Luk 1
1
Nɔgɔngɔ
1Si ebe anɛ amagara ayɛnɛ ateb mbe bi ɛma ba ɛmɛwɛmɛ ka ɛbɔngɔ ɛjɛrɛɛ, 2nsɛrɛ si anɛ ba agbɔmba ajɔayɛ ka ɛjamannab na ba ɛragha nono Ɔsɔwɔ asighi abɔ akɛ warr. 3Erusi, mɛfɔnɔ mmanaa nete mfɛ nyɛ kpere ejo ka ɛjamannab, kpɛnɛfa ɛkɔrɔmkɔr si nyɛnɛ ka ɛtɔɔngɔ ɛtɔɔngɔ nkia, ntakpa nnɛ Teofilus, 4sɔng ɔma ɔgbɛrɛ kɛdɛdɛghɛ mbe ba ame kpene.
Arag ateb sa awɛn Jɔn Nwura alab
5Ka ngara Ɛrɔd nton a Judia ɛfɔ Njɔ Ɔsɔwɔ ya anɛsi Sakaria, ajɔ ka ɛbɔngɔ baɛjɔ Ɔsɔwɔ ka mgbanga Abija; nka wɛ Elisabɛt atamaru ka ɛbangannab Aarɔn. Ji baɛjɔ Ɔsɔwɔ wɔɔ aru. 6Mbɔ anɛ ababa afɔfɔ ka nibri Ɔsɔwɔ, anɔngɔ ajighi a Ntaa wɔɔ obe arifɔ. 7Ka abɔ arifɔ, atebsi Elisabɛt ajɔ ngo, kpɛnɛfa mbɔ anɛ ababa amokon asing.
8Ka ngara yi mgbanga Sakaria ajɔ ane noto ka nju Ɔsɔwɔ ka yɛ ajɔ njɔ Ɔsɔwɔ ka nibri Ɔsɔwɔ, 9atob nafanga, ɛsangɛ si nɛwɛmɛ baɛjɔ Ɔsɔwɔ ɛtɔngɔ, sa amo ka nju a Ntaa ama fi ɛnwanwa. 10Ka ngara ifigha ɛnwanwa asi anɛ wɔɔ ba aba ama kag Ɔsɔwɔ ajɔ kifi akag ajɔjɔ. 11Naosunosu ɛnjɛl a Ntaa aru ayimi Sakaria ka nibri, ka mgbanga ɔbɔnu ekpom ɛnwanwa. 12Ngara yi Sakaria ayiɛ, alik, ɔbɔn eneɛ. 13Ka ɛnjɛl atɔɛ: “Ɔbɔn ekiane, Sakaria; Ɔsɔwɔ amoyog njɔ ɛya. Nkawa Elisabɛt awɛn mmɔannu akia, ɔkiɛ mbeng a Jɔn. 14Mmɔ yɔ akia ntakpa ɛyɛbɛ nete, ka ebe anɛ ayɛbɛ nete, atebsi amɛ wɛn, 15ajɔ ntakpa nnɛ ka nibri Ntaa. Aki wɔ amam sa akora amam yayi, ason na Mbara Nɛfɛb jam ka nna nnyɛ. 16Ane ebe anɛ a Isɛrɛl afɛnɛ njam ama kag Ntaa Ɔsɔwɔ mbɔ. 17Jɔn atɔghɔ ba ka Ntaa aba, ka nɛwɛmɛ na nsam nasi Ɛlija, akpeghe nte bansɛ abɔ afɔ nɔkɔrɔ na abɔ a mbɔ na ba erighitama sa atama na ɛwag a anɛ ba atama na Ɔsɔwɔ ane anɛ atongo biji abri Ntaa.”
18Sakaria abɔmmɔ ɛnjɛl, “Nne nang ntama ɛbɛ ejo na? Mmɛ mmokon nka waa atam akon.”
19Ka ɛnjɛl akpɛ, “Mmɛ Gebrɛl. Nyim ka nibri Ɔsɔwɔ atom si ma ntɔa nyɛbɛ ɔka. 20Ka munu ɔgbɔghɔ ɛmɔm ɔkpam ma ɔrag nono tɛtɛ ofo bi ɛwɛmɛ, atebsi oritama ano ɛyaa, ji ɛbagha ka ngara yi Ɔsɔwɔ agara.”
21Sa anɛ ajɔ abri Sakaria akana jɛ ɛsɛrɛ ka amɔ jɔ mba arab ka nju Ɔsɔwɔ. 22Ngara yi aru arima arag nono na mbɔ. Fa ya agbɛrɛ sa amɛyɛ nibriamar ka nju ɔsɔwɔ, ajɔ arag na mbɔ ka abɔabɔ atebsi amɔgbɔ ɛmɔm.
