Luku 5
5
Jisasi'a ese aposel naga zmavare'nea naneke
(Mat 4:18-22, Mak 1:16-20)
1Mago knazupa Jisasi'a Genesareti tiru ankenare otino mani'nege'za, tusi'a vahe kevumo'za Anumzamofo naneke antahinaku ome eritruhu'za manititipa hu'naze. 2Ana tiru ankenare tare onensa vente me'negeno ke'ne. Hianagi nozamema nehaza nagamo'za anampintira urami'za, kukozimi umaniza sese hu'naze. 3Mago ventefi Agra umrerine, ana suzana Saimoni ventefi mrerino antahigegeno osi'a tinkenaretira aretufe ogantu'a atre'ne. Hagi Jisasi'a anampi marerino tamu mani'neno, mika vahe mono kea ana onensa ventefinti zamasmi'ne. 4Ana nanekema huvama nereno'a Saimoninku anage hu'ne, Antuma timoma avu'hanihanima huneama'afi aretufe kantu antenka, kukonka'a nozamema avazu hananku atrenkago. 5Hianagi Saimoni'a kenona'a anage hu'ne, Ramoke, tagra tusi amuho huta meni keragera noza azeri naku tusi'a amuho eri'za erinonanagi, magora aze'oritfaza hu'none. Hianagi Kagrama hana kere kukoni'a ataregahue. 6Anama hute'za zamagra tusi nozamezga azerizageno kukozamimoa agafa huno tagato hu'za hu'ne. 7Anama hige'za, zamagra mago onensa ventefima maninaza knampa zamirega eme zamaza hihogu kezanke hugantu atrage'za zamagra e'za tarega onensa venterarena emeri avitageno, anantarega ventemokea tirami'za hu'na'e. 8Hianagi Saimon Pita'a negeno'a, Jisasi agafi renareno anage hu'ne, Ramoka nagri navatetira ogantua vuo. Na'ankure nagra kumimo avite'nea ne'tfa mani'noe! 9Na'ankure Pita'ene, ruga'a nagama agrane mani'naza nagamo'za nozamema zamagrama azeri'naza zankura, tusi'za hu'za antri hu'naze. 10E'i anazanke huke Zebedi ne'mofo Jemisike, Jonikea znagogogu hu'na'e, Saimoni ene tragote'za erizana e'nerizane. Higeno Jisasi'a Saimoninku anage huno asami'ne, Korera osuo, amaretima agafa hunka vnanana, vahera zamavregahane. 11Onensa vente'zamia eri'za tinkenare'ma vute'za, mika zazmia anante netre'za, Jisasi amage ante'naze.
Jisasi fugo namu re'nea ne' azeri knamare'nea naneke
(Mat 8:1-4, Mak 1:40-45)
12Jisasi'ma mago ra kumapima umani'negeno'a, mago nera fugo namumo miko avufga azeri anovazi'nea ne'mo, Agrite e'ne. Jisasima eme negeno'a, avugosaregati mopafi prihuno unemaseno anage hu'ne, Ramoka nazeri so'e hunaku'ma kvemasisigenka, Kagra amane nazeri so'e huo. 13Higeno Jisasi'a azana avufare avako nehuno anage hu'ne, Nagrima navesiana, kagra so'e huo higeno, ana fugo namumo'a ame huno ana zupage atrente'ne. 14Anante Agra ana ne'ku hunteno, vahera ozamasmio. Hianagi kagra Prisi nete vunka, kagraka'a ome averinka Mosesima huneagante, ofa erinka ome hugeno, fugo namumo'a hago vgare hu'za vahemoza kageho. 15Hianagi anama hu'nea avu'avazamofo kemo vuno eno higeno, tusi'a vahe kevumo'za Agri ke nentahisageno, krizmia eriamane hanie hu'za e'naze. 16Hianagi anama hutageno, akoheno Jisasi'a zamatreno vahe omani ka'ma kopi viazamo nunamu ome hutere hu'ne.
