ओसेम् येसुचे सुङ्‌ज्‍यी, “होसीयार् तउ, एङ्‍यीमाचे म्‍हीमाकी ङोन्‍री र्‌हङ्‍त धर्‌मी ङोन्‍बे लक् थस्‍य्‍हेङो। अय्‍हीन् पङ्‌सम् स्‍वर्‌गरी स्‍य्‍हुबे पर्‌मेस्‍वर् अप ग्‍यम्‍से एङ्‍यीमाचे तइ बक्‍सीसएनो यङ्‍स्‍ये अरे।
“होत्‍तज्‍यीम्, एङ्‍यीमाचे तोःबलमात पीन्‍बे बेलोरी कपटीमाचे पीन्‍ब र्‌हङ्‌ले ङोन्‍ज्‍यीम् थपीनो। तलेपङ्‍सम् थेङ्‍यीमाचे म्‍हीमाचे थेङ्‌यीमात तोप्‍खइ बी यहुदीमा र्‌हुप् तबे दीम्‍मातेङ् ग्‍यम्‍मारी पीन्‍ब स्‍य्‍हेङ्‌ब। देमेन्‍नो ङ एङ्‌यीमात पङ्‍ब, थेङ्‍यीमाचे यङ्‍थोस्‍येकी बक्सीस् यङ्‍ज्‍यीन्‍बल मुब। तर एचे पीन्‍बे बेलोरी एइ केत् याचे ता स्‍य्‍हेङ्‍टीब हुजु ल्‍होम् याचे अस्‍येखइ। होत्‍तज्‍यीम् खोसोक्‍ले पीनो ओसेम् खोसोक्‍ले पीन्‍बल स्‍हीबे पर्‌मेस्‍वर् अपचे एत बक्सीस् न्‍हङ्‌जेत्स्‍ये मुब।


“एङ्‍यीमाचे प्रार्‌थना स्‍य्‍हेङ्‌बे बेलोरी कपटीमाचे र्‌हङ्‌ले थस्‍य्‍हेङो। तलेपङ्‍सम् थेङ्‍यीमा म्‍हीमाचे म्रङ्‌खइ बी यहुदीमा र्‌हुब् तबे दीम्‍मातेङ् ग्‍यम्‍की चोःतेङ् गुमारी रप्‍ज्‍यीम् प्रार्‌थना स्‍य्‍हेङ्‌बरी तङ्‍ब। देमेन्‍नो ङ एङ्‌यीमात पङ्‍ब, थेङ्‍यीमाचे यङ्‍थोस्‍येकी बक्सीस् यङ्‍ज्‍यीन्‍बल मुब। तर एचे प्रार्‌थना स्‍य्‍हेङ्‌बे बेलोरी र्‌हङ्‌की कोठ न्‍हङ् वङ्‌ज्‍यीम् म्रप् दुङो ओसेम् अम्रङ्‍नले स्‍य्‍हुबे पर्‌मेस्‍वर् अपत प्रार्‌थना स्‍य्‍हेङो। ओसेम् एचे र्‌होचे अम्रङ्‍नले स्‍य्‍हेङ्‌बे लक् स्‍हीबे अपचे एत बक्सीस् न्‍हङ्‌स्‍ये मुब।”
“ओसेम् प्रार्‌थना स्‍य्‍हेङ्‌बतेङ् यहुदी अय्‍हीन्‍बे म्‍हीमाचे र्‌हङ्‌ले अतोबे य्‍हक्‍को छीःमा तेत्‍ज्‍यीम् थस्‍य्‍हेङो। तलेपङ्‍सम् थेङ्‍यीमाचे र्‌हीङ्‌बे प्रार्‌थना स्‍य्‍हेङ्‌ज्‍यी पङ्‌सम् ख्‍लचे थ्‍येःब बी म्‍हेन्‍ब। होत्‍तज्‍यीम् एङ्‍यीमा थेङ्‍यीमा र्‌हङ्‌ब थतउ। तलेपङ्‍सम् एङ्‌यीमात ता-ता तोब हुजु एङ्‍यीमाचे पर्‌मेस्‍वर् अपत र्‌हीत्‍प बीम ङोन्‍ग्‍यम्‍नो थेङ्‌चे खेम्‍जेत्‍प। एङ्‍यीमाचेम् चोले प्रार्‌थना स्‍य्‍हेङो-
‘स्‍वर्‌गरी स्‍य्‍हुजेत्‍पे ङ्‍यीमाकी पर्‌मेस्‍वर् अप,
थेङ्‌की छेन् पबीत्र तखइ।
थेङ्‌की य्‍हुल् खखइ,
थेङ्‌की थुः स्‍वर्‌गरी खतेब मुब, होतेब चु जम्‍बुलीङ्‌री टोप् तखइ।
तीङ्‌यी ङ्‍यीमात दीनइलनो तोबे चब थुङ्‍ब न्‍हङ्‍जेतो।
ओसेम् ङ्‌यीमाचे स्‍य्‍हेङ्‌बे पापमात क्षमा स्‍य्‍हेङ्‌जेतो,
खले ङ्‍यीमाचेएनो ङ्‌यीमाइ बीरुद्‍दरी पाप स्‍य्‍हेङ्‍बलमात क्षमा पीन्‍बल मुब।
ङ्‍यीमात परीक्षरी दोःन थलजेतो,
तर ङ्‍यीमात सैतान् ग्‍यम्‍से जोगइतीजेतो।
[तलेपङ्‍सम् य्‍हुल्‍तेङ् सक्‍ती ओसेम् महीमा खेम पङ्‌लेनो थेङ्‍लनो य्‍हीन्‍ब, आमेन्।’]
“एङ्‍यीमाचे एङ्‌यीमाकी बीरुद्‍दरी पाप स्‍य्‍हेङ्‍बलमात क्षमा पीन्‍ज्‍यी पङ्‌सम् स्‍वर्‌गरी स्‍य्‍हुबे पर्‌मेस्‍वर् अपचेएनो एङ्‌यीमात क्षमा न्‍हङ्‌स्‍ये मुब। तर एङ्‍यीमाचे ल्‍हो-ल्‍हो म्‍हीमाकी पाप क्षमा अस्‍य्‍हेङ्‌ज्‍यी पङ्‌सम् पर्‌मेस्‍वर् अपचेएनो एङ्‌यीमात क्षमा न्‍हङ्‌स्‍ये अरे।