23Ngara yi akan na noto nifa ka nju Ɔsɔwɔ, akru etek. 24Ka ma ngara, nka wɛ Elisabɛt ayibi ka amɛ arɔn ariru kifi. 25Asi, “Ntaa amene akɛm. Ka afo yafa amimkɛ ɔfa ayighim nsɔn ka amar anɛ.”
Arag ateb sa awɛn Jisɔs
26Ngara yi ɔla Elisabɛt esi amɛ asaghasa, Ɔsɔwɔ ato ɛnjɛl Gebrɛl amo ka Nasarɛt, ɛjɛbɛ ka Galili, 27sa amo ka mfo a ngɔnganɛ ya akagha gbɛrɛ munnu ka Josɛf ya aru ka ɛbangannab Debid amɛ gbɔ ka naban. Ngɔnganɛ yɔ anɛsi Meri. 28Ɛnjɛl amo akɔrɛ arag, “Mmakag nnyɔ, wɔ yi ntakpa ɔfa are nana! Ntaa are nana.”
29Meri afɔ ntakpa efegheayɔ ka ano ya ɛnjɛl aragha ka akana bagha nagana ɛkaghannyɔ jina. 30Ka ɛnjɛl atɔɛ, Meri, “Ɔbɔn ekiane, ɔfa Ɔsɔwɔ ere nana. 31Uyibiɔla ka ɔwɛn mmɔannu, ɔkiɛ mbeng a Jisɔs. 32Ajɔ ntakpa nnɛ ka abengɛ si Mmɔ a Nton Ɔsɔwɔ ya Agagaga. Ntaa Ɔsɔwɔ akiɛ oton nsɛ ji Debid, 33ka afe ɛbangannab Jɛkɔb kaˈnkankan; oton ɛbɛ nkannisi ɛfɔm.” 34Meri abɔmmɔ ɛnjɛl, “Ɛjɔ nang atebsi nkagha gbɛrɛ munnu?”
35Ka ɛnjɛl akpɛ, “Mbara Nɛfɛb abagha atɔba, ka nsam ya agagaga abona. Ka mfɔ a mmɔ yɔ ɔwɛnɛ ebengɛ si Mmɔ a Ɔsɔwɔ. 36Araggasi Elisabɛt mfono wa awɛn mmɔ ka okon ɛbɛ, ka yɛ ya aragsi are ngo akpe ɔla amɛ asaghasa munu. 37Ka nono nani erem ni Ɔsɔwɔ aragha ni arighima ane.” 38Meri akpɛ. “Mmɛ nde mmɔanju a Ntaa, nɔngɔ ɛjɔ ɛkɛm si ɔragha.” Ka ɛnjɛl atam asighɛ.
Meri Areb Elisabɛt
39Ka ngara yi Meri atongo biji amo ɛbanɛban ka ɛjɛbɛ akonkon ka ekpeghe Judia, 40ama anam ka nju a Sakaria akag Elisabɛt nnyɔ. 41Ngara yi Elisabɛt ayog nnyɔ Meri, mmɔ atam ka nna, ka Elisabɛt ason na Mbara Nɛfɛb. 42Abenge gbogbo: “Ɔsɔwɔ ama nara ka ɛbɔngɔ abaka, afɛnɛ anara mmɔ yɔ ɔwɛnɛ! 43Erunang ka ɔfa ɛtɔɔngɔm, yi nnyɛ Ntaa aba ama arebem? 44Nsɛrɛsi nyog nnyɔ Meri mmɔ atamam ka nna ateb ɛyɛbɛ nete. 45Ɛnara ɛjɔ akiɛ yi atama si ji Ntaa atɔɛ ɛwɛmɛwɛmɛ.”
Ɔsɛ Meri
46Ka Meri arag:
“Nete ɛnaa eger Ntaa
47nete ɛyɛbɛm na Ɔsɔwɔ nnanagha ɛwaa,
48yi agbɔmmɛnter
mmɔanju ɛwɛ yi ndisi jaji.
Jam munu sɔng isi anɛ ba eying wɔɔ na ji ɛbagha kisi abengem si ɛnara,
49mfɔ a nsam amene ntakpa ejo akɛm
nɔfɔ ya are mbeng ɛyɛ.
50Ɛkpɔgisi ɛjɛ ɛjɔ ɛkɛ anɛ ba akpe ɔbɔn ɛbɛ,
ka eying wɔɔ na ji ɛbaghaba.
51Amene atakpa mbe ka nsam ɛyɛ;
akama anɛ ba atab biji ka nkana mbɔ.
52Ataba aton nsam ka oton mbɔ
atab anɛ ba asɛnɛ biji ayar.
