OHÚTU 8
8
Éŋkpɔ̄ nɛ̄hi ā mɛ
1Ɔwɔicō í je mlanyī Unówa mɛ́mla odúúdú aɛ́bɛ́ mɛ́mla aígbáanɔ nēe bá mɛ́mla anú ipú ɔwú ā ŋ́. Ó le yá kú owu nɛ̄hi kóō tá, anɔ́ɔ éŋkpɔ̄ ā gbo ɔ́ ō wúla á. 2Éŋkpɔ̄ nōo pɛ́ ŋmá ipú ajɛ ā le gwū, ɔwɔ nōo yā ŋmá ɔkpáncō ā kē le hɛ́ í yā ɛ́ɛ́ gɛ ŋ́. 3Éŋkpɔ̄ ā wúla wāajɛ ɛmɛɛma jāā ɛ̄cī ofahāapa ce igwó, anɔ́ɔ ó kwú wúla gaajɛ ɛyínɛ̄hi á. 4Ɛ̄cī igwáahāapa kú ɔyā ahāapa ā, úgbéenyi ā gaá cɛyí aɛ́fu kú Árārati. 5Éŋkpɔ̄ ā yɔ̄ ī wúla jāā gbó ɔyā igwó. Ɛ̄cī aflɛ́yí kú ɔyā igwó ā, īkpɛ̄yí kú aɛ́fu ā gbɔɔ́ ō kwɛɛcɛ.
6Oŋmɛ́yí kú ɛ̄cī ofɛpa ā, Unówa le ɔwɛ kú úgbéenyi ā nwūla. 7Anɔ́ɔ ó le ígbáanɔ nēé hī ka ɔtágláma ā tɛ̄hɔ̄ ga ɛcɛ á. Ó cīgbīhi wā gɛ ŋ́, ó yɔ̄ ī wu gaajɛ gicō jāā gbéeko nɛ̄ éŋkpɔ̄ ā le ŋmó ŋmá ajɛ. 8Anɔ́ɔ ó klla le okóohō tɛ̄hɔ̄ ga ɛcɛ kóō má ɔ́dāŋ ka éŋkpɔ̄ ā le ŋmó ŋmá ajɛ ɛɛ́. 9Amáŋ abɔ̄ éŋkpɔ̄ ā yɔ̄ ajɛ kpɔ́ ɛ́ɛ́ mā, okóohō ā í má ɛga ō lɛ ikpó kwaajɛ ŋ́. Anɔ́ɔ ó le wu cīgbīhi ga ɛgiyí úgbéenyi ā. Unówa le abɔ̄ nā ga ɛcɛ, mīyɛ ɔ́ wā ipú úgbéenyi ā. 10Unówa gbēyī ɛ̄cī ahāapa ɔhá kpɔ́, anɔ́ɔ ó le okóohō ā tɛhɔ̄ ga ɛcɛ igbɔhá kpɔ́. 11Anɔ́ɔ okóohō ā pīyɛyí wā ɛgiyí Unówa ɔ̄nɔ̄ɔ̄nɛ̄, le ēpū ɛ̄mɛ̄ɛ̄mɛ̄ kú ɔcí nēé hī ólifu ā kwu ɔkɔ́ á. Unówa le jé ka éŋkpɔ̄ ā ɔ́ɔ le ŋmó ŋmá ajɛ ɛɛ́. 12Anɔ́ɔ ó klla gbēyī ɛ̄cī ahāapa ɔhā kpɔɔ́, anɔ́ɔ ó lɛ okóohō ā tɛ̄hɔ̄ ga ɛcɛ kpɔ́ á. Igbɛ́nyā, ó pīyɛyí wā ɛgiyí nū ɛ́ɛ́ gɛ ŋ́.
13Eko nɛ Unówa wɛ iháyí úlā ce ofigwó ce éyi ā, ɛ̄cī aflɛ́yí kú ɔyā éyi ā, Unówa lɛ ɔwú ā nwūla, ó le eyī pīya má ajɛ, anɔ́ɔ ó le má ka ajɛ ɔ́ɔ le ŋmó ɛɛ́ á. 14Ɛ̄cī ofu ce ahāapa kú ɔyā ɛpa ā, ajɛ le ŋmó dúúdú.
15Ɔwɔicō da Unówa kahíníī, 16“Nyɔ̄ gɛcɛ ŋmá ipū úgbéenyi ā mɛ́ɛ́nɛ, awɔ mɛ́mla ɔnyā uwɔ mɛ́mla ayí uwɔ mɛ́mla anyā ūwā. 17Kwú odúúdú aígbáanɔ mɛ́mla aɛ́bɛ́ ā ú kpó kéē gɛcɛ mɛ́mla awɔ dúú. Cɛ́ɛ́ kéē ma ayí kéē nyīla ga ɛga dóódu kú ɛcɛ.” 18Anɔ́ɔ Unówa le bɛ̄cɛ ŋmá ipū ɔwú ā mɛ́mla ɔnyā nū mɛ́mla ayí nū, mɛ́mla anyā ayí nū á. 19Odúúdú aɛ́bɛ́ mɛ́mla aígbáanɔ mɛ́mla aɔ́dā ō lɛ ipú piyajɛ ā, le pɛ́ bɛ̄cɛ ŋmá ipú ɔwú ā, ígwíígwu kú uwā ɛ́gɛ́nɛ̄ ɛdɔ kú uwā lɛ ā.
Unówa le ɛya gwó lɛ Ɔwɔicō
20Unówa le ede gwó lɛ Óndú ā, anɔ́ɔ ó kwú éyééye kú aɛ́bɛ́ mɛ́mla aígbáanɔ nēe le yēŋēē ā ú, kwú uwā ú gwɛ́ɛya oyi ɔlá dúúdú lɛ Ɔwɔicō ɛyí ede ā á. 21Eko nɛ̄ Ɔwɔicō le ocu kú ɛya oyi ɔlá dúúdú nyā pó ā, ó he ɔ́ ɔtū nɛ̄hi, anɔ́ɔ ó ka ipú ɔtū kú nū kahíníī, “Ń gaá tá okónu lɛ ɛcɛ ohígbū alɛɛcɛ igbɔhá gbóógbóō ɛ́ɛ́ gɛ ŋ́. Ohígbū ka n jé ka ɛlá obɔ̄bí nēé gē gbo ipú ɔtū kú uwā ā eko dóódu ŋmá eko ɔyípɛ̄ kú uwā á. Ń gaá je ɔdā oyēeyī yíífi igbɔhá ɛ́gɛ́nɛ̄ n yá eko nyā ā ɛ́ɛ́ gɛ ŋ́. 22Ɛ́gɛ́nɛ̄ ɛcɛ géē yɔ̄ í kwu lɛ ā, eko nēé ī nyi ɔdɛ̄hɔ̄ géē yɔ̄, eko nēé géē cē ɔdɛ̄hɔ̄ kē í yɔ̄. Eko ofū mɛ́mla eko iye okwulá géē yɔ̄, ɔgwā mɛ́mla ɔnɔ̄ kē géē yɔ̄. Ɔlɛ́ɛnɔ mɛ́mla otú kē géē yɔ̄.”
دیاریکراوەکانی ئێستا:
OHÚTU 8: IFBCL
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە