San Mateo 13
13
All tomaꞌntatanet Jesús ñeñth aꞌparreꞌteneꞌ poerets
(Mr. 4.1-9; Lc. 8.4-8)
1Ñeñthe yethropaꞌ xhaꞌnerrerr Jesús pokollothpaꞌ anorrwerr saꞌpatophño. 2Allñapaꞌ emchorraꞌwererr shonteꞌ acheñeneshaꞌ ñeñthoꞌmarña Jesúspaꞌ aꞌtap noñthopaꞌ awampes mameꞌ allpononeth allñapaꞌ anorros noñtho. Acheñeneshaꞌña allowenetpaꞌ alla thomxhaꞌtet saꞌpatophño. 3Allñapaꞌ esokmañen yexhatyenan acheñeneshaꞌ paꞌnamen tomaꞌnteñtsoxhno. Ñeñth ñanompaꞌ ateth otanet:
—Ñeñthña aꞌparreneꞌ poerets ñañapaꞌ awoꞌ allchaꞌ aꞌparreꞌtyenanaꞌ poepoer. 4All aꞌparreꞌtyeñ patantaꞌtetsñapaꞌ alla xhapyes thoñoꞌmar. Allñapaꞌ waxhaꞌtyesa oth eꞌñe añyallmechwenanaꞌ poerets. 5Poꞌpoñexhnoñapaꞌ alla xhapyes mapoetroꞌmesoꞌmar all ama tama eñalle pats. Ama nanak oꞌponoꞌtseno patso ñeñthoꞌmarña mamethollapaꞌ chepareswañ. 6Oꞌña enomeꞌtaꞌmoen atsrrethpaꞌ alla aꞌwyatwer. Ama erxhaꞌtenaꞌ ñeñthoꞌmarña alla weyaꞌwerra. 7Poꞌpotantañña poeretspaꞌ alla xhapyes allchaꞌ chepares aj. Allpaꞌxhoꞌ mameshapaꞌ chepareswañpaꞌ ajñapaꞌ mameshapaꞌ ateshaꞌtwa alla kaꞌmatwerranña narmets alla aꞌkllatwer. 8Poꞌpotantañexhno ñeñthñapaꞌ arr xhapyes all eꞌñe kowen patso. Ñeñthñapaꞌ eꞌñe kowen chepares. Allempoña ateshaꞌtwapaꞌ ñeñthñapaꞌ atarr aton ellomhreꞌtyes —poechaꞌtetspaꞌ xharroch xharraꞌ poeꞌllomer, poꞌpchañexhnopaꞌ pechapoch xharraꞌ poeꞌllomer, poꞌpchañexhnopaꞌ maꞌpoch xharraꞌ poeꞌllomer.
9Allempoña Jesúspaꞌ alla oterraneterr:
—Ñeñthes poꞌñoxh neꞌmhñoteneꞌ, xhaponasepaꞌch seyoxhro ñeñth ateth netmaꞌntatensa añ ñoñets.
Ateth otanet Jesús ñeñthekop ateth tomaꞌntatyenanet
(Mr. 4.10-12; Lc. 8.9-10)
10Allempoñapaꞌ ponemhya poeyochreshaꞌpaꞌ ateth otoset:
—¿Esoꞌmareꞌtña peserrpareꞌteñothpaꞌ attha es petmaꞌntatyenanet?
11Jesúsñapaꞌ ateth oterraneterr:
—Sa theꞌpaꞌ Yomporña oꞌ moenaterres atthoch señoterr ñeñth ama eñotpawoyaye amaꞌt awathotheñ ñeñth ateth penaña Yompor poꞌkowenña attho ayochreshathtena ña poeꞌntañoth. Tharraña poꞌpotantañexhnoñapaꞌ ñeñth attha es poexhaꞌyetsa, ñokpoetñapaꞌ amach errothenoth eñoterrñañeto Yompor poꞌkowenña. 12Eseshaꞌtheꞌ oꞌ xherranet poeyoxhreto amaꞌt eꞌñe allpona Yompor poꞌñoñ elloña Yomporpaꞌ alloꞌnach eñotatnenanet nanak shonteꞌ. Tharraña eseshaꞌña ñerraꞌm ama xhenaneto poeyoxhro tharroꞌmar ñetpaꞌ ama poꞌñoxhayeꞌ agëññañeto Yompor poꞌñoñ, amaꞌt allpon eñotyenetañ poeyoxhro ñeñthñapaꞌ xhach poerratamperranet Yompor. 13Ñeñthoꞌmarña amaꞌt neserrpareꞌtatenanet tomaꞌnteñtso, ñokpoetñapaꞌ ama eñoteñetoña ñeñth ateth netmaꞌntatenanet. Atthoña amaꞌt enteñetañ, ñetñapaꞌ ama amnatarethteneto oꞌch es xhapawet poeyoxhreto. Amaꞌt eꞌmoeñetañ amaña xhenanetoña poeyoxhreto ñeñth ateth yexhateney Yompor poꞌkowenña. 14Ateth penet ñetpaꞌ theꞌñapaꞌ poꞌñoxh oꞌ etsotwa Isaías poꞌñoñ ñeñth aꞌmhtayeꞌth Yompor poꞌñoñ awath. Ñeñthpaꞌ ateth oteꞌth Yompor:
Amaꞌtchaꞌ poꞌñoxh eꞌmoeñetañ amaꞌt eꞌñe awathapaꞌ amach xhapanetoña poeyoxhreto. Ñamha amaꞌtchaꞌ xho eꞌñe es entenetañpaꞌ amach xhapanetoña poeyoxhreto.
15Tharroꞌmar ñeñth acheñeneshar theꞌña ñet poeyoxhretopaꞌ nanak echarrtenet atthochña amach es xhenaweto poeyoxhreto. Theꞌña ñetpaꞌ amach moeneñeto oꞌch es eꞌmhñotet thayeꞌtoꞌtheꞌ es xhenawet poeyoxhreto. Theꞌñapaꞌ amach moeneñeto oꞌch es entet thayeꞌtoꞌtheꞌ xherranet poeyoxhreto. Atthochña amach es kothapeꞌcherreto nokop amaꞌt eꞌñe mamesha atthochña naꞌkeshphaterranetañ.
16Allempoña Jesúspaꞌ alla oterranerr poeyochreshaꞌ:
—Saña poꞌñoxhpaꞌ atarr kosheñtsoꞌtsenes sa tharroꞌmar attho oꞌ senterrñañ Yompor poꞌkowenña seklloyoth theꞌñapaꞌ oꞌ eꞌñe xherrnasa seyoxhro. Ñamha attho seꞌmoerrñañ Yompor poꞌñoñ, theꞌñapaꞌ oꞌ eꞌñe xherrnasa seyoxhro. 17Poꞌñoxhkaꞌye notenes eꞌñe awathotheñpaꞌ shonteꞌ ñeñth aꞌmhtaꞌyesayeꞌth Yompor poꞌñoñ amaꞌt ñamha ñeñth eꞌñe pokteꞌ es phaꞌyestseꞌth allempo, ñetñapaꞌ atarr moenetañeꞌth oꞌch enterrñañetañ Yompor poꞌkowenña ñeñth oꞌ senter sa theꞌ. Tharraña allempo ñetpaꞌ amaña eseshayeꞌña enterrapaye Yompor poꞌkowenña. Amaꞌt atarr moenetañeꞌth oꞌch eꞌmhñoterrñañet Yompor poꞌñoñ ñeñth oꞌ seꞌmoerr sa theꞌ. Tharraña allempo ñetpaꞌ amaña eseshayeꞌña eꞌmoerrapayeña Yompor poꞌñoñ.
