 If you would like a copy of this version please contact info@davaraudiobibles.org

Text: Noiri New Testament, CC-BY-SA-4.0, The Love Fellowship. Audio: Noiri New Testament, CC-BY-SA-4.0, Davar Partners International, The Love Fellowship, 2023

Noiri New Testament

Noiri (नोयरी) Bible by The Love Fellowship is licensed under Creative Commons Attribution-ShareAlike 4.0 License.

पोन येशु जैतून डोगाआ पोओं गोयु. फासाडी वेगरयुज येशु मंदिरोम गोल्यो अने त्याजागे आखे मांहे तियाआ जागे आव्ये अने तो बोहित तियाहा संदेश आपुहू लाग्यू. तेहलाम यहुदी धोर्मी शास्त्री अने परुसी मांहे व्यभिचार गुनाह्गारोमे होमला बुईही तियाअ जागापो घेऊन आव्ये अने तीही माअहाआ आगाडी उभे कोल्यु, येशुहू कोयु, ओ येशु, ए बुई व्यभिचार अतांवाही तोअन्याम आवयी होय. मोशेए नियमशास्त्राम आमाहा आज्ञा आपलो आवयी होय का एहलो बोंई डोनो माअये जोवे ओमे कोआ, तुमाआ नाहाकोत कोईओलो होय? (ओ येशुहू ओलखीला कोअता ते तियाहा विचारोम ओते याकोअता तियाहा एहेलू नखरा मिलूहु वारू का जीयाद्वारे तियाआ विरूध लागाडता आवे) तेहलाम येशु निसे टूगुवोलीत आपाआ आंगठीवाही धरतीपो लिखेहू लाग्यू. काहाके ते विचारोम रोल्या त्याकोता येशु उबु रोला अने तियाहा कोयु, तुमामेरोत जे पापी ने ओय तिये पालील्यो यीपो डोणो माईलु. अने तो फासी टूगुवोलीत धरतीपो लिखेहू लाग्यू. जाहा माहु ओ होमल्यु तेहलाम आखाम पेल्लू डायु मांहे फासाडी फासी एक-एक कोईत त्याजागेरोत निहित गोये अने ह्याप्रमाणे तीही येशु एखल्यू उबु रोला अने येशुउ आगाडी ती बुई उबी ओती. येशु उबु रोला अने तियाअ बोंई कोयु, “ओ बुई, ते आखे कोठे गोये नाहाकोत ताहु कोडु दोषी ठेरव्यो नाहा?” बुई गोगल्यी, नाहा, महोदय, कोडूच नाहा येशु कोयु, आय पण ताहु दंड आपित नाहा जा, ओमे फासी पाप कोहू नाहा.

त्याजागे उपफासाडी स्थित माहुंहु येशु कोयु, आय जगाआ प्रकाश होय जो कोडु माफासाडी आवे तो आंदाराम रोही नाहा, अने तियाहा तियाअ उजवोडाआ प्राप्ती उवे जो जीवोन आपोहो. यापो परुसी तियाहा कोयु, तू आपाआ साक्षी स्वताच आपित होय त्याकोता ताआ साक्षी योग्य नाहा उत्तरामे येशु तियाहा कोयु, जर आय आपाआ साक्षी स्वताच आपित होय तेबी पण माआ साक्षी योग्य होय काहाके माहु मालूमे होय आय कोरात आवयू होय अने कोहे जात होय परंतु तुमु माहु उलखित्लू नाहा का आय कोरात आवयू होय अने कोठे जात होय. तुमु डीलो नियमोहो न्याय कोअता आय कोडाआ न्याय कोईत नाहा. पण जर आय न्याय कोहू तेबी पण माआ न्याय खोरू रोही काहाके आय एखल्यू नाहा परंतु परम बाह्हू जीआ माहु मोक्ल्यीत होय तो अने आय मिलून न्याय कोअता. तुमाआ नियमांमे लेखिलो होय का बेन माहुऊ साक्षी ए न्याय कोतली आय आपाआ साक्षी स्वता कोत्लू अने परम बाह्हू जीआ माहु मोक्ल्यीत होय, मापोरोत तो साक्षी आपोहो. यापो माहु तियाहा कोयु, ताआ बाह्हू कोठे होय? येशु उत्तर आप्लु, नाहा तुमु माहु ओलखीत अने नाहा तुमु माआ बाह्हाहा ओलखीत जर तुमु माहु ओलख ओते ताहा माआ बाह्हाहा पण ओलख ओते. येशु मंदिरामे हिकाडतो ओतु तेहलाम भेट वस्तूविषयी तो बोलतुल्यो ओतु पण कोडु तियाहा तोअल्यो नाहा काहाके फासी तिया वेल आवयू ने ओतू.

येशु तियाहा फासी कोयु, “आय निहित जानारू अने तुमु माआ होद मुडोपो परंतु तुमु स्वताच्याच पापुमे मोअनारू अने जीही आय जात होय तीइही तुमु आवहू शकत नाहा.” यहुदी अधिका फासाडी री कोडु लागाडीत, “नाहाकोत तुमु विचार कोअता का तो आत्महत्या कोअनारू होय? काहाके तिये कोयु होय का तुमु तियाअ जागापो आवहू शकत नाहा ज्याजीजागे आय जात होय?” त्यापो येशु तियाहा कोयु, तुमु निसाऱ्ये होय आय उसेरोत आव्यो होय तुमु संसाराआ होय अने आय आव जगाआ नाहा. याकोअता आय तुमामे कोयु ओते का तुमु स्वताआज पापाहाम मोअनारू जर तुमु विश्वास कोईत नाहा का आय तो होय तुमु आपाआ पापाहाम मांअहा. तिये येशुहू फासाडी फ़ुस्ल्याआ, तू कोडू होय? येशु उत्तर आप्लु आय तोज होय जो का पेलेरोत तुमामे कोयु आवयू होय. तुमामे कोइला अने तुमाआ न्याय कोईलाकाजे मा आहने जाखो किबी होय परंतु खोरो ओच होय जीआ माहु मोक्ल्यीत होय त्यापोरोत जे जगत होमल्यु होय तोज आय कोअत्लू. ते ओ ओलखुहू सेकेले नाहा का येशु तियाहा परम बाह्हू विषयी कोयु होय येशु फासाडी कोयु, जाहा तुमु माअहा पोऱ्याहा उचो मुडोपो तेहलाम तुमु ओलखीही का आय तोज होय आय मापोरोत किबी कोईत नाहा ताहा आय जे किबी कोयु होय ते ओच होय काजे माहु माआ परम बाह्हाही हिकाड्ये होय. अने जीआ माहु मोक्ल्यीत होय तो माआरी होय, तिये माहु एखुल्योज सोडये नाहा काहाके कायम आय तोज कोअत्लू जे तियाहा गोमतो. येशु जांहा ओ कोयु ओतु तेहलाम जास्तीज माहु तियापो विश्वास मेकिलो.

येशु तियाअ यहुदी अधिकाऱ्यांना कोयु जे तियापो विश्वास कोईत ओते, जे तुमु माआ संदेशाप्रमाणे सालनारू ताहा खोरोज माआ शिष्य उवे. अने खोरो नाहाकोत होय ते ओलखीही अने खोरो तुमामे मुक्त कोअही. यापो तिये येशुहू प्रश्न कोअयु, “आमाहा अब्राहमोओ वंशज होये, आमाहा कोडाआ दास रोयोजे नाहीत ताहा तुमु केहलो केते का तुमु मुक्त उवे.” येशु तियाहा उत्तर आपित कोयु, आय तुमामे खोरो-खोरो कोत्लू हरएकजो पाप कोअत्लू तो पापाहा दास होय. अने कोडु दास कायम परिवारा आरी रोत नाहा फक्त सुउज रोहू शकतो. जर पोऱ्या तुमामे मुक्त कोईत होय तोयोंज तुमु खोरो मुक्त उवे. माहु मालुम होय का तुमु आब्राहमोओ वंशज होय आवहू तुमु माहु मोयईला प्रयत्न कोईत होय काहाके माआ संदेशाकोअता तुमाआ अंतकरणाआ किबी जागू नाहा. आय तोज कोअत्लू जे माहु बाह्हाही देखाडीलाआ होय अने तुमु तोज कोअता जे तुमु तुमाआ बाह्हाद्वारे होमल्यु होय. यापो तिये येशुहू उत्तर आप्लु, आमाआ बाह्हू आब्राहम होय तेहलाम येशु तियाहा कोयु, तुमु जर अब्राहमोओ पोऱ्ये रोल्या ओते ताहा तुमु तोज काम कोल्यु ओते जे अब्राहम कोल्यु ओते. पोन तुमु ताहा ओमे माहु म्हणजे एहलो माहुंहु जो तुमामे तियाअ सत्याहा कोयु होय जे तिये परमेश्वारापोरोत होमल्यु होय तियाहा तुमु माआहि इच्छिता अब्राहम ताहा एहलो कोल्यु निमिले. तुमु आपाआ बाह्हाआ काम कोईत होय, फासाडी तिये येशुहू कोयु, आमाहा व्यभिचाराआ सहायाने जन्मूला आवयू नाहा आमाआ फक्त एकुच बाह्हू होय तो परमेश्वर होय. येशु तियाहा उत्तर आप्लु, जर परमेश्वर तुमाआ बाह्हू ओतलू ताहा तुमु मापो प्रेम कोल्यु ओते काहाके आय परमेश्वारापोरोत आवयू होय अने ओमे आय इंही होय आय इंही स्वताहून आवयू नाहा परंतु तिये माहु मोक्ल्यीत होय. आय जे तुमामे कोयु होय ते तुमु काहा होमलित नाहा? ह्याआ काहाके ओच होय का तुमु माआ संदेश होमलित नाहा. तुमु आपाआ बाह्हू शैतानाआ पोऱ्ये होय अने तुमु आपाआ बाह्हा इच्छेवही सालन्याआ प्रयत्न कोईत होय तो सुरवातीरोत खुनी होय अने तिये वाटेए बाजू केधी लेदि नाहा काहाके तीयाम खोराआ दाणुजा नाहाजांहा तो खोटो गोगत्लू तेहलाम तो सहज भावनावाही गोगीत रोतो काहाके तो ठोग होय अने आखे खोटाहा जोल्मो आपोहो. काहाके आय खोरो कोयु होय तुमु मापो विश्वास कोईत नाहा. तुमामेरयू कोडू एहेलू होय तो मापो पापी ओईला दाग देखाडहु शकतो? जर आय खोरो कोयु होय ताहा तुमु मापो काहा विश्वास कोईत नाहा? जो माहहू परमेश्वरोओ होय, परमेश्वरोओ वचनांमे मानत्लू तियाआ कारनोवाही तुमु माआ होम्लाडित नाहा का तुमु परमेश्वरोओ नाहा.

उत्तर आपित यहुदी तियाहा कोयु, “ओ कोआ का आमाहा खोरो ने ओतू, तू सामरी होय अने तुमामे एखादी दुष्टात्मा वास कोल्यु होय?” येशु उत्तर आप्लु, “मामेहे कोडूबी दुष्टात्मा नाहा, परंतु आयताहा माआ बाह्हा आदर कोअत्लू अने तुमु माआ अपमान कोईत होय.” आय आपाआ महिमा कोईत नाहा परंतु एक एहेलू होय जो माआ महिमा कोहू इच्छितो अने न्याय पण कोअत्लू. आय तुमामे खोरो कोत्लू जर कोडु माआ संदेशाला ग्रहण कोअत्लू ताहा तो मृत्यु हु अनंतकाल जाआ नि पाले. यापो यहुदी अधिकारावाही तियाहा कोयु, ओमे आमाहा ओलख होय का तांआम कोडु दुष्टात्मा लेतजा वास कोअयी होय इहिंजा का आब्राहम अने संदेष्टे माईत गोये अने तू कोयो होय जर कोडु माआ संदेशाप्रमाणे जातले ताहा तियाआ मरण अनंतकाल जाआ नि उवे. खरोज तू आमाआ आब्राहम ह्यापेक्षा वोडू नाहा जो मरण पाव्यू अने संदेष्टे पण मोल्यापो तू नाहाकोत विचार कोअत्लू? तू नाहाकोत होय? येशु उत्तर आप्लु, जर आय माआ महिमा कोअयी ताहा ती महिमा किबी नाहा, जो माहु महिमा आपोहो तो माआ परम बाह्हू होय त्याविषयी तुमु आखा आगाडी कोआ का तो आमाआ परमेश्वर होय. तुमु तियाहा केधी ओलख नाहा परंतु आय तियाहा ओलखीत्लू जर आय एहलो कोहू का आय तियाहा उलखित्लू नाहा ताहा आय पण तुमा होस ठोग ठराविलो काहाके आय तियाहा हाजा रीतीवाही ओलखीत्लू अने तो जे कोत्लू तियाआ आय पालीत कोअत्लू. तुमाआ आगाडी आब्राहम ओ ओलखीत का तो याआ दिह्याहा पालनारू तेहलाम आय आविलो आनंदावाही पोईत गोल्यो ओतु तिये तियाहा पालील्यो अने प्रसन्न ओवयू. फासाडी यहुदी अधिकार्यांवाही तियाहा कोयु, तू ओमे पन्नास सालाआ पण नाहा अने तू आब्राहमोहो पालीत लेधलो? येशु यापो तियाहा कोयु, आय तुमामे खोरोज कोत्लू, अब्राहमो पेल्योओ त्यापोरोत आय होय. यापो तिये येशुहू देउलाकोअता वोड़े-वोड़े डोणो विसित परंतु येशु गुप्तपणे मंदिरामरोत निहित गोल्यो.

گوێگرتن لە युहन्ना 8