Jisasi'a agia sti'nea ne' azeri knamare'nea naneke
(Mat 9:1-8, Mak 2:1-12)
17Mago knazupa Jisasima rempima hu'nezamige'za anampina Farisi vaheki, kasegerema ugagote'naza vahe'enena tavaoma'are mani'naze. (Zamagara mago mago kumateti Galilitima, Judiati'ma, Jerusaletima hu'za Agrane emani'naze.) Higeno Ra Anumzamofo vahe'ma zamazeri knamare hanavea, Agripi me'negeno zmazeri so'e hu'ne. 18Anama hutegenoa anante, mago'a vahe'mo'za sesenku hu'za avufa fri'nea ne' zafa hu'za e'naze. Zamagara ana krinera Jisasi avuga eri'za ufre'za ome antenaku ana'ana hu'naze. 19Hianagi eri'za ufre kankamuna hakare'za erifore osu'naze. Na'ankure tusi'a vahekrerfamo hiza hazageno, ana'nera eri'za nomote mareri'za, no amumpa eri akasine'za ana sesenku'aga atrageno vahe amu'nompinti Jisasina avuga fatgo huno uramine. 20Jisasi'ma ana nagamokizmi zamentintima negeno'a, Agra anage hu'ne, Ronenimoke, miko kumika'a ama apase kantoe. 21Anante kasegere ugagota hunaza vahe'ene, Farisi vahe'moza agafa hu'za ke hakare hu'za, ama nera i'za Anumzamofona huhaviza nehie? Iza Agra huno kumira apasenegantoe nehie. Anumzamoke kumira apasegahianki? 22Hianagi Jisasi'a ha'arente antahintahima antahi'zana nezmageno, Agra anage hu'ne, nahigetma tamagra e'inahu antahintahia tmagu'afina nehaze? 23Inana kemo oza hanigena hugahue, Kumika'a apasegantoe kemopi, Otinka vuo hanua kemo'e? 24Hu'neanagi e'inahu hanigenka, kagra kenka antahinka nehunka, Vahe'mofo Mofavremo'a ama'na mopafina, hanavea eri'neankino kumira amane apase zamantegahie hunka hugahane. Nehuno ana avufga fri'nea nera asami'ne, Nagra negasmue, otinka sesenkuka'a enerinka nonkarega vuo huno hunte'ne. 25Hagi zamagri zamufi ame' huno otino, mase'nea tafe'a enerino Anumzamofo agi erisaga hume noma'arega vu'ne. 26Anama hiazamo zamagrira zamazeri zamanovazige'za, ananteti agafa hu'za Anumzamofo agia erisga nehazageno, kore'zamo zamagripina avitege'za, ruzahu zantafa menina kone, hu'za hu'naze.
Jisasi'a Livai agi hu'nea naneke
(Mat 9:9-13, Mak 2:13-17)
27Anama huteno Agra megi'a nevuno omegeana, takisi zago zonegia nera agi'a Liva'e mago'a agi'a Matiu'e nehaza ne'mo zago zogi nompi mani'negeno agriku huno, Namage eno. 28Higeno agra miko'zana anante netreno, otino amage'anteno vu'ne. 29Hagi Livae'a tusi'a ne'za noma'afi Jisasina krentenege'za, anantega takisi zagoma zogi vahe krerafane, ruga'a vahe enena zamaza tununte kave'ne sipare zanagrane atru hu'za mani'naze. 30Farisi vahe'ene, kasegere ugagota hu'naza vahe'mo'za, Jisasi amage nentaza disaipol nagara kanunkanu hu'za ke ha' rezmante'za anage hu'naze, na'ahigetma tamagra kave ene, tinena takisi zagoma eneriza naga'ene, kumike naga'enena nenaze? 31Jisasi'a kenona huzamanteno anage hu'ne, knare huza mani'nesaza vahe'mo'za tusa vahekura ohakegahaze. Hagi krima erinesaza vahe'mo'za tusa vahekura hakegahaze. 32Nagra fatgo vahera zamagi hukura ome'noe, hagi kumi vahe'moza zamagu'a rukrehe hihogu e'noe.
Kave a'o huno nunamu hu'zamofo naneke
(Mat 9:14-17, Mak 2:18-22)
33Mago'a vahe'mo'za Jisasina amanage hu'za asmi'naze, Jonima amage'ma nentaza disaipol nagamo'za, hakare zupa ne'zana a'o hu'za mani'ne'za nunamu huvava hu'naze. Hagi Farisi mono vahe'mo'za anazanke nehazanagi, Kagrima kamage'ma nentaza nagamo'za nezane, tinena nevava nehaze. 34Anage hazageno Jisasi'a kenona anage zamagriku hu'ne, Tamagra, mago ne'moma aravema hukuma mni'nenigeta, ana ne'mofo rune'amofonkura, nezana a'o huta maniho hugahazo? Ana ne'ma maninenigeta anara osugahaze. 35Hianagi mago kna ne-eankino, aravema huku'ma hunesimofoma zamagripinti avretesigeza, e'i ana knafina nezana a'o hugahaze. 36Jisasi'a anazanke huno mago fronka kea zamasmi'ne. Mago'mo'a kahefa kenaretira tagato huno atafa kenarera anteno ohatigahie. E'inama hanigeno'a, kasefa kena eri tagato hanigeno, kasefa kenamo'a korapa kenarera mago knara osugahie. 37Ana hanigeno magomo'e huno kahefa wainia, afu akruteti tro hunte'nea atafa waini taferopina tagi ovazigahie. Anama haniana, kahefa wainimo'a ana akru taferora rezoreno prohuno tagiramisigeno, ana akarura erihaviza hutregahie. 38Anama hunakura, kasefa wainia, kasefa waini akru tafempi tagi vazigahaze. 39Mago'mo'a, atafa wainima netesuno'a, kasefa wainigura aveosigahie. Na'ankure Agra huno, atafa suamo'a knare'za hu'ne huno hugahie.
دیاریکراوەکانی ئێستا:
Luku 5: kbq
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2014, Wycliffe Bible Translators, Inc. All rights reserved.