Luka 16
16
Ba'ada təkəra Ndər Mər Tlər Kəla Jiri
1Yesu tə nar nyi nə ka shawa nyi, “Vanya ndər gəna da haaɗa, cha ngya nyi na gəna ki nyi nə vanya ndə ka cha ɗa dəgal təkəri. Ngə nja nda shili na nyi mafakə ənda ndə nda kwa kikilnda gəna nyi. 2Ngə tlakər ki nda nga ndə nda ga nar nyi, ‘Mi ngə yo ngatə təkəra kə zəma? Tsəfəbiya ɗa dəhə tlər nda ko məra, aka a tsə'u ko tsakətə mər tlər na'a wa.’ 3Kəl ndə nda na ku ɗufwa cha, ‘Tlakə ɗa kwa gədlənda ɗa nya tləra, aman yo ɗa? Jan a dunamar zwa da tsa ya wa, ya yo ngatə kuzhir ki gədi. 4Yau! A zəndətə ya sənda yo mər tsa'aka ma nja gədlənda ɗa nya tləra, njo dləutsə ɗa ku ki kənda.’ ”
5“Kəl cha nga dəhə nji'inda tlakə nyi kwa nəu nda məl. Cha jau ndə tangərma, ‘Yiɗawa tlakə ɗa kwa nəu ngha?’ 6Cha na, ‘Shikəmal gharəu.’
“Ndə nda na, ‘Jan likatəkata, kusa tsəfəya tufkumnyi.’ 7Cha na nə vanya ndə nda, ‘Yiɗawa njo nəu nghə nəngha?’ Ngə cha na, ‘Uhi, mbəl kwara gharəu.’ Ndə nda na, ‘Kusa, jan likatəkatə ka tsəfəya chisəkumnyi.’ ”
8“Ngə tlakər ki nda faliya ndə kəla jiri nda, aka cha char dəma. Aka dəmar njir dunəya ndəɗətə nə njir təlkur Hyel aku ənda nda kwa nəu na kuvanda.”
9Yesu tə tsakətə na, “Yo nar hi, hya mər tlər na gəna kəhi ka ga hya uya nyi bazhi nə kərnəhi. Ma gəna wura, njo dləutsə hi ku ki nə ba'anawa. 10Ndə nda ɗa na jiri təkəra sə kushiu, cho ɗa na jiri təkəra sə 'ual tsəu. Ma ndə nda pa'a ɗa na jiri təkəra sə kushiu, a da cha kwa nau ɗa na jiri təkəra sə 'ual wa. 11Macha a da hya ɗa na jiri təkəra sər dunəya wa, a ndər taɓəu hi gəna nə jirijiri da wa. 12Macha a da hi na jiri təkəra sər vanya ndə wa, wa ngə kwa nda nə hi sənda nəkə hya?”
13“A mava da kwa nau mər mavakur nə tlakə mətlə wa, kəl nda cha ngyar vanyi cha i vanyi, ndara cha nəu zhang na jiri cha həyatə zhang. Ya a laku da hya kwa nau fətə ɗufwa hi tə sənda nə Hyel ana gəna tsa'a kya'a wa.”
Alenya Dlədləɓə inda nə Musa
(Mat 11:12-13; 5:31-32)
14Manda njir Farisi kwa nyida gəna, nda nda ngatə səngə Yesu tə na nga, ngə nda chikətənyi chir. 15Kəl Yesu tə nar nda, “Nahi ingə nji'inda kwa i char biyamar nji, ənda jiri tsa hi. Ya Hyel zəndəbiyatə ɗufwa hi. Sə'inda njo la'a wi sə mənakəu, nanda ingə sə'inda pa'a Hyel kwa i cha la'a pa'a.”
16“Gadlagadla Musa ana sə'inda njir mətakər Hyel tə tsəfəbiya ingə nja kwa mər tlər ni, shili tsa'a tə bəjir Yohana ndər mər baɓtisma. Kəl ja, sakana nja bəzəya Mafakə Mənakə nə təlkur Hyel, madawa kwa mbadza ka cha uya gwa. 17Dəhə ka ənga, kusə huɗamələm ana dunəya zhazha, atsa njo bəzənda vanya sə kushiu ku gadlagadla Musa nga.
18“Dəhə ndə nda təkə na mala nyi ga həbiya vanyi, a mərtə cha kasalikur ndani, ya ndə nda hə mala nda tə təkə na sal nyi, kasalikur nda cho məra.”
Vanya Ndər Gəna ana Li'azaru
19“Vanya ndər gəna da haaɗa cho ha dzaki inda nja ɗəl na kwaba 'ualəu, cho səm sərsum mənakə mada sakamani. 20Ətsəu, vanya ndə ɗaliɗali da tləm nyi Li'azaru, dəhə dza cha na kəti. Nja kwa maka shili pinda nyi anya nyaki ndər gəna nda. 21Nacha tsəu cho səkə ka ga cha uya mada sərsum nda kwa pəpə ku nya ndər gəna nda cha səma. Ma'a həya kwa shili naɗə kəti nyi.”
22“Kəl ndə ɗaliɗali nda tə tah, chama Hyel tə hətə nyi, ga nənyi mbwa mənakə nanda na Ibrahim. Ndər gəna nda tsəu tə tah, ngə nja haɗiya nyi, 23tə cha kyo Hadis cho sa ɓwaɓwatəu, nda cha har kər, ngə cha la'a Ibrahim naɗə nanda na Li'azaru. 24Ngə cha nga, ga na, ‘Ada Ibrahim, ngatə təhuɗə ɗa, ka sə Li'azaru cha fəu kwalyanghar cha cha ku ɓiti, cha njamtə ɗa tə kyara ya, ga ya ngatə shishi'u, aka aku ɓwaɓwatə naya ku hu'u na!’
25“Kəl ngə Ibrahim tə na, ‘Zər ɗa, ɗənghatə bəji nda kə na pi tə dunəya, a uyatə kə dəhə sə mənakəu, Li'azaru tsəu tə sa ɓwaɓwatəu. Kəl ja, sakana cho ngatə məsəɗakəkur nakə tsəu ko sa ɓwaɓwatəu. 26Mada a da ka əngə ma'a wa, vanya ka'u ndzuɗakəu da ku pama mən kə'i hi, tsa nji'inda kwa gwa'a hya'atə tangna biya dzən hi da ba'a nau, ana tsa nji da ba'a hya'atə biya dzən hi zəbiya da ea.’ 27Ngə ndər gəna nda na, ‘Yau, Ada, yo gədi ngha, ka sə Li'azaru səyo ki ada ɗa, 28aka ka zamə ɗa da tufu, cha səya təɗar himya nda, tsa nda da ba'a shili tə mbwar ɓwaɓwatə na.’
29“Ibrahim tə na, ‘Gadlagadla Musa ana tsəfə njir mətakər Hyel da tsa ka zamə ngha, nda səhimi da sənda nda kwa na nə nda.’ 30Ndər gəna nda na, ‘A'a, Ada Ibrahim, ma vanya ndə tə hya'atə ku hwa, ga yi dzən nda, nda kwa ngyar mər səpəla'a.’ 31Ngə Ibrahim tə nar nyi, ‘Macha a da nda kwa səhimi da sənda gadlagadla Musa ana tsəfə njir mətakər nə Hyel kwa dəkə nənda wa, mada vanya ndə tə hya'atə ku hwa, a da nda kwa səhimi da cha wa.’ ”
دیاریکراوەکانی ئێستا:
Luka 16: hbbNT
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© Wycliffe Bible Translators, Inc. and © The Nigeria Bible Translation Trust 2018