San Juan 1
1
Kristo naa kiwete vxyaani
1Nyafxiitey naa kiwe meeíin, Kristo' ũsyã'kh yu'. Txã' Dxus yakhku ũsu', sa' Dxus íiçxáak yu'. 2Nyafxiiteya' txã'wẽk Dxus yakh ũssa yu'. 3Dxusa' txã'sna neewe'weçxak kĩjkĩhnawa jxuka kvxiitu'j. Txãa pa'ga naa kiwete kĩjkĩhwa ũssa' jxuka txajx vxitniçxaçxáata'. Dxus yakh ũssa kĩjkĩhnawa vxitmeewaça', kĩh yuhwa mee yuutxna. 4Uuçxa ki' ĩtxi yuuwa'ja's txãak ji'phu', sa' txãa íiçxáak nasatx eena'te kaafxi'ze'jwa'jsa yu'. 5Txãa eena'sa' çxhi'dxte kweethku, aça' çxhi'dxsa' fxĩçxhaya' ãjame'.
6Txãa eena'sa's tuuthe'jsa' teeçx piçthẽ'j Juan yaasesak yu' Dxus kaahni. 7Txã' txãa eena'te kaafxi'ze'jwa'jsa's tuuthe'jsak yu', maawa txajx tuuthe'jni's wẽse'jçxa Kristo's ũuste jxpa'gakahn. 8Juan yu' eena'te kaafxi'ze'jwa'jsa meek yu', naasáa eena'te kaafxi'ze'jwa'jsa's tuuthe'jsaçxáak yu'. 9Naapkaçxha' nasatx eena'te kaafxi'ze'jwa'jsa Kristo' naa kiwete vxyaaççxáak yu'. 10Sa' vxyaaçxa' naa kiwete fxi'zena ũsu'k. Txã'wẽtewa, naa kiwetewe'sxa' jiyumeeta', makwe txajx vxitnisaçxawa. 11Txajx vxitni kiwete vxyaatewa, txajx ji'j jĩnisa' jxpa'gameeta'. 12Makwe txajx ji'j jĩnisa jxpa'gameetewa, maaíi yu' txã's nwẽese'jçxa ũuste jxpa'gatx. Aça' txã'sna jxpa'gasatxi's Dxusa' txajx luuçx yuuwa'ja's ũsku. 13Txãa pa'ga txãawe'sxa' naa kiwete neywe'sx kakweju kakwe yakh upxhi'tx neywe'sx jxthãasni txã'wẽsameeta', txãawe'sxa' Dxus luuçx yuuna pa'jsata'.
14Nyafxiitey Dxus yakh ũssa' nasaa kakwe's jxpa'gaçxa kwe'sx yakh ũsu'k, isasaçxá's pta'sxna peeygãhna. Txãa pa'ga kwe'sxa' txajx fxi'zeni wala zhiçxkwesa's uytha'w, txãasa jiitha'w Dxus Nçxi'k teeçxçxáasatewa. 15Txã'snak Juana' tuuthe'jna na'jĩna we'we:
—Adxa' na'snath pta'sxi' i'kwe'sxtxi: Adx e'ste yuja' txã' adx naa kiwete upxmeyna we'sxku yu', txãa pa'ga adxte jxthaakwesa' jĩnak pta'sx.
16Aça' kwe'sxa' txajx peeygãani makwe ne' yu' txã'sa' jxukatha'w jxpa'ga jxukaysa. 17Nyafxí' juuna' jxkaahnisa ley Moises nvxihtku txã'sçxáanatha'w jxpa'ga, naapkaçxha' Jesukristo' isa Dxus peeygãani'sku nuypa'j txã'snatha'w jxpa'ga. 18Nawa maa yuhwa Dxusa's iiuymeeta'. Txã'wẽtewa Dxus Nçxi'k teeçxçxáasa Ney yakh ih ũssa' kwe'sxtxi' kaajiyu'kh Dxus ma'wẽsatewa.
