Nouveau Testament en langue Gabri Maja du Tchad

Kɔl gɨ da Kumu gɨ Hɨrwa / Gabri Maja

Wɔlɛ gɨ pɨna wo̰, Jesu de kɨɗɨn̰ andaŋ doŋ duroy ƴaa gɨŋ, or sɔmɛ a gɨba kuray gɨ gumu taa taa gɨŋ. Ɨni na, dɨmdɨrdi kalaŋ ɨrgage dayge gusɨge gusi. Na toy di hɨn̰ wo̰ ma, ban nayi boy koburo gɨ gumu gɨŋ somɨn̰ nee. Bɨ ɗe dɨmdɨrdi kalaŋ le, ɨrege daa kɨbɨ kaŋ gaŋ. Bɨ ga ma ban ay kɨradi-kɔl dan̰ kondɨwayi arɨn̰ kɔl danage, ojɨn̰ cay te hɨnga kondɨ ye hɨn̰: «Wɔlɛ gɨ pɨna wo̰, ba-yage gɨ pɨna wo̰, andaŋ or yage gɨŋ kɨya gɨse. Kɨɗɨn̰ ga ban ɨre wɨje gasi gɨse na, gasi gɨse ga pɨna bugoŋ a te gɨyəŋ gɨ gay duroy yage gɨŋ. Bɨ cɨɗəŋ ɨrgage diige. Gasi-gɨse ga ɗaŋ bugoŋ a cay gɨsəŋ ga wan̰ dan̰ oru, gɨ gɨsəŋ kunda nee naŋ, kɔl gɨ kɨbɨna kɛ bɨ gasi gɨse le andaŋ kɨya gɨ gɨsəŋ kunda cay nee naŋ. Kɨɗɨn̰ ga tɨwa ɨrga ɨn ɗɨrɨj ɨni na, ul gasi gɨse ga andaŋ le lee gɨ hay kuyɔm coŋ, kɨya gɨ sarnayge ɗɨba dugo hen̰ naŋ. Gasi-gɨse ga ɗaŋ bugoŋge a duroy gɨsɨmn̰əŋ gɨŋ, lee gɨ gɨsɨmn̰əŋ malgɨ ƴee cayge. Ama gasi gɨse ga ɗaŋ bugoŋge a cay gɨsəŋ ga ɗari gaŋ, bɨ dor cayge: Cayge ga pɨna, cɨndɨge won̰ aru bɨ, cayge ga ɗaŋ cɨndɨge won̰ toyge-jii bɨ, ga ɗaŋ coŋ cɨndɨge won̰ toyge-sɨbɨ bɨ.» Kardi nee na, Jesu yege hɨn̰: «Ungo gɨ sɨmayi na wɨya nee na, kuɗa gɨ ban ɨrɨm cay kɔl gɨ ban ba je le.»


Ka-aye-cay-tɨbayi ɨrgage gusi bɨ, ɨngɨrige yege hɨn̰: «Kɨya wa ma mɨn̰ yen̰ kalaŋ kɔl na dan̰ kɨradi ga?» Ban dɨbɨge cay nee yege hɨn̰: «Kɨŋ-gandi na, Kumu bɨgɨŋ gɨyəŋ gɨ ni solɨn̰ hɨnga ga woy kɨɗɨn̰ wɔsɛdɨge gaŋ ga woy ojɨ cay dɔɔ-ƴaa di daa nii, ama kan ga kɛ le ban bɨge gɨyəŋ naŋ ƴee. Kɨɗɨn̰ ga ungo na ɨran̰ dan̰ hɨnga kobi na, Kumu kɨya bii kamdɨge cay nee jɨn̰ tumɔ tumɔ ɗe hɨnga-wɔɔdi kondɨ. Ama kɨɗɨn̰ ga ungo na ɨran̰ dan̰ hɨnga kobi naŋ na, Kumu kɨya dɔrɛ ga dḛ ga ban orɨn̰ le kobi cɔd coŋ. Na toy di hɨn̰ wo̰ ma, maŋ ay kɨradi-kɔl yen̰ kɔl danage. Kɨya wa kan solge hɨnga ga ɨŋ lee dan̰ cɨndɨge hage ama kan sɨlage duroy naŋ, kan jege kɔl gɨ ɨŋ ye dan̰ sɨmayige hage ama kan jage naŋ bɨ, sɨlage kɨradi naŋ bɨ. Ɗe kɔl gɨ ba-yɔɔ-kɔl-gɨ-Kumu-ba-yɔɔ Ijay ba ye or kɨɗɨn̰di gaŋ ojɨn̰ cayge, ban ye hɨn̰:
“Kɨŋ kɨya jɔɔ kuɗa dan̰ sɨmayigɨŋ hagɨŋ,
Ama kɨŋ kɨya sɔlɛ toyi naŋ.
Kɨŋ kɨya sɔlɛ kɨɗɨn̰ kuɗa dan̰ tɨdɨgɨŋ hagɨŋ,
Ama kɨŋ kɨya sɔlɛ-hɨnga pɨna nee naŋ.
Kɨya wa te wɔɔ gɨ da kalaŋ ga nee le, kuduroyge osu tɔgɨ.
Kan lɨgɨdege sɨmayige daa bɨ, lɨgɨdege cɨndɨge daa bɨ.
Ɗe gɨ cɨndɨge na sɨlan̰ kɨɗɨn̰ naŋ bɨ sɨmayige na jen̰ kɔl naŋ bɨ,
Ɗe kuduroyge na ɨrɨm kɔl pɨna naŋ bɨ,
Ɗe kan na da bɨlɨn̰ jɨgan̰ gusɨnɨ naŋ,
Ɨŋ na da poɗɨge.”
«Ama kɨŋ-gandi na tumoy wolwa woy kol caygɨŋ, kɨya gɨ cɨndɨgɨŋ sol kɨɗɨn̰ bɨ, sɨmayi gɨŋ je kɔl bɨ. Aŋ yəgɨŋ daa waŋ na cɨndi: Ka-yɔɔ-kɔl-gɨ-Kumu-ba-yɔɔ dan̰ kondɨwayge bɨ, kalaŋ ga gɨye-lɔɔdɨge or dan̰ durɔ ɗɨngar dan̰ kondɨwayge bɨ, geyge age na sol hɨnga ga kɨŋ ba sol kɛ le, ama kan sɨlage naŋ. Kan geyge age na je kɔl gɨ kɨŋ ba je kɛ le, ama kan jage naŋ bɨ.


«Jagɨŋ, aŋ dorgɨŋ te kɨradi-kɔl gɨ da ba-gɨse hɨnga le. Waŋ waŋ gɨ na ja kɔl gɨ ojɨ cay dɔɔ-ƴaa di daa nii ma na sɨla duroy naŋ na, Haban̰ Ba-lɔɔ ɨsɨna ɨrga boɗɨ hɨnga ga kan gɨsɨge ɗugoy le coŋ, na ban ma na gasi gɨse ga bugoŋ a te gɨyəŋ gɨ gay duroy yagegɨŋ le. Gasi-gɨse ga bugoŋ a cay gɨsəŋ ga wan̰ dan̰ oru le, gɨlɨn̰ na dan̰ kalaŋ ga jege kɔl gɨ da Kumu bɨ ƴeege kɨlaw dan̰ gusi-mɔwa. Ama kɔl gɨ da Kumu le bɨga sarnay kuduroyge naŋ, kɔl gɨ kan ƴeege le kan ɨrge cay nee kardɨge sɨngɨɗɨ naŋ. Kɨɗɨn̰ ga hɨnga ga ni dɔsɛ-ɗugɔ na andaŋ cayge, naŋ le, kan na gɨlge-cɨn̰ kɨya cay kɔl gɨ da Kumu na, kan dɨbɨge aye kudurɔ koge coŋ. Gasi-gɨse ga bugoŋ duroy gɨsɨmn̰əŋ gaŋ le, na kalaŋ ga jege kɔl gɨ da Kumu, ama ɨrɨme a cay hɨnga ga cay gɨsəŋ gaŋ bɨ, kurɔŋdi wɔɔ gursu bɨ ƴee cay kɔl gɨ nee le coŋ. Lee gɨ andaŋ hɨnga bɨge naŋ. Gasi-gɨse ga bugoŋ a cay gɨsəŋ ga ɗari gaŋ le, na kalaŋ ga jege kɔl gɨ da Kumu kuɗa bɨ, solge toyi bɨ. Lee gɨ cɨndɨge andaŋ. Kan ga pɨna, cɨndɨge won̰ aru bɨ, cayge ga ɗaŋ cɨndɨge won̰ toyge-jii bɨ, ga ɗaŋ coŋ cɨndɨge won̰ toyge-sɨbɨ bɨ.»

Jesu ay kɨradi-kɔl gɨ ɗaŋ yen̰ kɔl danage ye hɨn̰: «Dɔɔ-ƴaa di daa nii le, woy gɨlɨn̰ na hɨn̰ ungo gɨ gɨsɨ gasi gɨse kayi ga kuɗa duroy yage koyi gɨŋ wo̰. Ama duroy son̰do di pɨna dɨŋ wo̰ kɨɗɨn̰ ga kalaŋ woyge kuŋ ɨni na, ba-baadi ɨrga gɨsɨ cɨn̰-tɨngɨrɨn̰ duroy yage ga ni gɛmɛ gaŋ bɔb bɨ, ɗe gusi orɨn̰. Kɨɗɨn̰ ga gɛmɛ le say bɨ dor cayge ɨni na, kan solge tɨngɨrɨn̰ duroy nee. Marɨne ka-gɨye ɨrgage gusi ba-gulɔŋ ba-yage le bɨ, ɨngɨrige ye hɨn̰: “Ba-gulɔŋ, kɛ ji gɨsɨ na gasi gɨse ga kuɗa duroy yage kon̰ gɨŋ naŋ ga? Tɨngɨrɨn̰ di kɛ le sayga na ani ga?” Ban dɨbɨge cay nee yege hɨn̰: “Na ba-baa gɨ pɨna wo̰ ba-lɔɔ hɨnga ga nee le.” Marɨne ka-gɨye le ɨngɨriige yeyige hɨn̰: “Kɛ, ji gey gɨ ni ɨra tɔrɛ tɨngɨrɨn̰ le coŋ ga?” Ban dɨbɨge cay nee yege hɨn̰: “Kɨŋ ɨsɨbe naŋ, kɨya wa kɨŋ na tɨra tɨngɨrɨn̰ le coŋ na, gajanaŋ kɨŋ da tɔrɛ gɛmɛ coŋ bɨ. Ɗagɨŋ tɨngɨrɨn̰ le ɗe woy duroy gɛmɛ gɨŋ, ɗe malgɨge pɨna bɨrɨŋ gɨsɨn̰ wɔlɛ gɨ ni walɨn̰ cay gasa. Wɔlɛdi gɨ nee le, ɨŋ kɨya yon̰ ka-wale gasa yoge hɨn̰: Cay wase na tɨragɨŋ tɨngɨrɨn̰ saɗɨdagɨŋ dan̰ gabedo gabedo agɨŋ uloo coŋ. Ama gɛmɛ na dayagɨŋ daa duroy tugulu tɨnge dɨŋ.”»


Jesu dorge kɨradi-kɔl gɨ ɗaŋ ye hɨn̰: «Dɔɔ-ƴaa di daa nii woy gɨlɨn̰ na hɨn̰ cɨn̰-mutardɨ gɨ ungo ay gɨsɨ duroy yage koyi gɨŋ wo̰ Cɨn̰-mutardɨ le dḛ dḛ ɗɨn̰ cɨn̰ gasi gɨse nɔm, ama kɨɗɨn̰ ga na saa bɨ malga na, gumu ɗɨn̰ hɨya ga ni kabɨn̰ kɨlɨn̰ ga ɗaŋ nɔm. Ban bɨle hɨya lee gɨ cɨɗəŋ ga daa ɨrgage leege ƴaadɨge kobɨn̰ii gaŋ.»


Jesu yege kɨradi-kɔl gɨ ɗaŋ coŋ hɨn̰: «Dɔɔ-ƴaa di daa ni le, woy gɨlɨn̰ na hɨn̰ subugu di tama ay bee duroy kɨrbaŋdi gɛmɛ gɨŋ, gɨ hal ɓal kɔl wongɨsɨn̰ daa. Lee gɨ kɨrbaŋ gɨ wongɨsi le sodɨ nɔm.»


Jesu gɨlɨn̰ dɨmdɨrdi kalaŋ hɨnga ga nee le nɔm, na dan̰ kɨradɨge. Bɨ gɨ ban dɨle yɔɔ dan̰ kɨradɨge unɔ. Ban lee hɨnga hɨn̰ wo̰ na gɨ, ɗe gɨ kɔl gɨ da ba-yɔɔ-kɔl-gɨ-Kumu-ba-yɔɔ gɨ kɛ le na or kɨɗɨn̰di gaŋ:
«Ɨŋ kɨya haŋge kɨbɨnɨ yon̰ kɔl danage na dan̰ kɨradi-kɔl.
Hɨnga ga kan wosɨ cayge ayɨn̰ toy gɨ ɗen̰ge gɨɗɨgɨ-Kumu dan̰ cay gɨsəŋ le,
Ɨŋ kɨya tɔgɛ bɛrnɛ cay nee.»

Jesu say ɗe dɨmdɨrdi kalaŋ bɨ jogɨn̰ ƴen̰. Ɨni na, ka-aye-cay-tɨbayi orge kardi bɨ ɨngɨriige yege hɨn̰: «Dɨrani te kɨradi-kɔl gɨ da tɨngɨrɨn̰ di andaŋ duroy yagegɨŋ le ani je.» Ban dɨbɨge cay nee yege hɨn̰: «Ungo gɨ ba-gɨse gasi-gɨse ga kuɗa na, na ɨŋ-bandi Kurɨn̰-ungo. Yage le, na kalaŋ ga cay gɨsəŋ gaŋ. Gasi-gɨse ga kuɗa le, na kalaŋ ga a boy dɔɔ-ƴaa di daa nii dɨŋ. Tɨngɨrɨn̰ le, na kalaŋ ga da Haban̰, Ba-lɔɔ ɨsɨna. Ba-baa gɨ ba-gɨse tɨngɨrɨn̰ le, na Haban̰. Wɔlɛ gɨ ni walɨn̰ cay gasa le, na kagadi wɔlɛ. Bɨ ka-wale cay gasa le, na ka-ƴɔbɛ ga daa nii bɨ. Hɨn̰ gɨ kan ba sarɨn̰ge tɨngɨrɨn̰ kɨya ule le, hɨnga ga ba kɨya lɔɔ gusɨge a kagadi wɔlɛ gɨŋ le, kɨya wɔyɛ na hɨn̰ wo̰ bɨ. Kurɨn̰-ungo kɨya gɨye ka-ƴɔbɛ kayi ga daa nii, ɗe na torge hɨnga nɔm ga lee gɨ kalaŋ laydaŋge boy ɨsɨna gɨŋ bɨ, kɨya tɔrɛ ka-lɔɔ ɨsɨna nɔm boy dɔɔ-ƴaa toyi dɨŋ coŋ bɨ, kɨya bogɨge duroy tɨwa di ƴee tɔgɨ dɨŋ bɨ. Kɨɗɨn̰ ga nee le, kan kɨya ɨle bɨ, lɔydɛge gasɨndɨge kɛɗɛɗɛ kɛɗɛɗɛ bɨ. Ama kalaŋ ga dan̰ durɔ ɗɨngar na, gusɨge kɨya ƴɔɔdɔ tɨwa jə̰ jə̰ hɨn̰ tɨwa di daa wo̰ boy dɔɔ-ƴaa di da Bayge dɨŋ. Ungo gɨ sɨmayi na wɨya nee na, kuɗa gɨ ban ɨrɨm cay kɔl gɨ ban ba je le.

«Dɔɔ-ƴaa di daa nii le, woy gɨlɨn̰ na hɨn̰ kandi-wɔɔ ga kɨledɨge osu tɔgɨ ga wɔsɨge duroy yagegɨŋ wo̰. Ungo gɨ na andaŋ cay nee na, ay orɨn̰ wɔsɛ tumɔ. Gusi moyi tɔgɨ lee gɨ or kɨle kandi-wɔɔdi nɔm coŋ bɨ, jɨgan̰ kɨlɨn̰ yage le.

«Dɔɔ-ƴaa di daa nii woy gɨlɨn̰ na hɨn̰ ungo gɨ ba-lɔɔ gɨyaw gɨ mal mon̰ gɨ lee marɨna tɔgɨ. Kɨɗɨn̰ ga ban na wa pɨna gɨ kɨledi osu tɔgɨ na, ban or kɨle hɨnga ga ban orɨn̰ nɔm coŋ bɨ, kɨlɨn̰ mon̰ gɨ nee le.

«Dɔɔ-ƴaa di daa nii, woy gɨlɨn̰ na hɨn̰ bura di ka-ure gusa, dɨbɨge duroy kuray gɨ gumu taa taa gɨŋ, ƴomɨn̰ge te gusa nɔm ga woy duroy kaŋ gaŋ wo̰. Kɨɗɨn̰ ga gusa na wanɨn̰a duroy bura na, ka-ure gusa sɨrge orɨn̰ kɨbɨ kuray gɨŋ. Kan somge dugo kɨbɨ kuray gɨŋ bɨndɨge, ga ɗadɨraŋ beege duroy gɔy gɨŋ bɨ, beege ga ɨsɨndəŋ coŋ bɨ. Kɨya wɔyɛ na hɨn̰ wo̰ kagadi wɔlɛ gɨŋ bɨ. Ka-ƴɔbɛ ga daa kɨya ɨrgage kɨya dɔrɛge ti kalaŋ ga ɨsɨndəŋ coŋ duroy kalaŋ ga dan̰ durɔ ɗɨngar, kɨya bogɨge duroy tɨwa di ƴee tɔgɨ dɨŋ. Kalaŋ kɨya ɨlege bɨ lɔydɛge gasɨndɨge kɛɗɛɗɛ kɛɗɛɗɛ bɨ kɨɗɨn̰ ga nee gaŋ le.»

Jesu ɨngɨrge yege hɨn̰: «Kɛ kɨŋ sol duroy kɔl gɨ nee le nɔm hagɨŋ bɨ ga?» Ɨni na, kan dɨbiige cay nee yeyige hɨn̰: «Əw.» Kɨɗɨn̰di ga nee gaŋ le, Jesu yege hɨn̰: «Naa hɨn̰ wo̰ na, waŋ waŋ gɨ ba-gɨlɨn̰ kalaŋ gasɨn̰-kɔl gɨ da Moyis, ma na bɨl ba-gɨle hɨnga ga ojɨ cay dɔɔ-ƴaa di daa nii na, ban woy gɨlɨn̰ na hɨn̰ ba-gulɔŋ di ƴaa di gumu wo̰. Ban ɓal gɨ ni dɔrɛ a duroy hɨnga wɔɔdi gaŋ le, hɨnga ga hɨrɨwa bɨ, ga ɨlgi bɨ.»


Kɨradi-kɔl gɨ Jesu dor le, kɨɗɨn̰ ga ban dorge nɔm coŋ ɨni na, ban say ɗe kɨɗɨn̰ ga nee le orɨn̰ tumɔ. Ban bugoŋ a cay ƴaadi dɨŋ ɨni na, ban gɨlɨn̰ kalaŋ hɨnga a duroy ƴaa-daye-di-da-Jubɨn̰əŋ. Ban gɨlge hɨnga ga dor turnoyge, lee gɨ kan yege hɨn̰: «Kɛ cɨn̰-muɗɔlɛ gɨ kɛ le, ban saygan̰ na a ani ga? Kɛ ban lee belin̰əŋ ga kɛ le, na mɨna ga? Kɛ na ban ma na kurɨn̰ ba-lɔɔ gɨye sɨya le naŋ ga? Kɛ ƴoyi gusɔndɔ na Mari naŋ ga? Kɛ Jag bɨ, Jɨsɛb bɨ, Simo bɨ, Jud bɨ, na karmii naŋ ga? Kɛ karmii ga kandɨ nɔm wɨyage duroyni kɛ naŋ ga? Kɛ hɨnga ga kɛ le nɔm ban saygan̰ na ani ga?» Jesu woy gɨlɨn̰ na hɨn̰ gundi sɨya gɨ de tɨbayge wo̰. Ɨni na, Jesu yege hɨn̰: «Ba-yɔɔ-kɔl-gɨ-Kumu-ba-yɔɔ le, na a cay ƴaadi dɨŋ ƴɔbɨ bɨ, na a te wandɨ toyi dɨŋ ƴɔbɨ bɨ, ma kalaŋ kɨya dibiige hurɔmɔ cay naŋ.» Lee gɨ Jesu ɓala lɔɔ beli kondɨwa a nee naŋ, kɨya wa aye kudurɔ koge wɨyge.

گوێگرتن لە Matɨyo 13