Jọn 5
5
ẠJizos aakonom oye dị úmoon ọgbal ebaraph
1Ịphen phọ reten, kụ ẹteeny ẹyaal ạbuo aJu phọ, kụ ạJizos ạghi Jeruselem. 2Ẹpe Jeruselem, sịphe amatuman “Ọnhu-Aḍibuo Iyool-ịga phọ,” ebaraph owura ạmuum ịrol li dị oogh ịisua otu eko ekitonom. Ọnhu aHibru, esi phọ ẹphen ughol mọ aBetzata. 3Aḍiboom aḍita awe ạreezegh, bụo ikpom ariḍien, rꞌạbuo ạraagha, rꞌạbudi aruwol rꞌạraghaagh emuughu, ụde ni okoom ịisua phọ ịphen phọ. [Bịdi ukori ghan mọ ạmuum mọ akil. 4Mem etum mem ọokpaany Ẹnaan ạghi ghan ni sịphe atukemi mụum mọ. Ọḅel oye phọ ọpo kasoor bọ, mem lọ oḅunyon mụum mọ ọman, bịn aḍum ghan ni tọrobo eephina lọ eḍighi nyọdi.] 5Oye ạrol aani ni sịphe dị mạrol rẹezegh ịraardi rꞌọphaanya ạsia. 6Kụ ạJizos ạmiin ni dị ọdi ạmina sịphe phọ, kụ ọdi alegheri ni mọ oye phọ ọpo phọ mạrolom ni eephina phọ kꞌekpo amem dị mẹkel li, kụ ọdi apuru nyọdi mọ, “Nạ rạwa ni oḍum ḍụghum?”
7Kụ oye ẹzegh phọ ạḅeni nyọdi mọ, “Oye phọ, mị ụ́moogh aani sịen oye dị kụsighe ịmi asoore sịphe ạmuum mọ, mem lọ oḅunyon. Mị ạaghophonu rạki osoor, ọnon oye mạarom ịmi asoor.”
8Kụ ạJizos ạḅeni nyọdi mọ, “Ḅetenu, sịghe eetere phọ ạna arelhe!” 9Egina amem bịn oye phọ aḍum, ạsighe eetere phọ ọdi arelhe.
Aḍio phọ ạḍiphe phọ aḍio ophooghian. 10#Nehe 13.19; Jer 17.21Kụ ạbuo aJu phọ ọḅeni oye phọ ọpo ookonom bọ mọ, “Arodon phọ aḍio ophooghian, kụ eḍighi ni ologh orool eetere phọ ạna.”
11Kụ ọdi ạphagharanaan bịdi mọ, “Ọpo uukonom bọ ịmi kụ ụḅeni bọ ịmi mọ, ‘Sịghe eetere phọ ạna arelhe.’”
12Kụ bịdi opuru nyọdi mọ, “Ạnhian kụ ạḅeni bọ nyịna mọ, ‘Sịghe eetere phọ ạna arelhe’ phọ?”
13Kụ ọpo ookonom bọ ólhegheri oye phọ, ịdi eḍighi bọ ạJizos maḍighi lẹeph ạḍua, loor aḍita awe phọ momuza bọ.
14Onyebel aten kụ ạJizos ạmiin nyọdi pạ Otu Ịiḅereghi phọ, kụ ạḅeni nyọdi mọ, “Sịen mookonom bọ nyịna, ịkaraph káḍighi ghan mun, ọbo ịnon igbogh ịminimiin dị epu ịḅel phọ kesoorom ghan bọ nyịna.”
15Kụ oye phọ ạḍua kụ ạghi ạḅeni bụo aJu phọ mọ ạJizos kụ oye phọ aakonom bọ nyịno. 16Ọdo phọ arookonoma aḍio ophooghian phọ ịphen phọ kụ iḍighi dị ạbuo aJu phọ omiigh bọ ọgbiphoghom ạJizos.
