GÉNESIS 17
17
Asoc monquinatquiscama apyimpejic Abram
1Noventa y nueve años nic nat invocmoc aptiyascam Abram. Apvitac nic nat Dios Abram.
Aptomjac nic nat Dios apcanya Abram: —Coo nac sicvisay Dios Sicyimtalhnamo. Itamilsacpojo apanco mataa naysicsa aptiyascam. 2Pac olhenic napatoc lhip actemaclha monquinatquiscama sicmayjayoclha coo: pac olhamasiclha aptovana niptamin, appintalhnama sat eltimiclha— nic nat aptomjac.
3Yejemoc nic nat apquilpolintamo nalhpop Abram. Apticlhiquic nic nat acpayjaclha napaat nalhpop.
Aptomjac nic nat Dios apcanya Abram: 4“Eycaso actomja monquinatquiscama actemaclha sicmayjayoclha coo. Appintalhnama sat eltimiclha lhip aptovana niptamin lhalhma anco. 5Comascoc sat apvisay lhip Abram. Cotniclhac sat apvisay Abraham. Ayinyemaclha lhip sat etnejic apquilyap aplhamoclhojo apquilmolhama lhalhma anco.#Ro 4.17-18. 6Appintalhnama sat eltimiclha lhip aptovana niptamin. Apquilviscaa sat eltimiclhac nipyesicsa apquilmolhama lhalhma anco. 7Eycaso actemaclha monquinatquiscama sicmayjayoclha coo napato lhip najan aplhamoclhojo aptovana niptamin lhalhma anco: Otnejic sat mataa Dios lhip Visqui pac. Otnejic sat mataa Dios Visqui apancaoc aptovana niptamin lhalhma anco.#Lc 1.55. 8Omquecsic sat yoclhilhma Canaán aptiyascamcaclha lhip. Cotmongvoyam nelha sat cotnejic apmayclha lhip. Coo sat otnejic Dios Visqui apancaoc aptovana niptamin”— nic nat aptomjac Dios.#Hch 7.5-6.
9Aptomjac nic nat mocjam Dios apcanya Abraham: —Noyeycajascaoc nasa lhip siclhanma actemaclha sicmayjayoclha coo. Noyeycajascaoc nasa lhip. Nongyane nasa elyeycajacsic siclhanma sicmayjayoclha coo aplhamoclhojo aptovana niptamin lhalhma anco. 10Eycaso actomja monquinatquiscama actemaclha sicmayjayoclha coo napatavo quellhip. Incaymalhquic elyiplovcasojo aplhamoclhojo aptovana niptamin: Colhic sat asoc monquinatquiscama apyimpeoc moclhama apquilinava nipyesicsa quellhip.#Hch 7.8; Ro 4.11. 11Elyatemen sat nav'a ayimpejic aptilha quellhip. Eycaso cotnejic sat asoc monquinatquiscama siclhanmaclha sicmayjayoclha coo. Cotnatsalhquejec sat mataa najato najan nipyesicsa quellhip. 12Incaymalhquic colhic asoc monquinatquiscama moclhama quellhip najan moclhama quilhvo aptiyam acvocmo ocho acnim najan aptomja apmolhama najan metnaja apmolhama aptomja apmomap acyanmongam solyayem. 13Incaymalhquic elhojoc poc mepqui apcaymomap. Comasquejec sat mataa asoc monquinatquiscama apyimpeoc cotmongvoycamlha nelha. 14Am sat ancoc colhnac asoc monquinatquiscama lhama enlhit nipyesicsa quellhip, incaymalhquic ematong. Ayinyemaclha aptovasquic actemaclha siclhanma sicmayjayoclha coo— nic nat aptomjac Dios.
15Aptomjac nic nat mocjam Dios apcanya Abraham: —Comascoc sat cotnejic acvisay lhip aptava Sarai. Cotnejic sat acvisay Sara. 16Intasic actemaclha lhip aptava. Etac sat lhip apquitca apquinavo, cotimsic sat aptava. Naso, intasic actemaclha lhip aptava. Appintalhnama sat eltimiclha atovana natamin lhalhma anco. Apquilviscaa sat eltimiclhac nipyesicsa aplhamoclhojo apquilmolhama lhalhma anco.
17Yejemoc nic nat apquilpolintamo nalhpop Abraham. Apticlhiquic acpayjaclha napaat nalhpop. Apcasmasquic nic nat Abraham.
Intomjac nic nat apvalhoc: —Sicvanyam coo, cien años acvocmoc. ¿Evanqui ya otac sictamongvoyam? Acvanyam najan etava Sara, noventa años invocmoc. ¿Avanqui ya cotac ayitca?— nic nat intomjac apvalhoc.
18Apcatingmavoc nic nat Abraham: —Quip ilanojo sictamongvoyam Ismael. Altamjoc coo lhip elhamascasiclha aptovana— nic nat aptomjac.
19Aptomjac nic nat Dios apcanya Abraham: —Naso coo sicpayvam. Etac sat lhip apquitca. Cotimsic sat lhip aptava Sara. Iltime sat apvisay Isaac. Otnejic sat colhejec acyascacmo actemaclha monquinatquiscama sicmayjayoclha coo. Comasquejec sat mataa apquilyiplovquiscama Isaac aptovana niptamin cotmongvoycamlha nelha. 20Apvitac alhta lhip siclhoc anco apquitca Ismael ayinyema sicjalhenmo lhip appayvam. Actamila alhta sicpayvam: Olhamascasiclhac sat aptovana yoyam eleyoc sat lhalhma anco. Etac sat Ismael aptovana, doce apquilviscaa apquilyimtalhnamo sat eltimjic. Aptovana sat eltimjic aplhamoclhojo apquilmolhama lhalhma anco. 21Comasquejec sat mataa monquinatquiscama actemaclha sicmayjayoclha coo. Aptiyacmec sat ancoc Isaac, eyiplovcasojoc sat mataa actemaclha sicmayjayoclha coo. Elyiplovcasojoc sat mataa aplhamoclhojo aptovana. Etyamoc sat Isaac apquitcoc comejec sat lhama año— nic nat aptomjac Dios.
22Appenasquic nic nat Dios appamejitquiscama Abraham. Yejemoc nic nat apvonquepa. 23Apquillanac nic nat as acnim Abraham asoc monquinatquiscama apyimpejic Ismael. Apquillanac nic nat najan asoc monquinatquiscama apyimpejic aplhamoclhojo apmolhama najan apquilancam apquilmomap acyanmongam solyayem. Apquilyajaclhoc nic nat Abraham actemaclha apcanama Dios. Apquillanac nic nat asoc monquinatquiscama apyimpejic aplhamoclhojo apquilinava apquiltomja apmolhama najan apquiltomja apquilancam. 24-25Noventa y nueve años nic nat apvocmoc Abraham, trece años nic nat apvocmoc apquitca Ismael, apquilvita asoc monquinatquiscama apyimpeoc. 26Innoc nic nat moc as acnim apquilvita asoc monquinatquiscama Abraham najan apquitca, 27najan aplhamoclhojo apmolhama najan apquiltomja apquilancam najan apquiltomja apquilmomap acyanmongam solyayem.
دیاریکراوەکانی ئێستا:
GÉNESIS 17: ENHL
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە