Fíĉilum 4
4
Kaeŋ namuh atiol Abbel
1Adam narobo bugo n’aarol Eva. Eva naŋar far, nak’apegor nabaj júᵽur naah : « Ni garamben Atúla niballo júᵽur. » Min akan jo gajow gagu gaa Kaeŋ (dóemme "ébajul"). 2Nabbañ ateb ak’aalen náŋarul Kaeŋ jitiay navoh jo Abbel. No uñiaw gújalo me, Abbel nakan akoña ubbarum, atiol Kaeŋ o náni aaña.
3Min gunah gagu gúgale me, nuĉiga funah fice, Kaeŋ nátebul mitiñ maa burokol bi éji Atúla. 4Abbel may o náŋarul gabugor gátiar gafat me gal ubbarumol ákail áji Atúla. Ban Atúla nayab Abbel n’gásumay n’gájiol ró 5min til ahabo gaa Kaeŋ. Ñer Kaeŋ fiiñol ni fitiñ náñigen. 6Atúla naagol : « Wa uĉile fiiñi ni fitiñ ? Uñígen min ni bu ? 7Biinumi bútuen me, ᵽan úju úallo bújonih ; bare búhoji me, gatil gagu ugu to n’guholei ti énuhureŋ yafiye m’butum gánonumi nénii n’enah. Gumaŋe bi ejogi, bare aw núarie uhek go. »
8Ᵽúrto, Kaeŋ naah atiol Abbel : « Ujaa ujatora mbal ulah waw ! » No guĉih bo me, náñag álloŋ Abbel min amugol.
9No nabbanno me, Atúla narorenol : « Atii Abbel umelo ? » Naagol : « Ijugutol. Injé ᵽiaŋ eemme apoyaol ? » 10Atúla naagol : « Wa nukan me ? Físim atii fo núyu me n’ettam ufu fákoŋeul me bi n’ínje, fuoge bulugen ! 11Nujuge, gatab ugu ni aw, min mb’uhat ettam yay yámer me físim atii o numuh me. 12Maer uañ me ettam yay, mat’ebbañ eseni wo nuh’ubajen dó me. Ᵽan nuh’uyanor bo me, ban mat’ubaj to nujae éjoj. »
13Kaeŋ naagol : « Gúteh gauge gúliiomlii mámah, mat’íju iteb go. 14Jama aw umu n’ehamom n’ettam yay yáari me. Ᵽan ñer ik’imeoi ráli. Mbi nih’iyanor bo me m’bájojut, an ajugom babu, namuh ! » 15Atúla naagol : « Hani ! An amugi me, bulugeni ᵽan bubaj ñono futoh ni ñúuba. » Min akan fúffasum ni o, mbi an aemor n’aĉila jamb’amugol. 16Ᵽúrto, Kaeŋ najow ráli n’Atúla ak’aĉin ni mof mamu maa Nod (dóemme "gayanor") galam bo tinah túᵽureul me aw baamer Eden.
Gabugor Kaeŋ
17Kaeŋ nak’abaj anaare, n’gurobo. Aarol naŋar far ak’apegor áᵽur navogol Henok. Kaeŋ naŋar gajow áᵽurol akan ésuh yay yo naamme n’eju. 18Henok nabuh Irad ; Irad nabuh Mehuyael aamme ᵽay Metuĉael abuh me Lameh.
19Lameh waare gúuba nayabe : átiar gajaol Ada, áuten gajaol Sila. 20Ada nabuh Yabal ; aĉila aamme ᵽay afan ala ukoñaaw ᵽe bugo nihi guĉin me ni gúggut|Fúggut Aláemit. 21Atiol gajaol Yubal ; aĉila o aamme ᵽay afan ala utega sisimbiŋ#4.21 esimbiŋ : enogonogor ehontiŋ, bare yo efaŋe emmeŋ unew. sasu ni uoga sutongole sasu. 22Sila abel Ada nabaj may añil navogol Tubal-Kain ; aĉila o aamme ᵽay afan ala uaᵽaaw ᵽe, bugo nihi guaᵽ me mañ mújugah ni muñuget. Alínol gajaol Naama.
23Mb’uĉiga funah fice, Lameh naah waarol :
« Ada ni Sila, aᵽi juuttenom !
Buru waarom, mbi jikan to uinumul ni wo nijaeul me elob :
Nimuge ánaine o bábukenerom,
nitege áᵽur ik’imuh o bakanerom gúbit.
24Guoseh an amuh me Kaeŋ, ᵽan gulugenol ñono futoh ni ñúuba.
Bare ínje neege, an agor me ínje Lameh,
ᵽan ilugen ni o ñono úvi gúfaji ni gaat ni ñúuba (77). »
Gabugi Set ni gal Henoĉ
25Ᵽúrto, Adam nabbañ asen Eva far ak’apegor júᵽur. Eva naah : « Aláemit nájiom ace añil butum Abbel o Kaeŋ amuh me. » Yo eĉil me nakanol gajow gagu gaa Set (dóemme "éji"). 26Set nak’abuh áᵽur nakanol gajow gagu gaa Henoĉ. No, bugan bugagu guju me elaw Aláemit ni gajaol gal Atúla.
دیاریکراوەکانی ئێستا:
Fíĉilum 4: bqjDBL2
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Wycliffe Bible Translators, Inc. All rights reserved.