17Kụ ạJizos ạphagharanaan bịdi mọ, “Ọde phọ ạmi rápooghian ghan oḍighi, kụ mị raḍighi aani ghan bọ.” 18Ịyaar phọ bịdi ọkparami bọ ḍịghaagh ọwa ghan oghiigh ọdi ịduon: mọ ọdi mạka ḍio ophooghian phọ, ạḅile kẹn rạḅem ghan mọ Ẹnaan Ọde ọno. Ịduon phọ, pọ mạsighe loor ọdi ạtomaam Ẹnaan.
Ịikpo ọtooghiom mọ Ọony phọ ạmoogh bọ
19Kụ ạJizos ạphagharanaan bịdi mọ, “Mị ạkar rịḅeni ghan inyina mọ Ọony phọ rátue ghan kạda rꞌẹmhu ọdi bịn aḍighi ịyaar. Ịyaar dị ọdi raḍighi ghan ílho, emuton ịpe ọdi ạmiin bọ dị Ọde phọ ọdi raḍighi. Ịpe Ọde phọ raḍighi ghan bọ kụ ịdi Ọony phọ ạtuugh raḍighi aani ghan, 20ịdi eḍighi bọ Ọde phọ ạpomoghian ni Mọony phọ ọdi kụ raḍeenaan ghan nyọdi oomo phọ ịpe ọdi raḍighi ghan bọ. Ọde phọ kaḍeenaan ni nyọdi rạraar dị epu ịphen phọ mọ aḍighi, kụ oomo phọ anyina keekia ni. 21Ịdipho Ọde phọ raḅerion ghan bọ ni bụlo momuughu kạngooghi ghuḍum, kụ ẹdi Ọony phọ kạngo ghuḍum bụlo ẹḅeeraan nyọdi ọngo. 22Ọde phọ oye ọoruen rásophonaan ghan. Ọdi mạngo Mọony phọ ọdi oomo ịikpo oogboom ịiruen, 23pịdi oomo awe phọ ọlogh eghuan Mọony phọ, ịdipho bịdi ọlogh bọ Ọde phọ. Kụ oye lọ ụ́logh eghuan Mọony phọ, pọ mamuton eephoogh Ọde phọ ọpo arom bọ Mọony phọ.
24“Mị ạkar rịḅeni ghan inyina mọ ọpo ụnaghanan bọ ịmi kụ ameeraam nyọpo urom bọ ịmi, pọ mạmoogh ghuḍum kꞌagee-pọ, kụ kósoph ịiruen opume nyọdi. Ọdi mạḅeeny ẹku aḍuugh aḍigh ẹku aghuḍum. 25Mị ạkar rịḅeni ghan inyina mọ amem retu ni, kụ mẹteeny ni, dị bụphe momuughu bọ kọnaghanan ni ẹḍogh Ọony phọ Ẹnaan, kụ bụphe ọnaghanan bọ kọmoogh ni ghuḍum. 26Ịdipho Ọde phọ rꞌaloor ọdi kụ aḍighi bọ zin aghuḍum mọ kụ ịdi ọdi maḍighi aani Mọony phọ Ọdi zin aghuḍum rꞌaloor ọdi. 27Ạḅile kẹn ạngo nyọdi ịikpo oogboom ịiruen, ịdi eḍighi bọ ọdi kụ Ọony phọ Oye. 28Ịphen phọ kíḍighi iikia: amem retu ni, dị bụphe odi bọ pạ ariiḍi phọ kọnaghanan ni ẹḍogh ọdi 29#Dạn 12.2kụ ọḍua sịphe ariiḍi phọ ạbidi omiteghu. Bụlo oḍighi ghan igey koḅerion ni ọmoogh ghuḍum, kụ bụphe oḍighi ghan bọ ịkaraph phọ, koḅerion ni kụ osoph ịiruen opume.”
Ịdi ẹmeera bọ rẹgbaanaan Jịzos
30“Mị útue ụda rꞌẹmhu ạmi bịn uḍighi ịyaar. Mị raagbo ghan ịiruen phọ ịpe Ẹnaan ịḅeni bọ ịmi kụ kạngo. Kụ ịiruen phọ ạmi eeleeny ni, ịdi eḍighi bọ mị rạ́wa ghan ịlo ạmi; mị rạwa ghan ghụn ịpe ẹḅeeraan bọ nyọpo urom bọ ịmi.
31“Ịlo mị ạgbaanaan loor ạmi, kómeeraam mọ ịne phọ ni. 32Ọnon oye odi ni dị ạmeera rụgbaanaan ịmi, kụ mị alegheri ni mọ ịpe ọdi rạkaaph bọ ịlo ạmi igey ni. 33#Jọn 1.19-27; 3.27-30Nyina irom ni ẹghiomaan Jọn, kụ ọdi mụgbaanaan ịmi igey phọ. 34Ọbo ị́kpaariom mọ mị ụ́moogh oye dị kụgbaanaan ịmi pọ íten, kụ mị ụtuan mọ ịmoogh pẹleeny kụ mị rạkaaph bọ ịduon phọ. 35ẠJon phọ ạghigh ọtozi dị raamor kạngo ḍịḅaal; kụ nyina imeeraam ni ẹrol mọony ẹnum amem eboh iboh sịphe ạḍiḅaal phọ ọdi. 36Kụ ạraraar edi ni dị ẹmeera rịgbaanaan ịmi kepu ịpe ạJon ạghaaph bọ: iiḍighi phọ Ọde phọ ụḅeni bọ ịmi mọ ḍighi phọ kụ mị raḍighi bọ, rịgbaanaan ni ịmi keḍeenaan mọ Ọde phọ kụ urom ni ịmi. 37#Mat 3.17; Mạk 1.11; Luk 3.22Kụ Ọde phọ urom bọ ịmi rụgbaanaan kẹn ni ịmi. Nyina ẹḍogh ọdi kẹ̋naghan ghan, ḅịle kẹn nyina nyọdi kẹ̋miin ghan ekpeḍien. 38Nyina íseere ọghaaph phọ ọdi iloghi phọ anyina, ịdi eḍighi bọ nyina ímeeraam nyọpo ọdi arom bọ. 39Nyina rẹeḅeghion ghan Ḍịnya Iigbia phọ kephogh, ịdi eḍighi bọ nyina regbi ghan mọ ịpa kụ ẹdi nyina kẹmoogh ghuḍum kꞌagee-pọ phọ. Ọkar igey ni, Ạḍinya Iigbia phọ rịgbaanaan ni ịmi. 40Kụ nyina ímeera itu ịteeny ịmi ịlo ọmoogh aghuḍum.
41“Mị rạ́wa ghan ḍịseph awe. 42Kụ mị ilegheri ni inyina mọ iloghi phọ anyina Ẹnaan ị́pomoghian. 43Mị ughol ḍien Ọde phọ ạmi kụ aru bọ, kụ nyina ịmi ị́sighe bọ. Ọnon oye lọ ạda ẹmhu kụ aru kụ ọdi nyina kẹsighe. 44Ịḅeeraan ni inyina dị oniin rakueni ghan ni nyoniin, kụ nyina rẹ́wa ghan ọmoogh eghuan kꞌEgina phọ Ẹnaan. Nyina kemeeraam bọ ika? 45Kégbi mọ mị kụ kạgbaaghi rạraar ạḅam ẹmhu anyina ghisigh Ọde phọ. AMozis phọ nyina eḍuom bọ ologhi phọ kụ kạgbaaghi rạraar ạḅam ẹmhu anyina. 46Mọ nyina ịkar ri emeeraam Mozis, nyina mimeeraam aani ni ịmi, ịdi eḍighi bọ ọdi ạge ni ịlo ạmi. 47Kụ ịdipho nyina ímeeraam bọ ịpe ọdi ạge bọ, nyina kemeeraam bọ ika ọghaaph phọ ạmi?”
دیاریکراوەکانی ئێستا:
Jọn 5: ẠḌI
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS