मत्ती 4
4
शैतान यीशु परीक्षा नेण
मरकुस 1:12-13; लूका 4:1-13
1तोउं परमेश्वरे आत्मा यीशु अरुणि धार घिन गई, ताकि शैतान तस लचेरयाल। 2तेन चढ़ी रोज तकर दन रात ना कुछ खउ, होर ना पिउ। त पता तस ढुक लगी। 3त लचेरणे बाड़ा यीशु भेएड़ आ त तेस जे बोलुण लगा, “अगर तु परमेश्वरे कुआ भो त बोल कि ई घोड़ रौठि बण घिए।” 4यीशु जवाब दिता, “धरमे कताब अन्तर लिखो असु:
‘मेह्णु सद रौठि बइ ना,
बल्कि परमेश्वरे हर यक बोके बइ जीन्ता रेहन्ता,
जे तसे मुंह केआं निस्ती।’”#विधि 8:3
5तोउं शैतान तस शुचा शेहर यरुशलेम घिन गा त देहरे पुठे कुणे पुठ खड़ियेर छड़ा। 6त तेस जे बोलुण लगा, “अगर तु परमेश्वरे कुआ भो त अपफ इठिआ उणिहां टऊ दी छड़; किस कि धरमे कताब अन्तर लिखो असु:
‘से तोउ केईं जे अपु स्वर्गेदूत लंघान्ता।
त से तोउ अपु कल्हाई कइ छते
ताकि घोड़े बइ तें खुर ना लगियेल।’”#छुआंरी 91:11-12
7यीशु तेस जे जवाब अन्तर बोलु, “तठि ईं बि लिखो असु कि ‘तु अपु प्रभु परमेश्वर न परख।’”#विधि 6:16
8त अखिर अन्तर शैतान तेस यक बोडे फाट पुठ घिन गा त पूरे मतोके राज्य त तेन्के धन दौलत हराल कइ तेस जे बोलुण लगा, 9“अगर तु उटेऊ में खुर बिन कइ में पूजा कराल त इ सोब अउं तेन्धे दी छता।” 10यीशु तस जे बोलु, “ए शैताना, इठिआ नश! किस कि धरमे कताब अन्तर लिखो असु:
‘तु सद प्रभु अपु परमेश्वरे सेवा कर त हमेशा तसेरी पूजा कर।’”#विधि 6:13
11तोउं शैतान तठिआ नश गा, त स्वर्गेदूत एई कइ यीशु सेवा करण लग गे।
यीशु सेवा करीण शुरु की
मरकुस 1:14-15; लूका 4:14-15
12जपल यीशु ईं शुणु कि राजा हेरोदेसे यूहन्ना कैद कइ छड़ा, त से गलील राज्य जे वापिस घेई गा।#मत्ती 14:3; मरकुस 6:17; लूका 3:19,20 13त से नासरत ग्रां छड़ दी कइ तथे कना जबूलून त नपताली इलाके कफरनहुम शेहर अन्तर बिशुण लगा।#यूहन्ना 2:12 14तोउं यशायाह भविष्य वक्ते बेलि परमेश्वर जे बोलो थिउ से पूरु भु। 15-16तेन बोलो थिउ:
“यरदन दरेउ पार, जेन बइ गलील तथ जे बथ असी,
जेस जे ‘गैर यहूदी के गलील’ बोते,
तेस जबूलून त नपताली इलाके अन्तर
जे मेह्णु अन्हारे अन्तर थिए,
तेन्हि यक टगड़ियार काई,
त जे मरणे उडार अन्तर थिए
तेन्हि पुठ यक दीया चमका।”#यशायाह 9:1-2
17तेस टेम केआं खड़ यीशु ई बोल कइ प्रचार करण लगा “अपु अपु मन बदलीण दिए, किस कि स्वर्गे राज्य नीड़ा एई गो असा।”#मत्ती 3:2
यीशु मसीहे कम त तसे संदेश
(मत्ती 4:18—16:20)
यीशु पेहला चेला भिआण
मरकुस 1:16-20; लूका 5:1-11
18पता यक रोज, गलीले तथे औत हंटते हंटते यीशु दुई भाई काए: शमौन त तसे भाई अन्द्रियास। शमौन नओं पता तेन “पतरस” रखु। से दुहे तथ अन्तर जाल छड़ण लगो थिए, किस कि से मछवारे थिए। 19यीशु तेन्हि जे बोलु, “में पता एईए, तोउं अउं तुसी शिचालता की मेह्णु में चेला कीं बणाण।” 20त से तिखेईंए जाल छड़ दी कइ तसे पता घेई गे।
21तठिआ धिक अगर घेई कइ यीशु दुई होरे भाई काए। से जबदी कुआ याकूब त यूहन्ना थिए। से अपु बोउ जोई नाव पुठ बिश कइ जाल जुढ़ेरण लगो थिए। त तेन से बि भिए। 22त से दुहे जेईं अपु बोउ त नाव छड़ दी कइ तसे पता घेई गे।
यीशु बीमार मेह्णु ठीक करण
लूका 6:17-19
23तोउं यीशु पूरे गलील राज्ये अराधनालय अन्तर शिचालता त खुश खबरी प्रचार कता हंटते रिहा, त हर किस्मी बीमारी त कमजोरी केआं मेह्णु बि ठीक कता रिहा। #मत्ती 9:35; मरकुस 1:39 24तोउं पूरे सीरिया देश अन्तर बि तसे चर्चा भुण लगी। त मेह्णु तेस केईं सुआ बीमार मेह्णु अण्हण लगे, जेन्हि अन्तर सुआ किस्मे बीमारी थी त जेन्हि अन्तर दुष्ट आत्मा भुन्तीथ, होर जेन्हि मिर्गी त अदरंगे बीमारी थी। त तेन सोब सुसुरेरि छड़े। 25तोउं त, गलील राज्य त दिकापुलिसे इलाका, यरुशलेम शेहर, यहूदिया राज्य त यरदन दरेउ ओवर-पार केआं सुआ हुसुड़ा यीशु पता पता घेण लगा।
دیاریکراوەکانی ئێستا:
मत्ती 4: pgg
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2023 (Active) Wycliffe Bible Translators, Inc. All rights reserved.