Yohanes 18
18
Yesu nitingkang
(Mat. 26:47-56, Mrk. 14:43-50, Luk. 22:47-53)
1Tòna ladu‑mo ti Yesu mampusua: nasang aka to, lumao i heteꞌna Haung Kidron sìnang pasikolaNa. I anto ara besa kinete:, pang mintama‑i se. 2Yudas ung mambalòka Yesu mangìsang kaoneang to, sàbaꞌ dea ti Yesu biasa one: i anto sola: pasikolaNa. 3Jadiꞌ, lumao ti Yudas i anto mambaha tantara Roma pang pira-pira pikuyaꞌ Tamming Kabussùngang ung na pantuyu kapala-kapala imang pang tu Parisi. Mambaha‑i se ung patarung, pauꞌ, pang lampu. 4Na ìsang nasang Yesu aka ti ung bùruꞌa mao i kalaeNa. Dea pùna mindùkuꞌ mao i tau to‑i se, pang mangkutiki teꞌ, “Isai ti ung nu okaꞌ se?”
5Misùmu‑i se teꞌ, “Yesu tu Nasareꞌ.”
Musuana‑mi ti Yesu teꞌ, “Koi:‑moko.”
Dea ti Yudas ung mambalok‑I, tèdeꞌ ho i anto. 6Tòna musua: ti Yesu teꞌ, “Koi:‑moko,” tummàlaꞌ‑i se nasang. 7Na kutikìna‑mi kang ho Yesu teꞌ, “Isai ti ung nu okaꞌ se?”
Misùmunna‑mi se teꞌ, “Yesu tu Nasareꞌ.”
8Musua: ti Yesu teꞌ, “Ku konai:‑mo moa teꞌ, Koi:‑moko. Pang ìna tongang Koi: teng ti ung nu okaꞌ se, eloꞌna‑mo ha pola:‑i se ti tee.” 9Nai suaNa mène: to, tikannaꞌ ti ung Na pusua: i langena: mao i AmanNa teꞌ, “Nai àlaꞌna‑i se ung Nu hengi‑mingNaꞌ hari: moi besa ung hùling.”*#18:9 Puang Yesu mampusua: ung mène: tee i 17:6, 12. Hele ho i 6:39 pang 10:28.
10Na nonokòna‑mi Simon Petrus ti pisona pang na ae:‑ing, urungang lumpong ti talinga konangna kaunangna Kapala Imang. Konana tau to, Malkus. 11Musuana‑mi ti Yesu teꞌ, “Pai kuma: pole ti pisomu! U moa naꞌ teꞌ hang Ku olai: ti kamaparriꞌang ung na patantu‑mingNaꞌ Ama:?”*#18:11 U moa naꞌ teꞌ hang Ku olai: ti kamaparriꞌang ung na patantu‑mingNaꞌ Ama:? Sua: Yunani U moa naꞌ teꞌ hang Ku enùngi: ti enùngang ung na hengi‑mingNaꞌ Ama:?
Yesu i heleꞌna Hannas
(Mat. 26:57, Mrk. 14:53, Luk. 22:54)
12Na tingkangna‑mi tantara sìnang komandangna pang pikuyaꞌ Tamming Kabussùngang ti Yesu, pang na pungu‑i se. 13Parrara na baha‑i se mao i heleꞌna Hannas, sàbaꞌ Kapala Imang matua:. Tau to, siranna Kayapas. Kayapas tempo to, Kapala Imang. 14Pang dea‑mo ti ung mampasakiꞌ ung si nipiama: i aluku tu Yahudi teꞌ, Làbi belo:‑da sule: besa tau mate nai none: tau boso:.*#18:14 Hele i 11:50.
Petrus mampissangkaꞌ‑ing Yesu
(Mat. 26:69-70, Mrk. 14:66-68, Luk. 22:55-57)
15Dea ti Simon Petrus sìnang besa pasikola sintàna:, mangulaꞌ Yesu. Pasikola to, na ìsang Kapala Imang, pùna nipatinai‑i pola: i Yesu mintama i pangàloangna. 16Hampoꞌ Petrus one: maang i sòhongna bambangang muahong. Jadiꞌ, mangule:‑ing ti pasikola to nai laling, massilàha:‑ing bahine pangkoring ung mangkuyaꞌ bambangang i anto, màli: na baha‑i ti Petrus mintama. 17Na silàhana‑ming pikuyaꞌ bambangang to ti Petrus teꞌ, “He, dio ho ti pasikolana Tau to.”
Na sùmui teꞌ, “Hang koi:‑kaꞌko.”
18Hengi to mirarung, jadiꞌ mampamèha‑i se oring ti pangkoring pang tau ung mangkuyaꞌ Tamming Kabussùngang na pamminnui‑i se. Dea ti Petrus lumao ho i anto missola: mamminnu.
Kapala Imang mamparessa Yesu
(Mat. 26:59-66, Mrk. 14:55-64, Luk. 22:66-71)
19Tempo dea ho teng to, Kapala Imang matua: mangkutiki Yesu mampatu: pasikolaNa pang pipaturoNa. 20Na sùmui Yesu teꞌ, “Ku nene musua: i heleꞌna tau boso:. Ku nene mupaturo: i tamming-tamming kapinombaang pang i kaoneang Tamming Kabussùngang, i heleꞌna ung si nipiama: i aluku. Pang hara‑Kaꞌko mangkomoꞌ-komoꞌi musua:. 21Jadiꞌ, aka pu u Mi kutiki? Kutiki‑i se ti ung massàding‑mo pipaturoKu. Tantu na ìsang‑mi se ti ung Ku pusua:.”
22Tòna musua: mène: to ti Yesu, besanna nai àlaꞌna pikuyaꞌ Tamming Kabussùngang ung tèdeꞌ i anto massampeling‑I pang musua: teꞌ, “Aka pu U harani musua: mène: to mao i Kapala Imang?”
23Na sùmui Yesu teꞌ, “Ìna Ku mampusua: ung masala:, konai: ti salana! Hampoꞌ ìna ung Ku pusua: to malleo:, aka pu u Mi sampeling?”
24Na pakatunna‑mi Hannas ti Yesu mao i Kayapas, dea‑mo Kapala Imang.*#18:24 Nikaonei: mangìsang toroꞌna pamparessa Puang Yesu i heleꞌna Kayapas pang Ung si Nipiama: i tu Yahudi, hele i Mat. 26:57-68 pang Mrk. 14:53-65.
Petrus mampissangkaꞌ‑kanging ho Yesu
(Mat. 26:71-75, Mrk. 14:69-72, Luk. 22:58-62)
25Simon Petrus mamminnu maang i anto, sàbaꞌ palea: lupu sola: Yesu. Na silàhana‑ming tau i anto teꞌ, “He, dio ho ti pasikolaNa.” Hampoꞌ missangkaꞌ teꞌ, “Hang koi:‑kaꞌko.”
26One: ho ti besa pangkoringna Kapala Imang, tau deanna to tau ung na lumpòngi Petrus talinganna. Mangkonai: teꞌ, “U moa naꞌ teꞌ hang ku ita‑ko sola: i kinete: to?”
27Petrus tùrung teng missangkaꞌ teꞌ, “Hang koi:‑kaꞌko!” Moninna‑mi ti manoko.*#18:27 Hele i 13:38.