Arrpaꞌ all eñotatanet Jesús ñeñth tomaꞌntatenanet ñeñth aꞌparreꞌteneꞌ poerets
(Mr. 4.13-20; Lc. 8.11-15)
18Jesúsñapaꞌ alla oterranerr poeyochreshaꞌ:
—Ñeñthoꞌmarña theꞌ sapaꞌ seꞌmhñoten oꞌch neñotatas ñeñth ateth yexhateney ñeñth ateth oꞌ netmaꞌntatwa ateth ñerraꞌmrratheꞌ poesheñarr ñeñth aꞌparreneꞌ poerets. 19Ñewa, añ poerets ñeñth xhapyesets thoñoꞌmar, ñeñthpaꞌ añ notenes acheñeneshaꞌ ñeñth eꞌmhñotenayeñ Yompor poꞌñoñ ñeñth attho ayochreshathtena ña. Amaꞌt eꞌmhñotenetañ tharraña ama xhenaneto poeyoxhreto ñeñth poꞌñoxh ateth oteney Yompor. Ñeñthoꞌmar allorokmach wapa oneñethpaꞌ oꞌch alla poerratamperranet Yompor poꞌñoñ eꞌñe poeyoxhretoth. 20-21Ñamha ñeñth xhapyesets mapoetroꞌmesoꞌmar ñeñthpaꞌ añ notenes acheñeneshaꞌ ñerraꞌm esempo eꞌmhñoteññañet Yompor poꞌñoñ eꞌñech allorokma poksheñeshaꞌ agëññañetañ Yompor poꞌñoñ. Eꞌñech kowen ameꞌñeretañ tharraña ñeñthpaꞌ mamekpach ateth penet. Tharroꞌmar ñetpaꞌ eꞌñe ateth penet ñerraꞌmrratheꞌ narmets ñeñth chepoets mapyo amach eñalle poerexh. Tsapathonethña ñerraꞌm oꞌch wapanet topateñets ñeñthchaꞌ moeroxhtatawet tharroꞌmar ñetpaꞌ oꞌ ameꞌñeretañ Yompor poꞌnoñ, ñetñapaꞌ allorokmach alla kexhpoerretña Yompor poꞌñoñ. 22Ñamha poerets ñeñth xhapyesets ajmoꞌmar, ñeñthpaꞌ añ netmaꞌntatena poꞌpotantañ acheñeneshaꞌ ñeñth eꞌmhñotenayeñ Yompor poꞌñoñ. Amaꞌtchaꞌ xhapanetañ poeyoxhreto, tharraña ñetpaꞌ alloꞌnach senet eꞌñech aña atarr kothapeꞌchenet ñeñth llekaꞌyenet arr patsro ñeñth eꞌñe ñokpoeta. Añach moenenet oꞌch esokmañen es echyenet, tharraña ñeñthpaꞌ xhakaꞌye shekënanet. Atthoña ñetpaꞌ amach errothenoth orrtatyesñañetoña ñeñth eꞌñe kowen enten Yompor. Ñetpaꞌ eꞌñe attheta ñerraꞌm narmets ñeñth xha aꞌkllaten ajmaꞌ ñeñthoꞌmarña amach errothenoth meꞌteneto oꞌch ellomhreꞌtyeset. 23Ñamha añ poerets ñeñth xhapyesets eꞌñe kowen patso ñeñth eꞌñe kowen cheparsatspaꞌ ñeñthña tomaꞌntenaya poꞌpotantañ acheñeneshaꞌ ñeñth eꞌmhñoteneꞌ Yompor poꞌñoñ, ñoñetspaꞌ eꞌñech kowen xhenanet poeyoxhreto. Ñetñapaꞌ ñeñthet poꞌñoxh orrtatyenet ñeñth atarr sherbets Yomporekop. Atthoña ñetpaꞌ eꞌñe ateth penet ñerraꞌm narmets ñeñth atarr aton ellomhreꞌtyets—patheꞌtets xharroch xharraꞌ poeꞌllomer, poꞌpoñpaꞌ pechapoch xharraꞌ poeꞌllomer, poꞌpoñpaꞌ maꞌpoch xharraꞌ poeꞌllomer.
