Rom 3
3
God deravɨra uan akamɨn gɨn zui
1E fo, mɨkarzir mogomemɨn inimɨn dɨghorim a pura inivafɨzimɨn bizim puvatɨ. Ezɨ kamaghɨn Judaba ti manmaghɨn Kantrin Igharazibar Gumazamizibagh afira? Ezɨ bizir aghuir manaba mɨkarzir dɨghorimɨn arazimɨn otifi? 2#Godɨn Araziba 4:7-8; Onger Akaba 147:19-20; Rom 2:18; 9:4God bizir bar aghuir avɨriba Judabagh anɨngi! Bar bizir ekiam, God uan akam isa Judabagh anɨga ghaze, ia deravɨra a geghuv an ganam. 3#Rom 9:6; 10:16; 11:29; 2 Timoti 2:13; Hibru 4:2Bar guizbangɨra, Judan marazi akar kam deravɨra an gɨn zuir puvatɨ. Eghtɨ God manmaghɨn damuam? Me nɨghnɨzir gavgavim Godɨn ikian koghtɨ, bizir kam God damightɨ, a uan akamɨn gɨn mangan kogham, o? 4#Onger Akaba 51:4; 62:9; Jon 3:33Bar puvatɨ! Gumazamiziba bar moghɨra ifari, ezɨ God uabɨra zurara guizbangɨra mɨgei. Godɨn Akɨnafarimɨn osizirim kamaghɨn mɨgei:
“God, nɨ mɨgeima, gumazamiziba fo, nɨ guizbangɨra mɨgei.
Egh me nɨn araziba tuisɨghɨva, me fogh suam, nɨ arazir kuratam itir puvatɨ.”
5 #
Rom 6:19; Galesia 3:15 Ezɨ manmaghɨn ami? E kamaghɨn mɨkɨm suam, en arazir kuraba ti Godɨn arazir aghuiba azenim garɨsi? O, e kamaghɨn mɨkɨm suam, God en arazir kuraba ikarvagha ivezir kuraba e ganɨga, kamaghɨn a ti arazir kuram gami? (Mɨgɨrɨgɨar kaba, nguazimɨn itir gumazamizibar mɨgɨrɨgɨabar mɨn zui.) 6Bar puvatɨ! God deraghan koghɨva, manmaghɨn gumazamiziba bar men araziba tuisɨgham? Bar puvatɨ, an araziba dera, kamaghɨn amizɨ a gumazamizibar arazir kuraba ikarvasi. 7Gumazitam o amizitam kamaghɨn mɨkɨm suam, “Nan akar ifavarim, Godɨn guizɨn akam gamizɨ, an azenim girɨ, egha an ziam gamima an ekefe. Egh manmagh su, God na mɨkɨm suam, kɨ gumazir arazir kuram gamim, egh nan arazir kuram ikaragham?” 8#Rom 5:20; 6:1; 6:15Mɨgɨrɨgɨar onganir igharazir mamra kara: “Aria, e arazir kuram damutɨma arazir aghuim otivam.” Gumazamizir maba akam na gasa ghaze, kɨ kamaghɨn bizibav gei! Kamaghɨn God me gasɨghasɨghtɨ, bar deragham.
Gumazamiziba Godɨn damazimɨn derazir puvatɨ
9 #
Rom 1:18--2:24; Rom 3:23 Ezɨ manmaghɨn ami? E Judaba ti Kantrin Igharazibar Gumazamiziba Godɨn damazimɨn me gafira? Bar puvatɨ! Kɨ mɨkemegha gɨfa, Judaba ko Kantrin Igharazibar Gumazamiziba sara, arazir kurabar gavgavim bar e avarazɨ e an apengan iti. 10#Fofozir Gumazim 7:20#Onger Akaba 14:1-3; 53:1-3Godɨn Akɨnafarim bizir kam kamaghɨn a mɨgei:
“Gumazamiziba bar moghɨra,
men tav arazir aghuitam bar a gamizir puvatɨ.
