Luk 3
3
Jã ngeɗa deg baptem la mber ta
(Oo Mat 3:1-12; Mrk 1:8; Jã 1:6-9,19-28)
1Kam ɓalt kɨkõkɨlah gidaimi lo kõɓe lo Tiber Sejar lon Põsɨ Pilat i ngekõɓe dɔ dɔning Judet, Herod i ngekõɓe dɔ dɔning Galilet, Pilip i ngekõɓe dɔ dɔning Ituret kɨ dɔning Trakonit, Lisanias i ngekõɓe dɔ dɔning Abilent; 2dɔ kaglot'n Hanna kɨ Kaip ĩn nẽ bɨra ngéjamosɨ kadkarig ye, ta lo Luwah ɗe ro Jãt ngon Jakari kam dɨlalot. 3Jã lago dɔning kɨ gug dɔ bah Jurdẽ tube, a la mber ta kad deg tɔrrɨn ndid dɔ majalgt lod kɨ ɗan baptem, kamla Luwah a nyàgo majalg lod kɔ, 4kɨgo tat'n ndangɨn kam maktubt lo Ejai ngekelta kɨ ta Luwaht an: Ndi mad ko kam dɨlambot an: I ɗan go ɗob lo Bɨraɓe, i ɗan go ɗobg loa ad asɨna jerɨr. 5A utɨn hollo kɨɗen ad ɗoosɨ, mbalbo kɨɗen kɨ door kɨɗen a gand kɨber, log kɨ ɗug gɔligɔli a telɨnd kad ɗan kɨɗingg, log kɨ tɔrr njɔtnjɔt a adɨn õ tõri. 6Kamla deg tube a oon kaj lo Luwah.
7Jã el deg koosɨg'n ɗen kad ɗad baptem ye, an: Ĩn li kɔka, nõ ug elsɨ kad ãin wong'n ndɨ ɗe a? 8I teen kɨ kand nyaɗag kɨ asɨta tɔrrndi. Ot gaan kamsɨt kan: Abraham i bɔwj. M'ndɨ m'elsɨ, Luwah asɨ kad ɓai kɨ ngang ku mbalgt'n ɗan, kad teld ngan Abrahamt. 9Ke tajigla kaa, ndahn kɨnga girr kaggt woi, na kag kɨɗen'n a tee kɨ kand kɨmajal a ne, a gana lana kam horrt.
10Deg koosɨg ndɨjena anan: Jĩ ye, j'a kɨ ɗa ɗi a?
11Turd an: De'n kub loa i joo, kɨ ad kɨɗa de'n loa goto. De'n aw kɨ nyasa a ne, kɨ ɗa titbe ho.
12Ngétaalambo madg ɗen kɨta ɗa baptem ho, ndɨjena anan: Ngendooj, jĩ ye j'a kɨ ɗa ɗi a?
13Turd an: Ot taan kad tɔi dɔ nar'n gangɨn nõ.
14Ngéɗɔɔg ndɨjena anan: Jĩ ye, j'a kɨ ɗa ɗi a?
Turd an: Ot taan nar ji de madt kɨ lo ngetɔgt, ke kɨ ɗob tet ta dɔ det. Adɨn kamsɨ so kɨber dɔ nyabajisɨt.
15Deg tube ndɨ ngoon keɗengẽ, ndɨ ɔjɨn ta kamdt dɔ Jãt ke maja i Krist. 16Taa ne, Jã turd tube an: Mĩ taa m'ndɨ ɗasɨ baptem kam mant; na de mad kɨ tɔim ndɨ ɗe nõ, m'asɨ kad m'tut kɨla sanja loa al. Ĩla a ɗasɨ baptem kam Ndil Kɨkunjɗangt kɨ kam horrt tɔ ye. 17Nyatonya loa i jiat, kad ton nyako kɨ dɔ gart lon, na a kaw nyako, 18kɨ dama, na a la horr tisa kɨ horr kɨ dum tɔl.
Titbe la Jã lan mber hoita kɨmaj ho, na ad deg ngãibe kɔj madg tɔ ho. 19Na Jã ndáng Herod kɨ ngekõɓe kɨta taa Herodias kɨ i nẽ ngonkõa nẽnt. Ndánga kɨta nyag kɨmajal tube'n ɗa nõ tɔ. 20Na Herod ɗa majal kɨ tɔi 'nten ɓaitɔ, ad hɔ Jã laa dangait.
Jã ɗa Jeju baptem
(Oo Mat 3:13-17; Mrk 1:9-11; Jã 1:32-34)
21Lon Jã ɗa deg tube baptem woi ye, ɗa Jeju baptem ho. Jeju ɗa elta kɨ Luwah ɓaitɔ, dɔrã tee tan. 22Ndil Kɨkunjɗang ɗisɨ tit derrngɔt be, ɗe ndɨ dɔat. Ndi ta mad tee ko kam dɔrãt dõ an: Ĩn ɗan i Ngonɨm kɨ ngetar lom ĩn rom nelɨm sia kɨ dumbit.
Girrkooj Jeju
(Oo Mat 1:1-17)
23Jeju kɨ dɔn lon mbagɨr la mber hoita kɨmaj ye, ɓala i dɔmɨta. Deg oon anan i ngon Jojep. Jojep taa ne, i ngon Heli, 24ngon Matat, ngon Lebi, ngon Melki, ngon Jan, ngon Jojep, 25ngon Matatias, ngon Amos, ngon Hahum, ngon Esli, ngon Nage, 26ngon Maat, ngon Matias, ngon Simein, ngon Josek, ngon Joda, 27ngon Joanan, ngon Resa, ngon Jorobabel, ngon Salatiel, ngon Neri, 28ngon Melki, ngon Ad'd, ngon Kosam, ngon Elmadam, ngon Er, 29ngon Jeju, ngon Eliejer, ngon Jorim, ngon Matat, ngon Lebi, 30ngon Simeõ, ngon Juda, ngon Jojep, ngon Jonam, ngon Eliakim, 31ngon Melea, ngon Mena, ngon Matata, ngon Natan, ngon Dabid, 32ngon Jese, ngon Jobed, ngon Boaj, ngon Sala, ngon Nason, 33ngon Aminadab, ngon Admin, ngon Arni, ngon Esrom, ngon Pares, ngon Juda, 34ngon Jakob, ngon Isaak, ngon Abraham, ngon Tara, ngon Nakɔr, 35ngon Seruk, ngon Ragaw, ngon Palek, ngon Eber, ngon Sala, 36ngon Kainam, ngon Arpagjad, ngon Sem, ngon Noe, ngon Lamek, 37ngon Matusala, ngon Henok, ngon Jared, ngon Malelel, ngon Kainan, 38ngon Enos, ngon Set, ngon Adam, ngon Luwah.
دیاریکراوەکانی ئێستا:
Luk 3: MlL
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Mbai Bible Revision © Bible Society of Chad, 2015.