Yesu i heleꞌna Pilatus
(Mat. 27:1-2, 11-14, Mrk. 15:1-5, Luk. 23:1-5)
28Ladu niparessa i heleꞌna Kayapas, na pingkakaꞌ‑ming se ti mambaha Yesu nai rasangna Kayapas mao i tammingna gubernur. Tu Yahudi hang mintama‑i i tamming to, mangking hang miluhali‑i se burere manuruꞌ aluku,*#18:28 Gubernur Pilatus handei: tu Yahudi. Manuruꞌ aluku tu Yahudi, niàna: burere ti tau ìna mintama i rasangna tau ung dang dea tu Yahudi. sàbaꞌ mannei: se i laling perayaang Paska. 29Deanna‑mo to, missòhong ti gubernur ung nikonai: Pilatus mampasikorai:‑ing se pang mangkutiki teꞌ, “Aka ti ung nu pantannaꞌ‑ing se Tau tee?”
30Misùmu‑i se teꞌ, “Àla: ung dang mampukauꞌ‑I ung kadetu, àla: hang ki baha‑Ika mai.”
31Musuana‑mi ti Pilatus teꞌ, “Paressa kalenanna‑ko se, pang hukung‑ko se siulaꞌ atorangmu!”
Hampoꞌ na sùmui‑i se teꞌ, “Hang mading‑kangka manghukung mate tau.”*#18:31 Manuruꞌ atorangna tu Roma, tau ung dang dea tu Roma ha mading‑i manghukung mate tau. 32Jadi ti aka te mangking tikannaꞌ to aka ung na pusua: Yesu mampatu: dalangna kamateangNaa.*#18:32 Yesu mate nipai oròngang siulaꞌ atorangna ung muparenta tu Roma. Ha mate nihatui‑I siulaꞌ atorangna aluku tu Yahudi. Hele i 12:32-33, 3:14, pang Mat. 20:18-19.
33Pilatus mintama pole i laling pang manghàngo Yesu, màli: na kutiki‑I teꞌ, “Tongang naꞌ U datuna tu Yahudi?”
34Na sùmui teꞌ, “Nai kinta: kalenanna naꞌ ti pingkutìkang te? dea‑raka ara tau ung mampaìsàngi‑ke mampatu: Koi:.”
35Misùmu ti Pilatus teꞌ, “Oꞌ ku tu Yahudi‑ko naꞌ? Ung mampehea‑Ko mao i koi:, santuYahudimMu teng, dea‑mo kapala-kapala imang. Aka ti ung Nu pukauꞌ?”
36Misùmu ti Yesu teꞌ, “KadatuangKu hang nai lino‑ida. Àla: nai lino‑i, taungKu mukaenang‑mo mangking hang nipehea‑Kaꞌ mao i ung si nipiama: i aluku tu Yahudi. Hampoꞌ ìnang handei:‑Ko nai lino tee ti kadatuangKu.”
37Na konaina‑mi Pilatus teꞌ, “Ìna mène: to, baꞌ U datu:‑do.”
Misùmu ti Yesu teꞌ, “Mène:‑mo ti ung ta pusua:. Sitongangna, Ku nikianak‑ing pang bùruꞌ mao i lino, mampatu: besa pampatu:, dea‑mo mampadeaꞌ passabiingKu mampatu: katongangang. Tau ung si nai katongangang mampisàdìngia‑Kaꞌ.”
38aNa konaina‑mi Pilatus teꞌ, “Niakaa ti katongangang?”
Yesu nihukung mate
(Mat. 27:15-31, Mrk. 15:6-20a, Luk. 23:13-25)
38bLadu musua: mène: to, missòhongna‑mi ho pole ti Pilatus mao i ung si nipiama: i tu Yahudi moa teꞌ, “Hari:‑ko ku korai: moi besa kasalaangNa. 39Hampoꞌ siulaꞌ kabiasaangta se tempo perayaang Paska, u ku holi‑ing se nene besa tau ung nitarungkuꞌ. Datuna naꞌ tu Yahudi ti ung ku holiing‑ko se?”
40Mikakoangna‑mi se teꞌ, “Handei:! Barabas‑ra:!” (Dea ti Barabas dea‑mo gorombolang.)
دیاریکراوەکانی ئێستا:
Yohanes 18: skx
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە