Kadiwéu: Gela Liwai Lotaɡ̶anaɡ̶axi Aneotedoɡ̶oji

Neɡ̶eote ciinze nicaaɡ̶ape Tibério ja ninionigi-eliodi romaanotedi codaa iiɡ̶e inoatawece iiɡ̶otedi. Niɡ̶ijo romaano ane iiɡ̶e nipodigi Judéia baɡ̶a Pôncio Pilatos. Ninionigi-eliodi nipodigi Galiléia baɡ̶a Herodes, nioxoa ica Filipe ninionigi-eliodi nipodigi Ituréia codaa me Traconites. Nipodigi Abilene, baɡ̶a ninionigi-eliodi Lisânias. Lacilo-sacerdotitedi baɡ̶a Anás ijaa Caifás. Niɡ̶ijoa nokododi Aneotedoɡ̶oji ja yotaɡ̶aneɡ̶e João, lionigi Zacarias. João idiaaɡ̶i miditaɡ̶a nipodigi ane diɡ̶ica niɡ̶eladimigipi. João diɡ̶etita iditawece nipodigi akiidi Jordão, odaa yatematitibece me leeditibige inatawece oko modinilaatece libeyaceɡ̶eco, codaa me leeditibige me dinilegetibigiwaji, odaa Aneotedoɡ̶oji ja iwilegitetema inoatawece libeyaceɡ̶eco. Niɡ̶ida libakedi João, akaa eetece Isaías, niɡ̶ijo ane yeloɡ̶oditedibece Aneotedoɡ̶oji lowooko niɡ̶ijo jotigide. Isaías iditeloco lotaɡ̶anaɡ̶axi, mee,
“Ida ica ane igedi me dotaɡ̶a miditaɡ̶a nipodigi ane diɡ̶ica niɡ̶eladimigipi.
Mee me dotaɡ̶a,
‘Oenitece naigi Ǥoniotagodi menagi,
awii naicoli ane dixoketema!
Inoatawece ane elagigi icota me dinoxoco,
codaa inoatawece wetiadi ane leegitibigimece oyakagidi.
Naicoli ane dinamage icota me dixoke,
codaa naicoli aninoa nalaɡ̶atedi icota mabotiwage.
Odaa inatawece oko onadi Aneotedoɡ̶oji anodaaɡ̶ee me yewikatidi oko.’”
(Joaniɡ̶idaa Isaías iboɡ̶oditege niɡ̶ijo me ilakidetice naigi Ǥoniotagodi, João ane ilakideticoace laaleɡ̶enali oko mowajipatalo lotaɡ̶a Jesus.)
Eliodi oko domoɡ̶odiita João me dinilegetibigiwaji. Pida João meetiogi, “Akaamitiwaji lionaɡ̶a laketedi. Amiijo aneo ɡ̶abodigitiwaji ina noɡ̶oleetigi me ɡ̶adiwokonitiwaji lélaɡ̶a Aneotedoɡ̶oji nige iloikatidi oko leeɡ̶odi libeyaceɡ̶eco? Iigitiwaji ɡ̶adakataɡ̶a amaleeɡ̶aɡ̶a ikeeni naɡ̶adinilaanitibece, macataɡ̶a naɡ̶ana niale ela me ikee anada naɡ̶ada niale. Jinaɡ̶a domeɡ̶enitiwaji me ɡ̶anelokodi Abraão, (Igaataɡ̶a niɡ̶ina anida aneetege licoɡ̶egi Abraão leeditibige me dinilaatibece), igaataɡ̶a ejitaɡ̶awatiwaji Aneotedoɡ̶oji yakadi me ibake niɡ̶idiwa wetiadi meote mida aneetege licoɡ̶egi Abraão. Codaa micataɡ̶a niɡ̶ina ɡ̶oneleegiwa baanaɡ̶a igo me yakagidi niale neɡ̶epaa litodi. Inoatawece nialeli ane deɡ̶eleteda ela oyakagidi, odaaɡ̶oyalegi.” (Joaniɡ̶idaaɡ̶ee Aneotedoɡ̶oji ja igo me iloikatidi oko aneo ane beyagi).
