Акълова 8
8
8 къаьм
Аᵸкъиллъила гьинил рец бо̄лъи
1Аᵸкъиллъи гаьъади илӀелацас,
аᵸкълола гаьъади аьгьи богьцас?
2Гьинолила гомдийа мицакьана йечена,
гьула̄зу гьинода йийаццала мица̄кьана йечена гей гьули аᵸкъиллъи.
3Шагьарлила кавлидойна йечена,
шибаб билӀола маьгьакьана йечена илӀелацас гей гьули:
4«Мизохъа̄ъ, аьдамла до илӀелацас гей,
къацӀцӀо халкъилахъа̄ъ до гьокӀ йагъоцас гей!
5Йе жагьилабла аьдамла, мизол илмо-лъай бокӀола!
Йе аьбдалла, дие аᵸкъло боха!
6Дӣхъа энекзи ба̄хъ миже,
пайда гаьгьийо жо нисаллӀона гей до мизохъа,
битӀараб жо нисал дил сикӀо йеᵸгьелал йатӀна гей.
7Боважаъцас йаьже гуваъас диела сикӀаъкьа̄,
гьересина гей диела сикӀал сурукъаб жо.
8Диела сикӀаъкьа̄ гувагьийа̄ йаьжбо битӀарабла йа̄хъца.
Гьиллана, мекълъи-тӀекълъина йахъаъас гьолло йаьжла̄ъ.
9Биджи йахъцала сукӀол битӀарабла йаьжбо гей вагьалло̄л,
лъай гаьгьийа̄л ритӀухъаблана гей.
10Окко-меседлила мицаъ дие аᵸкъло-малъи миза,
цӀудда меседлила мицаъ дие илмо-лъай тӀалаб бова.
11Жавгьар-якъутлигъана кӀетӀо гей до,
гьула̄зу дул йатӀийосинаб жона дил данде йоᵸкъойхъаъас.
12До гей аᵸкъиллъи. Дӣъ гей цӀодорлъина,
гьула̄зу дие илмо-лъайна гикьа мокъойо гей.
13БетӀергьан Аллагьлихъа гьичӀейолъи – вагьли йахъца кешлъи йатӀеэшлъи.
Дил – аᵸкъиллъилал – йатӀаъцас жо гей букъо аьмал бо̄йолъи,
гьула̄зу кешлъиладойс гьинона, йоᵸтӀолацас сикӀона.
14Аᵸкъло нилӀнана бахъца дӣхъа, комак богьнана бахъца дӣхъа.
Дӣъ аᵸкъло-насигьатна гей, дӣъ къуват-гучна гей.
15Дӣъкьа̄ъйа̄ъ пача̄ гьидес ханлъи йо̄с,
гьаькимла̄ битӀараб гьоькмо бо̄с.
16Дӣъкьа̄ъйа̄ъ халла̄ ханлъи йо̄с,
къацӀцӀола наибла̄ ритӀухъаб гьоькмона бо̄с.
17До йаццала̄л динна ба̄цца,
до йиᵸзал муьхобалъийа̄л йиᵸхъос до!
18Дӣкьа̄ йиᵸхъос бечелъина къадро-къиматна,
гьоᵸсна болъаъцас боцӀи-ризкъина, кӀетӀо бетӀербахъина.
19Дӣкьа̄ йиᵸхъоцас жо цӀудда меседлигъана кӀетӀо гей,
дӣкьа̄ йахъцас жо окко-меседлигъа кӀетӀо гей.
20До йеᵸкьеш ритӀухълъилала гьидкьа̄,
ритӀухъабли гьоькмолала гьидкьа̄.
21До йатӀийа̄л нилӀал бечелъина гей дие,
гьоллос гъамасбана до хазиналис йовацӀилца.
22Бишун аьᵸйдда̄ до йо̄йо БетӀергьалли,
йилӀа аьᵸйда̄ла замалла̄ъзу зукъойо до.
23Лъингъана аьᵸйда̄ – гьинила замаллиъ йахъийо до,
дунийал бахъал аьᵸйда̄жу бижжи йахъна.
24До йахъийа мехлаъ, ралъадба зувакъеэш,
лъи тели гаьгьийа̄ эᵸхейа зувакъеэш.
25Ма̄ьда-бизода йа̄хъал аьᵸйда̄ до йахъна.
26Ракьна, гьулиъ муькъо-бохна,
мицас аьᵸйдда̄ш къакъа̄на БетӀергьалли йа̄хълал аьᵸйда̄ зукъойо до.
27Гьолцо гьаса гувалцалаъ, до гьулиъ зукъойо.
Аьᵸйдда̄ ралъадбакьа вагьдо дунийал бахълал маче мизцалаъ,
Гьолцо гор богьна гьуч багъослаъзу, до зукъойо.
28Гьолцо гьасаъ гьаса-муса йовагьцалаъ,
аьᵸйдла̄ла ралъадбаъас эᵸхейа-кӀа̄ьда йеᵸйагьцалаъзу,
до зукъойо.
29Гьинис амро бугъонна, ралъад гиса богицӀечӀе бецалъгъа,
Гьолцо оьрхъи гулло, гьула̄зу мицал бигъа гулцалаъзу,
до зукъойо.
30Вагьалълъо мехлаъ до зукъойо Гьолцол йогьдацас устарлъилаъна, шибаб водиъ Гьолцол рохеллъилаъна
зукъойо.
Нитоназу Гьолцоъкьа̄ рази йахъна йахъа̄гьийо дона.
31ВагьалӀо дунийалликьа йакӀо цӀилӀона йахъа̄гьийо до,
Гьолцо бахъилла дунийаллила аьламатликьа рази йахъна йахъа̄гьийо до.
32Верейа, аьдаьмла, гьаᵸже дӣхъа энекзи ба̄хъ:
гьардарабла гаьъад дие гьинода цӀуми йовагьийа̄ аьдамла.
33Энекзи ба̄хъ диела малъ-хъайла̄хъа,
гьолло̄л йечабаннейа̄къа,
аᵸкъилабла ба̄хъ.
34Гьардараб гаьъад воддиъ диела кавлидой аьгъиъна эчена,
гьула̄зу диела маьгьакьа къаравуллъилаъ эчена,
дӣхъа энекзи ахъцас сукӀо.
35До гьидел йиᵸхъова̄ сукӀол чӀаголъи йиᵸхъос,
БетӀергьанна рази ахъца гьолцокьа.
36Дидой шеблаъкьа̄ эᵸкьейа гьинилзу зарал бо̄с;
до йатӀеэшшинабла̄л хел бацца».
دیاریکراوەکانی ئێستا:
Акълова 8: KapPROLUK
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)