If you would like a copy of this version please contact info@davaraudiobibles.org

Bodo Parja New Testament, CC-BY-SA-4.0, The Love Fellowship. Bodo Parja New Testament Audio Bible, CC-BY-SA-4.0, Davar Partners International, The Love Fellowship, 2023.

Bodo Parja New Testament

Bodo Parja Bible (ବ୍‌ଡ଼୍ ହ୍‌ର୍‌ଜା) by The Love Fellowship is licensed under Creative Commons Attribution-ShareAlike 4.0 License.

ଯୀଶୁ ତାର୍ ନିଜାର୍ ବାରଗ୍‍ଟ୍ ଚେଲାମ୍‍ନ୍‍କେ ଇ ସ୍‌ବୁ ଶିକ୍ୟା ଦେଇ ସ୍‍ର୍‍ଲା ହ୍‌ଚେ, ଗାଲିଲୀ ଜିଲାର୍ ସ୍‍ହର୍‌ମ୍‍ନ୍‍କେ ଶିକ୍ୟା ଦେମ୍‌କେ ଆର୍ ପର୍‍ଚାର୍ କ୍‌ରୁକେ ସେ ଜାଗାଇ ହ୍‍ଣି ବାରିଗ୍‍ଲାଇ। ସେଡେବ୍‍ଳ୍ ଡୁବେନ୍ ଦେତା ଯୋହନ୍ ଜ୍‌ଇଲେ ରିଲା ଆର୍ ଖ୍ରୀଷ୍ଟ ଯୀଶୁର୍ କ୍‍ଲା କାମାର୍ କ୍‌ବର୍ ଶୁଣିକ୍‍ରି ନିଜାର୍ ଜଳେକ୍ ଚେଲାମ୍‍ନ୍‍କେ କ୍‌ବର୍ ଦେଇ ଯୀଶୁର୍ ଲ୍‌ଗେ ହ୍‌ଟାଇଲା, ଆର୍ ସେମ୍‍ନ୍ ଆସି ଯୀଶୁକେ ହ୍‌ଚାର୍‌ଲାଇ, “ଜୁଇ ଖ୍ରୀଷ୍ଟକେ ଇଶ୍ୱର୍‌ ଇ ହୁର୍‌ତିବିକେ ହ୍‍ଟାଇନ୍ ବ୍‌ଲି ହ୍‍ର୍‍ମାଣ୍ କ୍‌ରିରିଲା, ସେ ଖ୍ରୀଷ୍ଟ ତୁଇ କି? କି ଅମିମ୍‌ନ୍ ଆର୍ କାକେ ଜାଗି ରେମ୍‌ନ୍ଦ୍?”
ଯୀଶୁ ଡୁବେନ୍ ଦେତା ଯୋହନାର୍ ଚେଲାମ୍‍ନ୍‍କେ କଇଲା, “ଜୁଇରି ଜୁଇରି ତୁମିମ୍‍ନ୍ ଶୁଣୁଲାସ୍ ଆର୍ ଦ୍‌କୁଲାସ୍, ସେସ୍‍ବୁ ତୁମି ଜାଇକ୍‍ରି ଯୋହନ୍‍କେ କ୍ଉଆ, କାଣା ଲକ୍‍ମ୍‍ନ୍ ଆକି ଦ୍‍କ୍‍ଲାଇ। ଚଟା ଲକ୍‍ମ୍‍ନ୍ ଇଣ୍ଡୁଲାଇ। କୁଷ୍ଟରଗି ମ୍‌ନ୍ ବ୍‍ଲ୍ ଅମ୍‍ଲାଇ। ନ୍‍ଶୁଣ୍‍ତା ଲକ୍‍ମ୍‍ନ୍ ଶୁଣୁଲାଇ। ମ୍‌ଲା ଲକ୍‍ମ୍‍ନ୍ ଆରେକ୍‌ ଜୀବନ୍ ହାଇକ୍‍ରି ଉଟୁଲାଇ, ଆର୍ ଗ୍‌ରିବ୍ ଲକ୍‍ମ୍‍ନ୍‍କାର୍ ଲ୍‌ଗେ ଇଶ୍ଵରାର୍ ରାଜିର୍‌ ସୁବ୍‌କ୍‌ବର୍ ପର୍‍ଚାର୍ ଅମ୍‌ଲି। ଆର୍, ଜ୍‌ତେକ୍ ସ୍‍ବୁ ଲକ୍‍ମ୍‍ନ୍ ମକେ ବିଶ୍‌ବାସ୍‌ କ୍‌ରୁଲାଇ ସେମ୍‍ନ୍‍‍କେ ଆଶିର୍‌ବାଦ୍‌ ହାଉତି।”
ଡୁବେନ୍ ଦେତା ଯୋହନାର୍ ଚେଲାମ୍‌ନ୍ ଲେଉଟି ଜାତାବ୍‍ଳ୍ ଯୀଶୁ ଡୁବେନ୍ ଦେତା ଯୋହନାର୍ ବିଷୟ୍ ଲକ୍‌ମ୍‍ନ୍‌କେ କ୍‍ମ୍‍କେ ଦ୍‍ର୍‍ଲା, ତୁମି ଶୁନ୍‌ସାନ୍ ବ୍‍ଟାଲ୍‌ଗେ କାଇରି ଦ୍‌କୁକେ ଜାତି ରିଲାସ୍, କାଇରି ହ୍‍ବନେ ଜ୍‍ଲ୍‌ତିରିଲା ର୍‍ନ୍ ଦ୍‍କୁକ୍ ଜାଇରିଲାସ୍? ସେଡେବ୍‍ଳ୍ ତୁମିମ୍‍ନ୍ କାଇରି ଦ୍‍କୁକ୍ ଜାଇରିଲାସ୍? କି ବେସିଦାମାର୍‌ ଆଙ୍ଗି ହିନ୍ଦିରିଲା ଗଟେକ୍ ମାନାଇକେ? ଦ୍‌କା, ଜୁଇଲକ୍ ହେଁ ବେସିଦାମାର୍‌ ଆଙ୍ଗି ହିନ୍ଦ୍‌ତି ଇଜାଗାଇ ନ୍‍ରେତି, ସେମ୍‍ନ୍ ର୍‍ଜାର୍ ଗ୍‍ରେ ରେତି।
ସେରି ନ୍‌ଇଲେକ୍ ମକେ କ୍ଉଆ କାଇରି ଦ୍‌କୁକେ ଜାଇରିଲାସ୍? ଗଟେକ୍ ବବିଶତ୍ କ୍‌ତା କ୍‌ଉତା ଲକ୍‌କେ ଦ୍‍କୁକ୍ ଜାଇରିଲାସ୍ କି? ମୁଇ ତୁମୁକ୍ ସ୍‌ତ୍ କ୍‌ମ୍‌ଲେ, ବବିଶତ୍ କ୍‌ତା କ୍‌ଉତା ଲକ୍‌ମ୍‌ନ୍‌‍କାର୍ ତ୍ଇହ୍‍ଣି ବେସିବ୍‍ଡ୍ ବବିଶତ୍ କ୍‌ତା କ୍‌ଉତାଲକ୍ ଡୁବେନ୍ ଯୋହନ୍‍କେ ତୁମି ଦ୍‌କୁକେ ଜାଇରିଲାସ୍। ଜ୍‌ଡେବ୍‌ଳ୍ ସେମ୍‍ନ୍ କଇଲାଇ, “ଡୁବେନ୍ ଯୋହନ୍ ଗଟେକ୍ ମାନାଇ ଯାର୍ ବିଷୟେ କି ଦ୍‌ର୍‌ମ୍ ଶାସ୍‌ତର୍ ତ୍‌ଇ ଲେକା ଅଇଲିଆଚେ, ମାପ୍‌ରୁ କଇଲା ଦ୍‌କା, ‘ମୁଇ ମର୍ ଡ୍‍ଣ୍ତାସିକେ ତୁମାର୍ ଆଗ୍‍ତୁ ହ୍‍ଟାମ୍‍ଲେ, ସେ ତୁମାର୍ ବାଟ୍ ତିଆର୍ କ୍‍ରେଦ୍, ଇରି ସେ ଲକ୍’।”
ସେଡେବ୍‌ଳ୍ ଯୀଶୁ ସେମ୍‌ନ୍‌କେ କଇଲା, “ମୁଇ ତୁମୁକ୍‌ମ୍‌ନ୍ ସ୍‌ତ୍ କ୍‌ମ୍‌ଲେ, ଇ ହୁର୍‌ତିବି ତ୍‌ଇ ଜ୍‍ର୍‍ନ୍‌ ଅଇଲା ଇସ୍‍ବୁ ଲକ୍‍ମ୍‍ନ୍‍କାର୍ ବିତ୍‌ରେ ଡୁବେନ୍ ଦେତା ଯୋହନାର୍ ଜ୍‍ର୍‍ନ୍‌ ଲ୍‌ଗେହ୍‌ଣି ବେସିବ୍‍ଡ୍ କେ ହେଁ ଅଇନ୍‌କେର୍‌ତି। ମ୍‍ତର୍ ଜୁଇଲକ୍ ଇଶ୍ଵରାର୍ ରାଇଜେ ସାନ୍, ସେ ଇ ଯୋହନାର୍ ତ୍ଇହ୍‍ଣି ଅଦିକ୍ ବ୍‍ଡ୍ ଅଇଦ୍। ଆରେକ୍‌, ଡୁବେନ୍ ଦେତା ଯୋହନାର୍ ପର୍‍ଚାର୍ ଆରମ୍ କ୍‍ଲାତ୍ଇ ହ୍‍ଣି ଅବେହ୍‍ତେକ୍ ଇଶ୍ଵରାର୍ ରାଇଜ୍ ତାଳ୍‌ନା ହାମ୍‍ଲା। ଆର୍, ତାଳ୍‌ନା କ୍‌ର୍‌ତା ଲକ୍‍ମ୍‍ନ୍ ତାକେ ଜ୍‌ବର୍‍ଦସ୍‌ତ୍ ଅଦିକାର୍ କ୍‌ରୁଲାଇ।
ସ୍‍ବୁ ବବିଶତ୍ କ୍‌ତା କ୍‌ଉତା ଲକ୍‌ମ୍‌ନ୍‌ ଆର୍ ମୋଶାର୍ ନିୟମ୍, ଯୋହନ୍ ଆସ୍‌ତା ହ୍‍ତେକ୍ ସେ ବାବବାଣି କଇରିଲାଇ। ଆର୍, ଯଦି ତୁମିମ୍‍ନ୍ ମର୍ କ୍‌ତାକେ ବିଶ୍‌ବାସ୍‌ କ୍‍ରାସ୍, ତ୍‍ବେ ଜୁଇ ଏଲିୟର୍ ଆସ୍‌ତାର୍ କ୍‌ତା ବବିଶତ୍ କ୍‌ତା କ୍‌ଉତା ଲକ୍‌ମ୍‌ନ୍‌ କଇରିଲାଇ, ଏ ଯୋହନ୍ ହ୍‌କା ସେ ଏଲିୟ। ଯାର୍ ଶୁଣୁକେ କାନ୍ ଆଚେ, ସେ ମ୍‌ନ୍ ଦେଇକ୍‍ରି ଶୁଣ ଆର୍ ବୁଜୁକେ ଚେଷ୍ଟା କ୍‌ର।
ମ୍‍ତର୍ ମୁଇ କାର୍ ସ୍‍ଙ୍ଗ୍‍ ଅବାର୍ ଲକ୍‌ମ୍‍ନ୍‌କେ ସ୍‍ମାନ୍ କ୍‍ରିନ୍? ସେମ୍‍ନ୍ ଆଟେ ବ୍‍ଜାରେ ବ୍‍ସିରେତା ସେ ହିଲାମ୍‍ନ୍‍କାର୍ ହର୍, ଜୁଇମ୍‌ନ୍ ଗଟେକ୍ ଜାଗାଇ କୁଦି କ୍ଉତି, ଅମିମ୍‍ନ୍ ତୁମାର୍ ଗିନେ ମରିବାଜା ବାଜାଇଲୁ ମ୍‍ତର୍ ତୁମିମ୍‍ନ୍ ନାଚି ନ୍‌କେଲାସ୍। ଅମିମ୍‍ନ୍ ଦୁକାର୍ ଗିତ୍ କଇଲୁ, ମ୍‍ତର୍ ତୁମିମ୍‍ନ୍ କାନ୍ଦି ନ୍‌କେରାସ୍।
କାଇତାକ୍ ଡୁବେନ୍ ଯୋହନ୍ ଆସିକ୍‍ରି ଅଣ୍ତା ସାଗ୍ ଆର୍ ଅଙ୍ଗୁର୍‌ ର୍‌ସ୍ ନ୍‍କାତି ରିଲା, ମ୍‍ତର୍ ସ୍‍ବୁ ଲକ୍‍ମ୍‍ନ୍ ତାକେ ବୁତ୍‌ଆତ୍ମା ଡ୍‍ସ୍‍ଲିଆଚେ ବ୍‌ଲି କ୍‌ଉତିରିଲାଇ। ମ୍‍ତର୍ ଜ୍‌ଡେବ୍‌ଳ୍ ମୁଇ ମାନାଇ ହିଲା ଆଇଲେ ଆର୍ କାମ୍‌ଲେ ଡୁକୁଲେ, ଆର୍ ଲକ୍‍ମ୍‍ନ୍ ମକେ କ୍ଉତି, ଦ୍‌କା, ଏ ଗଟେକ୍ କାଉରା ଆର୍ ମ୍‍ଦୁଆ ଲକ୍, ଆରେକ୍‌ ରିବ୍‍ନି ଆର୍ ପାପି ଲକ୍‍ମ୍‍ନ୍‍କାର୍ ସାଙ୍ଗ। ମ୍‍ତର୍ ଲକ୍‌ମ୍‌ନ୍‌କାର୍‌ ବୁଦି ଆର୍ ଗିଆନ୍ ତାକାର୍ କାମ୍‌କେ ଦ୍‍କି ଜାଣା ହ୍‌ଳେଦ୍।”


ସେଡେବ୍‍ଳ୍ ଜୁଇ ଜୁଇ ସ୍‌ହରେ ଯୀଶୁ ବେସି ଚମ୍‌ତ୍‍କାର୍ କାମ୍ କ୍‌ରିରିଲା, ସେ ସ୍‌ହ୍‌ରାର୍ ଲକ୍‍ମ୍‍ନ୍ ପାପେହ୍‌ଣି ମ୍‌ନ୍ ନ୍‍ବାଦ୍‍ଲାଇଲାର୍ ଦ୍‍କିକ୍‍ରି, ସେ ସ୍‍ବୁ ସ୍‌ହରାର୍‌ ଲକ୍‌ମ୍‍ନ୍‌କେ ଯୀଶୁ ଉଡି କ୍‍ରି କ୍‌ଲାଇ। ହାଇ, ଡ୍‌ଣ୍ଡ୍ ହାଉତା କ୍‍ରାଚିନ୍ ଆର୍ ବେଥ୍‍ସାଇଦା ସ୍‌ହରାର୍ ଲକ୍‍ମ୍‍ନ୍, କାଇତାକ୍ ତୁମାର୍ ବିତ୍‌ରେ ଜୁଇସ୍‌ବୁ ଚମ୍‌ତ୍‍କାର୍ କାମ୍‌ମ୍‌ନ୍‌କ୍‌ରି ଆତ୍‍ତି, ସେସ୍‍ବୁ ଯଦି ମୁଇ ସର୍ ଆର୍ ସୀଦନ୍ ସ୍‌ହରେ କ୍‍ରିରେତି, ତ୍‍ବେ ସେମ୍‍ନ୍ ବେସିଦିନ୍‌ ଆଗ୍‍ତୁ ବାସ୍‍ତା ହିନ୍ଦିକ୍‍ରି ଚାର୍ ଉହ୍‍ରେ ବ୍‍ସିକ୍‍ରି ତାକାର୍ ମ୍‌ନ୍‌କେ ବାଦ୍‍ଲାଉତି।
ସେତାକ୍ ମୁଇ ତୁମୁକ୍‌ମ୍‌ନ୍ କ୍‌ମ୍‌ଲେ, ତୁମାର୍ ବିଚାର୍‌ ଦିନେ ସର୍ ଆର୍ ସୀଦନ୍ ସ୍‌ହରାର୍ ଲକ୍‌ମ୍‌ନ୍‌କାର୍‌ ଡ୍‌ଣ୍ଡ୍ ତ୍‌ଇହ୍‌ଣି ଅଦିକ୍ ଡ୍‌ଣ୍ଡ୍ ତୁମୁକ୍ ମିଳେଦ୍।
ଆରେକ୍‌ ରେ କପର୍‍ନାହୁମ୍ ସ୍‌ହରାର୍‌ ଲକ୍‍ମ୍‍ନ୍, ତୁମି କାଇରି ସ୍‌ର୍‌ଗେ ହ୍‍ତେକ୍ ଜ୍‌ମ୍‌କେ ଚେଷ୍ଟା କ୍‍ରୁଲାସ୍? ନଇ, ଦ୍‌କା ଇଶ୍ୱର୍‌ ତୁମୁକେ ନ୍‌ର୍‌କେ ହିଙ୍ଗେଦ୍, କାଇତାକ୍ ତୁମାର୍ ବିତ୍‌ରେ ଜୁଇ ଚମ୍‌ତ୍‍କାର୍ କାମ୍ ମ୍‌ନ୍ ଅଇଲିଆଚେ, ସେ ସ୍‍ବୁ ଯଦି ସଦୋମର୍ ସ୍‍ହର୍‍ ବିତ୍‌ରେ ଅଇରିଲେକ୍, ସେ ସ୍‌ହରାର୍‌ ଲକ୍‍ମ୍‍ନ୍ ଆଜିହ୍‌ତେକ୍ ରେତି। ମ୍‍ତର୍ ମୁଇ ତୁମୁକ୍‌ମ୍‌ନ୍ କ୍‌ମ୍‌ଲେ, ତୁମାର୍ ବିଚାର୍‌ ଦିନେ ସଦୋମ୍ ସ୍‌ହରାର୍ ଲକ୍‌ମ୍‌ନ୍‌କାର୍‌ ଡ୍‌ଣ୍ଡ୍ ତ୍‌ଇହ୍‌ଣି ଅଦିକ୍ ଡ୍‌ଣ୍ଡ୍ ତୁମୁକ୍ ମିଳେଦ୍।


ସେଡେବ୍‍ଳ୍ ଯୀଶୁ ଉତର୍‍ଦିଲା, “ଏ ମର୍ ଉବା, ସ୍‌ର୍‌ଗ୍‌ ଆର୍ ହୁର୍‌ତିବିର୍ ମାପ୍‌ରୁ, ମୁଇ ତକେ ଦନ୍ୟବାଦ୍‌ ଦେମ୍‍ଲେ। କାଇତାକ୍ ତୁଇ ବୁଦିମାନ୍ ଆର୍ ଜାନ୍‍ତା ଲକ୍‍ମ୍‍ନ୍‍କାର୍ ତ୍ଇହ୍‍ଣି ଇ ସ୍‍ବୁକ୍‍ତା ଲୁକାଇକ୍‌ରି, କାଇରି ନ୍‌ଜାଣ୍‌ତା ଲକ୍‍ମ୍‍ନ୍‍କାର୍ ଲ୍‌ଗେ ଜାଣାଇଲିସ୍‌। ହେଁ ଉବା ଇରି ତର୍ ଆକିୟେ ସ୍‌ର୍‌ଦାର୍ ବିଷୟ୍ ଅଇଲି।। ମର୍ ଉବା ସ୍‌ରଗ୍ ଆର୍ ହୁର୍‌ତିବିର୍ ସ୍‌ବୁ ଅଦିକାର୍ ମ୍‌କେ ଦିଲାଆଚେ, ଉବାସି ତାର୍ ହଇସିକେ ବ୍‌ଲ୍‌କ୍‍ରି ଜାଣ୍‌ତି, ଆର୍ ଉବାସିକେ ତାର୍ ହଇସି ସେ ବ୍‌ଲ୍‌କ୍‍ରି ଜାଣେଦ୍, ଆର୍ ମୁଇ ମାନାଇ ହିଲା ଯାକେ ଉବାର୍ ବିଷୟ୍ ଜାଣାମ୍‍କେ ମ୍‌ନ୍ କ୍‌ରିନ୍ଦ୍, ସେ ହ୍‌କା ମର୍ ଉବାକେ ଜାଣେଦ୍।
ଏ କ୍‌ଷ୍ଟ କାମ୍‌କ୍‌ର୍‌ତା ଲକ୍ ଆର୍ ଚିନ୍‍ତାର୍ ବଜ୍‌ଲାଦି ଅଇରିଲା ଲକ୍‍ମ୍‍ନ୍ ସ୍‍ବୁ ମର୍‍ଲ୍‌ଗେ ଆଶା, ମୁଇ ତୁମୁକେ ଶାନ୍‌ତି ଦେଇନ୍ଦ୍। ମର୍ ଆଦେଶ୍‌କେ ମାନା, ଆରେକ୍‌, ମର୍‍ଲ୍‌ଗେହ୍‍ଣି ଶିକା, କାଇତାକ୍ ମୁଇ ଦ୍‌ର୍‌ମ୍ ଆର୍ ଶାନ୍‌ତିର୍ ଲକ୍, ଆରେକ୍‌ ତୁମିମ୍‍ନ୍ ନିଜାର୍ ନିଜାର୍ ଆତ୍ମାର୍ ଶାନ୍‌ତି ହାଉଆ। କାଇତାକ୍ ମର୍ ଶିକ୍ୟା ବ୍‍ଲ୍ ଆର୍ ମର୍ ଆଦେଶ୍ ମାନ୍‌ତାର୍‌ ବେସି ସ୍‌ହଜ୍‌।”

گوێگرتن لە ମାଥିଉ 11