San Mateo 3
3
Lapúrichijan Juan le abásteragüdajabei lídan fulásu mageírawati
(Mr 1.1-8; Lc 3.1-9, 15-17; Jn 1.19-28)
1Lídoun dan ligía, ába liábin Juan le abásteragüdajabei apúrichija lídan fulásu mageírawati, Judéa, 2ába laríñagun lídan lapúrichijan.
—Sáansi jumeí joúserun, ladǘga yaráfaali larúeijan Búngiu.
3Juan le, ligía le uágubei meja labǘrüja proféta Isaías ítara.
Agaambúati lumálali ában gürígia agúaraja lídan fulásu mageírawati ítara.
“Aráanse jumoún janígi lubá liábin Wabúreme,
queísi ladárarúniwa ǘma surúti.”
4Lanáangun Juan, láutu lúra caméyu, liábin lagǘrüga liránaagua, guéru, chigángaru leígubaña lúma síruudu le áraabuna. 5Ábaja jayábin ubúrugugiñe Jerusalén, lúma Judéagiñe, lúma lubádugiñe dúna Jordán agáambei lapúrichijan, 6dántija le jagúfeseruni jafígoun, ába labásteragüdüniña lídan dúna le gíribei Jordán.
7Dan le laríjin Juan luágu sarágu jáña lan gürígia lídaangiñetiña jadámurin fariséogu jáma saduséogu ñǘbintiña lun jabásterun, ába laríñagun joun.
—¡Jarásan jéwe jugúya le! ¿Ca awísarubadün lun janúrajan lueí lanárime afáyeiragülei luágu figoú le lúnbei liábin? 8Oúsera jumá buídu, arijúa lámuga furáangu luágu sáansigua lan ligáburi joúserun. 9Mapántajan jugúyame, aríñaga jídaangua. “Linébaanfaangu Abrahám wagía”, ladǘga naríñajare jun luágu gayára lan ladǘgün Búngiu linébaanfaangu Abrahám lídaangiñe dǘbü le. 10Madíseeli lagúnfulirun le laríñagubei Búngiu, luágu yaráfaali lan lidáani abeichúni luágu figoú, aráanseeru jaráwa lun lánchuajoún wéwe, áni sun wéwe le mabuídunti lin, chaǘnwati, ába lagudún. 11Áu, láu dúna nabásteragüdaün, arúfudei luágu sáansi jumáali lan ligáburi joúserun, ánjeinti le lúnbei liábin nárigi, labásteragüdübadün láu Sífiri Sándu, áni lafáyeiragüdübadün luágu figoú queísi láu wátu geméti. Gabáfuti nueí darí lun madǘna nan ni lun narágachunun ligeídin. 12Nújeinjaru lichóbulin lújaburugu, larúmadagüdübei türígu, ábame lanúadiruni lídaangiñe sagádi mábeijali. Ábame lareíduni türígu, ábame láguduni sagádi le mábeijali lídan wátu geméti le méñeguchadibei.
Labásterun Jesúsu
(Mr 1.9-11; Lc 3.21-22)
13Dan le liábin Jesúsu Galiléagiñe, ába lachǘlürün luágun dúna le gíribei Jordán le ñí lubei Juan lun labásteragüdüni. 14Májati yebéti Juan labásteragüdüni, ába laríñagun lun Jesúsu.
—Nugúya lúnbei babásteragüdünina, ¿amǘrü lubeí ñǘbin nun lun nabásteragüdünibu?
15Ába laríñagun Jesúsu lun.
—Ítara lúba guetó, ladǘga lúnti wadǘgüni le lubeíbei Búngiu.
Ába labásteragüdüni Juan Jesúsu, 16lárigiñe labásterun Jesúsu, ába láfuridun dúnarugugiñe. Sódini ába lánjunrenchagun siélu, ába laríjini Jesúsu Sífiri Sándu larárirun camá ában únjun liábin luágun. 17Ába lagaambún ába umálali siélugiñe le aríñagubei.
—Niraǘ le jínsiñebei nun le, le áubei oúnwenbun lan nugúndan.
دیاریکراوەکانی ئێستا:
San Mateo 3: cab
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2012, Wycliffe Bible Translators, Inc. All rights reserved.