Text: © L'Alliance Biblique du Tchad 2006 Audio: ℗ 2008 Hosanna

Sar - 2008 Edition (NT)

Bibəl ta Sar̄ © L'Alliance Biblique du Tchad, 2006, 2010.

Ta anī kósə de gə̄ malang ḭḭ aw̄n̄ kə Jeju no Pilatə tə́. Əlan̄ gír sekə́n rɔ̄ Pilatə tə́ ədan̄ na:
Á̰a̰ā̰, j-ənge dəngam ń toō loo sə̄lā nápar deē yājí gə̄ tə́ ō, loo kɔgə̄ de gə̄ kadə̄ Sejar yá̰a̰ tīr̄ gə̄ tə́ ō. Tá nəkɔ́ əda ɓáý to̰ na ni na i Kərist ō.
Anī Pilatə dəjen najə̄ əda na:
Ḭ̄ i mban̄g yā Jipə gə̄ a?
Jeju tél ədan na:
Īkɔ́ ə́dá ɓá.
Anī Pilatə tél əda ngol gə̄ kə́ dɔ ngé tun̄ yá̰a̰ gə̄ tə́ ō, kósə de gə̄ ō na: Mā m-ə́ngé yá̰á̰ kógə̄ḿ dɔ dəngam ń toō tə́ kə́ yā kadə̄ sarya rāānneé alé.
Ba nin̄-əhɔn̄ tadə́ ngan̄g ɓáý, ədan̄ na: Ni sə̄lā de gə̄ kə ta kūl̄ ndóōdə́ yá̰a̰ gō nang kə́ Jude tə́ malang, əla gír i Galile tə́ nú bátə́ gāngəń laā.

Dan ń Pilatə oō beé ní a, dəje ké deē ní i de kə́ Galile wa. Loo ń ni-ger̄ kadə̄ i deē yā Herod anī, əla seneé rɔ̄ Herod tə́. Kem ndɔ̄ gə̄ nəkɔ́ ń noō tə́ ní Herod nəkɔ́ i Jerusalem noó ō. Dan ń Herod a̰a̰ Jeju ní anī, rɔ̄n nelə̄n ngá̰ý, tɔdɔ̄ ni-sāā ka̰a̰n i jóo najə̄ yá̰a̰ gə̄ ń ni-oō dɔn tə́ ní, tá əndā kemən dɔ tə́ kadə̄ Jeju a rāā yá̰á̰ kə́ yáā kógə̄ḿ kadə̄ n-a̰a̰ ɓáý ō. Adə̄ dəje Jeju najə̄ ngá̰ý, ba Jeju tá ədan yá̰á̰ kógə̄ḿ sḛ́ý alé. Ngol gə̄ kə́ dɔ ngé tun̄ yá̰a̰ gə̄ tə́ kə ngé ndóō de gə̄ ndū najə̄ gə̄ ran̄ a sekə́nən̄ kə ngangāá ngá̰ý ɓáý to̰. Gō tə́ dan ń Herod naā tə́ kə áskar kə́ ngé ngɔ̄m̄ loo yān gə̄ ɔjən̄ Jeju kadə̄ ni i deē ta kumdə́ tə́ aĺ ō, lurənən̄ ō oy ní anī, Herod adə̄ əlan̄ kūbə̄ kógə̄ḿ kə́ ndə́lē pir pir rɔ̄ Jeju tə́, ba tél əla seneé rɔ̄ Pilatə tə́ gogə́. Anī ndɔ̄ nəkɔ́ ń noō tə́ ní, Herod nin̄ kə Pilatə ń i madə̄ ba̰ā̰ naā gə̄ kété ní télən̄ madə̄ naā gə̄.


Anī Pilatə ɓāŕ ngol gə̄ kə́ dɔ ngé tun̄ yá̰a̰ gə̄ tə́ ō, ngār gə̄ ō, de kə́ kem ɓē gə̄ ō, adə̄ kánə̄n̄ naā, ba ədadə́ na:
Sḭḭ̄ ī-sekíī dəngam ń toō rɔ̄ḿ tə́ na i tām̄ ni na sə̄lā de kə́ kem ɓē gə̄, ba á̰a̰ī, m̄-dəjen najə̄ i ta kumsí sḭḭ̄ kɔ́ gə̄ tə́ laā ō, ba mā m-ə́ngé yá̰á̰ kógə̄ḿ kə́ dan yá̰a̰ gə̄ ń ī-sekə́niīneé tə́ ní kadə̄ sarya rāān alé. Herod ənge yá̰á̰ kógə̄ḿ dɔn tə́ aĺ ɓáý to̰, tɔdɔ̄ á̰a̰ī, ni-tél əla seneé tají tə́ laā. Sḭḭ̄ kɔ́ gə̄ á̰a̰ī kə kumsí njóý njóý n toō. Dəngam ń toō rāā yá̰á̰ kógə̄ḿ sḛ́ý kə́ əɓa kum kadə̄ oyń alé. Ní i beé ɓáa, m-ādə̄ a əndanən̄, ba gō tə́ a, m-ā m-ə́ya̰n dɔɔ́.
Kə dɔ rāā nāā Pákə gə̄ malang anī, sɔɔ̄ kadə̄ Pilatə a əya̰ dəngáý kógə̄ḿ dɔɔ́.
Ba nin̄-əgan̄ kɔŕ kə̄ dɔɔ́ ngá̰ý, ədan̄ naā tə́ malang na:
Ādə̄ ī-tɔ̄l̄ dəngam ń toō, ba Barabas tá əya̰n dɔɔ́ ādə̄jí!
Barabas ní əhɔnən̄ dəngáyá i najə̄ rɔ̄ɔ̄ kógə̄ḿ kə́ ngé sə̄lā de gə̄ dɔ ngār gə̄ tə́ rɔ̄ɔ̄n̄ kem ɓē tə́ ō, najə̄ tɔ̄l̄ kə́ ni-tɔ̄l̄ deē tə́ ō. Ba Pilatə gḛy i kəya̰ Jeju tá adə̄ tél ɔr̄ najə̄ sedə́ ɓáý to̰. Ba nin̄-əgan̄ kɔŕ dəjenə̄ń yá̰á̰ ń kemdə́ ndigə ní ədan̄ na: Əndan kə́ máyá̰ tū kāgə̄ kə́ dēsə́ tə́! Əndan kə́ máyá̰ tū kāgə̄ kə́ dēsə́ tə́!
Pilatə ədadə́ ɓáý to̰ nja kə́ nge ko̰ mətá na:
Yá̰a̰ nəkɔ́ kə́ majaĺ ń deē ń toō rāā ní i rí? Mā m-ə́nge yá̰á̰ kógə̄ḿ dɔn tə́ kə́ əɓa kum kadə̄ oyń alé, ní i beé ɓáa, m-ādə̄ a əndanən̄, ba gō tə́ a m-ā m-ə́ya̰n dɔɔ́.
Ba nin̄-əhɔn̄ gír ngan̄g ngá̰ý kə̄ nodə́ tə́ kə kɔŕ gēé kə̄ dɔɔ́, ba dəjen̄ kadə̄ kə əndan̄ Jeju tū kāgə̄ kə́ dēsə́ tə́ kə máyá̰, ba kɔŕ yādə́ ní a ɓār̄ kə̄ dɔɔ́ ngan̄g ngá̰ý mān̄ kə̄ kété ɓáý to̰. Loo ń noō tə́ ní Pilatə gān̄g sarya dɔn tə́ tītə̄ ń nin̄-dəjen̄neé ní. Ni əya̰ nge ń nin̄-dəjen̄ ní dɔɔ́, i nge ń əhɔnən̄ dəngáyá tām̄ rɔ̄ɔ̄ kə́ ngé sə̄lā de gə̄ dɔ ngār gə̄ tə́ rɔ̄ɔ̄n̄ tə́ ō, najə̄ tɔ̄l̄ kə́ ni tɔ̄l̄ deē tə́ ō ní, ba adə̄də́ Jeju kadə̄ rāān̄ yá̰á̰ ń kemdə́ gḛy ní seneé.


Dan ń a aw̄n̄ kə Jeju tītə̄ ń noō ní anī, əhɔn̄ dəngam kógə̄ḿ kə́ tél ndɔrɔ́ a reē, rīn na i Simo̰ kə́ Siren, ba adə̄nən̄ kāgə̄ kə́ dēsə́ kadə̄ ətō gō Jeju tə́.
Kósə de gə̄ ngá̰ý unən̄ gōn, kə dəyá̰ gə̄ kə́ a tə̄ndān̄ nganjədə́ gə̄ ō, a nōōnən̄ ō. Jeju tél tūr̄ kumən kə̄ rɔ̄ dəyá̰ gə̄ ní tə́, ba ədadə́ na:
Dəyá̰ kə́ Jerusalem gə̄, ī-nōōmī mā alé, ba ī-nōōī rɔ̄sí sḭḭ̄ kɔ́ gə̄ ō, ngáńsí gə̄ ō. Tɔdɔ̄ á̰a̰ī, ndɔ̄ gə̄ a reēn̄ noó kadə̄ a ədan̄ na: Rɔ̄nel̄ i yā dəyá̰ kə́ kujə gə̄! Rɔ̄nel̄ i yā ngé gə̄ ń ojən̄ ngōn̄ aĺ ní! Rɔ̄nel̄ i yā ngé gə̄ ń adə̄n̄ ngōn̄ mba aĺ ní! Loo ń noō tə́ de gə̄ a ədan̄ mbal̄ kə́ bo gə̄ na kə tə́sōn̄ dɔdə́ tə́ kɔ̄ɔ́ ō, a ədan̄ ngán mbal̄ gə̄ na kə utə̄n̄ dɔdə́ kɔ̄ɔ́ ō. Ní, ré rāān̄ kāgə̄ kə́ mbōl̄ yá̰á̰ kə́ tītə̄ ń noō gə̄ anī, nge kə́ tutə ní, yān i ba̰ý?
Aw̄n̄ kə de kə́ rang gə̄ jōó seneé yā tɔ̄l̄də́ ō, i de kə́ ngé rāā majaĺ gə̄. Dan ń ugə̄n̄ loo ń a ɓāŕnən̄ na i Kār̄ dɔ tə́ ní anī, əndanən̄ kə máyá̰ tū kāgə̄ kə́ dēsə́ tə́ tū tə́ naā tə́ kə ngé rāā majaĺ gə̄ ní. Kógə̄ḿ i dɔ jī ko̰n tə́ ō, kógə̄ḿ i dɔ jī gelən tə́ ō. Anī Jeju əda na:
Bɔbə́ḿ, ī-māȳ rɔ̄í dɔdə́ tə́, tɔdɔ̄ nin̄-gerə̄n̄ kum yá̰á̰ ń nin̄-rāān̄ toó alé. Gō tə́ anī nin̄-túgə̄n̄ wə̄lā kēgə̄n̄neé naā kūbə̄ yān gə̄. De kə́ kem ɓē gə̄ ra a̰a̰n̄ loo sikəm. Ba ngār gə̄ tá a kəgōn̄ naā dɔ Jeju tə́. Nin̄-ədan̄ na:
Ni ń ajə de kə́ rang gə̄ ní, ré ni i Kərist anī, ādə̄ ajə rɔ̄n yā ka̰a̰ tā.
Áskar gə̄ lurənən̄ ɓáý to̰ ō. Nin̄-reēn̄ kə̄ rɔ̄n tə́ ngɔr kə kasə kə́ masāá yā kadə̄n, ba ədan̄ na:
Ré ḭ̄ i mban̄g yā Jipə gə̄ anī, īkɔ́ ájə rɔ̄í tā.
Ndangən̄ najə̄ kógə̄ḿ əndān̄ dɔn tə́ dɔɔ́ ɓáý to̰, ədan̄ na nge ń toō i mban̄g yā Jipə gə̄.
Nge rāā majaĺ kə́ kógə̄ḿ ń əndan̄də́ kə máyá̰ tū kāgə̄ kə́ dēsə́ tə́ ní əda najə̄ kə́ to ngonjə̄ na: Ḭ̄ i Kərist aĺ a? Ájə rɔ̄í īkɔ́, ba ájə́jí seí ō tā! Anī madə̄n kə́ noō ní ndángə̄n əda na:
Ḭ̄ ń gāngə̄n̄ sarya kə́ kógə̄ḿ beē dɔjí tə́ mbak ní, ī-ɓōĺ ndíĺ Nə́ɓā aĺ a? Yājí jḭ̄ i gō tə́, tɔdɔ̄ rāān̄jí i yá̰á̰ kə́ asə gotə yājí gə̄ ń jə-rāā tə́ ní. Ba ni, ni-rāā yá̰á̰ kógə̄ḿ kə́ majaĺ sḛ́ý aĺ bátə́.
Tá ni-əda Jeju na:
Jeju, ādə̄ əga kemií dɔḿ tə́ dan ń ā ūgə̄ kem Ɓē ko̰o̰ yāí tə́ ní.
Anī Jeju tél tūr̄ ədan na:
Ādə̄ m-ə́daī najə̄ kə́ bo ngá̰ý, ɓōólaā nəkɔ́ ń toō, ḭ̄ i seḿ loo kə́ majə yā Nə́ɓā tə́.


Loo ń mbang i dan ɓēé ní, loo gān̄g tíbə ripə, adə̄ loo kə́ risə til taā loo dɔ nang tə́ malang, bátə́ ugə̄ń mbang kə́ mətá kə́ loo sɔlí tə́. Kūbə̄ ń gāngə̄n̄neé kem kújə́ yā Kɔ́ɔ̄ɓē ní njar naā tə́ danaá kɔ̄ɔ́. Anī Jeju əga kɔŕ ngá̰ý əda na:
Bɔbə́ḿ, m-ə́yá̰ ndílə́ḿ kem jīí tə́.
Dan ń əda najə̄ ń noō oy anī, əhɔ tan kə̄ naā tə́. Loo ń ngol áskar gə̄ a̰a̰ yá̰a̰ gə̄ ń toō beé ní, a ɔsə gɔn Nə́ɓā, əda na:
Rɔ̄kum, deē ń toō i de kə́ súmūú!
Ba kósə de gə̄ malang ń kánə̄n̄ naā yā ka̰a̰ yá̰a̰ ń rāā yá̰á̰ ní, dan ń a̰a̰n̄ tītə̄ ń noō anī, télən̄ ta kaw̄ ɓēé tə́ndān̄ nganjədə́ dɔɔ́ dɔɔ́. Ngé gə̄ malang ń gerə̄n̄ Jeju majə ní ō, dəyá̰ gə̄ ń unən̄ gōn ḭḭn̄ seneé Galile nú ní ō, ran̄ dan sa̰y, a a̰a̰n̄ yá̰a̰ gə̄ ń rāān̄ yá̰á̰ ní.


Deē kógə̄ḿ dan ngé sarya kə́ bo gə̄ tə́ teē reē. Rīn na i Jəjep, ni i de kə́ kem majə ō, i de kə́ súmūú ō. Yá̰a̰ gə̄ ń madə̄n gə̄ ɔjən̄ rāā ō, yá̰a̰ gə̄ ń rāān̄ ō ní, ni-əla rɔ̄n danaá alé. Ni i de kə́ Arimate, ɓē kógə̄ḿ yā Jipə gə̄. Ni a ngóō i Ɓē ko̰o̰ yā Nə́ɓā. Ni-aw̄ rɔ̄ Pilatə tə́, dəjen na kə adə̄n nīń Jeju. Gō tə́ anī, ɔr̄ nīnə́n tū kāgə̄ kə́ dēsə́ tə́, ɓír̄ kə kūbə̄ yoó, ba aw̄ ənī bāá yo kógə̄ḿ kə́ ndērə̄n̄ tū mbal̄ tə́, ba ənīn̄ deē kógə̄ḿ tū tə́ aĺ ɓáý tə́, I ndɔ̄ ń a rāān̄neé loo kán̄ yá̰a̰ gə̄ kəndā tām̄ yā ndɔ̄ sabat tə́ ní, tá ndɔ̄ sabat nəkɔ́ i ngɔr kɔ̄ɔ́.
Dəyá̰ gə̄ ń ḭḭn̄ kə Jeju Galile nú reēn̄ ní aw̄n̄ gō Jəjep tə́, nin̄-a̰a̰n̄ bāá yo ní ō, loo kənī ń ənīn̄ nīń tū tə́ ní ō. Gō tə́ anī tél aw̄ rāān̄ loo yibə̄ kə́ kotə majə ngá̰ý gə̄ kə́ yā rāā dɔ nīń tə́, kə yibə̄ ítər gə̄, əndān̄. Ndɔ̄ sabat tə́ ɓá anī, nin̄-ɔrə̄n̄ koō tītə̄ ń ndū najə̄ ədań ní.

گوێگرتن لە LUK 23