Baɗitari 7
7
Yimər Avava Ku Hartə Duniya
1Antə MTHLAKU pəla aka Nuhu abbər, “Səkwa shar ni, ga ka shanga mjir kutakəyir nga, kamnyar I wuta abbər gə shinga an ka jirkur akwa zaman ngəni. 2Akwa nca shanga jili mwaɓiyayeri na kəcəkəcari, ka gə fatə mwaɓi repu repu vəyari murfa salari ka mwalari, ka da ndzi adzə nga. Tsuwa akwa nca shanga jili mwaɓiyayeri na adiya, ka gə kəɓəla mwaɓi pal pal, salari ka mwalari. 3Tsuwa akwa nca shanga ɗikayeri, ka gə fatə ɗika repu repu vəyari murfa, salari ka mwalari, kamnyar ka hwulfər ɗa mbila ata kəra duniya shang. 4Kamnyar aghəla vir murfa, I ata thlentə yimi akwa duniya, yimi na ata hara pci nfwarkumari ka viri nfwarkumari. Antə shanga su na ka mpika natə I ku namta, I ata shamta ɗa ata kəra duniya.” 5Antə Nuhu ku hara shanga su kalkal apatə MTHLAKU ku tsawa alari
6Nuhu ka məvari aru ngkwa sakatə yimər avava ni si ata kəra duniya ni. 7Antə Nuhu ka maɗashilərni, ka mwalankiɗa kəga mwankir maɗa'ni ku ləkwa shar ni ata kəma duku kamnyar ka da msəra ta avava ni. 8Antə akwa nca mwaɓiyayeri na kəcəkəcari, ka akwa nca mwaɓiyayeri na adiya, ka tsuwa akwa nca ɗikayeri, ka shanga mwaɓiyayeri na ana mwa ka yimər kuta ɗa ata di, 9da suɗsuɗa, salari ka mwalari, an si ka ləkwa shar ni adzə Nuhu, tsu apatə Hyel ku tsawa aka Nuhu. 10Aghəla vir murfa antə yimər avava ku baɗitə təra akwa duniya.
11Akwa vira thliya kumnya murfəkur ar thliya na suɗkur, akwa məva na aru ngkwakur ka yaɓəladzər Nuhu, vir nda antə shanga vəi səɓəlar yimayeri na zurang akwa kira di, ka gular yimayeri na amtazi ku mbugərəmtadzi. 12Antə yimi baɗitə təra ata di akwa duniya ar pci nfwarkumari ka viri nfwarkumari. 13Tsuwa tsu vir nda antə Nuhu ka maɗashilərni, watau Shem, ka Ham, ka Yafeth, ka mwalankiɗa, ka mwankir maɗa'ni na makər ni, ku ləkwa shar ni. 14Da ləkwa ata kəma duku ka shanga jili mwaɓiyayeri ar mtaku, ka shanga jili mwaɓiyayeri ar kəi na aɗi, ka shanga jili su na ana mwa ka yimər kuta ɗa ata di, ka shanga jili ɗikayeri na aɗi, kəlara jili su na ka ɓəɓəku. 15Shanga ɗa ku ləkwa shar ni ata kəma duku ka Nuhu, kəlara su na ka mpika, suɗsuɗa. 16Tsuwa shanga ɗa na ləkwa ni an salari ka mwalari ar shanga su na ka mpika, antə da ku ləkwa kalkal apatə Hyel ku tsawa aka Nuhu. Antə MTHLAKU ku hartə nyarmbwar shar ni.
17Antə yimər avava ni ku ləkəma ka təra akwa duniya har vir nfwarkumari. Antə yimi ni ku jakjaka har ka haptə shar ni kazhar di, tə shar ni ku ləmta nal kazhar di. 18Antə yimi ni ku muli ka jakjaka ka hara hang ata kəra duniya. Antə shar ni ku haptədzi amta ka ndzi ata kəra yimi ni akwa mwa. 19Antə yimi ku mula ka duna ata kəra duniya, har tə shanga kəra garayeri na nal nal akwa duniya ku hartədzi. 20Yimi ni ku muli har ka hartə kəra garayeri, har tə kəra garayeri ni sha akwa yimi ni səyam ka dzartsi kumnya ntəfu. 21Antə shanga su na ka mpika na ana mwa akwa duniya ku mtəgəmtadzi, kəga ɗika, kəga mwaɓi kəi, kəga mwaɓi mtaku, ka shanga su na ka mpika na ana mwa ata di, ka shanga mji.
22Shanga su na ata di ul'ula, na ana mpika akwa kucirari ku mtəgəmtadzi. 23Apani antə tsa ku kurəmta shanga su na ka mpika akwa duniya, mda, ka mwaɓi, ka mwaɓi na ana mwa ka yimər kutari, ka ɗika na ata kutahyel, shanga ɗa mdə ku shamta ɗa kazhar kəra duniya. Tar Nuhu ka mji na adzə ni akwa shar ni an mbil ka mpika. 24Antə yimi ni ku mula ka hartə kəra duniya ni har mnyar vir aru pal ka ntəfkumari.
دیاریکراوەکانی ئێستا:
Baɗitari 7: KNB
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.