Yohana 10
10
Ba'adar Ndər Ɓəla ana Kətəng Nyi
1“Jiri yo dəkar hi, ndə nda a da tə gwa ku chiɓi kətəng təwa nyavi wa, ya ngə cha gwa təwa ngwa, ndər həl cha, ndər fa'avi tsəu. 2Ndə nda tə gwa təwa nya chiɓi, nacha ngə ndər ɓəla kətəng ɗa. 3Ndər ɓəla nyavi kwa wuniya nyi nyavi nə ndər ɓəla kətəng, kətəng tsəu kwa səhimi da kuraka cha, cho nga nda na tləm, cho dəliya nda. 4Macha dəliya nda, cho ma'i manə nda, kətəng i kwa nəu hi nyi, aka kwa zəndə nda kuraka cha. 5A da nda kwa nəu mihiɓi wa, kəl nda ndo hwi tsa cha, aka a da nda kwa zəndə kuraka cha wa.”
6Yesu tə mərtə nda ngəna ba'ada, ya a da nda ngabiya sə nda cho dəkə nə nda wa.
Yesu ngə Ndər Ɓəla Mənakəu
7Ngə Yesu tə nar nda səkəu, “Jiri yo nar hi, Naya ngə nyavi kətəng. 8Dəhə nji'inda tə shili təvi ya shili, njir həl inga ana njir fa'avi, kəl ja, a kətəng da səhimi da nda wa. 9Naya ngə nyavi. Madawa tə shili ga gwa təwa ɗa cho uya mbəɗa, aka cho gwa, cho biya ya cho uya bəɗakə mənakəu. 10Shilir ndər həl nənyi, kəl aka həl, ana tsəya, ana aka səwandi. Naya, ya shili aka ga nda uya pi nda ba'anawa, ana nda uya nyi bwaɓəu.”
11“Naya ngə ndər ɓəla mənakəu, ndər ɓəla mənakəu kwa sənda pya cha aka kətəng nyi. 12Ndər mər tlər wazəba nənyi, a da cha ndər ɓəla mənakə wa, aka kətəng da nənyi wa, aka ma sakanda cha la'a ularvwa kwa shili cho hwi tanyi, kəl ularvwa nda kwa gwa ku pama nda cho səya alenyi, alenyi kwa wiɗa. 13Cho hwi tanyi aka tlər wazəba cho məra, a cho ɗəngha na kətəng wa. 14Naya ngə ndər ɓəla mənakəu. A kwa zəndə ya na'a, na'a tsəu kwa zəndə ɗa nda, 15Wi ngə Ada kwa zəndə ɗa, əngə tanyi tsəu kwa zəndə ya Ada, ana yo sənda pya ya ka kətəng inga. 16Alenya kətəng da tsa ya nda pa'a ta gwa ku chiɓi na, ya na'a nda. Tuku yo tsəmtə nda, aka ga nda səhimi da kuraka ya, nda ngya ku chiɓi zhang, ndər ɓəla zhang. 17Ada kwa i ɗa, aka yo sənda pya ya, ga ya ɓəla hətə səkəu. 18A ndər nau həbiya pya yada wa kəl nda na ikur ɗa. Gyalkur sənda da tsa ya, ya gyalkur ɓəla hətə da tsa ya. Na cha ngə sənda Ada ɗa nar ɗa ya məra.”
19Aka ɓwanya nga, kəpal tə gwa ku pama njir Yahuda səkəu. 20Ɗang ku pama nda tə na, “Məlləm ku kəra cha! Nacha gwa'atə cho mər məlləmkur, mya gwa'atə hyo səhimi da cha?”
21Kəl ja, alenya nji tə na, “A da ɓwanya ndər səu kər ngə wa, kwa nau ndər məlləm wuniya lya ndər wuləfə ya?”
Njir Yahuda tə Ngyar Yesu
22Nda bəjir Ladər nə Dzəviya Mbwa'alə Hyel vu Urshalima tə shili, ya bəjir fwakəu. 23Yesu kwa zhuli ku pama Madləɓa Saloman anya nya Mbwa'alə Hyel. 24Njir Yahuda inda tə təyadzəa, ga ɓandə nyi, ngə nda nar nyi, “Ba'a sakamani ko ngya ea ku tar zənda? Dəkar ea jiri tə babal, ma cha nakə ngə Kəristi?”
25Ngə Yesu tə na, “A dəkar hi tə ya, ya a da hya na'a jiri wa. Tlər inə yo mər na aku tləmər Ada ɗa nə yo məra, nacha ngə tsəu kwa pə jiri təkəra ya. 26A da hya kwa na'a jiri wa, aka a da hi kətəng ɗa wa. 27Kətəng ɗa i kwa səhimi da kuraka ya, kwa zəndə ɗa nda, nda kwa nəu hiɗa tsəu. 28Yo nənda pi nda ba'anawa, ya a da nda kwa kuɗə pa'a wa. A ndə da kwa nau dləuya nda ku cha ya wa. 29Ada ɗa nda tə na'a nda, a ndiya tə dəhəu, ya a ndə da kwa nau gutsəbiya nda ku cha Ada ɗa wa. 30Ada ana Naya zhang ea.”
31Njir Yahuda tə ɓəla fa'a hangu ka ga nda vakə nyi ni. 32Ngə Yesu tə nar nda, “Səshinshin wawa'a ɗang nda ya mər hya'atə tsa Ada ɗa ku pama hi, mi ngə sə zhang ku huɗa nda nda hyo gwa'a vakə ɗa təkəra?”
33Ngə njir Yahuda inda tə nar nyi, “A da ka sə mənakə nda ka mər ngə eo gwa'a vakə nghə wa, kəl nda ka ko pə ɓwanya həyatəvi, ko məməla kərnghə na Hyel, ya jan kə ndə tanyi.”
34Yesu tə nar nda, “A tsəfətsəfə nyi cha ku gadlagadla kəhi ma, ənda Hyel tə na, ‘Nahi hyel hi.’ 35Aka zəndətə hi ɓwanya nda ku likatəkatə da kwa nau ɓəlnda dzə wa. Macha cho nga nji'inda ɓwanya Hyel tə shili da nda, ‘hyel i,’ 36aman hyo na nacha nda Hyel na kərnyi tə ɓatliya ga sətə shili tə dunəya kwa ngəl Hyel aka cha na naya Zər Hyel ya? 37Macha a da yo mər tlər nda Ada ɗa kwa mər wa, ngwa hya da na'a jiri wa. 38Kəl ja, macha ənga, mada a da hya na'a jiri wa, nənyi ma jiri nə tlər inga, aka ga hya ngabiya ana hya zəndə ənda Ada aku ya cha, naya tsəu aku cha ya.”
39Ahir ngə səkəu, nda gwa'a laku aka ga nda səya Yesu, kəl ja, a da nda nau wa.
40Ngə Yesu tə ɓəl tanyi biya tiya Dəl Urdun tangnda Yohana kwa ɗaka mər baɓtisma nə nji ti, ga ngyata nyi. 41Nji ɗang tə shili da cha, nda kwa na, “A Yohana da mər səshinshin wa, kəl nda aku dəhə sənda cha dəkə təkəra ndə na, jiri.” 42A tangnda nji ɗang tə nənyi jiri nə Yesu.
دیاریکراوەکانی ئێستا:
Yohana 10: hbbNT
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© Wycliffe Bible Translators, Inc. and © The Nigeria Bible Translation Trust 2018