Matíe 3
3
Zán Batísɩ cí Lagɔ̀wɔ̀lɩ̀ɛ̀
(Málɩ́kɩ 1.2‑8; Lúkɩ 3.15‑17; Záan 1.19‑28)
1Bhʋ́ a tányɩɛ́, Zán Batísɩ yi Zudée a bhlɩ́ a zɩkpɩkɔfʋ́ a mnɩ́, ɔ́ pá wɔlɩ́ 2ɔ́ nie: «A cɩ́cɩ á nɩnɩgbɩ mà Lagɔ a Léyibhlɩɛ́ a yiyitanyɩ ya ʋ́ mɛ́.» 3Ɔ́mɔ́ Záan Batísɩɛ́, ɔ́ wɔlɩ́ Lagɔ a nékʋ́cinyɔ Ezayíi cíé wá mà:
Nyɔ pá wɔlɩ́ zɩkpɩkɔfʋ́ a mnɩ́,
Ɔ́ cíé lé ɔ́ nie mà,
A gɩglà Kanyɔ a nyúzɔ̀ɔ̀!
A srí ɔ nyízɛ̀ɛ̀ sá. # 3.3 A zɛlɩɩ sáà Eza 40.3.
4Záan pla mnamneku kotu mʋ́, lé ɔ́ gʋa mneku bɛ̀tʋ mnɩ́. Ɔ́ lie kpáàkpɩ́, lé ɔ́ mɛlɛ lovúkpʋ. 5Zelízalɛ́mʋ yà Zudéebhlɩɛ́ a mnɩ́ a nyʋaá sɔ́, lé Zrʋdɛ́ɛnyié gɔ̀ a nyʋaá a lɔ̀fɩ́ɛ́, á yió gɔ̀, 6lé á sa á nyumoé mnɩ́, lé Záan ŋwʋ́ɛ́ á nyú wlú Zrʋdɛ́ɛnyié a mnɩ́.
7Záan yɛ́ kɔ́ɔ̀kʋ́ Falizɩ́ɛnyʋaá yà Sadisɩɛ́nyʋaá sɔ́ a kpá lé á yió gɔ̀ nyú wlú ŋwʋ̀ ka a, ɔ́ srʋ á mà: «Mónyùmònyʋa yɩ, amɔɔ́ nyù mnɩ́ bɛbɛlɩ bhísakʋ́ a, ɔ̀ pápa amɔ cémʋ́ á nie lé á gúle Lagɔ a dɩŋwʋ̀yrùò ʋ̀ yie áa? 8A nɩ námagbɩ, wɔlɩ́ɛ́ a na ká nɩ lé ɩ̀ kà nyʋa srʋ mà a ya cɩ́cɩ a! 9A ná srʋ flɛ́flɛ̀sa a nyoku mà: À tɩtɔ ɔ̀ ŋwɔ́ɔ Ablaámʋ. Mà náa yie lɛ́ amɔ srʋ ka mà, Lagɔ nɩ wà a, ʋ́ yi cɔ́kpalɩ́ɛ́ lɩ̀à Ablaámʋ a yúó mʋ́ pláa. 10A lɛ́bhɛɛ, dɔ̀mɛ̀ɛ̀ ya yrɩ̀lɩ̀ ɛ ká suó a bhlíkpié dédìè: suó ʋ̀ nɩ́ trʋ námabhi a, áa dí ʋ́ kʋ́ lé á pálʋʋ́ kosuú.
11Mɔ́ɔ, náa ŋwʋ́ɛ́ amɔ nyú wlú lé a ká a nyumogbɩ̀ɛ̀ fɩ́ɛ́ a gbʋ́ wlʋ́, mà nyɔɔ́ ɔ̀ yie mɔ́ɔ bɩ́ a, ɔ́ ka fɩ́ lé ɔ́ zi mɔ́ɔ kʋ́. Nɩ́ ɔ sí a mɔ̀ɔ sasʋ́ neé bhɩa. Ɔ́mɔ́, Blɔ̀blɔ̀zùzùò yà kosu sɔ́ mʋ́ ɔ́ na ká amɔ nyú wlú ŋwʋ́. 12Ɔ́ gbá bɩ́tɛ́ɛ́ mʋ́ ɔ́ na ká pʋ a wlɩɩ́, ɛ́mɛ́ ɔ́ na ká bhá lé ɔ ká fɩfɩɛ́ yà yʋ́ɔ́ sɔ́ yɩ́ sɩsa à. Ɔ ká yʋ́ɔ́ wlʋ kʋ ŋwʋ́, ɩ́zà fɩfɩɛ́, ɩ́mɩ́ na ɔ ká kosuú páa lé ɩ ká si. Bhʋ́anɩ kosuó ʋ̀ nɩ́ nyúmo kɔ́ɔ̀kɔ́.»
Zán Batísɩ ŋwʋ́ Zozíi nyú wlú
(Málɩ́kɩ 1.9‑11; Lúkɩ 3.21‑22)
13Tányɩ a múó Zozíi wlʋ́ Galilée, lé ɔ́ yi Zrʋdɛ́ɛnyié gɔ̀ Záan kɔ́ɔ́ nyú wlú ŋwʋ́. 14Záan nɩ́ fɩ́ɛ́ ŋwnʋ́ʋ̀, ɔ́ srʋ Zozíi mà: «Mɔ̀ kà lé ɔ̀ kà mɔ́ɔ nyú wlú ŋwʋ́ a, mɔ̀ yie lé ɔ̀ nie mà, mɔ́ɔ nɩ̀ ŋwʋ́ mɔ̀ nyú wlúu!» 15Zozíi anɩ́: «Ŋwnʋ́ lé ɩ nilo mà sɩ́tɛ̀ mʋ́ Lagɔ yrálɩɩ́.» Zozíi cí sɩ́tɛ̀ a, Záan ɔ́ɔ ŋwnʋ́ yɩ́. 16Lé Záan ŋwʋ́ Zozíi nyú wlú lé ɔ́ wlʋ́ nyɩ́é. Mà ɔ́ wlʋ́ kɔ́ɔ̀kʋ́ nyɩ́é a, lagɔ kalɔ klʋ́ ɔ́ zà, lé Blɔ̀blɔ̀zùzùò kwlíloó jɩ̀ kpóòkpú bhísakʋ́. 17Lé niwɔlɩ wlʋ́ lagɔɔ́ lé ɩ́ kwlíi, ɩ́ anɩ́: «Ɔ̀lɩa, ŋwɔ́ɔ ná Wàwàyʋ ɔ́mɔ́ ɩ́ gbázɩ̀ mʋ́!»
دیاریکراوەکانی ئێستا:
Matíe 3: NEY
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© (Active), Wycliffe Bible Translators, Inc. All rights reserved.