Texte de la Bible: Gulei © Alliance Biblique du Tchad, 2004 Enregistrement du Nouveau Testament Gulei ℗ 2008 Hosanna

Gulei - 2004 Edition (NT) Drama

Magtub Mann-ra ke Kige ©Alliance Biblique du Tchad, 2004

Jésu unn gos nyan karé le tɔje’n de rebe kɔje tà se Nube dɔ-dɔ anje kade kêm de tête mann. E ede de ede nè:
– Njègang-rebe-tà karé ndi kêm ɓee karé’t bè. Doo nè nga ile koje dè Nube’t lé a, an doo-made’n ke nyan lé a tɔ. Njèkei-kinge karé bè ndi kêm ɓee’t nè nga tɔ. Dɔ-dɔ è ree ra njègang-rebe-tà nè nga ede’n ede nè: «I gɔl tà ke tò dann jé’t se njèkɔse se’m tà ade’m.» Njègang-rebe-tà nè inye tà nè nga ade kur’n heb ɗak tede è ndige le gɔl lé. Nè go’t gugu, è tam kêmn’t ede nè: «Kerɔte kuwe, man nga m’ile koje dè Nube’t lé a, m’an doo-made’m ke nyan lé a tɔ. Nè né è bè géa, njèkei-kinge nè nga ɔge’m taa kebe. Gir’n ke nè á, m’a m’gang’n rebe tà le’n le kade tel ree ndɔje’m gugu lé ta.»
Kuwe-ɓee tel tam ede nè:
– Uri mbi si maje ooi tà le njègang-rebe-tà ke se go rebe’n lé nga. Ké Nube à gang rebe tà le njé le’n ke è ɔr de unde de se ninn’n ke tooi tànn’t lêkê-lêkê kada a, ndɔ a nga lé wa? Né à ngine mbɔr géa, ké à nal ra nyan tede le de wa? Man m’ede sei ndàt, à in kalang le gang rebe tà le de kuwe. Nè loo ke man ke m’ee Ngonn doo m’a m’tel ree nga, ké m’a kinge njé ke undei kêm de dèm’t se dè Nube’t dè nang nè kuwe wa?

Nja karé bè, Jésu unn sertà karé ɔje’n dè dooge ke d’an ra de ke njéra nyan danné sêwge tàkum Nube’t a, d’an made dege ke rang ke nyan lé ede nè:
– Ndɔ karé bè dooge joo in-in awi kêm kei le Nube le kɔje se’n tà. Dooge ke joo nè nga, è ke karé è Pharisien a, è ke karé è njètaa tir a tɔ. Pharisien nè nga ɔse nang in nda dɔ mbeng, ɔje tà se Nube kêmn’t ede nè: «Hei! Nube, m’rai oiyo tede man m’ee tite gute dooge ke ei njéɓog-ge a, njéra nyan danné sêwge lé se njésang dinyege le made dege lé a tɔ. M’rai oiyo tede man tite njètaa tir ke nda nè nga lé a tɔ. Man m’ɔge kêm ɓo nja joo kêm ndɔ ji sejimute’t a, nyan malang ke m’inge nga, ke nè á è dɔg ɓaa, m’unn tà karé m’adi a tɔ.» Njètaa tir nga ɔse nang in nda dɔ gugu nú, è ndige kɔr kum’n kan’n loo ke dɔ lé a tɔ. Nè è unde kàde’n se ji’n ɗi ede nè: «Hei! Nube, ade kêmi tin mbit dèm’t tede man m’ee njèkaiya.» Man m’ede sei ndàt, loo naje’n goto, doo nè nga d’ɔr tà dènn’t pa ɓita tel aw kêm kei le’n ɓai. Nè Pharisien nè nga tà uwe dè’n. Nanan ke unde dè’n dɔ ɓaa, d’a d’ade dè’n à è nang, nanan ke ule dè’n ɓaa, d’a d’unn’n kunde’n dɔ ɗáng ɓai.


Ndɔ karé bè, dooge reei se ngannge ke ndêin-ndêin ra Jésu’t le kade ile ji’n dè de’t tɔr’n ndu’n dè de’t tɔ. Loo ke njékuwe-girnge an-in bè ɓaa, ei in-in se njé ree se ngannge nè nga. Jésu ɓar ngannge nè nga ke rann’t ede nè:
– Inyei loo adi ngannge reei ram’t m ilei de kage lé. Tede Konɓee le Nube nga è le njé ke tooi asinan se de bè. Man m’ede sei ndàt, nanan ke ndige kade Nube on ɓee dènn’t titeke ngannge ke ndêin bè rai lé ɓaa, à um nan’t bɔk se Nube ndan lé.


Doo ke bò le Juipge karé ree ra Jésu’t deje’n ede nè:
– Njèndó dooge nyan, i njè maje kɔr njêt, ké m’a ra bain á le kinge’n ndikumgajer se non nga wa?
Jésu tel deje’n ede nè:
– Ké bain á i ɓar’m doo ke maje ɔr njêt wa? Doo ke maje ɔr njêt karé géa goto, nè Nube kuwe karé luk-luk á maje ɔr njêt. I ger nyange ke Nube unn’n ndu’n le kade dooge rai éké dooge rai lé nga ɓá. Ei á tooi nè: «I a sang dinye le doo-madi lé a, i a tɔl doo lé, i a ɓog lé, i a tête tà kunde tà doo’t lé a, i a kile koje dè njékojige’t a tɔ.»
Doo nè nga tel ede Jésu ede nè:
– M’an dè ndukunnge nè malang sêw-sêw mari se basa’m sár ɗarinè.
Loo ke Jésu oo tà le doo nè bè ɓaa, è ede’n ede nè:
– Nyan karé nain kade i ra ɓai. Aw ige nyange lei mbak inye nar’n i nobo njéndooge ɓaa, i a kinge nyanbaw ra Nube’t nú ɓai. Aw i ra nyange nè pa ɓita i tel i ree unn rebe goom’t ɓai.
Nè loo ke doo nè nga oo tàge nè bè ɓaa, wur’n gang mbann tede è baw-nyankinge. Loo ke Jésu an’n bè ɓaa, è tam ede nè:
– Tur ngain le kade njényan kingege umi nan’t bɔk se Nube. Le kade lugman ur kêm bolè libri’t tee nga è nyan ke tur ngain lé, nè le kade baw um nan’t bɔk se Nube nga è nyan ke tur ngain.
Njé ke ooi tà nè nga ei tami edi nè:
– Ke nè á è bè ɓaa, ké nan á d’asekum kaje’n ta wa?
Jésu ile de dè’t ede nè:
– Nyan ke dooge asikum rai lé nga, Nube asekum ra.
Pierre unn tà deje Jésu ede nè:
– An! jè nga, j’inye nyankinge jé malang j’unn rebe gooi’t, ké ndɔn’t le jé à è ri wa?
Jésu ede de ede nè:
– Man m’ede sei ndàt, ke nè á doo karé inye ɓee koje’n éké neen’n, éké ngakonnge, éké njékojennge, éké ngannenge tede le kule ra’n gir Konɓee’t le Nube ɓaa, à inge nyange ngain dum nyange malang ke è inye kêm ndɔ ke ɗarinè a, à inge ndikumgajer se non kêm ndɔ ke à ree a tɔ.


Jésu ɓar njékuwe-girnge ke dɔg-gidé-joo rann’t ede de ede nè:
– An-in! j’à j’awi ke kêm ɓee-bò ke Jérusalem. Nyan malang ke njéribe-dè-tàge ke tà Nube’t ndangi kêm magtubge’t ɔji dè’m man ke m’ee Ngonn doo nga aw loon’t deĵ. Man nga d’a d’ule’m ji girkoje dooge ke ei juipge lé. Dé nè nga d’a d’ule mbe dèm’t, d’ade taje’m a, d’a tibe yor kum’t, d’a tunde’m se ndêin jap-jap a, d’a tɔl’m a tɔ. Nè ndɔ ke njèkon’t mute ɓaa, m’a m’unde loo tee dann njé ke koo’t.
Nè njékuwe-gir-Jésuge geri gir tà nè nga lé tede è tà ke tò mek.


Nain ngɔr kade Jésu tee kêm ɓee ke Jéricho. Njèkumtɔ karé bè ndi nang ngang rebe’t à kɔ nyan. E oo ká nja dooge ɓar. E deje njé ke ndai kɔtenn’t ede nè:
– Ké ri ra nyan wa?
Dooge teli ileii dè’t edi nè:
– E Jésu ke Nazareth á ndi à dese.
Loo ke è oo bè ɓaa, è tam tà se ndu’n ke bòi ede nè:
– Jésu ngonnkà David, an kumndoo le’m kɔkrɔ karè.
Njé ke ɔri non Jésu in-in se njèkumtɔ nè nga, ndángii edi nè:
– Ebe’t.
Nè njèkumtɔ tam se ndu’n ke bòi beng ke kété kété ede nè:
– Ngonnkà David, an kumndoo le’m kɔkrɔ karè.
Jésu tel nda nang gek. E unn ndu’n ade dé ree se njèkumtɔ nga rann’t. Loo ke njèkumtɔ ree ngɔr ke ra Jésu’t ɓaa, è deje’n ede nè:
– Ké i ndige kade m’ra ri m’adi wa?
Njèkumtɔ tel ile jésu dè’t ede nè:
– Kuwe-ɓee, ade kum’m tel an loo gugu.
Jésu tel ile njèkumtɔ dè’t ede nè:
– Maje kade kumi tel teen ade an loo. I aje ɓá tede takul kêmi ke unde dèm’t.
Ke loon’t nè kuwe kum njèkumtɔ teen ade an’n loo ule’n ndubra dè Nube’t a tɔ. Loo malang ke Jésu aw tutu nga, njèkumtɔ nè aw se’n nan’t-nan’t. Loo ke kosdooge malang an-in bè ɓaa, ei géa, unni gir kule ndubra dè Nube’t tɔ.

گوێگرتن لە Luc 18