AMASIWI AŴALESA 2001 (Drama NT)

Lamba Bible Version © United Bible Societies, 1959. 

Lomba panuma pali fyefyo-fintu ŵaYesu ŵalifumine uko, nekwaŵuke' cisiŵa caGalili, ico copele caTibelya; neŵumba lyaŵantu ilikulu lyaliŵalondele, pakuti ŵalukuŵona utwisiŵilo uto ŵalukucita kuŵalwele. Lomba ŵaYesu ŵalininine kulupili nekwikalo'ko neŵasambile ŵaŵo.
Lombe'mpindi yamuciluko, icitenje caŵaJuda, yalipalamine. Peŋka'po ŵaYesu ŵaliinucile nekuŵona iŵumba lyaŵantu ilikulu lilukwisa kuli ŵo, popeleŵalilaŵile kuli Filipo ati: Mbanikwisa twakuula ŵasiŋkwa, ati aŵa-ŵantu ŵalye? Sombi ŵalilaŵile'fyo ukumwesya lukoso, pakuti aŵene ŵaliisiŵile ifi ŵakucita. Filipo waliŵaasucile ati: Indalama imyanda iŵili tekusita-po siŋkwa uwakukumana ŵonse ati aŵa ŵalye-po panini.
Peŋka umbi umusambile waŵo, isina lyakwe niAndaleya, umukwaŵo Simoni Petilo, alilaŵile kuli ŵo ati: Epwali umusaŋkwa pano, uli nawasiŋkwa ŵamabali ŵasanu, nesaŵi linini liŵili! Mbefyo fikumane syani kuŵantu aŵenji aŵakuŵe'fi? ŴaYesu ati: Ŵekalikeni aŵantu pansi. Apo pali ifyani ifinji; naŵo aŵantu ŵaliikele pansi, ubwinji bwaŵo bwalikumene koti masausande asanu. Eli ŵaŵulile ŵasiŋkwa ŵaYesu. Peŋka ili ŵatotele, ŵaliŵaaŵenye aŵo aŵaikele; fyopele'fyo kaŵili nekuŵaaŵanya isaŵi ilyo, nekukumana ukufwaya kwaŵo ŵonse.
Lomba pakwikuta ŵo, ŵalilaŵile kuŵasambile ŵaŵo ati: Tolaleni ifyo ifyakumacile ifyasyala-po; peposeka neli kamo. Popele ŵalifitolawile nekwisusya ututundu ikumi natuŵili ifyakumacile-ko ifyo ifyafumine kuli wasiŋkwa ŵamabali ŵasanu, ifyasyele-po kuli ŵaŵo aŵalile. Lomba aŵo-ŵantu, ili ŵabwene akesiŵilo ako ŵacitile, ŵalilaŵile ati: Cine uyu ewakusimiko'yo ulukwisa mucalo capansi.
Sombi ŵaYesu, ili ŵaisiŵile ati ŵalukwisa mukunjikata nekumpanjilisya ati njikale nimfumu, ŵalikumbulucile liŵili kulupili eŋka.
Peŋka pakufika iciŋgulo aŵasambile ŵaŵo ŵaliile kucisiŵa, nekwicila mubwato, ati twaŵuke ukuya kuKapanaumi; lomba bwaila'kale, sombi ŵaYesu tawaŋgafika kuli ŵo. Popele amenda aliŵucile ŵafuŋgwe aŵakulu pakuti pacipupu icakuti uŵukulu. Ati ŵoŵe ukusilo'musinso wamasitalyo amakumi aŵili naasanu, neli makumi atatu, ŵaliŵabwene ŵaYesu ŵalukwisa ili ŵenda peulu pamenda, ŵalukupalamina kubwato; naŵo nekuŵa nemwenso. Sombi ŵalilaŵile kuli ŵo ati: Nineŵo, mwitina! Peŋka ŵalisumine ukuŵapoka mubwato; naŵo ubwato impindi iyo yopele bwalificile kumutunto'ko uku ŵalukuya.
Ŋgamailo ilyo-ŵumba lyaŵantu aŵaiminine pesilya lyacisiŵa ŵalibwene ati ubwato ŵumbi taŵu-po, nakaŵili ŵaliisiŵile ati ŵaYesu taŵainjile mubwato pamo neŵasambile ŵaŵo, sombi ati aŵasambile ŵaŵo ŵalifumine-ko ŵeŋka; (sombi icine amato ambi afumine kuTibelya aliisile apepi napapo apo ŵalile siŋkwa, ili ŵatotele ŵaSikulu). Lomba iŵumba lyaŵantu ilyo, pakuŵona ati ŵaYesu taŵa-po, neŵasambile ŵaŵo naŵo taŵa-po, aŵene ŵaliinjile mumato nekufika kuKapanaumi, ili ŵaŵafwaya ŵaYesu. Lomba pakuwasaŋgana bwisilya bwacisiŵa, ŵalilaŵile kuli ŵo ati: MweŵaLabi, mbamwaisa lisa kuno?
ŴaYesu naŵo ŵaliŵaasucile ati: Cine cine, ndukulaŵila kuli mweŵo ati, mulukumfwaya-fwaya tepakuti patwisiŵilo uto utu mwabwene, koku, sombi pakuti mwalilile ŵasiŋkwa aŵo nekwikuta. Mweŵo, tekulukupyunjila ifyakulya ifyo ifiŵola; sombi mupyunjile ifyakulya ifiikalilila ukufika kumweo uwamuyayaya, ifyo ifi akamupeleni Umwana waMuntunsi; pakuti ŵa Wisi, eŵaLesa, ŵalimuŵicile-po akesiŵilo kaŵo. Pakuti pali fyefyo ŵaliŵepwisye ati: Mbefyo, tucite syani ati tulukucite'milimo yaŵaLesa? ŴaYesu ŵaliŵaasucile ati: Imilimo yaŵaLesa niyiyi, ati mucetekele muli woyo uyu ŵatumine.
Peŋka ŵalilaŵile kuli ŵo ati: Mbacindo mulukucita icakesiŵilo, ati tuŵone, tucetekele muli mweŵo? Mulukucite' ndo? Ŵawisifwe ŵalukulya mana mumpaŋga, koti nifyopele'fyo ifilembelwe ati, Siŋkwa uwafumine kwiulu ŵaliŵapele, ati ŵalye. Pakuti pali fyefyo ŵa Yesu ŵalilaŵile kuli ŵo ati: Cine cine, ndukulaŵila kuli mweŵo ati, Taali niMose uwamupeleni siŋkwo'yo uwafumine kwiulu; sombi niŵaTata eŵalukumupeleni siŋkwa wacine ufumine kwiulu. Pakuti siŋkwa waŵaLesa ewoyo useluka kwiulu, nekuŵapelo'mweo aŵamucalo capansi.
Pakuti pali fyefyo ŵalilaŵile kuli ŵo ati: MweŵaSikulu, insiku syonse mulukutupela siŋkwo'yo, Naŵo ŵaYesu nekuŵaasuka ati: Neŵo enesiŋkwa waMweo. Aŵantu ŵonse ulukwisa kuli neŵo, taakomfwa-po insala neli limo; fyopele'fyo ulukucetekela kuli neŵo taakomfwa-po neli cilaka conse insiku syonse. Sombi ndukumuŵuleni ati naŋgaŵa ati mwambona, tamulukucetekela. Aŵantu ŵonse, aŵo ŵalukumpela ŵaTata, ŵakesa kuli neŵo; peŋka aŵo aŵakwisa kuli neŵo, nsikaŵatamfya-po neli limo, koku. Pakuti nsiselucile ukufuma kwiulu mukucito' kufwaya kwanji, sombi nimukucita koti kufwaya kwaŵaŵo aŵantumine emo nselucile. Uko-kufwaya kwaŵaŵo aŵatumine nikuku, ati pali fyefyo fyonse ifi ŵampele, nsikalufye-po neli cimo; sombi ati ŋkafiwusye fyonse pakasuŵa ako akakupela-ko, Pakuti ukufwaya kwaŵaTata nikuku, ati aŵantu ŵonse uwakumuŵono'Mwana, nekucetekela muli ye, akaŵe nemweo uwamuyayaya; kaŵili ati ŋkamuwusye akasuŵa ako akakupela-ko.
Peŋka aŵaJuda ŵaliliŋwiŋwisisye ifyakuli ŵo, pakuti ŵalilaŵile ati—Neŵo enesiŋkwa uwafumine kwiulu. Naŵo ŵalieŵele ati: Kansi uyu-muntu teYesu, umwana wakwe Josefi? Naŵawisi naŵanyina tuliŵesi. Mbasyani alukulaŵila pano ati—Ndiselucile ukufuma kwiulu? ŴaYesu lomba ŵaliŵaasucile nekulaŵila ati: Mwilukuliŋwiŋwisyansyanya. A ŵantu ŵonse, tapali-po neli umo uwisi ukwisa kuli neŵo, uwakuŵulo'kukulikwa kuli ŵaTata aŵantumine; naneŵo ŋkamuwusyo'yo akasuŵa akakupela-ko. Fililembelwe kuŵakusimika ati: Naŵo ŵonse ŵakafundwa kuli ŵaLesa: lomba aŵantu ŵonse uwaumfwile kuli ŵaTata, nekusambila, eulukwisa kuli neŵo. Sombi icine papo' muntu neli umo uwaŵabwene-po ŵaTata; sombi eŋko'yo ufumine kuli ŵaLesa, ewaŵabwene-po ŵaTata.
