Jone 5
5
Mae Jisas fakarhini kaisei mae te fogra na ka narane Sabat na
1Kaisei fata ke leghugna igne, mae Jisas neke haghe Jerusalem malagna kaisei nodi gaghamu biꞌo hatimare mae Jiu. 2Jare Jerusalem au kaisei kholo rhegna grengatha te kiloi mare nogna “Grengatha Sipu”. Kholo tuana mae Jiure kiloni Betsata. Rhegna kholo tuana au glima grorofe brahu. 3Kmana naikno thuru ka suga tuare. Naikno igre au kmana nafnata khabru tadi. Kehare dofu, kehare lehehi ghahedire nei kehare blughu. Engel nogna Lord na soru mei leuleghu fata mala fakaploni kholo tuana. 4Mae ihei ka hatimare te au khabru tagna nu kulu soru kate kaplo teu kholo na teuna, mana nake keli fapulo nogna. 5Kaisei mae te thuru teu jare na mana fogra fabrahu nabagna tolufulu nhana finogha. 6Kate mei te filoni mae igne na, mae Jisas laseni mae igne fogra fabrahu funu tifa. Aonu, mae Jisas ne ghusna eghu ka mana, “Ghema, iagho magnahaghei teke keli nou sia?”
7Mae te fogra igne ne cheke eghu ka mae Jisas, “Mae biꞌo, iara magnahaghei teke keli nogu, nu iara theo kaisei mae te mala togho ghau te lao ka vido te kaplo teu kholo na. Leuleghu fata na iara fariuriu te mala kulu lao ka kholo na eghu, nu theome tangomana eghu naugna kaisei mae nga te kulu tei na ame iara nga eghu.”
8Aonu, mae Jisas ne cheke eghu ka mana, “Kegra haghe, pipiri nou khifra na, nonolo tei ka sugamu na.” 9Theome raugha mana neke keli nogna. Mana pala nogna khifra na ne tei ka nogna suga na.
Narane te fakelini mae Jisas mae te fogra na igne narane Sabat, nodi narane blahi hatimare mae Jiu. 10Aonu, hatimare mae biꞌodi mae Jiu igre ne cheke eghu ka mae teke keli fapulo na, “Gognarogne narane Sabat. Thono blahi fara ka noda vetula tahati na te pala iagho nou khifra na kau narane Sabat gne.”
11Nu mana ne cheke eghu ka mare, “Mae teke fakeli ghau iara na, neke cheke ghau iara te mala hata nogu khifra na.”
12Hatimare ne ghusna eghu ka mana, “Ghema, mae ihei teke cheke nigho iagho te mala hata nou khifra na te mala nonolo te tei na?”
13Nu mae teke keli fapulo na theome laseni mae ihei teke fakelini mana na. Naugna kmana naikno fara au tekeu ka vido tuana. Aonu mae Jisas ne megei nga ne jifla ne tei nogna.
14Kaisei fata ke leghugna igne, mae Jisas neke filoni mae igne ka Sugablahi na. Mae Jisas ne cheke eghu ka mana, “Filo sagho, iagho gognaro na kela kelihi. Eghume iagho gognaro na thosei ke eni kaisei glepo te diꞌa, na eghunu ke thoke nigho iagho kaisei glepo ke diꞌagna ignei eghu.” 15Aonu, mae igne laseni mae Jisas ne tei cheke eghu ka mae biꞌodi mae Jiure, “Mae teke fakeli ghau iara na, nanghagna na mae Jisas!”
16Aonu funu ka narane tuana, hatimare mae biꞌodi mae Jiure ne theome magnahagheini mae Jisas. Mare mei ka mae Jisas ne funu cheke faparini mana, naugna mana ne fakelini mae igne kau narane Sabat te blahi fara kau vetula na. 17Nu mae Jisas ne filo glanidi gaoghathodi mare re ne cheke eghu ka mare, “Mae Kmagu iara na theome gnafa ka gloku. Eghume iara na loku la.” 18Kate nomhidi mae biꞌodi mae Jiu gre cheke te edi mae Jisas igre, mare fariuriu fara te mala faleheni mae Jisas. Theome naugna te huhughuni mana vetula eigna narane Sabat na kolho, nu mana ne kiloni thegna mae Thugna God. Gaoghathogna igne mana magnahaghei te kaisei ngala balugna God.
God ne tusu lao u nolaghi ka mae Thugna na
19Mae Jisas ne cheke eghu ka mae biꞌodi mae Jiure, “Tutuani fara te chekeni iara ka ghotilo na. Iara mae Thugna God na, theome tangomana te eni kaisei glepo leghuni u gaoghathogu thegu na. Iara edi kolho unha glepo teke filodi thegu te edi mae Mama re. Eghuteuna unha te edi mae Mama re tuare ngala te edi la iara re. 20Mae Kmagu iara na namha ghau iara mae Thugna na nei mana falalase ka iara gobigna lepo te edi mana re. Mana ginauna falalase ka iara u gloku ke biꞌodi te edi iara igrei, eghuteuna ghotilo ginauna kafe jaglo nomi fara ka thoke meidire. 21Mae Kmagu iara na tangomana teke fakarha fapulodi naikno teke lehehire. Eghume iara mae Thugna na ginauna eghu la ke tusu lao u karha ka iheire te vahidi iara re. 22Jaola ngau mae Kmagu iara na theome fateni kaisei naikno. Nu mana la tusu meihi ka iara mae Thugna na u nolaghi te mala fate naikno na. 23Mae Mama ne eni igne mala ghatho tahu ghau iara mae Thugna na naikno te gnafare, jateula ngau mare te ghatho tahu nila mae Kmagu iara na. Mae ihei te theome ghatho tahu ghau iara na, naikno tuana theome ghatho tahu nila mae Mama mae ihei teke kuru mei ghau iara na.”
24Mae Jisas ne cheke eghu ka mare, “Tutuani fara te chekeni iara ka ghotilo na. Mae ihei te nomhidi nei leghudi teu u nogu cheke iara re, nei fatutuani ni Mama mae ihei teke kuru mei ghau iara na teuna, mana na athini u karha te theo ka huigna na. Mae tuana iara na theome fate faleheni mana, naugna mana jateula mae ihei teke lehehi nu ke karha fapulo teu ia eghu. 25Tutuani fara te chekeni iara ka ghotilo na. U narane na la meihi, la kulu auhi agne, kau narane tuana naikno teke lehehira ginauna nomhi ghau iara mae Thugna God na. Eghuteuna naikno nate nomhi ghau nei leghu ghau teu iara tuare na athini u karha na. 26Uve, u thofno karha na mei funu ka thegna mae Mama. Eghume mae Mama neke snakreni ka iara mae Thugna na mala tufa u karha tuana ka ihei te nomhi ghau nei leghu ghau teu iara na. 27Eghuteuna mae Mama neke tusu ranghi ghau iara u nolaghi te mala fate na, naugna iara neke mei funu ka mana.
28 “Thosei jaglo nomi ka cheke iara igre. U narane na la namo meihi, kau narane tuana naikno teke kafe lehehire ginauna nomhi ghau iara. 29Aonu mare ginauna kafe jifla mei ka bekudire. Iheire teke edi koba gloku te keli tifa re mare ginauna karha fabrahu. Nu iheire teke edi koba glepo te diꞌare mare ginauna au papara fabrahu. 30Iara theome tangomana te eni kaisei glepo leghuni u nogu gaoghatho thegu na. Iara tangomana te fateni naikno na leghuni unha te chekeni mae Mama na. Eghume unha te fatedi iara naiknore thofno doglo fara, naugna iara theome fariuriu loku leghudi kolho unha glepo te magnahaghedi iara thegu re, nu iara loku leghudi kolho unha glepo te magnahaghei mae teke kuru mei ghau na.
Mae Jisas na Thugna God
31 “Jame toutonu eigu thegu iara ka naiknore meuna, mare ginauna theome fatutuanidi unha glepo tutuani te chekedi iara re. 32Nu kaisei mae ngau te au teu te mala cheke eigu iara ka naiknore, eghuteuna iara laseni unha te chekedi mana eigu iara re thofno tutuani fara.
33 “Mae igne nanghagna na, mae Jone. Ghotilo neke kurudi keha mae neke tei ghusnani mana eidi gobigna lepo te edi iara igre. Eghuteuna unha teke chekedi mana eigu iara igre thofno tutuani fara. 34Iara theome lelheghu ka naiknogna nauthoglu gne te mala chekedi unha te edi iara re tutuani fara teuna. Nu iara chekeni ka ghotilo igne mala fatutuani ghotilo mala athani u karha fei tifa na. 35Mae Jone gne jateula kaisei juta te faghano phae te mala filo fakelini u nabrou te tei ka God ia eghu. Eghuteuna katha vido ikoi ghotilo neke nomhidi chekegna mana re neke gleale'a fara.
36 “Nu glepo te edi iara igre, ke biꞌodi teke chekedi mae Jone rei, naugna u kofubobhoi te edi iara igre neke edi kau nogna nolaghi mae Mama neke famei ka iara. Eghuteuna u kofubobhoi te edi iara igre u fagaglana gna mae Mama teke kuru mei ghau iara na. 37Uve, mae Mama mae ihei teke kuru mei ghau iara na, mana thegna neke cheke eigu la iara. Ghotilo neke theome nomhini u naoglagna mana na, nei theome filoni la mana. 38Eghuteuna chekegna mana re theome au ka nagnafami ghotilo re, naugna ghotilo ne theome fatutuani ghau iara mae teke kuru mei mae Mama gne. 39Famane hiro fakelidi si ghotilo u gaoghathodi u grioriso te blahi gne, naugna ghotilo gaoghathomi ka glepo igre na, te tusu ranghi ghami u karha fei tifa na eghu. Eghuteuna u grioriso te blahi igre cheke eigu iara kolho! 40Neubane eghu ngau ne cheke eigu iara u grioriso te blahi gre ghotilo theome magnahagheini te mei ka iara te mala athini u thofno karha tuana.
41 “Iara theome hironi u nafnakno na ka naiknogna nauthoglu igne. 42Nu iara lase ghami ghotilo fara, naugna ghotilo theome namhani mae Kmagu iara na ka nagnafamire. 43Iara neke mei ka nanghagna mae Mama, nu ghotilo theome magnahaghei ghau iara. Nu jame kaisei mae mei ka nanghagna thegna kolho na, ghotilo ginauna fanomho ka nogna cheke mana re nei leghuni eghu mana. 44Ghotilo magnahagheidi naiknore te ghatho tahu ghami kolho themi, nu ghotilo theome fariuriu hatani u nafnakno te mei funu ka thegna God na. Eghume thono ninhigrana ghami fara ghotilo te fatutuani ghau iara na.
45 “Na eghunu ginauna mei cheke fapari ghami iara ke ulugna mae Mama na ghotilo gaoghathomire. Theo! Mae Moses mae ihei na falalase ranghi ghami u nabrou te tutuani na teu ghotilo igne nate cheke fapari ghami ghotilo na. 46Jame thofno fatutuanidi ghotilo unha teke chekedi mae Moses re na ghotilo tangomana te fatutuani ghau iara na, naugna mana neke rioriso eigu iara. 47Ghotilo theome fatutuanidi unha teke riorisodi mae Moses eigu iara igre, eghume ghotilo theome tangomana te fatutuanidi nogu cheke iara re.”
دیاریکراوەکانی ئێستا:
Jone 5: mrn
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2022, Wycliffe Bible Translators , Inc. All rights reserved.