“एङ्‌यीमा ङ्‌यीम्‍बु टीबे बेलोरी कपटीमाचे र्‌हङ्‌ले छेर्‌बे लीः थोज्‍यीम् थटीउ। तलेपङ्‍सम् कपटीमाचे म्‍हीमात र्‌हङ् ङ्‌यीम्‍बु टीबल ङोन्‍बे लागीरी लीः म्‍हुन्‍दुङ् लज्‍यीम् टीब। देमेन्‍नो ङ एङ्‌यीमात पङ्‍ब, थेङ्‍यीमाचे यङ्‌थोबे बक्सीस् यङ्‍ज्‍यीन्‍बल मुब। तर ए ङ्‌यीम्‍बु टीबे बेलोरीम् र्‌हङ्‌की क्ररी छ्‍युगु स्‍य्‍हुतो, ओसेम् ली ख्रुज्‍यीम् टीउ। ओसेम् ए ङ्‌यीम्‍बु टीबल म्‍हीमाचे म्रङ्‌स्‍ये अरे, तर अम्रङ्‌नले स्‍य्‍हुबे पर्‌मेस्‍वर् अपचेकीनो म्रङ्‍जेत्‍स्‍ये मुब, ओसेम् एत बक्सीस् न्‍हङ्‌जेत्स्‍ये मुब।


“र्‌हङ्‌की लागीरी जम्‍बुलीङ्‌री सम्‍पती र्‌हुब्‍ज्‍यीम् थेन्‍बे सेम् थलउ। चु जम्‍बुलीङ्‌री सोःबे सम्‍पतीमा बुलुङ्तेङ् चेःजे चब, ओसेम् य्‍होमा वङ्‌ज्‍यीम् य्‍होलब। तर र्‌हङ्‌की लागीरी स्‍वर्‌गरी सम्‍पतीमा र्‌हुब् लउ। हुजुरी बुलुङ्तेङ् चेःजे अच, ओसेम् य्‍होचेएनो वङ्‌ज्‍यीम् य्‍हो अल। तलेपङ्‍सम् खन एइ सम्‍पती तब, हुजुरी एइ सेम्‍एनो तब।
“एइ मीः ल्‍हीकी बत्‍ती य्‍हीन्‍ब। एइ मीः ज्‍यब मुसम्, एइ ल्‍ही ल्‍हुङ्‍बनो य्‍हल् तस्‍ये मुब। तर एइ मीः अछ्‍यर्‌बल मुसम् एइ ल्‍ही ल्‍हुङ्‍बनो म्‍हुन्‍दुङ् तस्‍ये मुब। ओसेम् एतेङ् मुबे य्‍हल् म्‍हुन्‍दुङ् तज्‍यी पङ्‌सम्, हुजु म्‍हुन्‍दुङ् झेन् गत्‍ते य्‍हक्‍को म्‍हुन्‍दुङ् तल!
“खल्‍चेएनो न्‍याबो ङ्‌य्‍हीकी स्‍य्‍हप्‍तो स्‍य्‍हेङ्‌ब अखम्। थेचे गीःत खोस्‍ये मुब, ओसेम् गीःबत अखोस्‍ये मुब। ओसेम् गीःचे पङ्‍बे तम् ङ्‍येन्‍स्‍ये मुब, गीःबचे पङ्‍बे तम्‍मी अङ्‍येन्‍स्‍ये मुब। होलेनो एङ्‌यीमाचेएनो पर्‌मेस्‍वर्‌तेङ् टङइ स्‍य्‍हप्‍तो स्‍य्‍हेङ्‌ब अखम्।


“होत्‍तज्‍यीम् ङ एङ्‌यीमात पङ्‍ब, र्‌हङ्‌की ल्‍हीकी लागीरी ता चल, ता थुङ्‍ल ओसेम् ता येन्‍ल पङ्‍ज्‍यीम् थछेरो। तलेपङ्‍सम् चब थुङ्‌बतेङ् येन्‍बे येन् बीमम् म्‍हीइ जीवन ङ्‍हच्‍छ्‍यङ् अय्‍हीनो स्‍यीम्? मुरी फ्‍यङ्‍बे ङ्‍यम्‍ङ्‍यमात च्‍यागो। थेङ्‍यीमाचे ब्‍लु अब्‍लुत् ओसेम् अन्‍न दुत्‍ज्‍यीम् बर्‌मा जुःज्‍यीमएनो अथेन्। होलेतलेनो एङ्‌यीमाकी स्‍वर्‌गरी मुबे अपचे थेङ्‌यीमात ख्‍वाजेत्‍प। एङ्‍यीमा हुजु ङ्‍यम्‍ङ्‍यमा बीमम् य्‍हक्‍को सेइल अय्‍हीनो स्‍यीम्? एङ्‍यीमान्‍हङ्‌री खल्‍चे पङ्‌लेनो छेर्‌ज्‍यीम् र्‌हङ्‌की छे चेक्‍प जाकी पङ्‌लेनो र्‌हीङनलब खम्‍ब स्‍यीम्?
“ओसेम् येन्‍बे येन्‍की लागीरी एङ्‍यीमा तले छेर्‌ब? सरी सर्‌बे लीली म्‍हेन्‍दोमात च्‍यागो, थेङ्‍यीमा खले छर्‌ब। थेङ्‍यीमाचे तइ लक्‍एनो अस्‍य्‍हेङ् ओसेम् येनेनो अरा। तर ङ एङ्‌यीमात पङ्‍ब, सोलोमन ग्‍यल्‍बो थेइ जम्‍म स्‍य्‍हेसमा यङ्‌ज्‍यीम् ज्‍यबे गोइल येन्‍लेनो म्‍हेन्‍दोमा न्‍हङ्‌री गीः गदेएनो ज्‍यब अरेबल मुबल। तीङ्‌यी सर्‌ज्‍यीम् न्‍हम्‍स्‍य्‍होनो मेन्‍हङ् ख्‍लास्‍येकी म्रातेङ् म्‍हेन्‍दोत पर्‌मेस्‍वर्‌चे चोले छ्‍येःपीन्‍जेत्‍प पङ्‌सम् झेन् एङ्‌यीमात य्‍हक्‍को थेङ्‌चे न्‍हङ्अजेत्‍ल स्‍यीम्? खइ एङ्‌यीमाकी बीस्‍वास्?
“होत्‍तज्‍यीम् ‘ता चल, ता थुङ्‌ल ओसेम् ता येन्‍ल?’ पङ्‍ज्‍यीम् थछेरो। पर्‌मेस्‍वर्‌त अस्‍येःबे म्‍हीमाचे चोतेबे स्‍य्‍हेमा म्‍हइज्‍यीम् छेर्‌ब। ओसेम् एङ्‌यीमात तोःबे जम्‍मा स्‍य्‍हेमा स्‍वर्‌गरी मुबे एङ्‌यीमाकी पर्‌मेस्‍वर् अपचे खेम्‍जेत्‍प। तर ङोन्‍ग्‍यम् थेङ्‌की य्‍हुल्‍तेङ् धार्‌मीक्‍ता म्‍हयो, ओसेम् चु जम्‍मा स्‍य्‍हेमा एङ्‌यीमात न्‍हङ्‌जेत्स्‍ये मुब। होत्‍तज्‍यीम् न्‍हम्‍स्‍य्‍होइ लागीरी थछेरो। न्‍हम्‍स्‍य्‍होइ लागीरी न्‍हम्‍स्‍य्‍होइ दुखनो योस्‍ये मुब। तीङ्‍यीइ लागीरी तीङ्‍यीइ दुखनो योबल मुबल।”

گوێگرتن لە मत्‍ती 6