San Mateo 11
11
1Dequide ulhuxa utixxiꞌen Jesús ca biꞌini tsiꞌinu rudheti ca tisa ruleꞌe gue bixa uncabi, bedáttebe nía die lheꞌe adí ca lheꞌesi seꞌe itúba nía qui quixxiꞌe lhe uleꞌenie lhe ca benni ca tisa gue Tata Do Iyyabaaha.
Juan biꞌini rugadi indaha udhelhabi ca benni sannaba tisacabi Jesús
(Lc. 7:18-35)
2Juan biꞌini rugadi indaha nna lisiyyaba tebi, atti binabi gue iyába nu run Jesús. Laniala nna udhelhabi ca biꞌini rudheti ca tisa ruleꞌebi 3qui tsiacabi sannaba tisacabi gácabi Benniha:
—¿Si cuinalu nua Cristu benni chi gaꞌana isía? ¿Si cuedabatu attu benni subi, aca?
4Laniala becabi Jesús re ca biꞌiniha:
—Gualeyya nna gualquixxiꞌani Juan gue nu chi begüiale runia, gue nu chi bieninle lhe. 5Gualgás na: ca nu xua loquinna riláquinna ca nu xi-na ridacana lhe ca nu raca cuerpu guecani nu anca attiba yiesusu te láni lepra reacacana lhe ca nu cuesu-na rienquinna lhe ca nu yatti-na reacaquinna lhe ca benni bittu te guecani chi runacana ca tisa tsee gue gaxasná rodilá Tata Do Iyyabaaha ca benni lhe. 6¡Carbáru ca benni bittu rudhequicani ria lecani neti lo niꞌa gue nu riláquinna runia!
7Atti chi güequi ca benni udhelha Juan, udulotteba Jesús utixxiꞌenie ca benni seꞌe nía gue Juan. Nianna re:
—Atti biríale diale güegüia Juan lo yu bisiha, ¿gasná anca benni ribedale ilenle? ¿Si ribedabale ilenle ttu unbiyuu bittu du tsitsi len nu rulaba leni attiba ttu yittixtila dia dedaaba len be-na? 8Gansi läba anía anca, ¿núla biríale begüiale? ¿Si biríale qui ugüiale ttu unbiyuu nucu xo tsee gueni ttu nu daca yaxi? Lebiꞌi nna gua yubale, ca nu nucu xo tsee guequinna lheꞌe yoꞌo atta do nu rinnabia xenin liba seꞌecana. 9¿Núla nua biríale begüiale ganna? ¿Si ttu benni anca profeta? Neti ria le, gualíba. Juan ancabi biꞌini ra xxenru lebi atti ttu benni anca profeta. 10Gue Juan-ni nua rinne Tata Do Iyyabaaha lo ca sitsi guee-na atta rulise Xiꞌinie re Benniha:
Neti idhelha ttu benni nneruna lolu qui quixxiꞌana ca tisa quia-ni.
Biꞌiniha idhalbi neda guelu.#11:10 Malaquías 3:1
11Neti ria, delo iyá ca benni chi uli yies lo yu-ni, läga chi biría ttu benni ra xxenru leni atti Juan biꞌini rugadi inda-na. Ttiaca benni bittu anque nu ra xxeni leni sela ca benni rinnabia Tata Do Iyyabaaha, Benniha la anque nu ra xxenru le atti Juan.
12’Desdeba atti udulo Juan biꞌini rugadi indaha rixxiꞌabi ca tisa gue Tata Do Iyyabaaha axta nnanna ixe ca benni runcabi duelha iselacabi ca benni rinnabia Tata Do Iyyabaaha, masquiba bicaxa ratecabi. Ttiaca sunruba ca benni re tsitsi lecabi gua ridacabi riselacabi ca biꞌin-na. 13Cumu iyába ca benni uca profeta lhe ca ley bocaꞌana Moisés lhe bedaa atti bisía Juanba, utixxiꞌacabi gue isía sá innabia Tata Do Iyyabaaha. 14Gansi lebiꞌi raca lele tsia lele gue nu ria-ni nna Juanba biꞌiniha ancabi Elías biꞌini chi gaꞌana esía.#11:14 Malaquías 4:5 15Atta gua rudo nagale gue nu ria, gualun duelha qui sadú lele.
16’¿Nú nua ttu innía anca attiba ca benni seꞌe nnanna? Lacana ancacana attiba ca unto ribía atta raca iꞌiya-na, ribesiꞌen loescani rácana: 17“Chi becuestu ca pipi guetu-ni nna bittu beyaꞌale. Chiguaba bilhatu nu rulha ca benni gue ca nu yatti-na lebiꞌi nna bittuguaba uresle.” 18Ria aná cumu bisía Juan biꞌini bittu riꞌa robi, lebiꞌi nna rálale: “Nu xxegüihaba du leni unná.” 19Bisíaya neti Benni unbiyuu daa iyyabaaha, riꞌa roa nna lebiꞌi nna rálale: “Unbiyuu-ni nna ancana ttu nu riꞌa roxxatta, ttu nu do tsee len ca güequixa-na lhe ca nu te tulha guecani lhe.” Ttiaca atti rilenri gaxasná run ca xiꞌini Tata Do Iyyabaaha, lania nna ritedeenri, elha rieni rapa Tata Do Iyyabaahaba nua rapa ca biꞌiniha.
Carusiꞌiru ca yiesi bittu rodú xiyyancana
(Lc. 10:13-15)
20Laniala nna udulo Jesús utise ca benni seꞌe lheꞌe ca yiesi atta chi benie uca ixeru ca milagru, cumu ca unnuha nna tsa läga bodú xiyyancana gue nu lä anca tsee bencanaha qui odaxxucana neda gue Tata Do Iyyabaaha. Nianna re:
21—¡Carusiꞌirule, xa benni seꞌe lheꞌe yiesi Corazín! ¡Carusiꞌirule, xa benni seꞌe lheꞌe yiesi Betsaida! Cumu ttirca lheꞌe yiesi Tiro lhe Sidón lhe chi uca ca milagru uca len lebiꞌiha nna nucala chi bodú xiyyan ca nua bodaxxucana neda gue Tata Do Iyyabaaha qui dhie elha xen lasi guecani. Chi ucucana ca lari ttipa lhe bedelha iquicani te gue gui lhe qui uleꞌe lo gualí re lenquinna gue nu bencana. 22Ttiaca neti nna ria le, gansi chi bisía sá un Tata Do Iyyabaaha elha uxtisi gue ca benni, xxenirla anca elha disa dhíle atti elha disa dhi ca benni seꞌe lheꞌe yiesi Tiro lhe Sidón lhe. 23Lebiꞌi nna ca benni seꞌe lheꞌe yiesi Capernaum, ¿si rquinle dequi eyopile iyyabaaha? ¡Dica! Axta atta lexúaha la iyinnale. Cumu ttirca lheꞌe yiesi Sodoma uca ca loesi milagru uca len lebiꞌi nna lania nna gua rerbana axta nnanna. 24Larcala ria le, gansi chi bisía sá uni Tata Do Iyyabaaha elha uxtisi gue ca benni nna tsitsirla anca elha disa dhíle attichula elha disa dhi yiesi Sodoma.
Jesús re: “Gualtá len neti qui edí lele”
(Lc. 10:21-22)
25Laniala nna unne Jesús re Tata Do Iyyabaaha:
—Tata, cuinalu ancalu Benni banani iyyabaaha lhe yies lo yu-ni lhe. Neti ribequi xenia lu de bittu begüeelhalu ttedaani ca nu rá ancacana nu yu te elha rien guequinna gue nu ria-ni, lu nna benlu ttedaaquin ca benni bittu ra xxeni leni gue unní. 26Gualíba, Tata, cumu anába beda le cuinalu unlu.
27’Tata quiaha nna iyába betee las náya. Tsa läganu yu gattigasná anca Xiꞌini Tata Do Iyyabaaha, sunruba lee yue nuxa anca Xiꞌinie. Nuttuguaba yu gattigasná anca Tataha lhe sunruba neti Xiꞌinie-ni yua nuxa anque, ca benni raca lasia quixxiꞌatia cana gue Benniharba nna yucana nuxa anque. 28Gualtá len neti, iyáxeale atta chi guatú lele lo nu ratele, atta chi guaxxaquinle loni lhe neti nna unia eyaca lele. 29Gualoquinna iquile udole tisa gue nu runia mandadu unle, gualudheti unle atti runia lhe cumu neti anca Benni pasensi, nu bittu runi ttaba. Lania nna guasaxxacabale elha xen lasi reasani lastoole na. 30Cumu nu runia le mandadu unle, läga anca unná ttu nu tsitsi bittu dhale unle, anca bunna ttu nu guadábale unle.
دیاریکراوەکانی ئێستا:
San Mateo 11: zaq
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2021, Wycliffe Bible Translators, Inc. All rights reserved.