Attho Jesúspaꞌ tomaꞌntaterranet ateth pena ñeñth aꞌparreꞌteneꞌ taꞌtllomh eꞌñe all aꞌparrareth kowen trigo
24Allempoña Jesúspaꞌ alla tomaꞌntaterraneterr, ñeñthpaꞌ ateth oterraneterr:
—Yompor poꞌkowenña ñeñth attho theꞌ ayochreshathtena ña poeꞌntañoth, ñeñthpaꞌ ateth pena ñerraꞌmrratheꞌ poesheñarr yakma ñeñth aꞌparreneꞌ kowen poerets paꞌmro. 25Eꞌñe kowen aꞌparreꞌtwepaꞌ tharraña allempo manrrenet allowenet, eꞌñeꞌt aꞌnawa wapa ñeñth eꞌmoñeꞌteneꞌpaꞌ allñapaꞌ awoꞌt aꞌparreꞌtyeswenanaꞌ taꞌtllomh eꞌñe all aꞌparrareth kowen trigo. Awoꞌtña aꞌparreꞌtweñapaꞌ oꞌ awerr aꞌnawa. 26Narmetsñapaꞌ oꞌ chepareswa oꞌ meꞌtyeswapaꞌ allempoñapaꞌ entet ñamha taꞌteꞌ oꞌ chepares epoet trigo. 27Allempoñapaꞌ waxhaꞌta pamoꞌmteꞌ paꞌtarwasañer, ñetñapaꞌ ateth otoset: “¿Amaꞌt, Nomporchaꞌ kowenayeꞌ phaꞌparrenoña poerets phaꞌmro? Errothenothwañakaꞌye oꞌ chopña ñamha taꞌteꞌ all.” 28Ñañapaꞌ ateth otanet: “Eꞌñekaꞌye kowen naꞌparrañña nepoer all. Ñeñth neꞌmoñeꞌteneꞌpaꞌ ñeñththeꞌkaꞌyeña oꞌ ateth phamphsen.” Paꞌtarwasañerñapaꞌ ateth ochet: “¿Amaꞌt pemno oꞌch awey oꞌch yaꞌmareꞌtwerraꞌña taꞌteꞌ?” 29Ñañapaꞌ ateth otanet: “Amachkaꞌye saꞌmareꞌtatsche theꞌt xha saꞌmarampennan netrigor. 30Allepaꞌ chepoepaꞌ epoet. Esempoch pomellaꞌwa trigopaꞌ allempochña noch ñeñthchaꞌ aꞌyapaxheꞌ trigo: Ñanomchaꞌ añ saꞌyapaxhaꞌ taꞌteꞌ oꞌch sewankachmech atthoch yaꞌpoyatater. Sewankaꞌwepaꞌ xhoschaꞌña aꞌyapaxheꞌña ñamha trigo oꞌch saññoꞌteñaꞌ allekma neshontateñ.”
Attho Jesúspaꞌ tomaꞌntaterranet ateth pena poeꞌllomer ñeñth otenet mostazllomh
(Mr. 4.30-32; Lc. 13.18-19)
31Allempoña Jesúspaꞌ alla oterraneterr:
—Añ Yompor poꞌkowenña ñeñth attho ayochreshathtena ña poeꞌntañoth, ñanompaꞌ eꞌñech poesheñaꞌttsa ameꞌñaꞌyestsa. Allempotheññapaꞌ alloꞌnach sen atonetnomtsa ñeñthchaꞌ ameꞌñerrtsa atthochña eꞌñe epaꞌwerra errakmañen Yompor poꞌkowenña.
Ñeñthpaꞌ añ tomaꞌntaterraneterr mostazllomh:
—Ñeñthña poeꞌllomhrethollpaꞌ poesheñarrñapaꞌ oꞌ anemh paꞌmro allchaꞌ nareꞌteñaꞌ. 32Ñewa, eꞌñe yeñoteñ mostazllomh ñeñthpaꞌ atarrkaꞌye nanak añetholleshallmerr, tharraña ñerraꞌm oꞌch yenareꞌchpaꞌ allempoña choppaꞌ alloꞌnach sen rrorranmats kowen, atarrchetnomoets, elloch metanaꞌtwan poꞌpchañ narmetsoxhno. Ñeñthña narmetsocherpaꞌ oꞌch waxhaꞌtoña othexhno ñeñthchaꞌ amaꞌtanatyesosets poetakroꞌmar.
