မ︀တ︀်တ︀ႄး 1
1
လ︀ွင︀်ႈပ︀ူလ︀ီꩫ︀်ယ︀ႃႈမ︀ွꩫ︀်ꩡ︀ဝ်ႛယ︀ေꩬ︀ုၵ︀ရ︀ီတ︀်ၵ︀ဝ်
လ︀ုက︀ႃ 3:23-38
1ဢ︀ꩫ︀်ႈꩫ︀ႆ︀ႇက︀ꩡ︀ံး ထဝ်ပ︀ူလ︀ီꩫ︀်ယ︀ႃႈမ︀ွꩫ︀်ꩡ︀ဝ်ႛယ︀ေꩬ︀ုၵ︀ရ︀ီတ︀် ၸ︀ူႛပ︀ီꩫ︀်ႈꩡ︀ိူဝ်ႇ ဢ︀ႃပ︀ြႃꩭၢမ︀်၊ ၵ︀ိူဝ်းꩡ︀ဝ်ႛꩭူဝ်ၵ︀မ︀်းၻႃဝိတ︀ီၵ︀ႃႛꩫ︀မ︀်ꩭေႃး။
2-6aꩡ︀ိူဝ်ႇဢ︀ꩫ︀်ႈလ︀ုက︀်ႉဢ︀ႃပ︀ြႃꩭၢမ︀်မ︀ႆ︀ႛ ဢ︀ဝ်ႈထိုင︀်ꩡ︀ဝ်ႛꩭူဝ်ၵ︀မ︀်းၻႃဝိ ၵ︀ိူဝ်းလ︀ူင︀်းမ︀ႃးꩫ︀ႆ︀ႇၵ︀ဝ်ယ︀ႃႇ ဢ︀ႃပ︀ြႃꩭၢမ︀်၊ ဢ︀ေꩬ︀က︀်၊ ယ︀ႃက︀ု၊ ယ︀ုတ︀ၵ︀ဝ်ပ︀ီႈꩫ︀ွင︀်ႇ၊ ၸ︀ႃရ︀ႅတ︀်ꩫ︀ၵ︀ႃꩡ︀ႃရ︀ ၸ︀ူႛလ︀ုက︀်ႉယ︀ုတ︀ဢ︀ꩫ︀်ႈတ︀င︀်းတ︀ႃမ︀ႃꩫ︀ႆ︀ႛ၊ ꩭေꩡ︀ရ︀ုင︀် ၸ︀ူႛလ︀ုက︀်ႉၸ︀ႃရ︀ႅတ︀်၊ ဢ︀ႃရ︀မ︀်၊ ဢ︀မ︀ိꩫ︀တ︀ပ︀်၊ ꩫ︀ႃꩬ︀ုင︀်၊ ꩡ︀ႃလ︀မ︀ုင︀်၊ ၿေႃꩡ︀ ၸ︀ူႛလ︀ုက︀်ႉꩡ︀ၢႆ︀း ရ︀ႃၵ︀ပ︀်၊ ဢ︀ေႃၿႅတ︀် ၸ︀ူႛလ︀ုက︀်ႉꩡ︀ၢႆ︀းရ︀ုထ၊ ယ︀ေꩬ︀ႄးင︀ႆ︀း ꩡ︀ဝ်ႛꩭူဝ်ၵ︀မ︀်းၻႃဝိၵ︀ဝ်ꩫ︀မ︀်။
6b-11ယ︀ဝ်ႇက︀ီး ၵ︀ိူဝ်းဢ︀ꩫ︀်ႈလ︀ုက︀်ႉꩡ︀ဝ်ႛꩭူဝ်ၵ︀မ︀်းၻႃဝိမ︀ႆ︀ႛ ၵ︀ိူဝ်းလ︀ူင︀်းမ︀ႃး ဢ︀ဝ်ႈထိုင︀်ꩡ︀ူဝ်ႈမ︀ိူဝ်ႈ ဢ︀ီတ︀်ꩡ︀ရ︀ေးၵ︀ဝ်မ︀ႆ︀ႛ ၿေၿီလ︀ုင︀်ၵ︀ဝ် ꩬ︀ႅဝ်ႛက︀ႃမ︀ိူင︀်းၵ︀ဝ်ꩫ︀ႆ︀ႇၵ︀ဝ်ယ︀ႃႇ ၻႃဝိ၊ ꩬ︀ေႃလ︀မ︀ုꩫ︀် က︀ူဝ်ႇဢ︀ꩫ︀်ႈၸ︀ူႛမ︀ေႈမ︀ꩫ︀်းယ︀ႃႇ ဢ︀ꩫ︀်ႈꩭွꩫ︀်ပ︀ီꩫ︀်ႈၸ︀ူႛမ︀ေးဢ︀ုရ︀ိယ︀မ︀ႃးꩫ︀ႆ︀ႇꩫ︀မ︀်။ ရ︀ေႃပ︀ွမ︀်၊ ဢ︀ပ︀ိယ︀၊ ဢ︀ႃꩬ︀၊ ယ︀ေႃꩬ︀ၸ︀တ︀်၊ ယ︀ꩭေႃယ︀ꩫ︀်၊ ဢ︀ေႃꩡ︀ိ၊ ယ︀ေႃတ︀ၢꩫ︀်၊ ဢ︀ႃၵ︀ပ︀်၊ ꩭေꩡ︀က︀ိ၊ မ︀ꩫ︀ႃꩬ︀ေ၊ ဢ︀ႃမ︀ုꩫ︀်၊ ယ︀ေႃꩬ︀ိင︀ႆ︀း ယ︀ေၵ︀ေႃꩫ︀ိၵ︀ဝ်ပ︀ီႈꩫ︀ွင︀်ႇꩫ︀မ︀်။ 12-16ယ︀ဝ်ႇက︀ီး ၵ︀ိူဝ်းဢ︀ꩫ︀်ႈလ︀ုက︀်ႉမ︀ိူဝ်ႈဢ︀ီတ︀်ꩡ︀ရ︀ေးၵ︀ဝ်မ︀ႆ︀ႛ ၿေၿီလ︀ုင︀်ၵ︀ဝ်ꩬ︀ႅဝ်ႛက︀ႃꩫ︀ႆ︀ႇမ︀ႆ︀ႛက︀ူဝ်ꩬ︀ီ ဢ︀ဝ်ႈထိုင︀်ꩡ︀ူဝ်ႈမ︀ိူဝ်ႈꩡ︀ဝ်ႛယ︀ေꩬ︀ုၸ︀ႃးမ︀ႃးꩫ︀ႆ︀ႇၵ︀ဝ်ယ︀ႃႇ ယ︀ေၵ︀ေႃꩫ︀ိ၊ ꩬ︀ႃလ︀ꩬ︀ေလ︀၊ ꩡ︀ေရ︀ုပ︀ပ︀ေလ︀၊ ဢ︀ႃပ︀ျုတ︀်၊ ဢ︀ေလ︀ျႃက︀ိမ︀်၊ ဢ︀ႃꩡ︀ေႃ၊ ꩡ︀ႃတ︀ုက︀်၊ ဢ︀ႃၵ︀ိမ︀်၊ ဢ︀ေလ︀ုတ︀်၊ ဢ︀ေလ︀ႃꩡ︀ႃ၊ မ︀တ︀်တ︀ၢꩫ︀်၊ ယ︀ႃက︀ုင︀ႆ︀း ယ︀ေႃတ︀ၢတ︀် ၸ︀ူႛၸ︀ူဝ်မ︀ေရ︀ီၵ︀ဝ်ꩫ︀မ︀်။ မ︀ေရ︀ီယ︀ႃႇ ၸ︀ူႛမ︀ေႈꩡ︀ဝ်ႛယ︀ေꩬ︀ု ဢ︀ꩫ︀်ႈꩭွင︀်ႇဝႃႈꩡ︀ဝ်ႛမ︀ေꩬ︀ိယ︀ꩫ︀ꩫ︀ႆ︀ႇꩫ︀မ︀်။
17င︀ႆ︀းꩫ︀ႆ︀ႇꩬ︀ီ ꩡ︀ိူဝ်ႇၵ︀ိူဝ်းꩡ︀ဝ်ႛယ︀ေꩬ︀ုၵ︀ရ︀ီတ︀်ယ︀ႃႇ လ︀ုက︀်ႉဢ︀ႃပ︀ြႃꩭၢမ︀်မ︀ႆ︀ႛ ဢ︀ဝ်ႈထိုင︀်ꩡ︀ဝ်ႛꩭူဝ်ၵ︀မ︀်းၻႃဝိ ꩬ︀ိပ︀်ꩬ︀ီꩡ︀ူဝ်ႈ၊ လ︀ုက︀်ႉꩡ︀ဝ်ႛꩭူဝ်ၵ︀မ︀်းၻႃဝိမ︀ႆ︀ႛ ဢ︀ဝ်ႈထိုင︀်မ︀ိူဝ်ႈဢ︀ီတ︀်ꩬ︀ြေးၵ︀ဝ်မ︀ႆ︀ႛ ၿေၿီလ︀ုင︀်ၵ︀ဝ်ꩬ︀ႅဝ်ႛက︀ႃမ︀ိူင︀်းၵ︀ဝ်ꩫ︀ႆ︀ႇ ꩬ︀ိပ︀်ꩬ︀ီꩡ︀ူဝ်ႈင︀ႆ︀း လ︀ုက︀်ႉမ︀ိူဝ်ႈဢ︀ီတ︀်ꩡ︀ရ︀ေးၵ︀ဝ် ထိုင︀်က︀ႃမ︀ိူင︀်းၿေၿီလ︀ုင︀်ꩫ︀ႆ︀ႇ ဢ︀ဝ်ႈထိုင︀်ꩡ︀ူဝ်ႈမ︀ိူဝ်ႈꩡ︀ဝ်ႛမ︀ေꩬ︀ိယ︀ၸ︀ႃးမ︀ႃးꩫ︀ႆ︀ႇယ︀ႃႇ ꩬ︀ိပ︀်ꩬ︀ီꩡ︀ူဝ်ႈꩫ︀မ︀်။
လ︀ွင︀်ႈꩡ︀ဝ်ႛယ︀ေꩬ︀ုၸ︀ႃးမ︀ႃး
လ︀ုက︀ႃ 2:1-7
18လ︀ွင︀်ႈꩡ︀ဝ်ႛယ︀ေꩬ︀ုၵ︀ရ︀ီတ︀်ၸ︀ႃးမ︀ႃးယ︀ႃႇ ပ︀ီꩫ︀်ႈင︀ႆ︀းꩫ︀မ︀်။ မ︀ေရ︀ီဢ︀ꩫ︀်ႈတ︀ီပ︀ီꩫ︀်ႈၸ︀ူႛမ︀ေႈꩡ︀ဝ်ႛယ︀ေꩬ︀ုယ︀ႃႇ တ︀င︀်းယ︀ေႃတ︀ၢတ︀်ဢ︀ဝ်ႈက︀ꩫ︀်ႈက︀ွတ︀်ꩫ︀ꩬ︀ီ ꩡ︀ူးက︀ꩫ︀်ႈဝႆ︀ႇမ︀ႃးꩫ︀မ︀်။ ꩫ︀ႆ︀ႇꩫ︀က︀ေႃႇ မ︀ိူဝ်ႈꩬ︀ွင︀်ၵ︀ႃꩵ︀ႈပ︀ႆ︀ꩭူမ︀်ႈဢ︀ူꩫ︀ႆ︀ႇ မ︀ေရ︀ီယ︀ႃႇ လ︀ႆ︀ၢးပ︀ိူဝ်ႈတ︀ꩫ︀်းၵ︀ူဝ်းၵ︀ွꩫ︀်ꩡ︀ဝ်ႛထႃဝရ︀ၸ︀ြႃးꩬ︀ီပ︀ီꩫ︀်ႈမ︀ဝ်တ︀ူဝ်ႈꩫ︀ႆ︀ၢႈက︀ႃꩫ︀မ︀်။ 19ယ︀ေႃတ︀ၢတ︀်ယ︀ႃႇ က︀ူꩫ︀်းဢ︀ꩫ︀်ႈꩬ︀ိုဝ်ႈတ︀ူဝ်လ︀ူင︀်ꩫ︀မ︀်။ ꩫ︀ႆ︀ႇꩫ︀က︀ေႃႇ မ︀ꩫ︀်းယ︀ႃႇ မ︀ေရ︀ီမ︀ႆ︀ႛ ပ︀ၢင︀်ႈꩫ︀ႃႛပ︀ူက︀်ႉက︀ူꩫ︀်းမ︀ႆ︀ႛ ၵ︀ၢꩫ︀်ႇဢ︀ဝ်ႈꩬ︀ူဝ်ႇꩫ︀ႆ︀ႇꩬ︀ီ ဢ︀ꩫ︀်ႈꩬ︀ွင︀်ၵ︀ႃꩡ︀ူးက︀ꩫ︀်ႈဝႆ︀ႇꩫ︀ႆ︀ႇမ︀ႆ︀ႛ မ︀ꩫ︀်းꩡ︀ဝ်ႛꩫ︀ႆ︀ၢႈတ︀ီတ︀်ꩡ︀ိပ︀်ႉꩰ ꩬ︀ၢင︀်လ︀ိတ︀်ႉပ︀ွက︀်ႉဢ︀ူ။ 20မ︀ိူဝ်ႈင︀ႆ︀းမ︀ꩫ︀်းꩬ︀ၢင︀်ꩬ︀ီဢ︀ူꩫ︀ႆ︀ႇ ၵ︀ုꩫ︀်ꩬ︀ၢင︀်ꩡ︀ဝ်ႛထႃဝရ︀ၸ︀ြႃးပ︀ႃးလ︀ိူင︀်ႈ ၸ︀ꩫ︀်ꩭꩫ︀်မ︀ꩫ︀်းမ︀ႆ︀ႛဢ︀ွက︀်မ︀ႃးꩬ︀ီ “ယ︀ေႃတ︀ၢတ︀် ၸ︀ꩫ︀်းꩡ︀ဝ်ႛꩭူဝ်ၵ︀မ︀်းၻႃဝိꩴ︀း လ︀ွင︀်ႈဢ︀ꩫ︀်ႈမ︀ႂ်းတ︀ီဢ︀ဝ်ႈမ︀ေရ︀ီꩫ︀ႆ︀ႇမ︀ႆ︀ႛ ပ︀ီက︀ပ︀်ႉꩡ︀ႂ်ႈ၊ လ︀ုက︀်ႉဢ︀ꩫ︀်ႈတ︀ွင︀်ႇမ︀ꩫ︀်းမ︀ႆ︀ႛယ︀င︀်းꩫ︀ႆ︀ႇယ︀ႃႇ ဢ︀ꩫ︀်ႈလ︀ုက︀်ႉၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛꩬ︀ိုင︀် ပ︀ီꩫ︀်ႈမ︀ႃးꩫ︀မ︀်။ 21မ︀ꩫ︀်းလ︀ုက︀်ႉꩡ︀ႆ︀ၢးက︀ူဝ်ႇလ︀ိူင︀်ႈ တ︀ီယ︀င︀်းမ︀ႃးꩫ︀မ︀်။ လ︀ုက︀်ႉꩡ︀ႆ︀ၢးဢ︀မ︀ႂ်းယ︀ႃႇ က︀ူဝ်ႇဢ︀ꩫ︀်ႈၸ︀ꩫ︀်းၸ︀ူႛꩡ︀ဝ်ႛမ︀ႆ︀ႛ လ︀ုက︀်ႉဢ︀ပ︀ႅတ︀်ႉမ︀ႆ︀ႛ တ︀ီၵ︀ေꩬ︀ေꩭႂ်ႛꩫ︀မ︀်။ င︀ႆ︀းꩫ︀ႆ︀ႇꩬ︀ီ မ︀ꩫ︀်းမ︀ႆ︀ႛ ယ︀ေꩬ︀ုꩫ︀ꩬ︀ီꩡ︀ိုဝ်ႈꩬ︀ႂ်ꩭႂ်ႛတ︀ႃႉ။ 22ဢ︀ꩫ︀်ႈꩫ︀ႆ︀ႇယ︀ႃႇ ဢ︀ꩫ︀်ႈꩫ︀င︀်မ︀ိူဝ်ႈင︀ႃးပ︀ုꩫ︀်ႛ ꩡ︀ဝ်ႛထႃဝရ︀ၸ︀ြႃး ပ︀ရ︀ေႃးၸ︀ႅတ︀်ႉပ︀ႃးလ︀ိူင︀်ႈမ︀ႆ︀ႛ ပ︀ွႆ︀ꩡ︀ႂ်ႇꩬ︀ီ ꩭႂ်ႛဝႃႈမ︀ႃးꩫ︀ႆ︀ႇꩫ︀က︀ꩫ︀်ႈ ပ︀ီꩫ︀်ႈမ︀ႃးꩫ︀မ︀်။ 23ပ︀ရ︀ေႃးၸ︀ႅတ︀်ႉဢ︀မ︀ႂ်းယ︀ႃႇ “ၸ︀ူႛꩬ︀ၢဝ်ꩡ︀ႅတ︀်ႉꩰက︀ူဝ်ႇလ︀ိူင︀်ႈပ︀ီꩫ︀်ႈမ︀ဝ်တ︀ူဝ်ႈꩫ︀ႆ︀ၢႈꩬ︀ီ လ︀ုက︀်ႉꩡ︀ႆ︀ၢးက︀ူဝ်ႇလ︀ိူင︀်ႈတ︀ီယ︀င︀်းမ︀ႃးꩫ︀မ︀်။ ꩡ︀ိုဝ်ႈလ︀ုက︀်ႉꩡ︀ႆ︀ၢးဢ︀မ︀ႂ်းယ︀ႃႇ “ဢ︀ေမ︀ႃꩫ︀ွေလ︀” ꩫ︀ꩫ︀မ︀်တ︀ီꩭွင︀်ႇꩫ︀ႆ︀ႇ” ꩫ︀ဝꩫ︀်ႇ။ ဢ︀ေမ︀ႃꩫ︀ွေလ︀ꩫ︀ꩫ︀ႆ︀ႇယ︀ႃႇ “ၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈတ︀င︀်းက︀ူꩫ︀်းꩭဝ်းၵ︀ိင︀်းလ︀ွေႛ” ꩫ︀ꩫ︀မ︀်။ 24ယ︀ေႃတ︀ၢတ︀်ꩫ︀ွꩫ︀်းတ︀ိꩫ︀်မ︀ႃးက︀ီး ꩫ︀င︀်ၵ︀ုꩫ︀်ꩬ︀ၢင︀်ꩡ︀ဝ်ႛထႃဝရ︀ၸ︀ြႃး ဝႃႈꩫ︀က︀ꩫ︀်ႈ တ︀င︀်းမ︀ေရ︀ီက︀ူပ︀်က︀ꩫ︀်ႈꩬ︀ီ မ︀ꩫ︀်းမ︀ႆ︀ႛမ︀ိုင︀်ႇပ︀ွင︀်ႈꩭႂ်ႛဢ︀ူ။ 25ꩫ︀ႆ︀ႇꩫ︀က︀ေႃႇ က︀ႃႈလ︀ၵ︀ႃဢ︀မ︀ႂ်းမ︀ဝ်ယ︀င︀်းမ︀ႃးယ︀ႃႇ တ︀င︀်းမ︀ꩫ︀်းꩵ︀ႈꩭူမ︀်ႈꩫ︀ွꩫ︀်း။ လ︀ၵ︀ႃယ︀င︀်းမ︀ႃးက︀ီး ယ︀ေႃတ︀ၢတ︀်ယ︀ႃႇ လ︀ၵ︀ႃဢ︀မ︀ႂ်းမ︀ႆ︀ႛယ︀ေꩬ︀ုꩫ︀ꩬ︀ီ ꩡ︀ိုဝ်ႈꩬ︀ႂ်ꩭႂ်ႛဢ︀ူ။
دیاریکراوەکانی ئێستا:
မ︀တ︀်တ︀ႄး 1: kht
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2023 (Active), Wycliffe Bible Translators, Inc. All rights reserved.