Matthew 2
2
Da Naḻpu Atte Dumingitan Init
1Aḵ Jesus ḵad niyanaḵ ad Bethlehem atte probinsiya'd Judea si nampangatan Ari Herod. Baag-en inninggaw da ummoy ad Jerusalem we naḻpu si dumingitan init. Nalaingdae angibaga'tta pion da bituwon ḵanan. 2Dummatongda ḵad, ḵanandae nan-imus, “Dinu abenge niyanaḵe arin da Judyu? Te innilani bituwone tummoḵwaḻ si ḵapon si dumingitan inite angipaigammu si niyanaḵana, pun ummali ḵani ta inḵani andayaw ḵan siya.”
3Dingngoḻ ḵad Ari Herod sana, amoamod ḵimutna ya isuna bos atta losane iJerusalem. 4Pun impadagupna da papangat da papadi ya da mimistulun ni lintog#2:4 Da mimistulun da lintog, nibelangda bos atta amo mapatgane tagu'tta susunuddae iyIsrael te iniiggammuda lintog Moses. Naadaḻanda, ḵad dida angituttudu'tte Ugud Apudyus ya da aduadu we ugalin da danaḵḵoḻda mipanggob atta imbilin Apudyus we ḵoonda ḵan adida ḵoon. woḵ nan-imus ḵan dida nu dinu miyanaḵan ni Kristu.
5Ḵananda, “Ad Bethlehem si saḵubna'd Judea. Te impaigilin Apudyus atte profetana si awe ye ḵanana,
6“ ‘Diḵayu we awad si ili'd Bethlehem atte saḵubna'd Judea,
sa iliyu ḵapatogan si madaydayawe ili'd Judah
te da ganaḵyu maḻpuwan ni angipangat
ya angayyuwan atta taguḵe ganaḵ Israel.’ ”#2:6 Micah 5:2.
7Pune sadi, illimod Ari Herod we nangibuun aḵ ummoy nangayag atta sadi ye nalalainge tagu'ḵ angibaga'tte pion da bituwon ḵanan ta maḵaugudda ḵan siya, pun inigammuna ḵan dida ustu we timpu we nampail-an ni bituwon. 8Pun imbuunna dida'd Bethlehem woḵ ḵanana, “Inḵayu sidi, ḵad itoḻpangyu we angngit atte sanate abeng. Ḵad nu odasanyu, mipauli ḵayu sina ya ibagayu ḵan saḵon ta iyyaḵ os andayaw ḵan siya.”
9-10Dingngoḻda ḵad imbilin ni ari nallibbatda woḵ baag-en amod pagay layadda te innilada bos ḵasin bituwone innilada si damu. Ummun-una nu dida inggana'ḵ niduum atte lap-at ni boḻoye inggawan ni abeng woḵ gumminoḵ. 11Dummatongda ḵad atte boḻoy, nillumnoḵda woḵ innilada abeng ya aḵ Mary ye inana. Nanalluḵuda ta andayawda ḵan siya. Pun binuḵtanda da iiggaan da ampapatoge atodda woḵ innatodda ḵan siya buḻawan, sa ambangu we incenso we ngannonda frankincense ya sa ampatoge lanae ngannonda myrrh.
12Pune sadi, impain-inop Apudyus ḵan dida woḵ binilinna dida ta adida ogon mipauli ḵan Ari Herod. Pun siya innoyda sabali ye daḻane mipauli'tte ilida.
Sa Ummawidan Da Joseph Ad Egypt
13Napuswidda ḵad, baag-en nampaila anghel Apudyus ḵan Joseph atte in-inop woḵ ḵanana, “Bumangonḵa! Aḻam da an-ina ta umawid ḵayu'd Egypt. Ḵad inggaw ḵayu sidi inggana'ḵ ibagaḵ te annat da ibuun Ari Herod we angngit si abeng ta pagongatna.”
14Pun nabaliḵusu'ḵ Joseph woḵ innaḻana da an-ina woḵ ummoyonda'd Egypt si sadi ye labi. 15Inninggawda sidi inggana'ḵ natoy aḵ Ari Herod. Naḵwa ḵaḵna ta sa imbagan Apudyus atte profetanae ḵanana, “Inayagaḵ abengḵu ta tenana'd Egypt.”#2:15 Hosea 11:1.
Sa Magongatan Da Abeng
16Inigammun ḵad Ari Herod we siniḵapan da nalalainge tagu, amod de sangana. Pune sadi, imbilinnae magongat da losane abenge laḻaḵi ye duwan tawon ya da daampun aḵ anduwantawon ad Bethlehem ya da nampaliḵwose ili. Te nibatay si dingngoḻna'tta nalalainge nampail-an ni bituwon. 17Pun nituttuwa Ugud Apudyus ḵan Profeta Jeremiah we ḵanana,
18“Amod de mangngoḻe gilob da umibil ad Ramah#2:18 Ramah - osae ili ye umoye waḻu we kilomitro si lagudona'd Jerusalem. Sa awe si tawon 586 BC da iBabylon intallayda da iyIsrael we naḵataw ya sa sadi ye timpu inggaw amode domdom ad Ramah we isun ni naḵwa'd Bethlehem si nampagongatan Herod atta losane abenge laḻaḵi. Ramah annae angipresenta'tta andomdom atta natoyan da abengda.
te aḵ Rachel,#2:18 Rachel - asawan Jacob we pipiona ya inan da Joseph ḵan Benjamin. Imbelang da Judyu we siya inan da ili. Nilibon si adanina'd Bethlehem si nabayage timpu si daan Herod angongatan atta abenge laḻaḵi Genesis 35:16-20. Siya nibaga si annae angipresenta'tta adu we bubai ye Judyu ad Bethlehem we andomdom atta natoyan da abengda si timpun Jesus. ibiibilana da abengna.
Ḵad adipun paat maliwliwa
te naamin natoy da abengna.”#2:18 Jeremiah 31:15.
Sa Nipauliyanda Ad Israel
19Natoy ḵad aḵ Ari Herod, baag-en nampaila anghel Apudyus ḵan Joseph si in-inop ad Egypt woḵ ḵanana, 20“Bumangonḵa! Itallaynu da an-ina si ili'd Israel te nanḵaḵatoy da angongat oḵyan si abeng.” 21Pun daguse nabaliḵusu'ḵ Joseph, innaḻana da an-ina woḵ angulinda'd Israel.
22-23Dingngoḻ ḵad Joseph we aḵ Archelaus we abeng Ari Herod nipasani ye Ari'tte probinsiya'd Judea, maḵimute mipauli'd Judea. Nagangput ḵad nabagbagaan si in-inop, ummoyda si probinsiya'd Galilee woḵ bummoḻoyda si ili'd Nazareth. Naḵwa ḵaḵna ta sa Ugud Apudyus atta profetana mituttuwae ḵanana, “Mangadanan aḵ iNazareth.”
دیاریکراوەکانی ئێستا:
Matthew 2: kml
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2019 Translators Association of the Philippines (TAP), All rights reserved.