S. Juan 7
7
3. Jesús mu k'at ira' ten u winiko'
(7.1—12.50)
Muj ch'ei'ko' u t'ʌn a Jesús ten u yits'ino'
1Pachi mʌni mo ne ya'p k'in, Jesús ti bij mʌn ix Galilea, mu' k'at u mʌn ix Judea, toj u yej ne poch kinsa' ten a judíos. 2Xok'o u k'uchu u k'ini a ku metko' u yo'cho' a judíos y ku metko' cho pʌsa a bex toj lik' a'a ten K'uj uchik, 3U yits'ino' a Jesús tu yao' ti' a Jesús:
—Ma' p'ʌta way, xen ix judea ti u yiriko' bexi' a kʌ'sa winiko' a ba' ka metik. 4A mok poch u k'o'ota' ten a winik muj ta'kik a ba' a ku metik, a tech ka metik ne ya'p ba', cha'e u laj irik tu woro a winik yok'o a lu'm.
5Tu yao' bex, tu bexi' tio' muj ch'ei'ko' u t'ʌn a Jesús. 6Jesús tu nuka tio':
—Mo' k'uchuk u k'ini ten, chen a teche'x tak xik lara k'in tsoy. 7A mok lʌji' u winik a lu'm mʌnʌ' u p'aktike'x a teche'x, chen a ten ku p'aktiken yok'o tuku ki ei'k tu woro a ba' mo tsoy ku metko'. 8Xene'x ta jʌne'x teche'x, a ten mij bin tu mo' k'uchuk u k'ini u p'is in bin.
9Chen ts'o'ki u yei'k ti bex, Jesús p'atij ix Galilea.
Jesús bini ix u yo'cho' a judíos a ku metik cho pʌsa a bex a'a ti K'uj lik' uchik u metko'
10Chen bino' u yits'ino' a Jesús, bexi' ti bini a tu ku metko' u yo'cho' a judíos, chen mix mok tu ya'ti', ta'kbi xik. 11A judíos tu kʌxto' a Jesús tuku metko' u yo'cho' y ku yei'ko':
—¿To' tu tiʌ a lay a xi'ra?
12Y ne pim winik tʌn jumo' yok'o a Jesús, tax jujuntu tʌn u yei'ko': «A lay a xi'ra ne tsoy u tuku»; y u jero' ku yei'ko': «Mo' tsoy u tuku, a lay ku tusik a winik.»
13Chen mix mok ku yei'k tu pimai yok'o a Jesús, tu sajak tio' a judíos.
14Chen chumuk u ts'oko u jʌno', Jesús bini ix u yatoch K'uj ij chu'mpʌ u kʌ'sa. 15A judíos peknʌ u yoro' y tu yao':
—¿A ti' mo' naj kʌju'nʌ y bik tu yetki ne ya'p ba'?
16Jesús tu nuka tio':
—A ki kʌ'sik mo' ten in t'ʌn, lʌji' u t'ʌn a mok tu tuchi'ten. 17A mok poch u metik a baij u k'at K'uj, je'e u yirik wa in kʌ'sa ti' u tar ti' K'uj o in bʌje in t'ʌn kin wei'k. 18A mok ku tsikbʌtik u t'ʌni', jari ti' ku kʌxtik u yira tsoy, chen a mok ku kʌxtik u yira tsoy a mok u yʌ tuchi'tik, a lay lʌji' jach u taji ba' ku kʌ'sik y mʌnʌ' ti' k'as ba'.
19»A Moisés tu ye'sa teche'x u t'ʌn K'uj a tu ts'ipta' uchik, chen teche'x mo' ta meta a baij tu ya'a. ¿Biken poch a kinsikene'x?
20A winiko' tu nuko' ti':
—¡Yʌn kisin tech! ¿Mok poch u kinskech? 21Jesús tu nuka tio':
—Jump'e ba' ta wire'x in metik y lʌji' yok'o tu taj laj pesa a worex. 22A Moisés tu ya'a a metke'x a bex ka k'upke'x chichin u yot'e tuku ch'ur a cho mejen, (tak mo' ti' u tar ti Moisés a tuba u jach tar lʌji' u ka nukio') a teche'x kaj circuncidatik#7.22 Circuncidatik: A je' lʌji' a t'ʌrʌ' u metko' u chuni ka'chik u winki israel a ku k'upik chichin u yot'e tuku ch'ur a meje xirao' ti' u ye'sik lʌjio' u winiko' K'uj a xi'ra tak lʌji' u k'ini a ku je'sik u bʌjo' a judíos. 23Wa ka circuncidatik a xi'ra u k'ini ku je'sik u bʌjo' a judíos ti' a metik u t'ʌn K'uj a u ts'ibtamʌ Moisés uchik, ¿biken ka ts'ikte'x ti ten tu ti ts'ʌka a xi'ra u k'ini ku je'sik u bʌjo' a judíos? 24Ma' wei'k t'ʌn ti' a boje'x wa jai' ti tech mo' tsoy, yʌnti' a yʌ irik wo jach taj a ba' ka wei'ke'x.
¿A je' lʌji' a Cristo?
25Tax jujunto' a mok u winki Jerusalén tʌn yei'ko':
—¿A je' mo' lʌji' a tʌn u kʌxta' ti' u kinsa'?
26Tu nuka u jer:
—Ka wirik tʌn u t'ʌn tu pimai y mix mok ku yei'k ba' ti'. ¿Wa mo' aj weso' tu tu tukro' jach lʌji' a Cristo a lay a xi'ra? 27Chen a to' ajkej tuba u tar, chen ka' jach tak a Cristo mix mok ku bin u yuete tuba u tar.
28Ka tu yua a Jesús bex ku yei'ko', chu'mpʌ u kʌ'sa yok'o u yatoch K'uj, y ne k'ʌ'm tu ya'a bex:
—A k'o'mene'x moken y bexi' a we'ex tuba in tar, a ten mo' in bʌji' tin li'sa t'ʌn tuj taren, a ten tu tuchi'ten K'uj a mok a teche'x ma' k'omo'e'x. 29A ten in k'o'mʌ, toj ti in tar ti' y lʌji' tu tuchi'ten. 30Y tiʌ mo' ne pim poch u chujko' a Jesús, chen mo' tu chuko' tu mo' k'uchuk u k'ini u chuka'. 31Y ne pim tu yakso' tu yoro' ti' y tʌn u yei'ko':
—Ka tak a Cristo, ¿yʌn wa je'e u más e'sik u metik ba' yete u muk' K'uj a bex a je' ku metik?
U winiko' a judíos a ku ya'batio' fariseos ku tuntiko' u chujko' a Jesús
32U winiko' a judíos a ku ya'batio' fariseos tu yuo' baij ku yei'ko' a winiko' yok'o a Jesús, y tio' yete u t'ojio' a moko' ku meajo' yok'o u yatoch K'uj, tu tuchi'to' a mok lʌjio' u yʌjkʌni u nʌji K'uj ti' u bin u chuko' a Jesús. 33Chen Jesús tu ya'a:
—Ti'en yete teche'x mo' ne ya'p k'in y pachi binikaj ka' sut tu tiʌ a mok tu tuchi'ten. 34Binaka' kʌxtene'x chen mʌnʌ' a wikene'x, a tu ki bin a ten teche'x mo' bik a tare'x.
35A judíos chu'mpʌjo' u k'atko' yete u bojo':
—¿To' tu ku bin a je' a xi'ra tu mo' bin aj ka' irik? ¿Yʌn ti' ku bin ti' a judíos a laj ch'ikibino' tu tio' a griegos o ti' ku bin u kʌ'se tu tio' a mok mo' judíos? 36¿Baij u k'at u yei'k tuk'in tu ya'a: “Binaka' kʌxtene'x chen mʌnʌ' a wikene'x, a tu ki bin a ten teche'x mo' bik a tare'x”?
A uk'un a ku ts'ek u kuxta a winik
37A lʌji' u k'ini u ts'oko a ku metko' u yo'cho', Jesús lik' ch'ikta y ne k'ʌ'm t'ʌnʌ y bex tu ya'a:
—Wa yʌn mok uk'a, u tar ti ten y ka uk'anʌk. 38A mok ku ch'eik in t'ʌn, a bex ku yei'k u t'ʌn K'uj, yok'o u pixʌn binukaj jok'o u yik' a ja' y ne ya'p uk'un ku bij aka', a lʌji' ku ts'ek kuxta.
39A Jesús tu ya'a a je', a mok ku yaksik tu yor ti' binukaj tar ti' u Pixʌn K'uj, chen tu mo' k'uchuk u k'ini u kimi y ka' lik'i tuka kuxta, bein mo' tey tarak u Pixʌn K'uj.
A winik tʌn u jʌtsik u bʌjo'
40Yʌn tax jujuntu tu pimai a winik ka tu yuo' a lay a tsikba, tu yao':
—A je' a xi'ra jach lʌji' a profeta.
41U jero' tʌn u yei'ko':
—A je' lʌji' a Cristo.
Chen u jer tʌn u yei'ko':
—¿Yʌn ti' ku bin tar a Cristo ix Galilea? 42¿Muj yei'k yok'o u t'ʌn a K'uj tu ts'ibʌ', yok'o u ka' ti'a a David, y yok'o Belén, a tuba lʌji' u kʌjta a David, ti ku bin tar a Cristo?
43Bein a winiko' tu jʌtsa u bʌjo' yok'o a Jesús. 44Y yʌn tax jujuntu poch u chujko' a Jesús, chen mix mok tu chuka.
¡Mo' naj ira' u t'ʌn xi'ra bex a je'!
45A moko' u yʌjkʌni u yatoch K'uj suto' tu tio' u winiko' a judíos a ku ya'batio' fariseos y bexi' tio' u t'ojio' a moko' ku meajo' yok'o u yatoch K'uj, lʌji' ka tu k'ata tio':
—¿Biken mo' ta tase'x a Jesús?
46A u yʌjkʌni u yatoch K'uj tu nuko':
—¡Mo' naj ira' u t'ʌn xi'ra bex a je'!
47Ka tu yao' u winiko' a judíos a ku ya'batio' fariseos:
—¿Bexi' teche'x laj tuse'x? 48¿Yʌn wa tu yakso' tu yoro' ti' junturi' ak wesio' o u winiko' a judíos a ku ya'batio' fariseos? 49Chen a je' a winiko' mu' k'omo' u t'ʌn K'uj a u ts'ibtamʌ Moisés uchik, K'uj ne ts'ik teche'x.
50A Nicodemo a lʌji' fariseo aj bini u yire a Jesús jump'e k'in, tu ya'a tio':
51—¿U t'ʌn K'uj a u ts'ibtamʌ Moisés uchik ti' to' muj yei'k, ti' u bo'tik u si'pi a xi'ra, yʌnti' a ya uik' baij ku yei'k y ak etik baij tu meta?
52Tio' tu nuko':
—¿Bexi' tech lʌjiech u winki Galilea? Ki xake u t'ʌn a K'uj y je' a wirik tita ku yei'k mo' naj jok'ok junturi' profeta yok'o Galilea.
A ch'upra a ku tusik u lak' yete u jer
53Pachi, laj bino' jujuntu jujuntu ix u yatoch.
دیاریکراوەکانی ئێستا:
S. Juan 7: PLacNaha
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Sociedad Biblica de México AC