يوحنا 18
18
ئِسْرَائِيلِيْين ذ يرُوْمَانِيْين تطّْفن سِيذِيثْنغ عِيْسَى
1منْبَعْد إِ ثْࢲَادْجِيث نِّي، ئِفّغ عِيْسَى اَك يمحْضَارن نّس ࢲْوَان يغْزَار ن قِيْدْرُوْن. ذِنِّي يجّن ن جَرْدَا، ؤُذْفن ذَايس نتَّا ذ يمحْضَارن نّس. 2تُوْغَا يَهُوْذَا ونِّي إِي ث غَا يزّنْزن يسّن اَمْشَان نِّي مِينْزِي عِيْسَى تُوْغَا يتْمڒْقَا ذِنِّي اَطَّاس اَك يمحْضَارن نّس. 3صَافِي، يُوْسَا-د يَهُوْذَا غَار جَرْدَا نِّي يُوْوِي-د اَكِذس ڒْعَسْكَار، تْوَاسّكّن اَكِذس عَاوذ شَان ن يعسَّاسن زݣ يفَرِّيسِيْين أُو زِي اَرُّوْيَاس ن ڒْفُقَهَا. ؤُسِين-د س ڒفْنَارَاث ذ يصْفضَاون ذ ڒسْنَاح. 4ئِسّن عِيْسَى مَارَّا مِين ذَاس غَا يوقْعن، ئِفّغ-د غَارْسن ينَّا-ٱسن: "مِينْخف ثْرزُّوْم؟"
5نَّان-اَس: "خ عِيْسَى زِي نَاصِرَا."
ينَّا-ٱسن: "أَقَا ذ نش."
ئِبدّ اَكِذْسن يَهُوْذَا ونِّي إِي ث يزّنْزن. 6وَامِي ذَاسن ينَّا قَا ذ نش، ذوْڒن غَار ذفَّار وْضَان غَار ثْمُوْرْث.
7ينَّا-ٱسن عَاوذ: "مِينْخف ثْرزُّوْم؟"
نَّان-اَس: "خ عِيْسَى زِي نَاصِرَا."
8ينَّا-ٱسن عِيْسَى: "قَا نِّيغ-اَوم-ث ذ نش. مڒَا ثْرزُّوْم خَافِي جّم يِيْنَا اَذ ؤُيُوْرن." 9س وَاوَاڒ-أَ يكمّڒ مِين ينَّا عِيْسَى زِي قْبڒ يعْنِي <وَار ذَايِي يودَّر حَدّ زݣ يِنِّي إِي ذَايِي ثُوْشِيذ.>
10سِمْعَان بُطْرُس تُوْغَا غَارس سِّيف، ئِجْبذ-يث-يذ يُوْوْثَا زَّايس يسْمغ ن اَرَّايس ن ڒْفُقَهَا يقسّ-اَس اَمزُّوْغ اَفُوْسِي. ئِسْمغ نِّي قَّارن-اَس مَڒْخُس.
11ينَّا-ٱس عِيْسَى إِ بُطْرُس: "أَرّ سِّيف نّش غَار ومْشَان نّس. ڒْكَاس-أَ ن ڒَعْذَاب إِي ذَايِي يُوْشَا بَابَا، مَا وَار سسّغ شَا زَّايس؟"
12ڒْعَسْكَار ذ اَرَّايس نْسن ذ يعسَّاسن ن يسْرَائِيلِيْين طّْفن عِيْسَى شَرْفن-ث. 13ذ اَمزْوَارُو ندْهن-ث غَار يجّن قَّارن-اَس حَنِّين مِينْزِي نتَّا ذ بَابَاس ن ثمْغَارْث ن قِيَافَا. قِيَافَا تُوْغَاث ذ اَرَّايس ن ڒْفُقَهَا ذݣ وسݣّْوَاس نِّي. 14نتَّا تُوْغَا ينْصح يسْرَائِيلِيْين ينَّا-ٱسن قَا حْسن اَذ يمّث يجّن ن ورْيَاز خ شَّعْب.
سِمْعَان بُطْرُس ينكَّر سِيذِيثْنغ عِيْسَى
15سِمْعَان بُطْرُس ذ يجّن ن ومحْضَار نّغْنِي ذْفَارن عِيْسَى. أَمحْضَار نِّي مَعْرُوْف غَار اَرَّايس ن ڒْفُقَهَا، يُوْذف اَك عِيْسَى غَار ڒمْرَاح ن ثدَّارْث ن اَرَّايس نِّي. 16بُطْرُس يبدّ يتْرَاجَا بَارَّا غَار ثوَّارْث. ئِفّغ-د ومحْضَار نِّي إِݣ يدْجَان مَعْرُوْف غَار اَرَّايس ن ڒْفُقَهَا، ئِسِّيوڒ اَك ثْعسَّاسْت نِّي يتِيڒِين ذِي ثوَّارْث يسِّيذف-د بُطْرُس.
17ثَعسَّاسْت نِّي يحطَّان ذِي ثوَّارْث ثنَّا-ٱس إِ بُطْرُس: "مَا وَار ثدْجِيذ شك زݣ يمحْضَارن ن بْنَاذم-أَ؟"
ينَّا-ٱس: "نش، لَّا!"
18ئِخدَّامن ذ يعسَّاسن بدّن ذِنِّي، ݣِّين ثِيمسِّي س ڒفْحَم زْغَارن غَارس مِينْزِي ثسْمض. ئِبدّ ؤُڒَا ذ بُطْرُس اَكِذْسن حمَا اَذ يزْغَار.
19ئِبْذَا اَرَّايس ن ڒْفُقَهَا يتْسقْسَا عِيْسَى خ يمحْضَارن نّس ذ مِين يسڒْمَاذ. 20ينَّا-ٱس عِيْسَى: "تْبشَّارغ زَّاث إِ يِوْذَان، سْڒْمَاذغ-ثن ڒبْدَا ذِي ثمْزِيذَاوِين ؤُڒَا ذِي ثمْزِيذَا ثَمقّْرَانْت مَانِي تْمُوْنن يسْرَائِيلِيْين مَارَّا. وَار سِّيوِيڒغ وَالُو س ثنُوْفْرَا. 21نش، مَايمّي ذَايِي تْسقْسِيذ؟ سّقْسَا يِنِّي ذَايِي يسْڒِين مِين ذَاسن نِّيغ. نِثْنِي سّْنن مِين نِّيغ."
22ينَّا-ٱس عِيْسَى مَانَايَا ڒخْدّنِّي يجّن زݣ يعسَّاسن يبدّن ذِنِّي يُوْشَا-ٱس يجّن ن وسقِّيڒ إِ عِيْسَى ينَّا-ٱس: "مَا س وَاوَاڒ-أَ إِي زِي غَا ثَارّذ خ اَرَّايس ن ڒْفُقَهَا؟"
23ينَّا-ٱس عِيْسَى: "مڒَا خْضِيغ ذݣ وَاوَاڒ، إِن-اَيِي مِينْذِي خْضِيغ. مڒَا سِّيوْڒغ نِيشَان، مَايمّي ذَايي ثُوْوْثِيذ؟" 24سّنِّي يسّكّ-يث حَنِّين ذ اَمحْبُوْس غَار قِيَافَا اَرَّايس ن ڒْفُقَهَا.
25بُطْرُس يبدّ ذِنِّي يزْغَار غَار ثْمسِّي. نَّان-اَس: "مَا وَار ثدْجِيذ ؤُڒَا ذ شك زݣ يمحْضَارن نّس؟"
نتَّا ينْكَر ينَّا-ٱسن: "نش، لَّا!"
26ڒخْدّنِّي يجّن زݣ يخدَّامن ن اَرَّايس ن ڒْفُقَهَا، نتَّا يتعْنَا-د إِ ونِّي ؤُمِي يقسّ بُطْرُس اَمجُّوْن، ئِرُوْح ينَّا-ٱس إِ بُطْرُس: "مَا وَار ثدْجِيذ ذ شك إِي ࢲْرِيغ اَكِذس ذِي جَرْدَا نِّي؟"
27بُطْرُس ينْكَر عَاوذ، ڒخْدّنِّي يدّن ويَازِيض.
ئِسْرَائِيلِيْين تْهَامن سِيذِيثْنغ عِيْسَى غَار يرُوْمَانِيْين
28ؤُوِين عِيْسَى زِي ثدَّارْث ن قِيَافَا غَار ڒقْصَر ن لْحَاكم، تُوْغَا زِيش. ئِسْرَائِيلِيْين وَار ؤُذِيفن شَا غَار ڒقْصَر حمَا وَار سْحرِّيم شَا ڒْعِيذ خ يِيخف نْسن.#18.28 شَّرِيعَا ن مُوْسَى تْحرّم إِ أَيث-إِسْرَائِيل اَذ اَذْفن اَمْشَان ن لْكُفَّر ذِي ڒْعِيذ اَمقّْرَان. 29ئِفّغ-د غَارْسن لْحَاكم ذ اَرُوْمَانِي قَّارن-اَس بِيلَاطُوْس، ينَّا-ٱسن: "مَان تُّهْمث إِي غَارْوم خ بْنَاذم-أَ؟"
30نَّان-اَس: "مَعْلِيك وَار يدْجِي ذ لْمُجْرِيم، أَتَاف وَار ذَاش ثِيذ نْتِيوِي شَا ذَا."
31ينَّا-ٱسن بِيلَاطُوْس: "إِيوَا اَوِيم-ث كنِّيو، أَخَاس ثْحكْمم س شَّرِيعَا نْوم."
نَّان-اَس يسْرَائِيلِيْين: "وَار ذَانغ ثْسمّْحم شَا كنِّيو أَ نْنغ ؤُڒَا ذ يجّن." 32يوْقع مَانَايَا حمَا اَذ يكمّڒ وَاوَاڒ إِي ينَّا عِيْسَى خ ڒْموْث إِي غَا يمّث.
33سّنِّي يُوْذف-د عَاوذ بِيلَاطُوْس غَار ڒقْصَر، ئِڒَاغَا خ عِيْسَى ينَّا-ٱس: "مَا ذ شك ذ اَزدْجِيذ ن أَيث-إِسْرَائِيل؟"
34ينَّا-ٱس عِيْسَى: "مَانَايَا، مَا ثقَّارذ-ت زِي غَارك نِغ نَّان-اَش-ث خَافِي ينّغْنِي؟"
35ينَّا-ٱس بِيلَاطُوْس: "مَا نش ذ اَئِسْرَائِيلِي؟ لْأُمَّا نّش ذ اَرُّوْيَاس ن ڒْفُقَهَا إِي ش د يُوْوِين غَارِي، مِين ثݣِّيذ؟"
36ينَّا-ٱس عِيْسَى: "ڒْمُلْك ينُو مَاشِي زِي دُّنشْت-أَ. مَعْلِيك ڒْمُلْك ينُو زِي دُّنشْت-أَ، أَتَاف يمحْضَارن ينُو حَرْبن حمَا وَار وطِّيغ شَا ذݣ يفَاسّن ن يسْرَائِيلِيْين؛ لَّا، ڒْمُلْك ينُو وَار يدْجِي شَا سَّانِيتَا."
37ينَّا-ٱس بِيلَاطُوْس: "زَعْمَا، شك ذ اَزدْجِيذ؟"
ينَّا-ٱس عِيْسَى: "ثنِّيذ شك نش ذ اَزدْجِيذ. نش خڒْقغ-د ؤُسِيغ-د غَار دُّنشْت-أَ حمَا اَذ شهْذغ إِ لْحَقِيقَا. مَارَّا ونِّي يدْجَان زِي لْحَقِيقَا اَذ يذْفَار اَوَاڒ ينُو."
38ينَّا-ٱس بِيلَاطُوْس: "إِيوَا مِين ثعْنَا لْحَقِيقَا-يَا؟" وَامِي ينَّا اَمُّو، ئِفّغ عَاوذ غَار يسْرَائِيلِيْين ينَّا-ٱسن: "وَار ذَايس ؤُفِيغ بُو تُّهْمث. 39وَلَكِن ثْنُوْمم ضدْجْقغ-اَوم-د إِ يِجّن ن ومحْبُوْس ذِي ڒْعِيذ اَمقّْرَان. ڒخُّو، مَا ثخْسم اَذَاوم د ضڒْقغ إِ وزدْجِيذ ن أَيث-إِسْرَائِيل؟"
40عيّْضن س جّْهذ نَّان: "وَار د ضدْجق شَا إِ وَانِيتَا، ضْڒق-اَنغ-د إِ بَرَابَاس!" تُوْغَا بَرَابَاس ذ اَقطَّاع يبْرِيذن.
دیاریکراوەکانی ئێستا:
يوحنا 18: ريف
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە