Yahaya 8
8
Vuka vu na a̱ ka̱na̱i a tsugbani
1Amma a̱yi Yesu u banai a Kusan ku Zaitun. 2Ana kayin ka asai n usana, ɗa u bonoi a̱ A̱Ꞌisa̱ a Gbayin. Uma a̱ ta̱wa̱i wa̱ ni, ɗa u da̱sa̱ngi u gita̱i kuyotsongusu le. 3Nlum n Wila̱ n Afarishi a̱ tuka̱i n vuka vi yoku vu na a̱ ka̱na̱i a kuyaꞋan tsugbani. Ɗa a zuwai ni u shamgba kelime ka̱ ka̱bunda̱i ka uma. 4Ɗa a danai, “Malum, vuka vu nam pa a̱ ka̱na̱ yi ta̱ a kuyaꞋan tsugbani. 5Wila̱ u Musa u yotsongusu tsu ta̱ vuka vu na vi yaꞋin tsu nam pa a vara yi n atali ali u kuwa̱. Avu tamkpamu yi ɗa̱i vu danai?” 6A yaꞋan ta̱ keci nannai adama a na a zuwaka Yesu maza ka̱ta̱ a̱ ciya̱ ili i na a kudansuka yi.
Amma ɗa Yesu u za̱lika̱i a kuyaꞋan iɗani n a̱jivu a̱ ni a iɗika. 7Ɗa a gbagbalai kece Yesu ukuna u vuka wa. A kubana uteku ɗa Yesu u ɗenga̱i kashani ɗa u danai, “Vuza na baci u saꞋwai kunusa ba, u gita̱ kuɗika katali ka̱ta̱ u vara yi.” 8Ɗa Yesu u doku u za̱lika̱i u ka̱na̱i kuyaꞋan iɗani a iɗika.
9Ana a panai nannai, ɗa ra̱ka̱ vi le a lazai vuza vi te vi te. Aza a̱ gba̱ra̱-gba̱ra̱ a ɗa a lazai a cau. A kubana uteku Yesu n vuka va o okpoi a uteku u le. 10Yesu u ɗenga̱i kashani ɗa we ecei vuka va, “Te yaba dem u banai? Ko vuza te u buwa a na wa̱ kilukpa̱ wu ba?”
11Ɗa wu ushuki, “Vuzagbayin, ko vuza te wi lo ba.”
Ɗa Yesu u danai ni, “Mpa feu n kilukpa̱ wu ba. Amma wala ka̱ta̱ vu doku vi yaꞋan unushi ba.”]#8:11 Atagarda a̱ kuku o yoku a zuwa kabaꞋin ka nam pa ba.
Yesu ɗa kutashi ka aduniyan
12Ana makyan ma yaꞋin, ɗa Yesu u danai uma, “Mpa ɗa vuza na n ci neke uma a aduniyan kutashi. Vuza na baci de dem u tonoi mu wi ta̱ a̱ kuciya̱ kutashi ku wuma, wi kpamu a kuwala a̱ ka̱yimbi ba.”
13Afarishi a danai ni, “Ana vi a kuyaꞋan kadanshi ka̱ ka̱ci ka̱ nu, avu endeꞋen ɗa vi a̱ kushuku a na ili i nam pa ya i mayun i ɗa. A̱tsu tsa̱ kushuku ba.”
14Ɗa wu ushuki, “E, mi ta̱ a kudansa ili i nam pa adama a̱ ka̱ci ka̱ va̱, amma ili i mayun i ɗa. N yeve ta̱ ubuta̱ u na mu uta̱i n ubuta̱ u na mi a kubana. Amma a̱ɗa̱ i yeve ubuta̱ u na mu uta̱i n ubuta̱ u na mi a kubana ba. 15A̱ɗa̱ ɗa aza a na a ci kiɗa afada uteku u na uma a ci kiɗa feu afada e le. Mpa mi a kuyaꞋanka vuza afada ba. 16Ko mi baci a kuyaꞋan afada, tsu na mi a kuyaꞋan afada mayun ɗa, adama a na mi endeꞋen ba. Dada vu na u suki mu wi ta̱ nu mpa. 17Wila̱ u ɗa̱ u danai uma e re a dansa baci ili i te derere tsu ngan adama a kakuna ko yoku, mayun ɗa a̱ ushuku n ili i na a danai. 18Mpa ɗa vuza te a̱ ka̱tsuma̱ ka aza a na i a kadanshi ka̱ ka̱ci ka̱ va̱, Dada vu na u suki mu a̱yi ɗa vuza te vu na wi a kadanshi ka̱ va̱ kpamu.”
19Ɗa e ecei, “Te ɗai esheku a̱ nu i?”
Ɗa wu ushuki, “A̱ɗa̱ i yeve mu ba, ko i yeve Dada vu va̱. Ishi baci i yeve mu, yi ishi e kuyeve Dada vu va̱ feu.” 20U yaꞋan ta̱ kadanshi ka nam pa a̱yi a kuyaꞋan kuyotsongusu punu asuvu a̱ A̱Ꞌisa̱ a Gbayin, ɗevu n ubuta̱ u na a tsu zuwa ikebe. Amma ko vuza te u ka̱na̱ yi ba, adama a na ayin a̱ ni ka̱ta̱ a yawa ba.
Yi a kubana a̱ ubuta̱ u va̱ ba
21Yesu u danai kpamu Afarishi a, “Mi ta̱ a kulaza a kubana a̱ ubuta̱ u yoku, ka̱ta̱ kpamu i la̱nsa̱ mu. Amma yi a kufuɗa kubana a̱ ubuta̱ u na mi ba, ka̱ta̱ kpamu i kuwa̱ n unushi.”
22Ɗa Ayahuda a danai, “U dana tsa kubana a̱ ubuta̱ u na wi a kubana ba. Wi ta̱ wo a kuna ka̱ci ka̱ ni?”
23Ɗa Yesu u danai, “A̱ɗa̱ a iɗika i ɗa yi, amma mpa gaɗi ɗa mu uta̱i. A̱ɗa̱ aza a aduniyan a nam pa a ɗa yi, amma mpa vuza va aduniyan vu nam pa ɗa mi ba. 24I ɗaɗa i zuwai ɗa n danai ɗa̱ yi ta̱ a̱ kukuwa̱ n unushi.” Mayun yi ta̱ a̱ kukuwa̱ nannai, i iwan baci kushuku a na mpa ɗa#8:24 Ayahuda e yeve ta̱ a na Ka̱shile ka danai Musa kula ku ni ku ɗa “Mpa ɗa”. Adama a nannai ɗa e enei adanshi Yesu wi ta̱ e kuɗeke ka̱ci ka̱ ni Ka̱shile. vuza na n danai ɗa̱ mi.
25Ɗa e ecei, “Avu ɗa vi ci yaꞋan ya?”
Ɗa wu ushuki, “Mpa ɗa vuza na n tsu dana ɗa̱ vuza na mi ayin tutu. 26Kakuna ki ta̱ n a̱bunda̱i ka na n kudana adama a̱ ɗa̱, ili yi ta̱ lo kpamu n a̱bunda̱i i na n kilukpa̱ka̱ ɗa̱. Amma n dana nannai ba. Adama a na vuza na u suki mu u tsu dansa ta̱ ili i mayun ayin tutu, mpa kpamu n tsu dana ta̱ aza a aduniyan ili i na u danai mu koci.”
27Uma a e yeve a na kadanshi ke Esheku kaꞋa wi a kuyaꞋanka le ba. 28Ɗa u danai le, “Ayin a na baci i ɗengusa̱i Maku ma Vuma a maɗanga ma atakaci, i kuyeve ta̱ a na mpa ɗa vuza na n danai vuza na mi. Yi ta̱ feu e kuyeve a na mi a kuyaꞋan ili n ka̱ci ka̱ va̱ ba. N tsu dana ta̱ ili i na Dada vu va̱ u yotsongushi mu koci. 29Vuza na u suki mu wi ta̱ nu mpa, u ka̱sa̱kpa̱ mu endeꞋen ba, adama a na ayin tutu n ci yaꞋan ta̱ ili i na i yokpoi ni.” 30Uma n a̱bunda̱i a na a panai Yesu a kuyaꞋan kadanshi ka nam pa, ɗa e nekei a̱ɗu wa̱ ni.
Ili i mayun yi ta̱ a kuzuwa ɗa̱ i ba̱ruwa̱
31Ɗa Yesu u danai Ayahuda a na e nekei a̱ɗu n a̱yi, “I lyaꞋa baci kelime n kutono kuyotsongusu ku va̱, a̱ɗa̱ aza o kutoni a̱ va̱ a ɗa yi mayun. 32A ayin a nan lo i kuyeve ta̱ ili i mayun, ka̱ta̱ ili i mayun i zuwa ɗa̱ i ba̱ruwa̱.”
33A̱ ushuki ni, “A̱tsu ntsukaya mi Ibrahim n ɗa, ka̱ta̱ kpamu tsu saꞋwa kokpo agbashi a vuza ba. Yi ɗa̱i i zuwai ɗa vu danai ci ta̱ a̱ kuba̱ruwa̱?”
34Ɗa wu ushuki, “N dana ɗa̱ mayun, yaba dem vu na baci u yaꞋin unushi, kagbashi ku unushi ka wi. 35Kagbashi ko tso okpo punu a kpaꞋa ku vuzakpaꞋa vi ni ko wanai ba, amma maku ma vuza vu kpaꞋa ayin tutu u ci yongo ta̱ a kpaꞋa ke esheku. 36Maku ma mu ushuku baci i ba̱ruwa̱, mayun ɗa ta na i ba̱ruwa̱. 37N yeve ta̱ a̱ɗa̱ muku mi Ibrahim n ɗa, amma i ciga ta̱ kuna mu adama a na yi isa akaka a̱ va̱ ba. 38Mi ta̱ a kudana ɗa̱ ili i na Dada vu va̱ u yotsongi mu, amma a̱ɗa̱ yi ta̱ a kuyaꞋan ili i na esheku a̱ ɗa̱ a danai ɗa̱.”
39A̱ ushuki, “Dada vu tsu ɗa Ibrahim.”
Ɗa u danai, “A̱ɗa̱ muku mi Ibrahim n ɗa baci yi mayun, yi ta̱ a kuyaꞋan ili i na Ibrahim u yaꞋin. 40N dana ɗa̱ ta̱ ili i mayun i na m panai a̱ ubuta̱ u Ka̱shile, amma ɗa i dakakai adama a na yu una mu. Ibrahim u kuyaꞋan ili nannai ba. 41Amma yi ta̱ a kuyaꞋan derere n ili i na esheku a̱ ɗa̱ a ci yaꞋansa.”
A̱ ushuki, “A̱tsu a matsa tsu ci nsheꞋe ba! Ka̱shile kaꞋa Esheku a̱ tsu a mayun.”
42U danai le, “Ka̱shile ka baci Esheku a̱ ɗa̱, yi ta̱ a kuciga mu, adama a na mu uta̱ ta̱ u Ka̱shile ɗa n ta̱wa̱i wa̱ a̱ ɗa̱. Mpa n ta̱wa̱ na adama a̱ ka̱ci ka̱ va̱ ba, amma a̱yi ɗa u suki mu. 43I yeve ili i na n danai ba, adama a na i iwan ta̱ kisa akaka a̱ va̱. 44Esheku a̱ ɗa̱ a ɗa Kalijani, ɗa yi kpamu a kuyaꞋan derere n ili i na u cigai. A̱yi ayin tutu vuza vu munaka ɗa n vuza va aꞋuwa. Ili i mayun yi lo wa̱ ni ba. U tsu dansa ta̱ ka̱ ka̱ci ka̱ ni koci, ili dem i na baci u dansai aꞋuwa a ɗa ta na. Vuza va aꞋuwa ɗa wi koci a̱ ka̱ci ka̱ ni ba, amma a̱yi ɗa feu esheku a aꞋuwa ra̱ka̱. 45Amma n dana ta̱ mayun, ɗaɗa i zuwai ɗa i kpa̱ɗa̱i kuneke a̱ɗu nu mpa. 46Yayi a̱ ka̱tsuma̱ ka̱ ɗa̱ wa kufuɗa kutuka̱ nu nsata m mayun adama a̱ va̱? A na mi a kudana ɗa̱ ili i mayun, yi ɗa̱i i zuwai ɗa i kpa̱ɗa̱i kuneke a̱ɗu wa̱ va̱? 47Vuza na baci de dem Esheku a̱ ni i Ka̱shile, wi ta̱ a kupana kadanshi ka̱ Ka̱shile. Amma a̱ɗa̱ uma a̱ Ka̱shile a ɗa ba, ɗaɗa i zuwai ɗa i kpa̱ɗa̱i kupana.”