Pida niɡ̶idi noiigi idioka limedi monigetice João, modita, “Amiida ica ane leeditibige me jaoɡ̶a? (Odaa aɡ̶alee ɡ̶odiloikatidi Aneotedoɡ̶oji.)” Odaa ja niniɡ̶odi, meetiogi, “Niɡ̶ini anidiwa itiwataale noecaɡ̶axiidi, leeditibige me yajigota onaditeci niɡ̶ijo ane daɡ̶aca noecaɡ̶axi. Codaa niɡ̶ini anidi ane yeligo, leeditibige me yedia niɡ̶ina ane diɡ̶ica ane yeligo.”
Niɡ̶ijo anodibatibigege ninyeelo ninionigi-eliodi romaanotedi, eledi icotiobece me domaɡ̶aɡ̶a dinilegetibigiwaji, odaa joɡ̶oige João, modita, “Ǥoniiɡ̶axinoɡ̶odi, oko amiida ane leeditibige maɡ̶aɡ̶a jaoɡ̶a?” Odaa jeɡ̶eetiogi, “Jinaɡ̶alee abanoonaɡ̶anitiwaji caticedi ane iiɡ̶etaɡ̶awa najoinaɡ̶aneɡ̶eco mabanoonaɡ̶ani.”
Codaa iodaɡ̶awadi eletidi oige, modita, “Epoɡ̶oko, amiida ane leeditibige me jaoɡ̶a?” Odaa ja niniɡ̶odi, meetiogi, “Jinaɡ̶atikani ɡ̶adoniciwaɡ̶a mabanoonaɡ̶anitece dinyeelo, oteɡ̶exaaɡ̶aɡ̶a awitaka oditaɡ̶a jaɡ̶abanoonaɡ̶ani. Pida adinanenitibece leeɡ̶odi niɡ̶idoda ɡ̶anigaanyeɡ̶egi.”
Niɡ̶ijo noiigi eliodi mowalita João deɡ̶eo anigetiɡ̶ida loenatagi anodoxicetema. Meetibige le niɡ̶idi noiigi ijoa nige niɡ̶idaaɡ̶ida João Niɡ̶icoa ane niiɡ̶e Aneotedoɡ̶oji me ɡ̶odewikatidi. Pida João meetiogi iditawece, “Ǥadilegenita ninyoɡ̶odi. Pida enagi anida loniciwaɡ̶a caticedi ee. Ajakadi me jaxawatece, oteɡ̶exaaɡ̶aɡ̶a me jowilece liwelatedi, leeɡ̶odi eliodi me ɡ̶oneɡ̶egi, aiciagi. Idi ane yajigotediogi Liwigo Aneotedoɡ̶oji, idiaaɡ̶eledi niɡ̶ina akaamitiwaji baɡ̶a iloikatidi, micataɡ̶a daɡ̶a yalegi noledi. Aneotedoɡ̶oji ja igo me iomaɡ̶adi oko, micataɡ̶a niɡ̶ina ɡ̶oneleegiwa baaniɡ̶ida najo libaaɡ̶adi naɡ̶a igo me ibinie lawodigijedi, odaa iomaɡ̶aditege leyeema, lapadi. Iladie leyeema minitaɡ̶a diimigi ane iladiete nijaacotedi. Pida napadi baɡ̶a yalegi mini noledi ane daɡ̶a ipe.”
Odaa João ibodicaxitiogi niɡ̶idi noiigi mowidi eletidi lotaɡ̶a me yaxawatiogi, niɡ̶ina me yatemati nibodicetedi anele.
Pida João ja dotaɡ̶atibige Herodes inionigi-eliodi, leeɡ̶odi Herodes dibanoonaɡ̶atece aca Herodias lodawa nioxoa, codaa leeɡ̶odi Herodes mowidi eletidi libeyaceɡ̶eco. Joaniɡ̶idaa leeɡ̶odi Herodes naɡ̶a diiɡ̶enatakata moixotiwece João niwiloɡ̶onaɡ̶axi, pida joaniɡ̶idaa leeɡ̶odi neɡ̶eote daɡ̶axatace mowidi niɡ̶icoa loenataka ane beyagi.


Niɡ̶ica naɡ̶a nigomaɡ̶a ijotawece niɡ̶ica noiigi me dinilegetibigiwaji, odaa Jesus jaɡ̶aɡ̶a dinilege. Niɡ̶ijo naɡ̶a yotaɡ̶aneɡ̶e Aneotedoɡ̶oji, niɡ̶ica ditibigimedi domoke. Odaa Liwigo Aneotedoɡ̶oji ja dinikatelogo Jesus dinanatigi yotibi. Odaa joɡ̶owajipata ica ane dotaɡ̶a digoida ditibigimedi, anee, “Akaami Ionigi aneliodi me ɡ̶ademaani, codaa eliodi me idinitibeci akaami leeɡ̶odi.”


Niɡ̶ijo niɡ̶idaa dinanatedigi Jesus me diba, ijoa 30 nicaaɡ̶ape. Odaa eliodi oko odiletibige daɡ̶a lionigi José. Pida Jesus ida aneetetege licoɡ̶egi Eli.
Eli eliodi ica Matate,
Matate eliodi ica Levi,
Levi eliodi ica Malqui,
Malqui eliodi ica Janai,
Janai eliodi ica José,
José eliodi ica Matatias,
Matatias eliodi ica Amós,
Amós eliodi ica Naum,
Naum eliodi ica Esli,
Esli eliodi ica Nagai,
Nagai eliodi ica Maate,
Maate eliodi ica Matatias,
Matatias eliodi ica Semei,
Semei eliodi ica José,
José eliodi ica Joda,
Joda eliodi ica Joanã,
Joanã eliodi ica Resa,
Resa eliodi ica Zorobabel,
Zorobabel eliodi ica Salatiel,
Salatiel eliodi ica Neri,
Neri eliodi ica Melqui,
Melqui eliodi ica Adi,
Adi eliodi ica Cosã,
Cosã eliodi ica Elmadão,
Elmadão eliodi ica Er,
Er eliodi ica Josué,
Josué eliodi ica Eliézer,
Eliézer eliodi ica Jorim,
Jorim eliodi ica Matate,
Matate eliodi ica Levi,
Levi eliodi ica Simeão,
Simeão eliodi ica Judá,
Judá eliodi ica José,
José eliodi ica Jonã,
Jonã eliodi ica Eliaquim,
Eliaquim eliodi ica Meleá,
Meleá eliodi ica Mena,
Mena eliodi ica Matata,
Matata eliodi ica Natã,
Natã eliodi ica Davi,
Davi eliodi ica Jessé,
Jessé eliodi ica Obede,
Obede eliodi ica Boaz,
Boaz eliodi ica Sala,
Sala eliodi ica Nassom,
Nassom eliodi ica Aminadabe,
Aminadabe eliodi ica Admim,
Admim eliodi ica Arni,
Arni eliodi ica Esrom,
Esrom eliodi ica Peres,
Peres eliodi ica Judá,
Judá eliodi ica Jacó,
Jacó eliodi ica Isaque,
Isaque eliodi ica Abraão,
Abraão eliodi ica Tera,
Tera eliodi ica Nacor,
Nacor eliodi ica Seruque,
Seruque eliodi ica Ragaú,
Ragaú eliodi ica Faleque,
Faleque eliodi ica Éber,
Éber eliodi ica Sala,
Sala eliodi ica Cainã,
Cainã eliodi ica Arfaxade,
Arfaxade eliodi ica Sem,
Sem eliodi ica Noé,
Noé eliodi ica Lameque,
Lameque eliodi ica Metusalém,
Metusalém eliodi ica Enoque,
Enoque eliodi ica Jarete,
Jarete eliodi ica Malaleel,
Malaleel eliodi ica Cainã,
Cainã eliodi ica Enos,
Enos eliodi ica Sete,
Sete eliodi ica Adão,
ane lionigi Aneotedoɡ̶oji.

گوێگرتن لە Lucas 3