53Akɛ anɛ ba njan atinga mbe
ka akama anɛ ba akpekpe amo abɔabɔ.
54Amanagha abɔanju ɛbɛ Isɛrɛl,
ka ɛkpɔgisi ɛjɛ agbɔmbɔnter
55Abraam na ɛbangannab ɛjɛ kaˈnkankan,
sa atɔ bansɔjɛrɛ.”
56Meri ajɔ na Elisabɛt nasi amɛ asa ka akru ɛjɛbɛ ɛjɛ.
Sa Awɛn Jɔn Nwura alab
57Si ngara asi yi Elisabɛt awɛn mmɔ wɛ, awɛn mmɔannu. 58Sa agbaetek ɛbɛ na abɔannyɛ ayog si Ntaa amɛ bri ɛkpɔgisi, ayighi nanɛ.
59Ngara si mmɔ asi afo anaghanɛ aba ama akɛbɛ ndor, ka akpogoro mbenga nsɛ ji Sakaria ɔban, 60ka nnyɛ atɔ mbɔ, “Nasang! Ma bengɛ si Jɔn.”
61Atɔɛ, “Nnɛ wawi arem ka ɛbɔngɔ abɔannaja ya akpe mbeng yifa.”
62Arag na nsɛ mmɔ ka abɔabɔ, sɔng agbɛrɛ mbeng yi akɔrɛ sa akɛ mmɔ. 63Abɔmmɔ ɛkpaghante ɛyɛnɛ a mbe, ayɛnɛ, “Mbeng ɛyɛ anɛsi Jɔn,” anɛ wɔɔ biji ɛkpɔmbɔ. 64Naosunosu, nnyɔ ɛbɛ eribi ka ninibi ɛnɛ ɛnagha, ajam nono naragha, atighi Ɔsɔwɔ. 65Agbaetek wɔɔ ɔbɔn ene mbɔ ɛkɔnɔ bɛjɛbɛ akonkon bi ere ka akpeghe Judia anɛ ajɔ arag ateb mbe bi wɔɔ. 66Kpere nnɛ ya ayog mbe bi akana ateb, abɔmmɔ, “Ka mmɔ yɔ abagha ama jɔ jɛ?” Atebsi nsam Ntaa are nanɛ.
Ɔsɛ Sakaria
67Nsɛ ji Sakaria ason na Mbara Nɛfɛb arag ji Ɔsɔwɔ aribi atɔɛ:
68“Nakagha ɛjɔ ɛkɛ Ntaa, Ɔsɔwɔ Isɛrɛl,
atebsi amaba ama anagha warr anɛ ɛbɛ.
69Ɔsɔwɔ amoto ntakora nnɛ akɛ warr
aru ka nju a mmɔanju ɛwɛ Debid sa anagha warr
70(sa asing ka biji afɔ abono ɛyɛ ba ɛmɛnɛ arag),
71anagha warr ka ɔbɔ anɛ ba ujing
na anɛ ba ɛsagga mbɔ wɔɔ
72sa atɔngɔ akuansisi ɛyɛrɛ ɛkpɔgisi
afɛnɛ agbɔnter mfɔ a ntama ɛyɛ,
73sa atere na nsɔjɛrɛ Abraam:
74sa anagha warr ka ɔbɔ anɛ ba ujing ɛbrɛ,
sɔng ɛma ɛkaghɛ eribɛ ɔbɔn
75ka nɔfɔ na ɛnɔngɔ ajighi ɛyɛ ka afo a nekpen ɛnɛrɛ kpakpa.
76Ka wɔ, mmɔ waa, abenga si mbono Ɔsɔwɔ bi Ɛgagaga;
ka wɔ ɔgbɔghɔmba omo omotongo nte anɛ ka Ntaa aba,
77ane anɛ agbɛrɛ nanagha Ɔsɔwɔ
sa atamasighi mbɔ ka abibi afɛ,
78atebsi Ɔsɔwɔ ɛbrɛ akpe ntakpa ɛkpɔgisi,
nnanagha ɛwɛrɛɛ njon aru ka bɔsɔ aya atob warr
79ɛmaya atob anɛ ba are ka ejingi
na ba abɛghɛ ɔbɔnɔ nuku,
sa ɛbaba ɔta nɛjɛn ɛbrɛɛ ɛjɔ ka nanaa.”
80Jɔn abenge ka biji na ɛwag; ajɔ ka eyomo tɛtɛ aru jaja ama ajam naragha ano Ɔsɔwɔ atɔ anɛ a Isɛrɛl.
دیاریکراوەکانی ئێستا:
Luk 1: NDD Nta
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
©️2022 Luke Initiative for Scripture Translation