Máciya 18
18
Anawu ahaŋumuu maluukeni feh li Jáyiiyaju jata Ateemit
(Maak 9:33-37; Lík 9:46-48)
1No unnu, kúgoomaku li kúkoojul Yéesu min kugel̥l̥enool koonool:
— Muñowu ayi ahaŋumuu maluukeni feh li Jáyiiyaju jata Ateemit?
2Muñeˈe Yéesu li áhooñul añiil atit, ban li aŋalool akaan li tutiil, 3min aaniil:
— Li mal̥egenamu fan ilobuul, jikatut bomuu bóonowabu booluul min jilaañ jinokoo loon bañiil batit, let jinoken li Jáyiiyaju jata Ateemit. 4Wahawu unwu újimuu an awalenoolomuu ajow anokoo loon jiñiilaju unje, akila ammuu ahaŋ maluukeni li Jáyiiyaju jata Ateemit. 5Ban an ayabumuu boola jak jiñiil jatit loon unje mata ínje íji, ínje humumom layabe boola.
Wahawu wájiyemuu an li ahoofoo
(Maak 9:42-48; Lík 17:1-2)
6— An ájimuu akee li umbuku kakitemuu li kúyinen lí ínje, li alo li kahoofoo, anawu ummu kóyumool buko baŋale kaneew kukok li enuy kul̥oofool li ekondo’, ban li kuŋalool kubeten li hal min akeel ló. 7Katek káamak kujow kulako li adunaayi, mata wahawu wakaanemuu ésukayi elo li kahoofoo úji! Li mal̥egenamu, wahawu unwu wóote ubaj, bale katek káamak kujow kulako li anawu ájimuu li ubaj!
8«Li bil nokoo loon kaŋeni, mantee foof kaati kújiyi li ulo li kahoofoo, li ufalen wo ubeten lóyiyi. Kóyume min unoken li buloŋabu bábaneliitumuu li kaŋen kano ló, mantee foof li kaat kano ló, awu babaje uŋen úl̥uba mantee foof woot úl̥uba, ban li ubeteni li sambunasu sáhokoweliitumuu. 9Li bil nokoo loon jíkilaju jooli joote jíjiyi li ulo li kahoofoo, li úkool̥ul jó ubeten lóyiyi. Kóyume min unoken li buloŋabu bábaneliitumuu li jíkil jano ló, awu babaje kúkil kúl̥uba ban li ubeteni li sambunasu sáhokoweliitumuu.
Bukittenoolum bata húgalalaan hájime
(Lík 15:3-7)
10— Jíkaanum! Jakum jibes akee li bukanabuku umbuke kan káyinenaku kooliil lí ínje kulitutumuu. Mata fan ilobuul, li emitayi kumalakaaku kooliil kumbuku nanoonan hákil Atuubawom ata haatiya. 11Mata Añool-An labiibil boot kafaken bukanabuku kájimumuu#18:11 Sakee li síliibalasu sihaanasu sibajut hulimahu unhe.
12«Buu jiyinoole? An abajumuu kúgalalaan koono éteemeel, ban hano li ko li hújim, fan akaan buu? Inti fan akat li huyuuyahu kúgalalaanaku kúyii kubakii li kaat li kubakiilaku kasaŋo tomuu, min ajow áŋesul hájimumuu? 13Li mal̥egenamu fan ilobuul, nan ammuu li ajuk ho, fan abaj ésuumahukow li húgalalaanahu unhu haŋ kúgalalaanaku kúyii kubakii li kaat li kubakiilaku kájimutumuu. 14Mo foof Atuubawuul ammuu haatiya afañutumuu maayeet min akee li bukanabuku umbuku, kan káyinenaku kooliil lí ínje kulitutumuu, ájim.
Yéesu li alob buu lommuu ukaan min úlaañenul an áyinene ahoofoole
15— Nokoomuu loon an an jibaje káyinen kano atile li awu, ujow ujukool min ulobool mo bukuluul balewuul. Ajantenimuu, li jilaañ jijamoo. 16Bale ajantenutimuu, li uŋa’ an ano mantee bukan kúl̥uba, min jilaañ jijow jijukool, «bájum hulim hanoohan hammuu hulobi, li lako kuyitowa kúl̥uba mantee foof kúhaaji kumaate nan hulobimuu,» loon Hulimahu hata Ateemit hulobumuu#Dótelonom 19:15. 17Ahoyumuu bajanteniil, ulob mo Ejanguwayi. Ahoyumuu foof bajanten Ejanguwayi, ujokool loon an ákaanumut li Ateemit balewool, mantee foof loon an ajakut.