Bar puvatɨ.
11Gumazitam fofozir aghuim itir puvatɨ.
Gumazitam God buri puvatɨ.
12Gumazamiziba bar tuavir aghuim ataki.
Gumazamiziba bar pazav ami.
Men tav arazir aghuitam bar a gamizir puvatɨ.
Bar puvatɨ.
13 #
Onger Akaba 5:9; 140:3 Men akar toriba mati gumazamizir moziba akaba akari;
kamaghɨn amizɨ me mɨgeima ovevem otifi.
Me akar ifavarir bar avɨribagh ami.
Me gumazibagh asɨghasɨghasa mɨgeir akaba,
men akatoribar ikia
mati kuruzim imezir kuram an aven iti.
14 #
Onger Akaba 10:7
Dughiaba zurara me akavghuriaba gumazamizibagh arɨgha,
mɨgɨrɨgɨar gumazamizibagh asɨghasɨsibagh amua
osɨmtɨziba me garɨsi.
15 #
Aghuzir Akaba 1:16; Aisaia 59:7-8 Me zurara atamra ghua
gumazamizir arazir kurabagh amir puvatɨzibav sozi,
me ariaghiri.
16Me aruava bizir gumazamizibar dabirabim gasɨghasɨzibagh amua,
mɨzaziba ko osɨmtɨziba me garɨsi.
17Me navir amɨrizimɨn tuavim gɨfozir puvatɨgha
igharaz darazi ko deragha apiaghiri puvatɨ.
18 #
Onger Akaba 36:1
Me tong Godɨn atiatia
an apengan itir puvatɨ.
Bar puvatɨ.”
19 #
Jon 10:34; Rom 1:20; 2:2; 3:9; 3:23 E fo, God kamaghɨn ifonge, an kotɨn dughiamɨn Judaba ko Kantrin Igharazibar Gumazamiziba sara, me Godɨn arazir gumazamiziba tuisɨzim riagh mɨgɨrɨgɨatam damighan kogham. Kamaghɨn God, Moses Osirizir Araziba isa, Judabagh anɨngi. Eghtɨ me dar gɨn mangɨ dar apengan ikiam. 20#Onger Akaba 143:2; Aposel 13:39; Rom 7:7; Galesia 2:16; Efesus 2:8-9; Taitus 3:5E fo, tav Moses Osirizir Arazibar gɨn mangɨtɨ, God kamaghɨn mɨkɨman kogham, nɨ nan damazimɨn dera. Puvatɨ. Gumazamizir Moses Osirizir Arazibar gɨn mangasava amiba, me uan arazir kurabar gara fo, kar arazir kuram.
Gumazir nɨghnɨzir gavgavim Kraisɨn itim, God ghaze, a nan damazimɨn dera
21 #
Aposel 10:43; 15:11; 26:22; Hibru 11:4; 1 Pita 1:10 Ezɨma tuavir e Godɨn damazimɨn derazim, a datɨrɨghɨn azenim girɨ. A Moses Osirizir Arazibar gɨn zuir tuavimɨn otozir puvatɨ. A tuavir igharazimɨn oto. Mosesɨn Osiziriba, ko Godɨn akam inigha izir gumazibar Akɨnafariba bizir kamɨn gun mɨgei. 22#Rom 1:17; 10:12; Galesia 2:16; 3:28; Kolosi 3:11Bizir kam kamakɨn, gumazamiziba bar nɨghnɨzir gavgavim Krais Iesusɨn ikɨtɨ, God suam ia nan damazimɨn dera. Tuavir igharazitam ua itir puvatɨ. 23#Rom 3:9; 5:2; 11:32; Galesia 3:22Gumazamiziba bar moghɨra arazir kuram gamigha, Godɨn angazangarimɨn saghon ikia an aven mangan ibura. 24#Rom 5:1; Efesus 1:7; 2:8; Kolosi 1:14; 1 Timoti 2:6; 1 Pita 1:18-19Ezɨ God en apangkuvigha Krais amizir ingangarimɨn a uam e givezegha ghaze, e an damazimɨn dera. E uan ingangaritamɨn Godɨn damazimɨn derazir pu. Puvatɨ. Kraisɨn Iesusɨn ingarim bangɨn, God bizir aghuir kam isa puram e ganɨngi. 25#Aposel 13:38-39; 17:30; Efesus 1:7; Kolosi 1:20; Hibru 9:15God kamaghɨn ifonge, Krais aremeghɨva, tuavir kamɨn a gumazamizibar amutɨ, men arazir kuraba gɨn amadagham. Bizir kam bagha, God Krais amɨsefe. Eghtɨ tina nɨghnɨzir gavgavim Iesusɨn ikɨtɨ, God suam, nɨ nan damazimɨn dera. Kraisɨn ovevemɨn tuavimɨn, God uabɨ en akagha ghaze, a uabɨ bar dera. Fomɨra God gumazamizibar asughav ikia, zuamɨra men arazir kurabar ivezir kuram da ikarazir puvatɨ. 26Egha datɨrɨghɨn dughiar kam God uabɨ en akagha ghaze, a uabɨ bar dera. A uan arazir aghuim kamaghɨn en aka, eghtɨ gumazamiziba nɨghnɨzir gavgavim Iesusɨn ikɨtɨ, a suam, ia nan damazimɨn dera.
27 #
Rom 2:17; 2:23; 1 Korin 1:29-31; Efesus 2:9 Eghtɨ e tizim bagh uarira uan ziaba fam? Biziba bar puvatɨ. E kamaghɨn mɨkɨman kogham, e Moses Osirizir Arazibar gɨn zuima God e mɨgɨa ghaze, e dera. Bar puvatɨ. Gumazamiziba nɨghnɨzir gavgavim Iesusɨn ikɨtɨ, God suam, ia nan damazimɨn dera. 28#Aposel 13:38-39; Rom 3:20-22; 8:3; Galesia 2:16E fo, Moses Osirizir Arazibar gɨn zuir tuavir kam gumazitam gamizɨ, a Godɨn damazimɨn derazir puvatɨ. Nɨghnɨzir gavgavim itir gumazamiziba, merara Godɨn damazimɨn dera. 29-30#Godɨn Araziba 6:4; Rom 4:11-12; 10:12; Galesia 3:8; 3:20; 3:28Ezɨ manmaghɨn ami, God ti Judabar Godra? O, a ti Kantrin Igharazibar Gumazamiziba sara, men God? Are. A Judaba ko Kantrin Igharazibar Gumazamiziba bar moghɨra men God. Godɨn vamɨra iti. Egha a gumazir uan mɨkarzir mogomebar iniba aghoreziba, men nɨghnɨzir gavgavimɨn garava, uaghan gumazir uan mɨkarzir mogomebar iniba aghorezir puvatɨziba, men nɨghnɨzir gavgavimɨn gari. Egha ghaze, ia nan damazimɨn dera. 31#Matyu 5:17; Rom 8:4Ezɨ manmakɨn? E kamaghɨn mɨkɨm suam, nɨghnɨzir gavgavim bar bizir ekiam, egh e ti suam, Moses Osirizir Araziba pura bizim? Bar puvatɨ. E kamaghɨn mɨkɨm suam, Moses Osirizir Araziba da gavgavigha ingangarim iti.
دیاریکراوەکانی ئێستا:
Rom 3: AruBib20
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
The Bible in Aruamu: Old Testament and New Testament: © 2020 Pioneer Bible Translators
This work is licensed under the Creative Commons Attribution Share-alike 4.0 license. http://creativecommons.org/licenses/by-sa/4.0/
New Testament is a revision of: The New Testament in Aruamu: © 2004 Bible Society of Papua New Guinea and Pioneer Bible Translators