UTOM MME APOSTLE 11
11
Peter Otim Atat Ikɔ Ɔnɔ Nditɔ-ete Ke Jerusalem
1EDI mme apostle ye nditɔ-ete eke edude ke Judaea ekop ete mme Gentile nde ebɔ ikɔ Abasi. 2Edi ke ini Peter ɔdɔkde edi ke Jerusalem, mmɔ emi eyirede mbobi eneni eneni ye enye, 3Afo omoduk ufɔk owo emi minaŋa mbobi akadia ŋkpɔ ye mmɔ. 4Edi Peter ɔtɔŋɔ ke eritɔŋɔ otim atat ŋkpɔ oro ɔnɔ mmɔ ke itie ke itie, 5ete, Ŋkodu ke obio Joppa mbɔŋ akam: ndien etie mi nte esiode mi ke ikpɔhidem, ami nnyuŋ ŋkut ŋkukut; ŋkut ŋkpɔ kiet ɔsuhɔrede, ebiet akwa ɔfɔŋ, eke emumde ke utit mbinaŋ, eyak oto ke enyɔŋ ɔsuhɔre; ndien enye edisim mi; 6Ndien ke ini ŋwukde enyin nse enye, ŋkere nnyuŋ ŋkut mme unam obot eke enyenede ukot inaŋ ye mme unam ikɔt, ye se inyɔnide ye mme inuen enyɔŋ. 7Nnyuŋ ŋkop uyo ɔdɔhɔde mi ete, Daha ke enyɔŋ Peter; wot, ta. 8Edi ndɔhɔ nte, Baba, Ɔbɔŋ: koro se misanake ye se ebetde ibet akanam idukke mi inua. 9Edi uyo oto ke enyɔŋ ɔtɔŋɔ ntak ɔbɔrɔ ete, Kubat se Abasi anamde asana ke ibet. 10Enam emi utim ikata: ndien ekot kpukpru edɔk ke enyɔŋ. 11Ndien sese, kpa idem idaha oro, owo ita eda ke enyin-usuŋ ufɔk emi nnyin idude ke esit; ekɔdɔŋ mmɔ eto ke Caesarea etiene mi. 12Edi Spirit ɔnɔ mi uyo, ete, nsaŋa ye mmɔ, ŋkusat owo. Nditɔ-ete itiokiet emi esaŋa ye ami; 13nnyin inyuŋ iduk ufɔk owo oro: ndien enye obuk ɔnɔ nnyin nte enye okokutde angel adade ke ufɔk esie, emi ɔdɔhɔde enye ete, Dɔŋ eka ke Joppa ekeda Simon, emi ekotde ekedian Peter, edi; 14enye eyemen ikɔ eke edinyaŋade fi ye ofuri ufɔk fo etiŋ ɔnɔ fi. 15Edi nte ntɔŋɔde nditiŋ ikɔ, Edisana Spirit ɔsuhɔre odoro mmɔ ke idem, kpa nte okodorode nnyin ke akpa. 16Ndien nti ikɔ Ɔbɔŋ nte Enye ɔdɔhɔde ete, John akada mmɔŋ onim owo baptism; edi eyenim mbufo baptism ke Edisana Spirit. 17Mmɔdo edieke Abasi ɔnɔde mmɔ kpa oruk enɔ emi Enye ɔkɔnɔde nnyin ke adaŋemi nnyin inimde Ɔbɔŋ Jesus Christ ke akpanikɔ, ami ndi anie nte ŋkpɔbiɔŋɔde Abasi? 18Edi ke ini mmɔ ekopde ŋkpɔ emi, mmɔ edop uyo, enyuŋ enɔ Abasi itoro, ete, Ama edi ntre ndien, Abasi ayak mme Gentile ŋko ekabare esit eduk uwem.
19Mmɔdo mmɔ eke esuanade ke ntak ukut emi ɔtɔŋɔde ke ikɔ Stephen esaŋa tutu esim Phoenicia, ye Cyprus ye Antioch, edi mmɔ ikwɔrɔke ikɔ inɔ baba owo kiet ke mibɔhɔke mme-Jew ikpɔŋ. 20Edi ke ini ndusuk mmɔ eke edide mbon Cyprus ye Cyrene ema edi ke Antioch, mmɔ etiŋ ikɔ enɔ mme Greek ŋko, enyuŋ ekwɔrɔ Ɔbɔŋ Jesus. 21Ndien ubɔk Ɔbɔŋ odu ye mmɔ: ediwak owo emi enimde ke akpanikɔ enyuŋ ekabare etiene Ɔbɔŋ. 22Edi etop mmɔ osim utɔŋ mbon ufɔk Abasi emi edude ke Jerusalem: mmɔ enyuŋ edɔŋ Barnabas edisaŋa tutu osim Antioch: 23ndien ke adaŋemi enye akade onyuŋ okutde mfɔn Abasi, enye adat esit; onyuŋ ekpe ye mmɔ kpukpru ete mmɔ eda iwukesit ediana ye Ɔbɔŋ: 24koro enye edide eti owo, Edisana Spirit ye mbuɔtidem enyuŋ eyɔhɔ enye ke idem: ndien ediwak owo ediana ye Ɔbɔŋ. 25Edi enye adaha aka Tarsus okoyom Saul: 26ndien ke ini okutde enye, ada enye edi ke Antioch. Ntre ke mmɔ ebono ye ufɔk Abasi ke ofuri isua kiet, enyuŋ ekpep ediwak owo ŋkpɔ. Ndien ebem iso esio mbet enyiŋ Christian ke Antioch.
27Edi ke mme usen oro mme prophet eto ke Jerusalem esuhɔre edi ke Antioch. 28Ndien owo mmɔ kiet, emi ekerede Agabus, adaha ke enyɔŋ ada odudu Spirit ayarare ete akamba akaŋ ɔmɔŋ odu ke ofuri ererimbot; akaŋ emi osu ke eyo Claudius. 29Ndien mbet eduak nditibe ŋkpɔ, adaŋa nte ukeme mmɔ kiet kiet edide, nnɔ esɔk nditɔ-ete emi eduŋde ke Judaea; 30mmɔ enyuŋ enam ntem, enɔ enɔ mmɔ ke ubɔk Barnabas ye Saul esɔk mbiowo.
دیاریکراوەکانی ئێستا:
UTOM MME APOSTLE 11: ENA
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Efik Old Bible With Sectional Headings © Bible Society of Nigeria, 2013, 2019.