Yesu u laꞋa ta̱ Ibrahim
48Ɗa Ayahuda a danai Yesu, “Derere ɗa tsu dana avu Kasamariya kaꞋa, vi ta̱ kpamu n wunla̱i u gbani-gbani!”#8:48 Kayahuda ke ɗeke baci vuza Kasamariya, ishikushi i ɗa. E yeve ta̱ Yesu vuza vu Ga̱lili ɗa, amma Kasamariya kaꞋa ba.
49Wu ushuki, “Mi n wunla̱i u gbani-gbani ba. N ci neke ta̱ Dada vu va̱ tsugbayin, amma a̱ɗa̱ i iwain kuneke mu tsugbayin. 50Mi a kudakaka adama a na n ciya̱ka̱ ka̱ci ka̱ va̱ tsugbayin ba. Amma vuza yoku wi ta̱ lo vuza na u cigai mi isa tsugbayin, a̱yi keyevikafada kaꞋa. 51N dana ɗa̱ mayun, vuza na baci u tonoi kuyotsongusu ku va̱, wi a̱ kukuwa̱ ba.”
52Ɗa a danai ni, “Gogo na ci yeve ta̱ a na vi n wunla̱i u gbani-gbani! Ko Ibrahim n eneki a̱ kuwa̱ ta̱. Amma avu vu danai, ‘Vuza na baci u tonoi kuyotsongusu ku va̱, wi a̱ kukuwa̱ ba.’ 53Vi sheshe ta̱ vu laꞋa ta̱ dada vu tsu Ibrahim n tsugbayin? U kuwa̱ ta̱, ta kpamu eneki nannai. Yayi tamkpamu vi ɗikai ka̱ci ka̱ nu vi?”
54Ɗa wu ushuki, “N neke baci ka̱ci ka̱ va̱ tsugbayin, tsugbayin tsu nan lo ili i ɗa ba, ko kenu. Dada vu va̱ ɗa u ci neke mu tsugbayin, ɗa a̱ɗa̱ i danai a̱yi ɗa Ka̱shile ka̱ ɗa̱. 55Ka̱ta̱ i saꞋwa kuyeve yi biꞋi ba, amma mpa n yeve yi ta̱. N dana baci n yeve yi ba, mi ta̱ o kokpo vuza va aꞋuwa tsu ɗa̱. Amma n yeve yi ta̱, ɗa mi o kutono ili i na u tsu dana. 56Esheku a̱ ɗa̱ Ibrahim u yaꞋin ma̱za̱nga̱ ana wi a kuvana kene ayin a na mpa n kuta̱wa̱. We enei a ɗa, ɗa u yaꞋin ma̱za̱nga̱.”
57A danai, “Nini ɗai ve kene Ibrahim? Ka̱ta̱ vi yawa biꞋi a̱ya̱ amangerenkupa ba.”
58Ɗa wu ushuki, “N dana ɗa̱ mayun, kafu a matsa Ibrahim, mpa ɗa† biꞋi.” 59Ana Yesu u danai nannai, ɗa uma a ɗikai atali a kuna yi. Amma Yesu u werei n ka̱bini, ɗa wu uta̱i u ka̱sa̱kpa̱i A̱Ꞌisa̱ a Gbayin a.
دیاریکراوەکانی ئێستا:
Yahaya 8: asgNT
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2012 Wycliffe Bible Translators, Inc. All rights reserved