Text: © The Bible Society of Zambia, 2003 Audio: ℗ 2012 Hosanna

Lunda - 2003 Edition (Drama - NT)

The Holy Bible in Lunda Ndembu © United Bible Societies, 2003. 

Kulondela hayumiyi, Yesu hakwenda muŊaliliya; walekeli kwenda muYudeya muloŋa aYudeya akeŋeli kumujaha.
Henohu chawija chawaYudeya chamuyisolu chashika dehi kwakwihi.
Dichi anakwindi hiyakumwila nawu, Fumaku kunu, yaŋa kweyi muYudeya kulonda atumbanji tweyi niwena akamoni nyidimu yeyi yiwelaŋa.
Muntu wakeŋa kutiyakana, helilaŋa yuma kumbaduku. Neyi eyi welaŋa yumiyi, kadimwekeshi eyi aweni kudi antu.
Muloŋa hela anakwindi niwena hiyamukuhweleleluku.
Dichi Yesu hakuyila nindi, Mpinji yami kanda yishiki; hakwila enu mpinji jejima jenu hohu.
Antu ampata yamunu mwishina hiyanatweshi kuyihela enuku; hakwila ami anhelaŋa, muloŋa yami nayishimunaŋa nami nyidimu yawu yatama.
Enu kwenu yenu kuchawija, ami kwami kukanduka kuchawijichi kanda, muloŋa mpinji yami kanda yishiki chikupu.
Chanayilejiyi yumiyi hakushakama tuhu muŊaliliya.
Chanakandukuwu anakwindi kuchawija, niyena nawa hakuya kwenoku; hayili hatookaku, ilaŋa chakumbadi hohu.
Dichi aYudeya hiyakumukeŋakeŋa kuchawija, nawu, Wudi kudihi?
Hamazaza awantu hadiŋi kumunyinyita nankashi; amu nawu, Himuntu muwahi; amakwawu nawu, Nehi, wudi nakuluwisha antu.
Hela chochu, hikwadiŋi muntu wamuteneni hatookaku, nawoma wawaYudeya.

Chihanashiki hakachi kachawija, Yesu hakukanduka ayi muTembeli nakutaŋisha.
Dichi aYudeya hiyakuhayama nawu, Muntu iwu neluki ŋahi kutaŋa chakadi kudiza?
Dichi Yesu hakuyakula nindi, Ntaŋishilu yami hiyamami awenuku, yambala yanona wantemesheli.
Neyi kudi muntu nakeŋi kwila mwaya muchima windi, wakeluka ntaŋishilu iyi, neyi yinafumi kudi Nzambi, hela neyi nahoshi chakumuchima wamami aweni.
Wáhoshaŋa chakumuchima windi yomweni, diyi walondaŋa kudilemesha yomwenindi; ilaŋa iwu wakeŋaŋa kulemesha wámutemesheli, diyi walala, mudi yena himwekala kuheŋaku.
Mosi wayinkeli nshimbi, ilaŋa hikwekala mwinenu wahembaŋa nshimbuku. Mudi nakukeŋa kunjahiladi?
Izaza hidikumwakula nawu, Eyi wudi nandemoni. Anakeŋi kukujaha kudinyi?
Yesu hakuyakula nindi, Nela mudimu wumu, himukuhayama wejima wenu.
Dichi chayinkeliyi Mosi kwalama; hichafumini kudi Mosuku, chafumini kudi ankakulula; mwalamishaŋa antu haSabata.
Neyi muntu amwalamisha haSabata kulonda nshimbi yaMosi abuli kuyimotoka, indi enu muzuwaŋa nanami nanichi chinakoleshi muntu chikupu haSabata?
Bayi musompeshaŋa chakumesuku, chiŋa musompeshaŋa kusompesha kwaloŋa.

Dichi antu akuYerusalema amakwawu hiyakwila nawu, Hidiyi adi nakukeŋa kujahawuku, tahindi?
Iwu wukuhosha hatooka iwu; izu nidimu dakumwilawu kwosi. Anyuuli aneluki dehi chalala nawu diyi Kristu, tahindi?
Hakwila etu tuneluki kwafumayi iwu iyala. Chamba kenzayi Kristu hikwakekala muntu wakeluka kwakufumayuku.
Dichi Yesu hakubidika muTembeli, iku wudi nakutaŋisha, nindi, Mwaŋiluka, mweluka nikunafumini. Ami hinadinjila ami awenuku, ilaŋa yena wantemesheli diyi walala, himwamwilukaku.
Ami namwiluka, muloŋa diku kunafumini, yena diyi wantemesheli.
Dichi hiyakukeŋa kumukwata, ilaŋa hikwadiŋi muntu wakumwolwela chikasaku, muloŋa henohu mpinji yindi kanda yishiki.
Ilaŋa antu amavulu amwizaza hiyakumukuhwelela, nawu, Chakenzayi Kristu, wakela yinjikijilu yakubadika yaneliyi iwu iyala, tahindi?
AFwarisewu hiyakutiya mwadiŋi nakumunyinyita izaza. Akulumpi jawatupristu niaFwarisewu atemesha nianhembi amukwati.
Dichi Yesu hakwila nindi, Nichidi nanenu mafuku antesha, hinakaya kudi yena wantemesheli.
Mwakankeŋakeŋa, kunwana nehi; iku kunakekalami, himwakatwesha kushika kwoku.
AYudeya hiyakuhosha mukachi kawu, nawu, Iyaliwu keŋa ayi kudihi kutukubula kumuwana? Wukuya kudi aYudeya amakwawu apalaŋena dehi mukachi kawaGriki nakutaŋisha aGriki, tahindi?
Idi izu danahoshiyi dakwila nindi, Mwakankeŋakeŋa, kunwana nehi; iku kunakekalami, himwakatwesha kushika kwoku; daya mudihi?
Hefuku dakukuminina, dodifuku dalemena chawija, Yesu hakwimana nakubidika, nindi, Neyi kudi muntu natiyi mpwila, enzi kudami anwi.
Muntu wukunkuhwelela, mumuchima windi mukufumaŋa tuloŋa twamenji akweti wumi, mwomunahoshi mukanda wajila.
Chahosheliyi ochu wateneni Spiritu, akukeŋa kutambulawu antu akumukuhwelela; henohu Spiritu wuchidi kanda enzi, muloŋa Yesu wuchidi kanda amulemeshi.
Amakwawu amwizaza chatiyiluwu mazu owu hiyakwila nawu, Chalala diyi owu kaprofwetu.
Amakwawu nawu, Diyi Kristu. Ilaŋa amakwawu nawu, Aka! Kristu afumi muŊaliliya, tahindi?
Mukanda wajila wunahoshi nawu, Kristu wukufuma kumutaŋa waDavidi, nikuBetelemi, kumukala kwadiŋiyi Davidi.
Izaza dambuka nihansaŋu yindi.
Amakwawu akeŋeli nawu amukwati; ilaŋa hikwadiŋi muntu wakumwolwela makasaku.

Anhembi hiyakufunta kudi akulumpi jawatupristu nawaFwarisewu; wena hiyakuyihula nawu, Munabulilidi kumuleta?
Anhembi hiyakwakula nawu, Hikudi muntu wahoshahu dehi neyi iwuku.
Kuchinka aFwarisewu nawu, Ninenu nawa anayidimbi dehi, tahindi?
Kunamwekani nyuuli wumu hela kaFwarisewu namukuhweleli, tahindi?
Ilaŋa antu awa amavulu anabuli kwiluka nshimbi ashiŋewa.
Nikodemu, owu wenjili dehi kudi Yesu, wadiŋi mwinawu niyena,
hakuyila nindi, Nshimbi yetu yasompeshaŋa muntu chakadi kusambila kutiya mwakuhoshayi yomweni, hela kwiluka mwakwilayi, tahindi?
Wena hiyakumwakula nawu, Komana nineyi nawa wumuntu wakuŊaliliya, tahindi? Talatalaku munyikanda yajila, wiluki kuŊaliliya hikwafumaŋa kaprofwetuku.
[Ayili wejima wawu, iwu kwitala dindi, iwu kwitala dindi.

گوێگرتن لە Yowanu 7