigijait angujaktiit, uqqumapluni ingniurvingmit.
Iglum iluani hivulliuqtiit minihittaqpait katimajiillu ilitturinahurittut Jesustigut, tuqutaujangani. Nanihinngittut kihimi. Amihut uqautigijaat itquumanngittunik uqauhiit aatjigiinngittutik. Kinguagut, angutit nangippakhutik iquplutik imaa uqaqtut: “Tuhaajaqqut uqaqtuq, ‘Imiktiniariga hamna angaatjuvikpagjuaq inuit hanahimajaat, uplunilu pingahuni nappaqhiniaqtunga aallamik, hanajauhiumanngittumik inungnit.’” Aatjigiiktumigluunniit iqqutiqarnatik!
Nangippakhuni hivulliuqtiat minihittaqpait apirijaa Jesus, “Kiujunaitpigiit ukua pinirlunahurijaujuut? Qanuq niplirnialiqqit?” Jesus nipaingaqtuq kiunngittuq. Hivulliuqtiat minihittaqpait apiringmijaa, “Messianguviit Atan'ngup Irnia?”
Jesus uqallaktuq, “Tamnaujunga. Takuniaqtaqhi ‘Inuum Irnia ikhivatillugu Hakugiktum taliqpiani,’ ‘qailiqtuq nuvujanit.’”
Talvanga hivulliuqtiata minihittaqpait aliqaaqtait aannuraangit ningakkami uqaqhuni, “Huuq apiqhuivita? Tuhaajuhi tamaffi iqqutaujunik itqumanngittunik. Qanuq ihumavihi?”
“Pinirluktuq!” tuqhulauqtut. “Tuqutaujukhaq!”
Ilangit tivvuaqturvigijaat, iingik taluplugik tigluqattaliqtaat. “Uqautjiguit!” mitaaqhugu. Angujaktit patiktuliktaat aullautiliqhugu.

Peter iqataujuq igluqarvium avaluani. Arnaq kivgaqtuiji hivulliuqtiannut minihittaqpait qaijuq takuplugu Peter ingniurvingmi uqqumajuq. Iigiplugu uqallaktuq, “Iqatigijat Jesus Nazarethmiutaq.”
Peterm qinngijaa. “Ilihimanngittunga uqarijarnik,” uqallakhuni anijuq. Talvuna, qupanuaq nivjaaqtuq.
Arnaup kivgaup takugamiuk talvani nangiktuq uqautijait ilani, “Una angut ilaujuq!” Peterm qin'ngingmijaa.
Tatjagunnuaqtauq nangiqqatigiiktun uqallautijaat Peter, “Ilaa ilagivaktatin Galileemiutaugavin.”
Peter huniaqtaa, “Pinirluktaulanga iqunniruma—ilihimanngitara angun uqarijakhi!” Tatjainnak qupanuaq nivjaatqiqtuq tuglirmik.
Atauttikkut Peterm itqaqtait Jesusim uqauhiin: “Qupanuaq nivjaaqtinnagu malruiqturluni, iqquniaqtutit pingahuiqturlutit ilihimanginnirarlunga.” Illaviijaqhuni qialiqtuq.

Poslouchat Mark 14