Jesus kimtewa Juan pta'sxni
(Mt 3.11-12; Mr 1.7-8; Lk 3.15-17)
19Jerusalente judiuwe'sxa' pẽjxya' kaahtx sacerdote vxite' levxitawe'sxtxi Juan kimtewa jiyuya'. 20Aça' Juana' ãatek pta'sx:
—Adxa' Kristomeeth jĩna.
21Txajũ' ki'kin pẽjxtxi:
—Txã'wẽçxa' ¿kimga? ¿Txãniitey Dxus yuwe pta'sxsa Elias wá'ga? jĩte', Juan pasçxa':
—Txã'wẽmeeth jĩk.
Aça' ki'kin pẽjxtxi:
—Dxus yuwe pta'sxsa' pa'jana jĩ'tx txãa wá'ga jĩte':
—Txãameeth jĩnak pas.
22Txajũ' ki' pẽjxtxi:
—Txã'wẽçxa' idxa' ¿kimga? Idxa' kĩh yũuna fxi'zesaçxawa mpeeta'sx. Txã'wẽme', kwe'sxtxi jxkaahsatx pta'sxya' u'jwa'j ji'ptha'w jĩte', 23Juan pasçxa':
—Dxus yuwe pta'sxsa Isaiasa' na'jĩnak we'we: Nasa u'pnimée kiwesu sus we'weni pthũusena: Dxus pa'jwa'ja's mpheu'jwe jĩna, nawa adx tuuthe'jna pekũhwa'ja's pta'sxnak txã'jĩ.
24Juana's paapẽjxya' pa'jsa' fxariseowe'sx kaahnisatx yu', 25sa' ki'kin paapẽjxtxi:
—Txã'wẽ Kristomeeth, sa' Eliaswa meeth, sa' Dxus yuwe pta'sxsa pa'jana jĩ'tx txãameeth jĩ'g sa' ¿kĩjxa'çxáaga nasatx yu'te bautisaĩ'? jĩte', 26Juan pasçxa':
—Adxa' yu'teçxáath bautisaĩ'. Nawa i'kwe'sx ksxavxyte teeçx ũsa' txã'sa' jiimeene'kwe. 27Txã' adx e'su vxyaana, nawa txã' adxte jxthaakwesa'. Aça' adxa' txajx pelgatxi tudni wesçxáa yuhtxwa khihbxa' ãhmeekwesath jĩnak pas.
28Juana' Jordan yu'wala kuteju sek kãani ju'gu Betábara yaasesatek txã'wẽ bautisãyna ũsu', aça' kxteetx txã'wẽ paapẽjxya' pa'jna ũsu'.
Kristo Dxus kaahni piisxakuẽ
29Kuskuskhẽ' Juana' Jesus yuhte uyçxa', na'wẽk we'we:
—Mthegwe, naaíi Dxus kaahni piisxakuẽ', jxukaysa pkaltxi txudewa'jsa. 30Aça' adxa' txã'sna we'weçxath txã'wẽ pta'sx: Adx e'su teeçx piçthẽ'j vxyaana, txã' adxte jxthaakwesa', txã' naa kiwete adx upxmeyna we'sxku yu' txãa pa'ga. 31Txã'sa' adxíi yuuwa jiimeeth yu' kimtewa. Nawa Israelwe'sx txã's jiyukahn yu'teçxáawa bautisãyna ũsu'th.
32Juana' ki'kin we'wek na'jĩna:
—Dxus Espiritu's uythu cieluju tub çxihme na'wẽsa Jesus kajkwekhẽ kĩijaçte. 33Txã'wẽtewa, adxa' nee jiimée íiçxáath yu' kimtewa. Nawa adxa's bautisãyya' kaahsa' pta'sxku: Espiritu's uyuune'ga teeçx piçthẽ'j kajkwete kĩijaçte', aça' txãa piçthẽ'ja' isa Dxus Espiritu's nasaa ũuste kxu'akhe'jsa yuuna jĩnak pta'sx. 34Aça' ãçxha' uyçxa', jiyuth Dxus Nçxi'ktewa, sa' txã'snath tuuthe'je'.
Kristo yakh u'jusa nyafxtewe'sx
35Vxite kuskuskhẽ' Juana' ki' kxtey ũsu'k txãa yakh u'jusa e'zsa yã'jçxa. 36Sa' Jesus jxkhẽuuçte uyçxa', Juana' na'jĩk:
—Mthegwe, naaíi Dxus kaahni piisxakuẽ'.
