Matiu 3
3
Ti fale-mate Yoniꞌa mono ke hu-haleno hu-maine.
1Ti fale-mate Yoniꞌa evaꞌyi huno Yutia kaꞌme kotega maineno Anumaya Koti kea hu-haleno hama-pai-maine. 2Yoniꞌa mage huno hie Anumaya Kotiꞌma ikapinaga kava yagaisia yamoꞌa aupaꞌa evaꞌyi hugahie. Evaꞌyi hugahigi tamakaya tamakuꞌa aiyahae hutama kefo yatamia “Nagoꞌene ohugahune.” hutama ataleho huno hu-maine. 3Ani kema hisia kanomofena nayona Anumaya Koti aune kanomoꞌa, Aisayaꞌa mage huno hu-maineane
“Kaꞌme kotegati nago kanomoꞌa keha keha huno mage hugahie ‘Anumayamo esia kamaꞌa ali hilato hutama ali fatago hiho.’ huno hugahie.” huno hu-maineane.
4Yoniꞌa kemolo afumo ayolagefaleti fakaꞌni-male kena fai-line. Fai-lineno pulamakao augafaleti amuꞌnofila aye-talako huno ki-lineno kaveꞌa keꞌnuꞌene tumemo timaꞌaene neneane. 5Ani kanafina Yelusalemu veaꞌnene Yutia kotega veaꞌnene nagoꞌa Yotani ti agegayalega hanea kumate veaꞌnene Yoni mainelega umainae. 6Yotani titega emaineꞌya kefo yaꞌamihena hu-falote hageno Yoniꞌa ani Yotani tipi tina fale-ma-tene.
7Tina fale-neꞌama-tegeꞌya Falasia* vayaꞌene Satiusi* vayaꞌene “Ti fale-la-tesie.” huꞌya neꞌageno Yoniꞌa amaketeno mage huno hie “Tamakaya osifaꞌveyagamo nafaꞌneyaga mainagi tamakaya havigeꞌage vayaꞌmogatama Anumaya Kotiꞌa kaiyekema hu-lama-tesigetama tamaugafa tamakata aisia kanamoꞌa aupaꞌa efalote hisia yafena ‘Faletama viho.’ kea ta tamaha-pai-maine? 8-9Hagotetama kefo yatamihema tamakuꞌa ai-yahae hu-mainesaya yana nave-lisageꞌna tina fale-lama-tegahue. Tamakaya ‘Apalahamu nafaꞌneyaga mainone.’ hutama ohiho. Nagaya tamaha-nepauve Anumaya Kotiꞌa ma yafatetila Apalahamu nafaꞌneyaga afaꞌa talo hileꞌasine. 10Tamakaya yosa kana hutama mainayanagi menia Anumaya Kotiꞌa tuna alino yosamo aipale maleneno kanale alagama oꞌayenesia yosa atagino atafi hagaꞌyu huno kaegahie.” huno hie. 11Tamakuꞌa ai-yahae hutama kefo yatamia atalegeꞌna nagaya titeti fale-nelama-toanagino nakavela nago kanoma esiana Alu Aotage Avamutetiꞌene ataletiꞌene fale-lama-tegahie. Ani kanomoꞌa tusiꞌa tokiyaꞌa hanea kanogino nagaila ago nagase-maineanagiꞌna nagaya afa kano mainoanagiꞌna agai aiyale ayesuana onategahie. 12Agaya sipeti ayopaꞌa ali-lineno vitimo anoꞌyaꞌa fuhu hale-taleno alagaꞌa alino nopi halaꞌya hu-malegahigi anoꞌyaꞌa ata tegelege nehia atafi kae-talegahie. Ani avinamoꞌma hu-mainea kava huno veala fako faka hugahie huno hu-maine.
Yoniꞌa Yisasina ti fale-tene.
13Ani kanafina Yisasiꞌa “Yoni ayapiti tina fale-natesie.” huno Kalili kotegatila ataleno Yotani titega umaine. 14Yoniꞌa Yisasifena “Tina fale-oka-tegahue. Nagaila kagaya tina fale-na-tanageno kanale hileꞌasine naꞌa higeka nagaifena ‘Tina fale-nato.’ huka nehane?” huno hie. 15Higeno Yisasiꞌa Yonifena mage huno hie “Menia aniꞌa hisanana kanalele. Tima fale-na-tesanana mukiꞌa Anumaya Kotina fatago kavaꞌa alitaꞌa lama hugahuꞌe.” huno higeno Yoniꞌa Yisasi ke akave maleno tina fale-tene.
16Tina fale-neꞌategeno Yisasiꞌa aupaꞌa tipiti aivati huno ageana ikamoꞌa ai-hagalo higeno Alu Aotage Avamuꞌmoꞌa nama kana huno agaitega elavi-maine. 17Ageho enelavigeno ikapinagati age aino mage huno hie “Ma kanoa nagaiꞌni nafaꞌnehena agaifena aluya huno nahau nayamopafina nenagea neꞌnimofena agaifena aluya huꞌna musemaꞌa nehue.” huno hu-maine.
دیاریکراوەکانی ئێستا:
Matiu 3: kmu
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2002, Wycliffe Bible Translators, Inc. All rights reserved.