मत्ती 21
21
ईशु चो यरूशलेम ने जितुन ऐतोर
1जिदलदाय हुनमन यरूशलेम चो लगे अमरला आउर जैतून डोंगरी थाने बैतफगे चो लगे ईला, तेबे ईशु दुय झान चेलामन के ऐ बोलुन भाती पठालो, 2“पुरे चो गाँव ने जाहा। हुता अमरते ची गोटक गदही बान्दलोर, आउर हुनचो संगे पिला तुमके मिरेदे। हुनमन के ढ़िलुन भाती मोचो लगे धरून आना। 3अगर तुमके कोनी काई बलदे, तेबे बला कि परबु के ऐचो जरूरत आसे, तेबे हुन तुरते हुनमन के पटाऊन देदे।” 4ऐ ऐईकाजे होली कि जोन बचन अगम गिआनी चो बाटले बोला जाऊ रये, हुन पुरा होओ:
5“सिय्योन चो बेटी ले बला,
‘दक, तुचो राजा तुचो लगे ऐये से;
हुन सोज आय, आउर गदाहा थाने बसलो से;
मान्तर गदही चो पिला उपरे।’”
6चेलामन जाऊन भाती, जसन ईशु हुनमन ले बलुन रलो, असने ची करला। 7आउर गदही आउर पिला के आनुन भाती, हुनमन उपरे आपलो फटीई लतला, आउर हुन हुनमन उपरे बस लो। 8तेबे खुबे असन लोगमन आपलो फटीई बाट ने ओचाला, आउर दुसर लोगमन रूकमन ले खेंदामन गोंदुन भाती बाट ने ओचाला। 9जोन भीड़ पुरे-पुरे जाते आउर पाट-पाट हिन्ड़ते ऐते रली, चिचयाऊन-चिचयाऊन भाती बलते रली, “दाऊद चो पिला चो होशाना, धन्य आय हुन जोन परबु चो नाव ले ऐऊ आय, बादरी ने होशाना।” 10जिदलदाय हुन यरूशलेम ने ओल्लो, तेबे सपाय नंगर ने हलचल मचुन गेली, आउर लोगमन बलुक मुरयाला, “ऐ कोन आय?” 11लोगमन बल्ला, “ऐ गलील चो नासरत चो अगम गिआनी ईशु आय।”
मंदिर ले बेबारीमन के निकराय जातोर
12ईशु माहापुरू चो मंदिर ने जाऊन भाती हुन सपाय के, जोन मंदिर ने लेन देन करते रवत, निकराऊन दिलो, आउर सराफो चो चौंकी आउर परेयां बिकतो बितामन चो ठेला के उलटाऊन दिलो; 13आउर हुनमन ले बल्लो, “लिकलोर आसे, ‘मोचो घर पारथना चो घर बलाया जाये दे’; मान्तर तुमी हुनके डाकुमन चो डेरा बनाय सास।”
14तेबे काना आउर खोड़ीयामन, मंदिर ने हुनचो लगे ईला, आउर हुन हुनमन के चेंगा करलो। 15मान्तर जिदलदाय परधान याजकमन आउर शास्तरीमन ऐ भयंकर काममन के, जोन हुन करलो, आउर लेकामन के मंदिर ने “दाऊद चो पिला चो होशाना” चिचयातोर दकला, तेबे हुनमन रिसे होला, 16आउर हुनचो ले बोलुक मुरयाला, “काय तुय सुन सीस कि ऐ काय बले सोत?” ईशु हुनमन ले बल्लो, “हव; काय तुमीमन ऐ केबीई नी पड़लास: ‘लेकामन आउर गोरस पिवतो पिलामन चो मुंह ले तुय अपार स्तुति करालीस?’” 17तेबे हुन हुनमन के छांडुन भाती नंगर चो बाहरे बैतनिय्याह ने गेलो आउर हुताय रात बिता लो।
अंजीर चो रूक ले सिक्या
18बिहाने जिदलदाय हुन नंगर ने लेवटते रलो तेबे हुनके भुक लागली। 19सड़क चो रेटे अंजीर चो गोटक रूक दकुन भाती हुन हुनचो लगे गेलो, आउर पानमन के छांडुन हुन थाने आउर काई नी पाऊन हुनचो ले बल्लो, “आजी ले तुचो थाने फेर केबीई फर नी धरो।” आउर अंजीर चो रूक तुरते सुकली। 20ऐ दकुन भाती चेलामन के अकचकित होली आउर हुनमन बल्ला, “ऐ अंजीर चो रूक तुरते कसन सुकली?” 21ईशु हुनमन के जबाप दिलो, “मय तुमचो ले सते बलें सें, अगर तुमी बिश्वास संगाहा आउर संका नी करा, तेबे ना मात्र ऐ करा से जोन ऐ अंजीर चो रूक ले करा गेली से, मान्तर अगर ऐ डोंगरी ले बले बला से, ‘उखनी हो आउर समुन्द ने जाऊन पड़’, तेबे ऐ होये दे। 22आउर जोन काई तुमी पारथना ने बिश्वास ले मांगा हुन सपाय तुमके मिरेदे।”
यहूदी अगुवामन चो ईशु चो अधिकार थाने संका
23हुन मंदिर ने जाऊ भाती उपदेश करते रलो, तेबे परधान याजकमन आउर लोगमन चो सियानमन हुनचो लगे ऐऊन भाती पचारला, “तुय ऐ काम काचो अधिकार ले कर सीस? आउर तुके ऐ अधिकार कोन दिलो?” 24ईशु हुनमन के जबाप दिलो, “मय बले तुमचो ले गोटक गोठ पचारें सें; अगर हुन मोके सांगा से, तो मय बले तुमके सांगेंदें कि ऐ काम कोन अधिकार ले करूं आंय। 25यूहन्ना चो डूबन काहां ले रली? सरग चो बाटले नाहले मानेमन चो बाटले?” तेबे हुनमन आपस ने बिवाद करूक मुरयाला, “अगर आमी बलुन्दे ‘सरग चो बाटले’, तेबे हुन आमचो ले बले दे, ‘फेर तुमी हुनचो बिश्वास केंव नी करलास?’ 26आउर अगर बलुन्दे ‘मानेमन चो बाटले’, तेबे आमके भीड़ चो डर आसे, कसनबल्लोने हुनमन सपाय यूहन्ना के अगम गिआनी मानु आत।” 27आउर हुनमन ईशु के जबाप दिला, “आमी नी जानु।” हुन बले हुनमन ले बल्लो, “तेबे मय बले तुमके नी सांगे कि ऐ काम काय अधिकार ले करें से।
दुय झान बेटामन चो कहनी
28“तुमी काय बिचारे सास? कोनी माने चो दुय ठान बेटा रवत; हुन पहले चो लगे जाऊन भाती बल्लो, ‘हे बेटा, आजी दाख चो बनवाड़ी ने काम कर।’ 29हुन जबाप दिलो, ‘मय नी जायें’, मान्तर पाचे पसताऊन भाती गेलो। 30फेर बुआ दुसर चो लगे जाऊन भाती असने ची बल्लो, हुन जबाप दिलो, ‘हव-हव जायें से’, मान्तर नी गेलो। 31ऐ दुनो झान ने कोन बुआ चो इच्छा पुरा करलो?” हुनमन बल्ला, “पयला।” ईशु हुनमन ले बल्लो, “मय तुमचो ले सते बलें सें कि कर धरू बिता आउर बेश्यामन तुमचो ले पयले माहापुरू चो राज ने ओले सोत। 32कसनबल्लोने यूहन्ना धरम चो बाट दकाते-दकाते तुमचो लगे ईलो, आउर तुमी हुनचो बिश्वास नी करलास: मान्तर कर धरू बिता आउर बेश्यामन हुनचो बिश्वास करला: आउर तुमी ऐ दकुन भाती पाचे बले नी पसताला कि हुनचो बिश्वास करतास।
दुष्ट किसानमन चो कहनी
33“गोटक आउर कहनी सुना गोटक घर चो मालिक रलो, जोन दाख चो बनवाड़ी लगालो; हुनचो चारो बाटे बाड़ा बान्दलो; हुन थाने रस चो कुण्ड खोड़लो; आउर गुबा बनालो; आउर किसानमन के हुनचो ठेका देऊन भाती परदेश जाते गेलो। 34जिदलदाय फर चो समया लगे ईली, तेबे हुन आपलो दासमन के हुनचो फर धरतो काजे किसानमन चो लगे पठालो। 35मान्तर किसानमन हुनचो दासमन के धरून भाती, काके तो पेटला, आउर काके तो मारला, आउर काचीई उपरे पकना मारला। 36फेर हुन पयलामन ले आगर आउर दासमन के पठालो, आउर हुनमन-हुनमन ले बले असने ची करला। 37आखरी ने हुन आपलो बेटा के हुनमन चो लगे ऐ सोचुन भाती पठालो कि हुनमन मोचो बेटा चो ईजीत कर दे। 38मान्तर किसानमन बेटा के दकुन भाती आपस ने बल्ला, ‘ऐ तो हकदार आय, ईआ, ऐके मारून देऊ आउर ऐचो सम्पत्ति धरवां।’ 39आउर हुनमन हुनके धरला आउर दाख चो बनवाड़ी ले बाहरे निकराऊन भाती मारला।”
40ऐईकाजे जिदलदाय दाख चो बनवाड़ी चो मालिक ऐये दे, तेबे हुन किसानमन चो संगे काय करे दे? 41हुनमन हुनचो ले बल्ला, “हुन-हुन खराप लोगमन के खराप रीति ले नष्ट करे दे; आउर दाख चो बनवाड़ी चो ठेका दुसर किसानमन के देयेदे, जोन समया थाने हुनके फर देदे।” 42ईशु हुनमन ले बल्लो, “काय तुमी केबीई पवितर शास्त्र ने ऐ नी पढ़लास:
‘जोन पकना के राजमिस्त्रीमन बेकार ठेबाऊ रवत,
हुनी कोनया चो मुंडी पकना होली?
ऐ परबु चो बाटले होली, आउर आमचो
नजर ने भयंकर आय।’
43“ऐईकाजे मय तुमचो ले बलें सें कि माहापुरू चो राज तुमचो ले धरा जाये दे आउर असन जाति के जोन हुनचो फर आनो, दिया जायेदे। 44जोन ऐ पकना थाने घसरे दे, हुन रनबन होऊन जाये दे; आउर जेचो उपरे हुन घसरे दे, हुनके पिसुन देयेदे।” 45परधान याजक आउर फरीसी हुनचो कहनीमन के सुनुन भाती समजुन गेला कि हुन हुनमन चो बारे ने बले से। 46आउर हुनमन हुनके धरूक चाहला, मान्तर लोगमन ले डरला कसनबल्लोने हुनमन हुनके अगम गिआनी मानते रवत।
دیاریکراوەکانی ئێستا:
मत्ती 21: HLBNT
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Halbi Bible by The Love Fellowship is licensed under Creative Commons Attribution-ShareAlike 4.0 License.