Attho Jesúspaꞌ tomaꞌntaterranet ñeñth ateth pena chaseꞌ
(Lc. 13.20-21)
33Jesúspaꞌ alla serrpareꞌtaterraneterr elloneth ñeñth ateth pena Yompor poꞌkowenña ñeñth attho atarr ayochreshathtena ña poeꞌntañoth. Ñeñthpaꞌ amaꞌtchaꞌ añetholla ñeñthchaꞌ ñanom orrtatsa tharraña eꞌñe ña poꞌwamenkoth mamethollapaꞌ oꞌch eꞌñe epaꞌwa ora errapharen. Ñeñthpaꞌ añ tomaꞌntaterraneterr ateth pena chaseꞌ:
—Ñeñth chaseꞌpaꞌ allo tsetenan koyaneshaꞌ harinaꞌ ñeñth oñetsetstaten atthoch aꞌchasatan harinaꞌ eshekchaꞌ eꞌñe aꞌmoesatwe. Ñeñthña chaseꞌpaꞌ amaꞌtchaꞌ añetholla net, amaꞌtchaꞌ aton harinaꞌ ñeñth maꞌpa arroga, mamethollapaꞌ oꞌch eꞌñe aꞌmoesatwanña amaꞌt atarr aton harinaꞌ.
Jesúspaꞌ ora allpon ñeñth ateth yexhatyenan acheñeneshaꞌ ñeñthpaꞌ atthoña paꞌnamenoth es tomaꞌntatyenanet
(Mr. 4.33-34)
34Ora allpon ñeñth ateth yexhatenan Jesús acheñeneshaꞌ, ñeñthpaꞌ attho es tomaꞌntatyenanet. Allempopaꞌ ama serrpareꞌtataneto eꞌñe attha, xhokmaña serrpareꞌtatenanet tomaꞌnteñtso. 35Atthoña oꞌ etsoterra ñeñth ateth oteꞌth ñeñth aꞌmhtayeꞌth Yompor poꞌñoñ awath ñeñth atethchaꞌ yexhaterr Cristo:
Napaꞌ neñerrchaꞌ eꞌñe tomaꞌnteñtso; naꞌpotherrchaꞌ ñeñth ama aꞌpotharetheyaye amaꞌt awathotheñ allempotheñ Yompor yexhkatan añ patser.
Attho Jesúspaꞌ eñotaterranet ñeñth atmaꞌntatarethtetsa taꞌtllomh epoet trigo
36Allothña Jesúspaꞌ saꞌnman acheñeneshaꞌpaꞌ oꞌ xherr pokollo. Allña waxhaꞌtoña poeyochreshaꞌpaꞌ ateth otoset:
—Theꞌpaꞌ oꞌch photey eꞌñe eñotoxhen ñeñth tomaꞌntena taꞌteꞌ ñeñth chepoets phaꞌmro.
37Ñañapaꞌ ateth otanet:
—Ñeñth nareꞌteneꞌ eꞌñe kowen poeretspaꞌ ñeñthpaꞌ nakaꞌye Ñeñthen Acheñetosets. 38Ñeñth naꞌmoer nepenpaꞌ ñeñthkaꞌyeña añe patser. Ñeñth kowen poeretspaꞌ ñeñthkaꞌyeña Yompor poeyochreshaꞌ ñeñthchaꞌña xherrets all amhchaꞌtarethtena Yompor. Ñeñth taꞌteꞌpaꞌ ñeñthkaꞌyeña oneñeth poeyochreshaꞌ. 39Ñeñth eꞌmoñeꞌteneꞌ ñeñth nareꞌtamphseꞌ taꞌteꞌ ñeñthkaꞌyeña oneñeth pompor. Esempoch xherr allempoch pomellaꞌwapaꞌ ñeñthpaꞌ añ tomaꞌntena allempochña mellapoterra. Ñeñthchaꞌña aꞌyapaxherretspaꞌ ñeñthkaꞌyeña mellañoteñnaneshaꞌ ñeñthchaꞌ waxhaꞌttsa entoth. 40Ateth apxhenet taꞌteꞌ theꞌ oꞌch aꞌpoyatachet tsopaꞌ atethchaꞌ perrñañetña oneñeth poeyochreshaxhno allempoch mellapoterra. 41Ñewa, na Ñeñthen Acheñetosetspaꞌ nach moeñerreꞌ nemhllañotheñnaneshar ñeñthchaꞌ aꞌyapaxhaꞌtwerreꞌ allowen ñeñth kothapeꞌchatyenawet sosey ñamha allowen ñeñth eꞌñe aña etsotayen pathpareñ. Arrothchaꞌ aꞌyapaxharethterra alloꞌtsaꞌyen ñamha Yompor poeyochreshaxhno, amaꞌt eꞌñe all ayochreshathtena ña. 42Oꞌch eꞌñe aꞌyapaxharethetwerretpaꞌ allempochña asaprrotarethtet oꞌpono all worten tsoꞌ. Allñapaꞌ allchaꞌ yawanrrorterret, panmoeñothet atserrpaꞌ rrasoꞌtyerretchaꞌ paꞌs. 43Allempoña allowen ñeñth eꞌñe pokteꞌ es phaꞌyets ñetñapaꞌ poptetsetach eꞌñech atthet ñerraꞌm atsrreth. Eꞌñech kowen popoetyenet all amhchaꞌtarethtena ñeñth pompor penet. Allowenes ñeñthes neꞌmhñoteneꞌ neñoñ xhaponasepaꞌchña seyoxhro ñeñth ateth notenes.
Attho Jesúspaꞌ tomaꞌntaterraneterr shonteꞌ kelle ñeñth eꞌpotarethtetsa patso
44Poꞌpocheño Jesúspaꞌ alla tomaꞌntaterranet poꞌpoñoneth. Ñeñthpaꞌ añ tomaꞌntatanet Yompor poꞌkowenña attho atarr ayochreshathtena ña, ñeñthñapaꞌ atarr ayeꞌchoxhen. Ñeñthpaꞌ ateth tomaꞌntatanet ñerraꞌmrratheꞌ shonteꞌ kelle ñeñth eꞌpotarethtetsa eꞌñe patso. Ñeñthña kelle poesheñarr yakmapaꞌ machayothach entos. Oꞌña entwepaꞌ oꞌ alla pampaꞌner ñañapaꞌ oꞌ awerr eꞌñe poksheñeshaꞌ allentha pomwawerran ora ñeñth allpon echyen allochñapaꞌ atthoch echan kelle alloch rañtherrana ñeñth patser alloꞌtsen kelle. Atthochña ganamperrana atarr shonteꞌ kelle ñeñth atarr yeꞌchena.
Attho Jesúspaꞌ tomaꞌntaterraneterr ñeñth atarr koxhneshaꞌ serets
45Poꞌpocheñopaꞌ ateth tomaꞌntaterraneterr:
—Yompor poꞌkowenña attho atarr ayochreshathtena ña ñeñthpaꞌ atarr ayeꞌchoxhen ateth ñerraꞌmrratheꞌ ñeñth atarr koxhneshaꞌ serets. Poesheñarrña ñeñth pomatsreꞌtyetsa ñeñthach atarr eꞌnyen ñeñthchaꞌ rañtha. 46Pamtharrñapaꞌ entosan serets ñeñth atarr nanak koxhneshaꞌ ñeñthñapaꞌ atarr tsaꞌteꞌ. Ñañapaꞌ allenthach awerr oꞌch pomwawerran ora ñeñth allpon echyen allochñapaꞌ atthoch echan kelle alloch rañtherrana serets ñeñth atarr nanak koxhneshaꞌ.
Attho Yompor poꞌkowenña eꞌñe ateth pena ñerraꞌmrratheꞌ añekmoen terraya
47Jesúspaꞌ alla tomaꞌntaterraneterr; ñeñthpaꞌ ateth otanet:
—Yompor poꞌkowenña attho atarr ayochreshathtena poeꞌntañoth ñeñthñapaꞌ eꞌñe ateth ñerraꞌmrratheꞌ terraya añekmoen. Oꞌch terrayet saꞌpopaꞌ oꞌch eꞌñe apxhaꞌwan allowen paꞌnamen kakaxhno. 48Ñerraꞌm oꞌch eꞌñe chorra allempoñapaꞌ oꞌch chetamperet tophñaso, oꞌch anorrxhaꞌtet allchaꞌ akret ñeñth eꞌñe kowenareꞌ ñeñthchaꞌña eshaꞌtanatet poekañthro. Ñeñthña ama kowenayayepaꞌ oꞌch saprrochet. 49Ñeñthpaꞌ atethchaꞌkaꞌye perraña allempoch mellapoterra. Xhaꞌnmaxhaꞌtchaꞌ mellañoteñneshaꞌ ñeñthchaꞌ ellopaꞌtetstaterreꞌ ñeñth atsrreꞌmñathneshaꞌ ñamha ñeñth eꞌñe pokteꞌ es phaꞌyets. 50Ñeñthña atsrreꞌmñathneshaꞌpaꞌ waporeꞌteretchaꞌ oꞌpono all worten tsoꞌ. Allñapaꞌ allchaꞌ yawanrrorterret, panmoeñothet atserrpaꞌ rrasoꞌtyerretchaꞌ paꞌs.
Atthoch eꞌñe kowen yorrtatyen kothaphñats ñeñth awathotheñ atarr sherbets ñamha atthoch eꞌñe kowen yorrtatyen kothaphñats ñeñth eꞌñe etserra atarr sherbets
51Allempoñapaꞌ allentha aꞌphthoꞌtanet:
—¿Eñotoxhenaꞌt sentenña allowen ñeñth ateth notyenes?
Ñetñapaꞌ ateth ochet:
—Eñotoxhenkaꞌye yenteñ.
52Allempoñapaꞌ ateth otanet:
—Ñeñthoꞌmarña amaꞌt allowen erraꞌtsen ñeñth atarr etsoteneꞌ ñoñets ñeñth ateth anareth awathotheñ, ñerraꞌm elloña ayxhatarethtet ñamet ñeñth ateth pena Yompor poꞌkowenña attho atarr ayochreshathtena ña, ñeñthña acheñer atarrchaꞌ kowen orrtatenan kothaphñats ñeñth awathotheñ, elloña kowenchaꞌ orrtaterran ñamha ñeñth eꞌñe etserra kothaphñats. Eꞌñech ateth pena ñerraꞌmrratheꞌ ñeñth apakllatheshaꞌ. All aññoꞌtyenan ñeñth atarr morrentena errothenopaꞌ oꞌch orrtatenan ñeñth errteꞌ aññoꞌten all; errothenoñapaꞌ oꞌch orrtatyenan ñamha ñeñth aññoꞌten awathotheñ all paꞌpakllo.
Allempo serrpareꞌtatan Jesús acheñeneshaꞌ all Nazareto
(Mr. 6.1-6; Lc. 4.16-30)
53Serrpareꞌtatwanet Jesús ñeñth ateth tomaꞌntatyesanet, ñañapaꞌ awerrerr alloth. 54Xherr paꞌnyo all Nazareto yexhatwerraneterr all poꞌpraweto. Allñapaꞌ nanak kowanrrorteñet, ateth otyeñet:
—Ñapaꞌ errawañakaꞌyeña eñotanña ora allowen ñeñth ateth phaꞌyena. Eseshaꞌwañakaꞌyeña eñotateneꞌña atthoth orrtatenan partsoteñets. 55Ñapaꞌ aña poechemer ñeñth poꞌtarwas peneꞌ oꞌch thorrenana tsach atthoch es yexhkatyen paꞌnamen. Pachorpaꞌ aña María. Paꞌmoꞌnasheñpaꞌxhoꞌña aña Jacobo, José, Simón, Judas. 56Allowen poꞌxhaneshaꞌpaꞌ eꞌñekaꞌye yechmeꞌtwenanet parroꞌmarneshayarramcheꞌ. Taꞌm ñañapaꞌ errothenoththeꞌña atarr es eñotyen.
57Ñeñthoꞌmarña all eꞌñe ña paꞌnyo ama eseshayeꞌ akwaꞌpenaye entenaye. Allempoña Jesúspaꞌ ateth otanet:
—Ñeñth aꞌmhteneꞌ Yompor poꞌñoñpaꞌ xhokmakaꞌye amhchaꞌnaꞌtpoꞌ entyeñña allowen acheñeneshaꞌ, arrña paꞌnyo alloꞌtsen eꞌñe ña pamoꞌtsnaꞌtarneshaꞌ ñetñapaꞌ ama akwaꞌpenayeꞌ enteñeto. Amaꞌt ñamha ñeñth parro yexhenet paꞌpaklleto, ñetpaꞌxhoꞌña ama akwaꞌpenayeꞌ enteñeto.
58Ama ameꞌñeñeto ñeñthoꞌmarña allpaꞌ ama atonocheyeꞌ orrtataneto poꞌpartsoña.
دیاریکراوەکانی ئێستا:
San Mateo 13: ame
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2014, Wycliffe Bible Translators, Inc. All rights reserved.