मत्ती 16
16
फरीसीमन घाई ले ईशु चो परका जातोर
1फरीसीमन आउर सदूकीमन लगे ऐऊन भाती हुनके परकतो काजे हुनचो ले बल्ला, “आमके सरग चो काई चिना दकाव।” 2हुन हुनमन के जबाप दिलो, “सांज के तुमी बोलु आस, ‘मोसम अच्छा रयदे, कसनबल्लोने बादरी लाल आसे’, 3आउर बिहाने बोलु आस, ‘आजी लेहरा धुका ऐऊ आय, कसनबल्लोने बादरी लाल आउर धुन्दरा आसे।’ तुमी बादरी चो चिना दकुन भाती हुनचो भेद सांगुक सकास? 4ऐ जुग चो खराप आउर बेबीचारी लोग चिना डगराऊ आत, मान्तर योना चो चिना के छांडुन हुनमन के आउर कोनी चिना नी दिया जाये।” आउर हुन हुनमन के छांडुन भाती गेलो।
फरीसीमन आउर सदूकीमन चो खमीर
5चेलामन झील चो हुनपाट अमरला, मान्तर हुनमन रोटी धरतोर भुलकुन रवत। 6ईशु हुनमन ले बल्लो, “दका, फरीसीमन आउर सदूकीमन चो खमीर ले खबड़दार राआ।” 7हुनमन आपस ने बिचार करूक मुरयाला, “आमी रोटी नी आनलु ऐईकाजे हुन असन बले से।” 8ऐ जानुन भाती, ईशु हुनमन ले बल्लो, “हे अल्पबिश्वासीमन, तुमी आपस ने केंव बिचार करेसास कि आमचो लगे रोटी निआय? 9काय तुमी ऐबले नी समजलास? काय तुमके हुन पांच हजार चो पांच रोटी सुरता निआय, आउर ना ऐ कि तुमी कितलो टुकना उठाऊन रलास? 10आउर हुन चार हजार चो सात रोटी, आउर ऐ कि तुमी कितलो टुकना उठाऊन राआस? 11तुमी केंव नी समजास कि मय तुमचो ले रोटी चो बारे ने नी बल्ले, मान्तर ऐ कि तुमी फरीसीमन आउर सदूकीमन चो खमीर ले खबड़दार राआ।” 12तेबे हुनमन चो समज ने ईली कि हुन रोटी चो खमीर ले नाई, मान्तर फरीसीमन आउर सदूकीमन चो सिक्या ले खबड़दार रऊक लाय बोलु रलो।
पतरस ईशु के मसीह मानतोर
13ईशु कैसरिया फिलिप्पी चो परदेश ने ईलो, आउर आपलो चेलामन ले पचारूक मुरयालो, “लोग माने चो बेटा के काय बोलु आत?” 14हुनमन बल्ला, “खिन्डिक तो यूहन्ना डूबन देतो बिता बोलु आत, आउर खिन्डिक एलिया, आउर खिन्डिक यरमिया नाहले अगम गिआनीमन थानले कोनी गोटक बोलु आत।” 15हुन हुनमन ले बल्लो, “मान्तर तुमी मोके काय बोलु आस?” 16शिमोन पतरस जबाप दिलो, “तुय जीवता माहापुरू चो बेटा मसीह आस।” 17ईशु हुनके जबाप दिलो, “हे शिमोन, योना चो बेटा, तुय धन्य आस; कसनबल्लोने मास आउर लऊ ने नाई, मान्तर मोचो बुआ जोन सरग ने आसे, ऐ गोठ तुचो उपरे उजागर करलो से। 18आउर मय बले तुचो ले बलेंसें कि तुय पतरस आस, आउर मय ऐ पकना थाने आपलो कलीसिया बनायेंदें आउर अधलोक चो कपाट हुनचो उपरे हाबी नी होयेदे। 19मय तुके सरग चो राज चो कुची काड़ीमन देयेंदे: आउर जोन काई तुय धरतनी थाने बान्द से, हुन सरग ने बान्दी होयेदे; आउर जोन काई तुय धरतनी ने खोल से, हुन सरग ने खुले दे।” 20तेबे हुन चेलामन के हुसीयार करलो कि कोचीई ले नी बल्ला कि मय मसीह आय।
आपलो मरना चो बारे ने ईशु चो अगम गोठ
21हुन समया ले ईशु आपलो चेलामन के सांगुक मुरयालो, “जरूरी आय कि मय यरूशलेम ने जायें दें आउर पुरनिमन, आउर परधान याजकमन, आउर शास्तरीमन चो हाथ ले खुबे दुख उठायें; आउर मारून पकाया जायें; आउर तीसर दिने जीव उठेदे।” 22ऐ थाने पतरस हुनके अलगे नेऊन भाती खिजुक मुरयालो, “हे परबु, माहापुरू नी करो! तुचो संगे असन केबीई नी होये।” 23हुन उलटुन भाती पतरस ले बल्लो, “हे शयतान, मोचो पुरे ले दूर हो! तुय मोचो काजे ठोकर चो कारन आस; कसनबल्लोने तुय माहापुरू चो गोठमन थाने नाई, मान्तर मानेमन चो गोठमन थाने मन लगाऊ आस।”
ईशु चो पाटे हिन्ड़तोर चो मतलब
24तेबे ईशु आपलो चेलामन ले बल्लो, “अगर कोनी मोचो पाट-पाट ऐऊक चाहा ओ, तेबे आपन खुद चो इन्कार करो आउर आपलो कुरूस उठाओ, आउर मोचो पाट-पाट ऐओ। 25कसनबल्लोने जोन कोनी आपलो जीव बचाऊक चाह ले, हुन हुनके नी बचाए; आउर जोन कोनी मोचो काजे आपलो जीव देयेदे, हुन हुनके पायेदे। 26अगर माने पुईतराय जगत के पाये दे, आउर आपलो जीव चो हानि उठाये दे, तेबे हुनके काय लाब होयेदे? नाहले माने आपलो जीव चो पलटा काय देयेदे? 27माने चो बेटा आपलो सरग दूतमन चो संगे आपलो बुआ चो महिमा ने ऐये दे, आउर हुन समया ‘हुन हरकोनी के हुनचो काम चो पुरती करलो फल देयेदे।’ 28मय तुमचो ले सते बलेंसें कि जोन ऐथा उबा आसोत, हुनमन थानले खिन्डिक असन आसोत कि हुनमन जिदलदाय ले माने चो बेटा के हुनचो राज ने ऐतोर नी दकेदे, हुलदाय ले मरना चो सुआद केबीई नी चाक दे।”
دیاریکراوەکانی ئێستا:
मत्ती 16: HLBNT
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Halbi Bible by The Love Fellowship is licensed under Creative Commons Attribution-ShareAlike 4.0 License.