37Txã'jĩni's wẽse'jçxa', txãa e'zsa' Jesus e'stey u'jtx. 38Aça' Jesusa' yu'thegçxa', txajx e'ste yuusatx uyku, sa' na'wẽk pẽjx:
—¿Kĩjkwe pakwé'? jĩte', txãawe'sx pasçxa':
—Kaapiya'jsa, ¿mteega u'pu'? jĩte',
39Jesus pasçxa':
—Mejkawe thegya' jĩk. Aça' txãawe'sxa' u'jçxa' jiyutx mtee u'psatewa. Sa' txãa yakh kxtee neeyũutx, kusuçyã'kh yu' naa pa'ga.
40Juan we'weni's wẽse'jçxa Jesus e'stey u'jsa teeçxsa' Adresku yaase yu', Simon Pedro nyakh. 41Aça' Adresa' txajx nyakh Simon khuẽ'yna nyafxte pta'sxya' u'kh:
—Dxus tasxu yuusa Kristo jĩni's yuutha'w uy jĩna.
42Txajũ' Adresa' txajx nyakh Simona's pe'jna kũjk Jesus ũsnite. Aça' Jesus uyçxa' na'jĩk:
—Idxa' Jonas nçxi'k Simon yaaseg, nawa ãçxha' Cefxas yaseni neeyũune'ga. Cefxas yu', Pedro jĩni'.
Fxelipe, Natanaelwe'sxtxi Jesus pa'yani
43Vxite kuskuskhẽ' Jesusa' Galilea kiwen u'jweççxa', Fxelipe's uyçxa':
—Adx yakh myuh jĩnak pi'kx.
44Fxelipe yu', Beçaida çxhabte u'psak yu', Adres Pedrowe'sxwa txãa çxhabteywe'sxtxi yu'. 45Aça' Fxelipe' Natanaela's pta'sxya' u'jçxa' na'jĩk:
—Moisesa' teeçx piçthẽ'ja' vxyaana jĩnak fxi'j ley librute, aça' Dxus yuwe pta'sxsa txãniiteywe'sxwa txã'snaíiçxáatx tuuthe'jna fxi'j txã'stha'w kwe'sxa' puutx uy. Txãa piçthẽ'ja' Jose nçxi'k Jesusa', Nasaret çxhabtewe'sxa' jĩte', 46Natanael pasçxa':
—Nasarette', ¿maaçxá' nasa ewsa kasejxa' ãjama'k? jĩte', Fxelipe pasçxa':
—Mejka wakx thegya' jĩk.
47Txajũ' Natanael utxaana kũjuçte Jesusa' uyçxa', na'jĩk:
—Naa piçthẽ'j yuuçxa' Israel nwe'sx jxpubasamée nasa ewsa yuh yu'ga.
48Txã'jĩte', Natanaela' pẽjxku:
—¿Ma'wẽ yuuçxaga adxa's jiyu? jĩte', Jesus pasçxa':
—Fxelipe pa'yameyna, idxa's uythu higwera fxtũu tasxte u'pte jĩte', 49Natanaela' na'wẽk pas:
—Idxa' Dxus Nçxi'kgu, Israelwe'sxtxi jxkaahsa jĩte', 50Jesusa' na'jĩk:
—Txã'wẽ higwera fxtũu tasxte u'pte idxa's uythu jĩteçxáa ¿adx kimtewa jiyuwá'ga? Txã'wẽyã'jçxa', naajũyã'ja' Dxus kaavxya'ja'jnitx wejx walasatx uyuune'ga jĩk.
51Sa' ki' we'weçxa':
—Adxa' isath we'we': cielu phaateçxa ũste', Dxus angeleswe'sxa' kĩhna tejkana ũste uyuune'kwe Dxus Nçxi'k Nasa Yuusáa kajkwekhẽ jĩk.
دیاریکراوەکانی ئێستا:
San Juan 1: pbbNNT
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 1984, Wycliffe Bible Translators, Inc. All rights reserved.