Cine cine, ndukumuŵuleni ati, Uyo ulukucetekela ali nemweo uwamuyayaya. Neŵoenesiŋkwawamweo. Ŵawisinwe ŵalukulya mana mumpaŋga; aŵo lomba ŵalifwile; sombi uno nisiŋkwa useluka kwiulu ati aŵantu ŵalye, ŵaŵule ukufwa. Neŵo enesiŋkwa wamweo uselucile kwiulu. Aŵantu ŵonse uwakulya siŋkwa uyu akalukuli nemweo uwamuyayaya: icine, nawoyo-siŋkwa munefu wanji, uŋkapela pakuti pamweo waŵamucalo capansi.
Pakuti pali fyefyo aŵaJuda ŵalitaticile ukupicisye'cikaka ati: Uyu-muntu aliisi syani ukutupelo'munefu wakwe ati tulye? Peŋka ŵaYesu ŵalilaŵile kuli ŵo ati: Cine cine, ndukumuŵuleni ati: Teti mwikale nemweo mweŵene, apakuŵulo'kulya umunefu waMwana waMuntunsi nekunwe'milopa yakwe. Uyo ulukulyo'munefu wanji, nekulukunwe'milopa yanji, ali nemweo uwamuyayaya; uyo, neŵo ŋkamuwusya pakasuŵa ako akakupela-ko. Pakuti umunefu wanji icine cakulya, nemilopa yanji icine fyakunwa. Uyo ulukulyo' munefu wanji, nekulukunwe'milopa yanji, alukwikala muli neŵo, naneŵo ndukwikala muli ye. Koti nifyopele'fyo ŵaTata aŵamweo ifi ŵantumine neŵo, naneŵo ifi njikele nemweo pakuti pali ŵaTata; fyopele'fyo kaŵili uyo ulukundya, uyo-ye akalukuli nemweo pakuti pali neŵo. Uno nisiŋkwa uwaselucile kwiulu: topalene nawoyo uŵalile ŵawisinwe, lomba nekufwa, yo; sombi uyo ulukulya siŋkwa uyu, akalukuli nemweo uwamuyayaya. Ifyo ŵalifilaŵilile pakusambisya mwisunagoge kuKapanaumi.
Peŋka pakufiumfwa ŵambi aŵasambile ŵaŵo aŵenji ŵalilaŵile ati: Amasiwi ayo alikatesye, mbaniŵani awaŋgaomfwisya? Sombi ŵa Yesu, pakuti ŵaliisiŵile mumutima waŵo ati aŵasambile ŵanji walukuliŋwiŋwisya pali fyefyo, ŵalilaŵile kuli ŵo ati: Kani filukumututwisyeni ifyo? Mbefyo syani kani mukaŵone Umwana waMuntunsi alukwimino'ko ukwalukwikala akale? Umupasi eupela umweo; umunefu lukoso tomuŵisyeni-po kantu: amasiwi analaŵila kuli mweŵo emupasi, emweo. Sombi peŵumba Iyenu epo ŵali ŵambi aŵataŵalukucetekela. (Pakuti ŵaYesu ŵaliŵesiŵile napakutaŋga aŵo aŵataŵacetekele, nekumwisiŵa nawoyo ukaŵaloŵela). Naŵo ati: Pakuti pali fyefyo nalaŵila kuli mweŵo ati—Aŵantu ŵonse tapali-po neli umo uwisi ukwisa kuli neŵo, uwakuŵulo'kufipelwa kuli ŵaTata.
Pakuti pali fyefyo ŵambi aŵasambile ŵakwe aŵenji ŵalibwelele, nekuleko'kulukwenda naŵo. ŴaYesu lomba ŵaliŵepwisye aŵo aŵali ikumi naŵaŵili ati: Kani namweŵo mulukufwayo'kuya? Kumfwa Simoni Petilo kaaŵaasuka ati: MweŵaSikulu, mbatukaye kuli nani? Mweŵo muli nemasiwi amweo uwamuyayaya; kaŵili fweŵo twacetekela, twaisiŵa icine ati mweŵo muli niŴaŵo Aŵaswetelele ŵaŵaLesa. ŴaYesu nekuŵaasuka ati: Kansi nsinalimusalulwileni mweŵo ikumi naŵaŵili? Sombi umo peŵumba Iyenu musensesi. Ifyo ŵalieŵele Juda, umwana wakwe Simoni lsikaliote; pakuti uyo wopele eukaŵaloŵela, uwapali ŵaŵo ikumi naŵaŵili.

گوێگرتن لە Yoane 6