Matiu 15
15
Yesu mokambaroa toParisi lawi barahe mampeulai parentana Pue Ala
(Mrk. 7:1-23)
1Hambela tempo, arahe toParisi hai guru agama Yahudi au hangko i Yerusale laohe mampohidupaa Yesu, rauli, 2“Moapari hai topeguruMu moliungihe adanda toiorunta? Ane maandehe, barahe hampai memando moula aturanta.”
3Nahanaihe Yesu, “Moapari hai niliungi parentana Pue Ala i kamampeulaimi adanda toiorumi? 4Lawi nauli Pue Ala, ‘Bila umamu hai inamu.’ Hai Nauli mbuli, ‘Hema au motunda-tunda umana ba inana hangangaa rapapate.’ 5-6Agaiana ikamu mepaturo node: barapi paraluu tabila umanta hai inanta ane tauliangaahe node, ‘Apa au hangangaa kuweikau, kupopenombami i Pue Ala.’ Mewali, Ngkorana Pue Ala au manguli bila umamu hai inamu, barari nipeulai. Ada toiorumiri au nipomahile. 7I raoana pea peulami i Pue Ala! Tou mpuu lolitana nabi Yesaya hangkoia au mololita kana irikamu node:
8Nauli Pue Ala:
‘Tauna iti, i humenda pea mobilaNa,
agaiana lalunda karao hangko Iriko.
9Bara mobundu penombanda Iriko,
lawi paturonda hangko i manusia pea,
bara paturo hangko Iriko.’ ”#Yes. 29:13
10Roo indo, Yesu mokakiomohe tauna bosa, pane Napahaweahe ngkora pandiri ide, Nauli, “Nipehadingi bona niisa. 11Paande au mesua i nganganta, bara iti au mopakedaike i peitana Pue Ala. Lolita au mesuwu hangko i humenta, iti au mopakedaike i peitana Pue Ala.”
12Hangko inditi, maimohe topeguruNa, mouliangaa, “Bara pae Nuisa kakoina inaonda toParisi mohadi lolitaMu inona?”
13-14Nahanai Yesu, “Pogiangaamohe toParisi iti padu! Ihira nodohe tuda-tuda au bara natuda UmaNgku au ara i suruga, hai batenda rawuka. Toparisi iti nodohe tadulako au bilo, lawi barahe moisa rara au manoto lao i Pue Ala. Hai ane hadua tobilo monini hangka tobilona, batena ina manawohe rorodua i kalolu.”
15Nauli Peturu, “Guru, Nupakanotoangkai ngkora pandiri au Nupahawe inona.”
16Mehana Yesu, Nauli, “Bara pae niisa lempona? 17Paande au mesua i lalu nganganta liliu mesua i lalu tainta, hai hangko inditi tatende. Bara iti au mopakedaike i peitana Pue Ala. 18Agaiana lolitanta au kedai au hangko i lalunta hai mesuwu i humenta, itimi au mopakedaike i peitana Pue Ala. 19Lawi hangko i lalunta mesupa hinangkana pekiri au kadake, alana ara au mepapate, mebualosi, metie, manangka, mosabi dongko hai mengkora-ngkora. 20Babehia au nodo iti au mopakedaike i peitana Pue Ala. Ane maande hai bara hampai memando, bara iti au mopakedaike i peitana Pue Ala.”
Hadua towawine au bara to Yahudi merapi tulungi i Yesu
(Mrk. 7:24-30)
21Hangko indo, laomi Yesu i tampo au hungku i wanua Tirus hai Sidon. 22Inditi, ara hadua towawine to Kanaa, au bara to Yahudi. Towawine iti mai i Yesu, hai meraroa, nauli, “Pue, pemuleana Datu Daudi! Pokaahi wongkoia! Anangku towawine napesuangi tokadake, rumihi kamahaina.”
23Agaiana Yesu bara mehana. Maihe topeguruNa mohungkuki, rauli, “Guru, Nutudumi padu towawine iti, lawi paka monganga-nganga meula irikita.”
24Nauli Yesu i towawine iti, “Pue Ala motuduNa mai motulungi pemuleana pea to Isaraeli, lawi ihira nodo dimba au puha.”
25Agaiana mai pea towawine iti molingkudu motumpa i lindona Yesu, nauli, “Pue, tulungi wongkoia!”
26Nahanai Yesu, Nauli, “Bara maroa moala paande anangkoi hai rawei dike.”#15:26 To Isaraeli rapandiri nodo anangkoi. Au barahe to Isaraeli rapandiri nodo dike.
27Mehana towawine iti, nauli, “Tou, Pue, agaiana dike moande wori wuta au manawo hangko i wongko meja paandeana ampuna.” 28Hangko inditi, nauli Yesu, “Mahile mpuu pepoinalaimu! Ina mewali nodo peundeamu.” Tempo iti peami, maoha mpuu anana.
Yesu mopakaoha bosa tauna
29Roo indo, padu worimi Yesu hangko inditi, molumao metalinti i wiwi rano Galilea. Mempanai lao i tongku-tongkuna, hai mohuda mepaturo. 30Mokoloromohe tauna bosa monontohi Ia, moantihe au palu, au bara masilolonga watanda, au bilo, au bara peisa mololita hai tomahai au ntanina. Rawolihe i lindona Yesu, hai Napakaohahe. 31Tingkaramohe tauna bosa moita ope-ope tauna au napakaoha Yesu: tauna au bara peisa mololita, mololitamohe, au bara masilolonga watanda, maroa hulemi watanda, au palu molumaomohe, au bilo meitamohe. Ido hai tauna iti mampomahile Pue Ala au rapenombai to Yahudi.
Yesu mopaande iba sabuna tauna
(Mrk. 8:1-10)
32Roo indo, Yesu mokakio topeguruNa, Nauliangaahe, “Maahi laluNgku moitahe tauna au bosa ide. Talumi alonda inde, bara ara paandenda. Bara turu inaoNgku motuduhe mesule i lalu kamariminda, laloarahe pae deade i rara.”
33Rauli topeguruNa, “Hangko iumba ina tahumba paande au ina tapopopaandehe tauna hanode kabosanda, lawi paidaa ide boa?”
34Yesu mekune irihira, “Hangkia oguna roti au ara irikamu?”
Rahanai, “Pitu oguna, hai bahangkia pea baana ikane kokoi.”
35Hangko inditi, Natudumohe tauna bosa mohuda i tampo. 36Naalami roti au pitu oguna hai ikane kokoi au bahangkia baana iti, hai mekakae i Pue Ala. Roo indo, Ia mobise-bisemi roti hai ikane hai Naweihe topeguruNa bona rakira-kiraahe tauna bosa. 37Maandemohe ope-ope duunda mabuhu. Karoonda maande, topeguruNa morampu pentarana, pitu bingkana. 38Kabosanda au maande i tempo iti, iba sabuna tobalilo, bara teimba towawine hai anangkoi. 39Roo indo, Natudumohe mesule lao i sounda, hai mesawimi i duanga lao i tampo Magadan.
دیاریکراوەکانی ئێستا:
Matiu 15: NPY
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
@LAI 2016