Эвел 5
5
Адамдихъан Нюгьдихъна
1Магьа Адамдин тухмикан ихтилат. Заанури адми арайиз хруган, Чаз ухшар вуйир арайиз гъахну. 2Жилижви ва дишагьли арайиз гъахну, дурар ужувлакк ккаъну, ва, арайиз гъахиган, дурариин «инсаният» кӀуру ччвур иливну.
3Адамдиз, дугъан варжна сумчӀур йис вуйиган, чаз ухшар вуйи бай шулу. Дугъаз Шит кӀуру ччвурра тувру. 4Шит бабкан хьпан кьяляхъ Адам миржидварж йисансана яшамиш шулу. Дугъаз хъанара баяр-шубар айи. 5Адам вари урчӀвудваржна сумчӀур йисан яшамиш гъахьну, хъа думу йикӀуру.
6Шитдин варжна хьуд йис гъабхьиган, дугъаз Энош шулу. 7Энош бабкан гъахьихъан, Шит миржидваржна ургуд йисансана яшамиш шулу. Дугъаз хъанара баяр-шубар айи. 8Шитдин вари урчӀвудваржна йицӀикьюд йис шулу, хъа йикӀуру.
9Эношдин урчӀвцӀур йис вуйиган дугъаз Кайнан шулу. 10Кайнан бабкан хьпан кьяляхъ Энош миржидваржна йицӀихьуд йисансана яшамиш шулу. Дугъаз хъанара баяр-шубар айи. 11Эношдин вари урчӀвудваржна хьуд йис шулу, хъа думура йикӀуру.
12Кайнандин ургцӀур йис вуйиган дугъаз Магьалеел шулу. 13Магьалеел бабкан хьпан кьяляхъ Кайнан миржидваржна ягъчӀвур йисансана яшамиш шулу. Дугъаз хъанара баяр-шубар айи. 14Кайнандин вари урчӀвудваржна йицӀуд йис шулу, хъа думура йикӀуру.
15Магьалеелин йирхьцӀурна хьуд йис вуйиган дугъаз Яред шулу. 16Яред бабкан хьпан кьяляхъ Магьалеел миржидваржна сумчӀур йисансана яшамиш шулу. Дугъаз хъанара баяр-шубар айи. 17Магьалеелин вари миржидваржна урчӀвцӀурна хьуд йис шулу, хъа думура йикӀуру.
18Яреддин варжна йирхьцӀурна кьюд йис вуйиган дугъаз Янок шулу. 19Янок бабкан хьпан кьяляхъ Яред миржидварж йисансана яшамиш шулу. Дугъаз хъанара баяр-шубар айи. 20Яреддин вари урчӀвудваржна йирхьцӀурна кьюд йис шулу, хъа думура йикӀуру.
21Янокдин йирхьцӀурна хьуд йис вуйиган дугъаз Метушелах шулу. 22Метушелах бабкан хьпан кьяляхъ Янок шубудварж йисансана яшамиш шулу. Янокдин уьмур Заанурихъди гъубшну. Дугъаз хъанара баяр-шубар айи. 23Янокдин вари шубудваржна йирхьцӀурна хьуд йис шулу. 24Янокдин уьмур Заанурихъди гъубшну. Хъа думу дургру, гьаз гъапиш думу Заанури Чахьна гъахуру.
25Метушелахдин варжна миржцӀурна ургуд йис вуйиган дугъаз Лемек шулу. 26Лемек бабкан хьпан кьяляхъ Метушелах ургудваржна миржцӀурна кьюд йисансана яшамиш шулу. Дугъаз хъанара баяр-шубар айи. 27Метушелахдин вари урчӀвудваржна йирхьцӀурна урчӀвуд йис шулу, хъа думура йикӀуру.
28Лемекдин варжна миржцӀурна кьюд йис вуйиган, дугъаз бай шулу. 29Дугъʼин Нюгь («ккарццру») кӀуру ччвур иливруган, Лемекди кӀуру: «Дугъу РАББИЙИ балайикк ккипу жилиин жафа зигурайи ухьу ккаарциди». 30Нюгь бабкан хьпан кьяляхъ Лемек хьудваржна урчӀвцӀурна хьуд йисансана яшамиш шулу. Дугъаз хъанара баяр-шубар айи. 31Лемекдин вари ургудваржна ургцӀурна ургуд йис шулу, хъа думура йикӀуру.
32Нюгьдин хьудварж йис вуйиган, дугъаз Сим, Хам ва Яфет кӀуру баяр шулу.
دیاریکراوەکانی ئێستا:
Эвел 5: ТабГК
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© Институт перевода Библии, 2010, 2013, 2016, 2018, 2023