San Mateo 6
6
Attho Jesúspaꞌ yexhatosanet amach pommoꞌcheñotheꞌna es kowen orrtatatsteto
1Jesúsñapaꞌ ateth oterraneterr:
—Eꞌñech señota, amachña eꞌñe sommoꞌcheñotheꞌnaña es sorrtatyeno kowen Yomporekop atthoch acheñeneshaꞌpaꞌ oꞌch entenset sapaꞌ atarroꞌ kowen acheñreseñ. Tharroꞌmar ñerraꞌm ñeñthekpaꞌna es sorrtatyen kowen, Yomporña ñeñth poeꞌntañoꞌtsenpaꞌ amach es apoerrsoña sa ñeñthchaꞌ atarr sokshaterreꞌ. 2Ñerraꞌm esempo es sapoeñ wokchañneshaꞌpaꞌ eꞌñechña aꞌnawa sapoenanet. Sommoꞌcheñothpaꞌ amach sotatsto entasepaꞌ allowen acheñeneshaꞌ atthoch eꞌñe kowen entasetañ. Tharroꞌmar ñeñthpaꞌ ommoñatheneshaꞌ ateth petsa. Ñeñth ommoñatheneshaꞌpaꞌ ñerraꞌm esempo es apoeñet wokchañneshaxhnopaꞌ oꞌch orrtachet alloꞌtsaꞌyen allowen acheñeneshaꞌ all poerawoꞌmar amaꞌt ñamha thoñoꞌmar; atthochña allowen acheñeneshaꞌpaꞌ eꞌñech kowen entenanetañ. Tharraña napaꞌ oꞌch notas, ñeñth ateth petsapaꞌ Yomporñapaꞌ amach es apoerraneto ñeñthchaꞌ atarr koshaterrawet. Tharroꞌmar ñetpaꞌ aña eꞌnenet acheñeneshach kowentatenawet. Ñetpaꞌ eꞌñech alla atsaꞌtarethterret. 3Tharraña sapaꞌ ñerraꞌm esempo es sapoeñ wokchañneshaxhno amach eseshaꞌ sotaphsaꞌtatsto amaꞌt ñeñth eꞌñe parro seyemtannena. 4Eꞌñechña aꞌnawa es kowen sephaꞌyen, allochñapaꞌ Sompor ñeñthña enteneꞌ allowen ñeñth aꞌnawa es sephaꞌyen, ñachña sapoerreꞌ ñeñthchaꞌ ello atarr sokshaterreꞌ.
Attho Jesúspaꞌ yexhatosanet eꞌñech kowen maꞌyochet
(Lc. 11.2-4)
5Jesúsñapaꞌ ateth oterraneterr:
—Ñamha ñerraꞌm esempo semaꞌyochena sapaꞌ amach ateth sephatsto ateth pena ommoñatheneshaꞌ. Ñetpaꞌ añekpaña maꞌyochenet atthoch acheñeneshaꞌpaꞌ eꞌñech kowen entenanetañ. Ñeñthoꞌmarña allempo maꞌyochenetpaꞌ arrach thomyesoset all shontena acheñeneshaꞌ poerawoꞌmar amapaꞌ all etsapeꞌtyena thoñ allekma waxhena shonteꞌ acheñeneshaꞌ atthochña allowen acheñeneshaꞌpaꞌ eꞌñech kowen entenanetañ. Tharraña napaꞌ poꞌñoxhpaꞌ oꞌch notas: Ñeñth ateth ommoꞌchetsa Yomporñapaꞌ amach apoerraneto ñeñthchaꞌ koshaterrawet tharroꞌmar ñetpaꞌ aña eꞌnenet acheñeneshach kowentatenawet. Ñetpaꞌ eꞌñech alla atsaꞌtarethterret. 6Sañapaꞌ ñerraꞌm esempo semaꞌyochenapaꞌ oꞌch sebeꞌthosyes soꞌponro xhochña seyottamphsa atthochña sapaꞌ amach sommoꞌcheñotha semaꞌyocheñoña Sompor, ñeñthpaꞌ eꞌñech ñapoeth alloꞌtsenes epas. Allochñapaꞌ Sompor ñeñth eꞌñe ñaptha senteneꞌ ñachña sapoerreꞌ ñeñthchaꞌ ello atarr sokshaterreꞌ.
7‘Sa ñerraꞌm xho semaꞌyochenapaꞌ amach attha nanak señosatsto atarr aton eꞌñe orrena ñeñth ateth pena poꞌpoñ acheñeneshaꞌ ñeñth ama ameꞌñenayo ñeñth ya Yeyomporer. Ñetpaꞌ atarr thematen maꞌyochenetañpaꞌ tharraña ñeñthach alla oterreteꞌth. Xhatheꞌ otenapoetañ ñerraꞌm atarr thematen eñosetpaꞌ eꞌñetheꞌ kowen entenanet Yompor atthoch eꞌñe kowen eꞌmhñotenanet. 8Sañapaꞌ amach ateth sephatsto ateth penet ñet tharroꞌmar sapaꞌ amaꞌt ama es senamoenaꞌ semaꞌyocheñoth, Somporña eꞌñe eñotwennas ñeñth sepalltaꞌyena. 9Sañapaꞌ atethchaꞌña kowen semaꞌyochaña sa:
Yompore Partso ñeñtheph peꞌntañoꞌtsen, yentapepaꞌch pha atarr Partsoph.
10Xhapoepaꞌch Nompore allempoch atarr phaꞌyochreshathterra arr patsro. Yetsotonapepaꞌch arr patsro ñeñth ateth pemnen pha Nompore ñeñth ateth penet ñamha all peꞌntaño.
11Xhokmoepaꞌch Nompore phapoeney ñamha yokrramh ñeñth allpon yepalltaꞌyena patheꞌtets yeth.
12Pephretnaꞌwonayepaꞌch Nompore allowen yoꞌchñar ñeñth ama pokteyeꞌ pentapretenye attho Nompore yapaꞌxhoꞌña yephretnannena ñerraꞌm esempo erroth yephannena.
13Ñamha amach Nompore pemnatatsche sosyaꞌtsañ oꞌch atarr topateney. Añchaꞌña xhoch Nompore phaꞌypoꞌñataterrey allowen sosyaꞌtsañexhno. Tharroꞌmar eꞌñe pha Nompore ayochreshathtetsa ñeñtheph atarr Partseshatets, eꞌñe phaptha ñeñtheph Nompore ayeꞌchoxhtatarethtetsa eꞌñe errponañowen. Ñeñthach nenamaph; ñeñthpaꞌ atthepaꞌch Nompore.
14‘Ñerraꞌm sa xhokma sephretnannena attho erroth sephannenapaꞌ sapaꞌxhoꞌña xhokmach peretnerresña Sompor ñeñth poeꞌntañoꞌtsen. 15Tharraña ñerraꞌm ama xho sephretnannenopaꞌ Somporpaꞌxhoꞌña amach peretnerrnasoña samha soꞌchñar.
Attho Jesúspaꞌ yexhatosanet ñeñth eꞌñech poꞌñoxh thoreꞌteñets Yomporekop
16Jesúsñapaꞌ ateth oterraneterr:
—Ñamha ñerraꞌm esempo semneñ semaꞌyocheñoth Yompor oꞌch sekexhpaꞌ serrar ñeñthpaꞌ eꞌñe pokteꞌ. Tharraña ñeñthpaꞌ ama añekpayaye atthoch entas acheñeneshaꞌ ñerraꞌm xha sellkaꞌwena. Tharroꞌmar ñeñthpaꞌ ommoñatheneshaꞌña ateth petsa. Ñetpaꞌ ñerraꞌm esempo kexhpoenet poerrar Yomporekop ñetpaꞌ atthach atsoklloyayenet allochñapaꞌ atthoch eñotenanet acheñeneshaꞌ ñetpaꞌ Yomporekpoꞌ ateth penet. Tharraña na poꞌñoxhpaꞌ oꞌch notas: Ñeñth ateth ommoꞌchetsa poethoreꞌteñoth Yomporñapaꞌ amach es apoerraneto ñeñthchaꞌ atarr koshaterrawet. Tharroꞌmar ñetpaꞌ aña eꞌnenet acheñeneshach kowentatenawet. Ñetpaꞌ eꞌñech alla atsaꞌtarethterret. 17Tharraña sa ñerraꞌm esempo eꞌñe semaꞌyocheñoth Yompor oꞌch sekexhpaꞌ serrar sapaꞌ attherachña sorrtena eꞌñech kowen satsamhoꞌtyena ñamha seꞌpaklleꞌchyena. 18Allochña acheñeneshaꞌpaꞌ amach xha eñotaseto sapaꞌ xho sekexhpoen serrar maꞌyochaya Yompor. Sapaꞌ eꞌñech ñaptha Sompor senteneꞌ ñeñth poeꞌntañoꞌtsen. Allochñapaꞌ Sompor ñeñth eꞌñe ñaptha senteneꞌ ñachña sapoerreꞌ ñeñthchaꞌ ello atarr sokshaterreꞌ.
