Seemthawhnak 3
3
Peitleng Sualnak leh Dantatnak
1 Bawipa Pathian ih vuakmi ramsa pace vanin rulpi hi a zerdeuh. Minu hemah, “Pathian ni, ‘Duum sungih thingkung pakhatkhat ih vuang nan aw thok lo,’ tiah a tan ti hngai maw?” tiah a ti. 2Minu ni rulpi hemah, “Duum sungih thingkungpawl ih vuang kan aw kho kau; 3ihmansela Pathian ni, ‘Duum laisim ih ommi thingkung ih vuang cu nan aw thok lo, a tham khaw nan tham thok lo, thamin aw taw cu ah nan thi thok’ a ti,” tiah a ti. 4Ihmansela rulpi ni minu cu, “Nan thi thok lopi; 5icatile nan awk tikah nan mit a vaang thok ih Pathian mang ii in ṭha leh sia nan tiah thok, ti a tiah hekhawh,” tiah a ti. 6Minu ni thingkung cu awkṭha leh a vuang cu mit la ngai ii in, cun tinnak mipia dingah mihiam a ik a hmuh tikah, a vuang cu a loih a aw; cun a hrekkhat cu amah rum a ommi a pumah a pia, culeh a pumah ni a aw ve. 7Cutikah an pahnih an mit a vaang ih takpalawng an ik an tiahtia; culeh theipi hnahpawl an ṭhittia ih an huhtiak nak.
8Siimla huih nem tlawh lioah Bawipa Pathian duum sungih a vah thawng an za ih mipa leh a nupi cu Bawipa Pathian hmaika in duum sung thingpawl lakah an thuptia. 9Ihmansela Bawipa Pathian ni mipa cu koin a hemah, “Khaw’h nan om?” tiah a ti. 10Mipa ni, “Duum sungah na thawng ka zaa ih, takpalawng ka ik ruangah ka thin a phang; culeh ka thuptia,” tiah a ti. 11Pathian ni, “Takpalawng na ik cu ahu ni a tan sim hmen? Aw lo dingah thu ka tan piakmi thingkung ih vuang na aw hetuhmen?” tiah a ti. 12Mipa ni, “Kamah rum omkhat dingih a ma piak mi minu ni thingvuang ma pia khawh ka awk cutang,” tiah a ti. 13Cutikah Bawipa Pathian ni minu cu, “Ahi na thilti hi itu ii maw?” tiah a ti. Minu ni, “Rulpi ni ma deuhtia khawh, cun ka awk cutang,” tiah a ti. 14Bawipa Pathian ni rulpi cu,
“Ahihi na ti rom ruangah nang cu
ramsapawl zate lakah leh
sahraangpawl zate lakah camkhaat na ii;
na pun in na vak thok,
cun na nun sung hmawh cu
leivut na aw thok.
15Nang leh minu lakkarah,
cun a ciitlangpawl leh na ciitlangpawl lakkarah,
raltiaknak ka sia thok;
na lu a tan rial thok,
cun nang ni a tawbong
na cu thok,” tiah a ti.
16Minu hemahcun,
“Nausanpiak na tuarmi vuaipi’n
ka karhsak thok;
titiak tuarin tianaupawl
na hring hngai thok,
acuhmanah na pumah hemih ik cu
na daw siksik thok,
culeh ani ni a tan uk thok,” tiah a ti.
17Cun pami hemah,
“Na nupi ih thu na ngai ih,
awk ka tan khammi
thingkung ih vuang na awk ruangah,
khur cu namah ruangah camkhaat a ii;
na nun sung hmawh cu
zanzaingaiin na awk ding na ṭuan thok;
18na ca’h hling leh so a suah hngai thok;
hramlak ih thlaikungpawl
na aw hngai thok.
19Khur ih na kirṭhan hlansung
thlanhripaih in na ṭuan thok ih
caw na aw thok;
icatile khur in lat na ita;
leivut na ii ih leivut ah na kirṭhan thok,” tiah a ti.
20Curuangah pami ni a nupi cu Eve a vawh, icatile a nung tu zate ih nu a ii. 21Cun Bawipa Pathian ni mipa leh a nupi caah saphaw partlai a vuak piak hngai, cun a thuam hngai.
22Cuhnukah Bawipa Pathian ni, “Zoh hman uh, mipa cu kanmah lakih pakhat mang a cang rom, sia leh ṭha a tiah; a kut hei suah in, nunnak thingkung ih vuang khaw a aw pang kho, cun kumkhua a nung kho men,” a ti. 23Curuangah Bawipa Pathian ni lat a ik nak khur thlo dingah Eden duum in a thlahsuak. 24Mipa cu a ṭhawl, cun Eden duum ih vapinla ah cherubim a sia hngai; cun khawlasan khaw a alh ih a mertia-leklomi ralreen cu nunnak thingkung la vahnak lam kil dingah a sia hngai.
دیاریکراوەکانی ئێستا:
Seemthawhnak 3: KHBF
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Khualsim Holy Bible © Bible Society of Myanmar, 2021.