Baɗitari 9
9
Hyel Ku Hara Alkawal Aka Nuhu
1Antə Hyel ku vədzə barka aka Nuhu ka maɗa'ni, ka pəla ala ɗa abbər, “Ka giri ya hang, ka giri yatədzi, ka giri nghyantə duniya. 2Shanga mwaɓiyayeri ar mtaku na akwa duniya, ka shanga ɗikayeri na ata kutahyel, ka shanga su na ana mwa ka yimər kutari ata di, ka shanga kəlfayeri na akwa yimi, ata thlivər giri ka yakata. I ku hamta ɗa shang akwa tsiya giri. 3Kəlara su na ka mpika na ana kənggərardzi ata ndzi susəma ala giri. Antə apatə I ku hamta ala giri shanga su na ka thlali ka da ndzi susəmər giri, antə I ku hamta ala giri shanga su. 4Amma giri aɗiya ɓɗə kum ka mamshari tsu akwa wa, kamnyar mamshi an mpika. 5Ata kəra mamshir giri natə tsa an mpika giri, I ata yu mnya kəlara mdə na ku kəl mpika nvwani. Apani kəlara mda wala mwaɓi na ku kəl mpika mda, tsa ata pəla mnyari. Kəlara mdə na ku kəl mpika ɓzərma'ni, mda ata kəl mpikari.
6“Kəlara mdə na ku pumta mamshir mda,
tsu mda an ata pumta mamshirni.
Kamnyar akwa dludzər Hyel
antə Hyel namtə mda.”
7“Amma ar giri, ka giri ya hang, ha hangkurər giri jakjaka. Ka giri yatədzi, ka jaka ata kəra duniya.”
8Antə Hyel jaktə pəla aka Nuhu ka maɗa'ni, 9“Nggədza kulini I ata mbwi alkawal ka giri, kəga kəkayeri ar giri na aghəla giri, 10ka shanga su na ka mpika adzə giri, ɗikayeri, kəga mwaɓiyayeri na ar kəi, kəga mwaɓiyayeri na ar mtaku, ka shanga su na ka mpika na ku səɓəla akwa shar ni. 11Tsuwa I akwa kətə alkawal ala giri abbər I aɗi ata jaktə shamta su na ka mpika ka yimər avava kəra wa. Mda aɗi ata jaktə hara yimər avava na ata shamta duniya kəra wa.”
12Antə Hyel pəla, “Ngəni an seɗar alkawal natə I ata kətari akwa daɓwi ka giri, ka shanga su na ka mpika na adzə giri, ka shanga zamanayeri na ata si. 13I ata vəi kigyau arna akwa dlamba, na ata ndzi seɗar alkawal akwa daɓwi ka duniya. 14Kəlara sakatə I ku səntə dlamba ata kəra duniya, antə giri ku wutə kigyau akwa dlamba ni, 15I ata ɗangtə alkawal natə I hara akwa daɓwi ka giri, ka shanga jili su na ka mpikə ni. Antə yimi aɗi na ata jaktə səntə avava har ka tsa shamta shanga su na ka mpikə wa. 16Kəlara sakatə kigyau ku wutədzi akwa dlamba I ata wutari kəi ɗangtə alkawal na ba saka madi tə I na Hyel hara akwa daɓwi ka shanga su na ka mpika ata kəra duniya.”
17Antə Hyel ku pəla aka Nuhu abbər, “Ngəni an seɗar alkawal natə I ku vəi akwa daɓwi ka shanga su na ka mpika ata kəra duniya.”
Nuhu Ka Maɗashilərni
18Maɗashilər Nuhu na səɓəla akwa shar ni an Shem, ka Ham, ka Yafeth. Ham an yaɓəla Kanana. 19Da makər ni an maɗa' Nuhu, tsuwa mji ngəni an yatədzi ka titilidzi akwa duniya ni.
20Nuhu ku ndzi mdər tsuhwa, tsuwa tsa an mdə na ntangkəma na baɗitə hara fakər anap. 21Tsa ku sa yimər anap, ka wika, ka pəpəi dura akwa tentərni. 22Antə Ham na baba' Kanana ku wutə baba'ni dura, antə tsa ləɓəla ka pəla aka maɗama'ni na suɗa aɓəla ni. 23Antə Shem ka Yafeth ku fatə ləptu laga, ka puta ata pathlaha ɗa japu, ka mwa ka bwahili ka bwahili kara pudza aka baba' ɗa na dura ni. Da hamta kəma ɗa təbwa damwa kamnyar ta da awutə durakur ar baba' ɗa. 24Sakatə wikə ni ku ɗəwula adzə Nuhu, tə tsa nggaɓəla su tə ɓzərni na raka ta shang hara alari ni, 25antə tsa pəla,
“Ka Kanana ndzi shushuwari!
Tsa ata ndzi mafar mafayeri aka maɗama'ni.”
26Tsuwa Nuhu pəla,
“Ka huwa ndzi aka MTHLAKU na Hyelər Shem!
Ka Kanana hara mafakur aka Shem.
27Ka Hyel hara ka sur Yafeth jakjaka,
Ka Yafeth ndzəndzi ata vəi duku ka Shem,
tsuwa ka Kanana hara mafakur aka Yafeth.”
28Aghəla yimər avava ni Nuhu ku jaktə hara məva aru makər ka ntəfkumari. 29Hangkur shanga məvar Nuhu an aru əmdla ka ntəfkumari, antə tsa ku mti.
دیاریکراوەکانی ئێستا:
Baɗitari 9: KNB
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.