Attho ñeñthchaꞌ seshonterr ñeñth atarr sherbets arrkaꞌye seshonteñ all Yompor poeꞌntaño
(Lc. 12.33-34)
19Jesúspaꞌ alla oterrerr:
—Ñamha amach seshontaꞌyesatsto chekmañats añe patsro ñeñthchaꞌ atarr semorrentena. Ñeñthpaꞌ atarr apomhpereꞌchña atarr aptsaña. Amaꞌt eñethpaꞌ oꞌch beꞌthosamphsonasapaꞌ oꞌch yoratsreꞌtampeswas. 20Yompor poeꞌntañochña seshontaꞌyesña ñeñth eꞌñe poꞌñoxh sherbets. Ñeñthpaꞌ ama apomhpereꞌchño ñamha ama aptsaño. Allpaꞌ amaꞌt eñethapaꞌ ama beꞌtheno atthoch yoratsreꞌtampeswas. 21Tharroꞌmar ñerraꞌm all Yompor poeꞌntaño seshontaꞌnen ñeñth atarr kowen senten, yeñoteñ eꞌñe ñeñtha patherr senen seyoxhro ñeñthña atarr sherbets Yomporekop. Tharraña arr patsro ñerraꞌm aña seshontaꞌnen ñeñth atarr semorrentena, yeñoteñ eꞌñe ñeñtha patherr senen seyoxhro ñeñthñapaꞌ ama es sherbenoña Yomporekop.
Attho yeklleꞌpaꞌ añ tomaꞌntena ñeñth poꞌlampareñ pen allowen yechets
(Lc. 11.34-36)
22-23Jesúsñapaꞌ alla oterraneterr:
—Yeklleꞌpaꞌ añ tomaꞌntena ateth ñerraꞌm ñeñth poꞌlampareñ pen ora yechets. Ñerraꞌm eꞌñe kowen womech yeklleꞌpaꞌ eꞌñech kowen entateney poetareꞌ. Allochñapaꞌ atthoch eꞌñe kowen thorratyenana allemeñ yechets tharroꞌmar eꞌñe kowen aꞌpoetarsamphsarethtenet. Tharraña yeklleꞌña ñerraꞌm ama eꞌñe kowen womhcheyayepaꞌ amach eꞌñe kowenayeꞌ entatenye poetareꞌ atthochña amach eshkayeꞌ thorratyenano allemeñ yechets tharroꞌmar xha ottena ñerraꞌmrratheꞌ chekmetoꞌtsaꞌyeneta. Atthekma pena ñamha yeyoxher. Ñerraꞌm eꞌñe kowen yokthapeꞌchyen yeyoxhro, ama aña es yeꞌnyeno ñeñth eꞌñe yokpa, atthoña xhennayaña eꞌñe ora allowen Yompor pokthaphña ñeñth poꞌkowenña pen. Atthoña ora yokthaphñapaꞌ eꞌñech aꞌpoetarsamphsarethtena Yomporeshoth. Tharraña ñerraꞌm ama kowenayeꞌ yokthapeꞌcheno yeyoxhro, ñerraꞌm aña yeꞌnyen ñeñth eꞌñe yokpa ñeñthpaꞌ amach errothenoth aꞌpoetarsampenyeña ñeñth yokthaphña yepen. Ñeñthña yokthaphña yepenpaꞌ atarrchaꞌ aꞌchekmetampennay yeyoxher.
Amach aña yemaꞌyoxhratsto ñeñth eꞌñe yokpa atthoch yegana aton kelle; ñeñth atethpaꞌ amach errothenoth yemaꞌyoxhroña ñamha Yomporekop
(Lc. 16.13)
24‘Ñeñthpaꞌ atethchaꞌ yetmaꞌntacha: Amaꞌt poesheñarrotheyapaꞌ amach errothenoth eꞌñe kowen yetarwasoña epsheñoꞌmar yamoꞌmtayekop. Tharroꞌmar ñerraꞌm ateth yephapaꞌ poesheñarr eꞌñech kowen yemorrenteñoth yoksheñeshokmañen yesherbeñ, poꞌpsheñeññapaꞌ amach eꞌñeyeꞌ yemorrenteño; xhach yottena ñerraꞌm xha yetsenaꞌteñ. Ñeñthoꞌmarña ñeñthpaꞌ amach kowenayeꞌ yesherbeñe. Ñerraꞌm aña eꞌñe semaꞌyoxhrena ñeñth eꞌñe sokpa atthoch segana aton kelle, ñeñth atethpaꞌ amach errothenoth semaꞌyoxhroña ñamha ñeñthekop atarr sherbets Yomporekop.
Attho Yomporpaꞌ ñach eꞌñe kowen kowampeneꞌ ñeñth poechemereshaꞌ pen
(Lc. 12.22-31)
25‘Ñeñthoꞌmarña theꞌpaꞌ oꞌch noterrserr: Amach aña sellkatsto ñeñth attho yokrrena arr patsro. Amaꞌt seyoxhrapaꞌ amach sotatsto, eswachkaꞌ yerrerrerrtheꞌ tsapathoneth, eswachkaꞌ yorrtheꞌ. Ñamha amach aña sellkatsto ñeñth eꞌñe sechtsokpa. Amach sotatsto, eswachkaꞌ yechorratheꞌ. Tharroꞌmar Yompor ña yapoeneꞌ yoꞌrrerrña allo yokrrena ñeñthña atarr nanak sherbets. Ñeñthoꞌmar yeñoteñ ña yapoeneꞌ ñamha yerrar ñeñthña ñokoppaꞌ ama esoyeꞌ enteñe. Ñamha ña yexhkateneꞌ yeꞌchets ñeñth atarr sherbets. Ñeñthoꞌmar yeñoteñ ña yapoeneꞌ ñamha amaꞌt ñeñth yechorraꞌyena ñeñthña ñokop ama esoyeꞌ enteñe. 26Senteñtheꞌ attho korrena othneshaxhno ñeñth anomxhaꞌtyetsa entoneth. Ñetpaꞌ ama xhoyeꞌ nareꞌtatseꞌteneto ñamha ama xhoyeꞌ apxhaꞌyeneto poerrar ñeñthchaꞌ rraꞌyenet. Ñetpaꞌ ama es echenaye allchaꞌ es aññoꞌtyenet. Amaꞌt attho korrenet Somporña ñeñth poeꞌntañoꞌtsenpaꞌ eꞌñe yexhkatyeswanet ñeñthchaꞌ poerrar phaꞌyenet. Elloña sa Yomporpaꞌ atarr morrentensa sa; ello semhtaneñ ñeñth attho atarr morrentenana othneshaxhno. 27Ñamha amach sellkatsto atthoch amach serromo tharroꞌmar amaꞌt sellkënañ atthoch atarr atomat sokrra arr patsro, tharraña amaꞌt eꞌñe poesheñarrothesapaꞌ amatheꞌ errothenoth soꞌchtatoña sokrreña amaꞌt eꞌñe pamtharra.
28‘Esoꞌmareꞌtchaꞌña sellkaꞌyesaña atthoch sepashta. Senteñtheꞌ ateth yexhkëna rorexhno ñeñth chopyets ñota allemeñ. Ñetpaꞌ ama xhoyeꞌ tarwasaꞌyeneto amaꞌt mamesha ama xhoyeꞌ taneneto ñeñth chorraꞌyenet attho eꞌñe kowen orretyenet. 29Tharraña napaꞌ oꞌch notas: Amaꞌt amhchaꞌtareth Salomón attho eꞌñe aꞌkowentateꞌth awath, amaꞌt ñapaꞌ ama chorraneꞌtheña ñeñth atarr kowen ñeñth ateth atarr kowentena ror. 30Ñamha ñeñth ror poeꞌchorpaꞌ ñeñthara taꞌteꞌ ñeñth chopyets allemeñ ñeñth sentyen theꞌ tharraña ñeñthpaꞌ mamekpa. Amaꞌt kowen chopyeneñ theꞌpaꞌ tsapathonethñapaꞌ oꞌch ethomamperetpaꞌ eꞌñech kollaꞌwerrapaꞌ oꞌwañchaꞌ kowenta. Ñewa, Yompor attho kowentatyenan amaꞌt ñeñth eꞌñe mamekpa, elloña sapaꞌ atarr chorratyensañ samha; sañapaꞌ esoꞌmartheꞌña amaña eꞌñeyeꞌ seyemteño. 31Ñeñthoꞌmarña notenes: Amach atarr sellkaꞌyesatsto. Amach sotatsto: “Eswachkaꞌye yerraꞌtheꞌ. Eswachkaꞌye yorrtheꞌ.” Amach sotatsto: “Eswachkaꞌye yechorratheꞌ.” 32Tharroꞌmar allowen acheñeneshaꞌ arr patsro ñeñth ama ameꞌñaꞌyetso, ñetpaꞌ ñeñthaña eꞌñe patherr eꞌnenet. Ñewa, Somporña ñeñth poeꞌntañoꞌtsen ñapaꞌ eꞌñe entwenes ñeñth allpon paꞌnamen sepalltaꞌyena arr patsro. 33Sapaꞌ añchaꞌña eꞌñe ñanom semaꞌyoxhrena Yomporekop atthoch atarr ayochreshathtena ña. Ñamha añchaꞌña semaꞌyoxhrena ñeñth eꞌñe pokteꞌ enten ña, allochñapaꞌ ñachña sapaꞌyeneꞌ ñeñth allpon sepalltaꞌyena samha. 34Amach eꞌñe thayekma sellkaꞌyesatsto ñeñthchaꞌ setantyesoya tsapathoneth. Tharroꞌmar amaꞌt eꞌñe thayotheñpaꞌ xhokma eñall ñeñth allkatañetyetsa amaꞌt eꞌñe patheꞌtets yeth.
دیاریکراوەکانی ئێستا:
San Mateo 6: ame
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2014, Wycliffe Bible Translators, Inc. All rights reserved.