18«Li mal̥egenamu fan ilobuul, wahoowah wan jíñeyiyene li etaamayi, fan úñeyiyeni li emitayi. Wahoowah foof wan jíñeyiyenut li etaamayi, let úñeyiyeni li emitayi.
19«Fan ilaañen eenuul, bukan kúl̥uba li bukuluul kujamoomuu li etaamaye min kul̥aw wah, Atuubawom ammuu haatiya fan aseniil wo. 20Mata tan bukan kúl̥uba mantee foof kúhaaji kujoje li kajawaku kúmbaam, ínje ummu li tutiil.»
Bukittenoolum bata aloka afañut abonket afaalool
21Muñeˈe Fiyeel li ákoojul Yéesu min agel̥l̥enool aanool:
— Amaaŋen, ñoono ñeem leete ibonket an, akila bafete lí ínje? Mantee fan ibonketool boot ñoono ñatok li ñál̥uba?
22Yéesu li aanool:
— Let eeni boot ñoono ñatok li ñál̥uba bale. Bale fan ubonketool boot yok ñoono kúyii kúhaaji li kuŋen, ñoono ñatok li ñál̥uba. 23Mó mújimuu, Jáyiiyaju jata haatiya jiyilo jikittenooli li áyii afañe ayoob min ahaas butumbuu anoowan li kulokaabuku koola kaakumuu ebajayi yoola, aakool. 24Nan áyiiyawu átoŋumuu kacobaku, li kúŋalulool akee aakenool similiyoŋ sameeŋe. 25Bale emmuu anawu ummu abajut wahawu wan ammuu aŋa’ min alaañen ecaagenayi yoola, áyiiyawu li alob mata min kujokool okila li aseekool li bañoolool ló, li wahawu wan abajumuu feh, kunoomen loon emiikeel min kulaañen ecaagenayi yan aakenumuu áyiiyawu. 26Muñeˈe alokaawu li ajow ákuntuŋ hákil áyiiyawu min ayaakoolool aanool: «Ubonket unaakom jakee. Fan ilaañeni ecaagenayi yan eekimuu feh.» 27Ayíiyawu li áyiyen alokaawu oola bil gay, li akatenool, ban li abonketool ecaagenayi yan aakenoolumuu.
28«Nan alokaawu ummu áfulum tómuu, li afam li afaalool aloka akee aakenool sídalam safamut. Li ajokool agak ban li aanool: “Ulaañenom ecaagenayi yan ookommuu!” 29Muñeˈe afaalool li ákuntuŋ hákilool, min ayaakoolool aanool: “Ubonket unaakom jakee. Fan ilaañeni ecaagenayi yan eekimuu!” 30Bale alokaawu li ahoy, min aŋalool ajow akul̥ boot yok nan ammuu li alaañenool ecaagenayi yan aakoolumuu. 31Nan kuloka kaabuku kata áyiiyawu kajukumuu wahawu wabajumuu, li jokiil ŋáa’. Muñeˈe li kujow kukitten áyiiyawu wahawu wabajumuu feh. 32Muñeˈe áyiiyawu li áhooñul alokaawu aakeneenoomuu sídalamasu áliiŋul li aanool: “Awu aloka ájakaatiye! Libonketibonket ecaagenayi yan ookenommuu, mata luyaakoolonyaakoo. 33Kama awu ooteenut foof úyiyen afaali loon ínje humumom íyiyenimuu?” 34Ayíiyawu huuñool li hulit ŋáa’. Li aŋalool asen kata hukul̥ahu kutek boot yok nan ammuu alaañen ecaagenayi yan aakenoolumuu.
35«Muñaˈa foof Atuubawom ata haatiya ammuu abil akaanuul, an li bukuluul bahoye babonket li buyinumool feh an atile li akila.»
دیاریکراوەکانی ئێستا:
Máciya 18: cskDBL
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2008, Wycliffe Bible Translators, Inc. All rights reserved.