يوحنا 16
16
1"نِّيغ-اَوم مَانَايَا حمَا وَار ثْسمْحم شَا ذِي لْإِيمَان نْوم. 2أَكنِّيو طرْدن زِي ثمْزِيذَاوِين. عَاذ اَذ د تَاس ڒْوقْث اَذَاس يتْغِير إِ ونِّي إِي كنِّيو غَا ينْغن بلِّي يتݣّ لْأَجَار إِ أَربِّـي. 3نِثْنِي تݣّن مَانَايَا مِينْزِي وَار سِّينن شَا بَابَا، وَار ذَايِي سِّينن ؤُڒَا ذ نش. 4قَا نِّيغ-اَوم ثِمسْڒَايِين-أَ ڒخُّو بَاش مڒْمِي د غَا ثَاس ڒْوقْث، أَذ تْعَقْڒم بلِّي نِّيغ-اَوم-ثنْت نش. ذݣ ومزْوَارُو وَار ذَاوم نِّيغ شَا ثِمسْڒَايِين-أَ مِينْزِي نش اَقَايِي اَكِذْوم.
سِيذِيثْنغ عِيْسَى يسڒْمَاذ خ ڒْخذْمث ن أَرُّوْح يقدّْسن
5ڒخُّو نش اَذ رَاحغ غَار ونِّي إِي ذَايِي د يسّكّن، وَلَكِن كنِّيو ؤُڒَا ذ يجّن زَّايْوم وَار ذَايِي يسّقْسِي مَانِي غَا رَاحغ. 6وَامِي ذَاوم نِّيغ مَانَايَا، ؤُڒَاون نْوم ذَايْسن ڒحْڒِيق اَطَّاس. 7أَقَا تسْڒَام ڒْحَقّ: حْسن إِ كنِّيو اَذ رَاحغ. مڒَا وَار رُوْحغ شَا، أَتَاف وَار غَارْوم د يتِيس شَا لْمُعَاوِن نِّي. وَلَكِن مڒَا رُوْحغ، أَتَاف اَذَاوم ثِيذ سّكّغ. 8خْمِي د غَا يَاس، أَذ د يسْبيّن إِ يِوْذَان ن دُّنشْت غَلْطن خ ڒْمُعْصِيّث ذ مِين يصڒْحَان ذ لْحِسَاب. 9غَلْطن خ ڒْمُعْصِيّث نْسن مِينْزِي نِثْنِي وَار زَّايِي تِيمْنن شَا. 10غَلْطن خ مِين يصڒْحَان مِينْزِي ݣُّوْرغ غَار بَابَا، وَار ذَايِي ثْࢲرّم شَا زِي سَّا ٱڒ ثْسَاونْت. 11أُو غَلْطن خ لْحِسَاب مِينْزِي لْمُفْسِيد#16.11 ذِي لْكِتَاب ن لْأَصل لْحَاكم قَّارن-ث إِ لْمُفْسِيد، يعْنِي إِبْڒِيس. نِّي اَمقّْرَان ن دُّنشْت-أَ يتْوَاحْكم.
12غَارِي اَطَّاس ن ثْمسْڒَايِين اَذَاوم ثنْت ينِيغ، وَلَكِن ڒخُّو قسْحنْت خَاوم. 13خْمِي د غَا يَاس أَرُّوْح ن لْحَقِيقَا، أَتَاف اَذَاوم د يسْبيّن لْحَقِيقَا ثكْمَاڒ. أَقَا نتَّا وَار يسِّيوِيڒ شَا زݣ يِيخف نّس، يسَّاوَاڒ إِلَّا زِي مِين ذَاس غَا يِينِي أَربِّـي. أَذَاوم يخبَّر ذِي ثْمسْڒَايِين إِي د غَا يَاسن. 14نتَّا إِي ذَايِي غَا يسمْغَارن مِينْزِي يكسِّي زِي مِين غَارِي، أَذَاوم يخبَّر زَّايس. 15مَارَّا مِين غَارس غَار بَابَا، غَارِي ؤُڒَا ذ نش. س مَانَايَا نِّيغ-اَوم بلِّي نتَّا يكسِّي زِي مِين غَارِي، أَذَاوم يخبَّر زَّايس."
سِيذِيثْنغ عِيْسَى يسوْجَاذ يمحْضَارن خ وُوْفُوْغ نّس
16 ينَّا-ٱسن عِيْسَى: "شْوِيت ن ڒْوقْث وَار ذَايِي ثْࢲرّم شَا، شْوِيت ن ڒْوقْث عَاذ اَذَايِي ثࢲرم."
17نَّان ڒبْعَاض ن يمحْضَارن نّس جَارَاسن: "مِين يخس اَذ يِينِي س وَاوَاڒ-أَ؟ ئِقَّار-اَنغ شْوِيت ن ڒْوقْث وَار ذَايي ثْࢲرّم شَا، شْوِيت ن ڒْوقْث عَاذ اَذَايِي ثࢲرم. عَاوذ يقَّار، ڒَاحقَّاش نش اَذ رَاحغ غَار بَابَا." 18قَّارن: "مِين يخس اَذ يِينِي ڒْمَعْنَا ن <شْوِيت ن ڒْوقْث>؟ وَار نفْهِيم شَا مِين يقَّار."
19ئِسّن عِيْسَى قَا رزُّوْن اَث سّقْسَان، أُوْشَا ينَّا-ٱسن: "مَايمِّي تْسقْسَام اَيَاوْيَا خ وَاوَاڒ إِي ذَاوم نِّيغ: <شْوِيت ن ڒْوقث وَار ذَايِي ثْࢲرّم شَا، شْوِيت ن ڒْوقْث عَاذ اَذَايِي ثࢲرم>؟ 20أَقَا تسْڒَام ڒْحَقّ: كنِّيو اَذ تْرُوْم اَذ تْحزْنم، وَلَكِن دُّنشْت-أَ اَذ تْفَرح. كنِّيو اَذَايْوم يِيڒِي ڒحْڒِيق، وَلَكِن ڒحْڒِيق نْوم اَذ يذْوڒ ذ ڒفْرَاحث. 21ثَمْغَارْث خْمِي تَارو، يتِيڒِي ذَايس ڒحْڒِيق ڒَاحقَّاش ڒْوقْث نّس ثُوْوض-د. وَلَكِن خْمِي غَا ثَارو اَسيْمِي، وَار تْفكِّير شَا عَاذ ذِي ڒحْڒِيق نِّي س ڒفْرَاحث نّس مِينْزِي ثُوْرو-د يجّن ن وسيْمِي غَار دُّنشْت-أَ. 22ؤُڒَا ذ كنِّيو ذَايْوم ڒحْڒِيق ڒخُّو، وَلَكِن اَكنِّيو ࢲرغ عَاوذ. ڒخْدّنِّي اَذ تْفَرْحم س وُوْڒَاون نْوم، وَار ذَاوم يتكّس ڒفْرَاحث نْوم حَدّ.
23نْهَار نِّي إِي د غَا يَاسن كنِّيو وَار ذَايِي تْسقْسِيم خ وَالُو. أَقَا تسْڒَام ڒْحَقّ: بَابَا اَذَاوم يُوْش مَارَّا مِين ذَاس غَا ثتَّارم عْلَاحْسَاب يسم ينُو. 24حتَّا ٱڒ ڒخُّو وَار ثتَّارم وَالُو عْلَاحْسَاب يسم ينُو. تَّارث اَذ تَافم، أَتَاف ڒفْرَاحث نْوم اَذ تِيڒِي ثكْمَاڒ.
25سِّيوْڒغ-اَوم مَانَايَا س ڒمْعَانِي. أَذ د تَاس يجّن ن ڒْوقْث وَار كِذْوم سِّيوِيڒغ شَا س ڒمْعَانِي. أَذَاوم خبَّرغ خ بَابَا س وَاوَاڒن نِيشَان بْڒَا ڒمْعَانِي. 26نْهَار نِّي كنِّيو اَذ تتَّارم إِ بَابَا عْلَاحْسَاب يسم ينُو. قَّارغ-اَوم بلِّي مَاشِي ذ نش إِي غَا يتَّارن ذݣ ومْشَان نْوم. 27مِينْزِي بَابَا س يِيخف نّس يتحِبَّا-كنِّيو وَامِي ذَايِي ثْحِبّم ثُوْمْنم بلِّي نش فّْغغ-د زِي أَربِّـي. 28فّْغغ-د زِي بَابَا وْضغ-د غَار دُّنشْت-أَ. أَذ ؤُيُوْرغ زِي دُّنشْت-أَ اَذ عقْبغ عَاوذ غَار بَابَا."
29نَّان-اَس يمحْضَارن نّس: "ڒخُّو شك ثسَّاوَاڒذ نِيشَان، وَار يدْجِي شَا س ڒمْعَانِي. 30ڒخُّو نشِّين نتْوَاڒَا بلِّي ثسّْنذ كُڒْشِي وَار ثحْذِيجذ وِي ش غَا يسّقْسَان. س مَانَايَا نُوْمن بلِّي ثُوْسِيذ-د زِي أَربِّـي."
31ئِنْدق-د عِيْسَى ينَّا-ٱسن: "ڒخُّو إِي ثُوْمْنم نِغ؟ 32أَذ د تَاس يجّن ن ڒْوقْث اَقَا ڒخُّو ثُوْسَا-د، أَذ تمْزدْجَاعم كنِّيو كُڒ يجّن زَّايْوم اَذ يروَّاح. أَذَايِي ثْسمْحم اَذ يڒِيغ وَاحْذِي، وَلَكِن وَار تِيڒِيغ شَا وَاحْذِي مِينْزِي بَابَا أَقَاث اَكِذِي. 33قَّارغ-اَوم مَانَايَا حمَا اَذ تيْسِيم زَّايِي ڒهْنَا. ذِي دُّنشْت-أَ ثَانِيتَا اَخَاوم ثكّ ذَايس تَمَارَا، وَلَكِن شجّْعث يخف نْوم اَقَا نش ربْحغ دُّنشْت-أَ."
دیاریکراوەکانی ئێستا:
يوحنا 16: ريف
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە