Migaama, Centre - WBT - NT non Drama

Migaama, Centre - WBT - NT Drama

Laalanco Yawudigeyyo ta mappayi bala muɗugu maa gu kolaaca goo Pak katta paaɗe. Guu taattuweeco soƴoowee ku saɗikaŋgeyyo o aalimnigee ku Kitamniti Muusa deyeɗɗo botol maa gu deeɗiya Iisa, guu ɓayaɗɗo soopa giimi ku maani.
Gaa Seetanne sekelkiliyya Yudas maa gu kolaa goo Iskariyot. Gata pa ay kaƴi min oko jobookeetee Iisa ku orro o seera. Gaa kaatiɗe ga deeɗe beneyya ma taattuweeco soƴoowee ku saɗikaŋgeyyo o ma taattuweeco taraakeetee girti Mellayi baŋ ga beraayooga gaa me Iisa. Gii deeɗiyo daanayo ta tirta, guu leeɗiyee goo gu beree gurus. Gaa Yudas oyyiɗe. Gaa diiliɗe paaɗe ga deyeɗɗo wikinne ma wagee ku maa ga biriyyooga Iisa, innasoopa ga unco giimo ɗa.


Gii meene asiɗe, maa gu lewɗica laalane ta mappayi bala muɗugu, wikinne maa gu saɗakayɗo ma tamee oko tiyaw ta laalane ta Pakti. Gaa Iisa n̰aamiɗiy ini Piyer ma giiti Yaaya gaa: «Aɗoŋ ku deeɗineeca hassila tiyaw ta laalane ta Pakti.» Guu inniyya goo: «Ki aŋka ni deeɗineeca hassila taŋaa?» Gaa Iisa tiiliyyoo gaa: «Wikinne maa kuu on̰aa daaɓantoŋ geegarri, ku wagaa ma gimu kaƴi aɗe ma goyee kuɗige ka ammo. Jobboŋga namma ya ger maa ga un̰n̰iɗo. Kuu deeɗine beneyya oko milti giiri kuu: “Garaawatine gaa ki gaaraniiga daŋaye maa ga asicca tee tiyaw ta laalane ta Pakti ma jobookeetee.” Gaa gaarittoŋ daŋaye kaƴi aɗe baramta ma gekee kayaati giiti maa gu lawwi alɗo saa hassilenta, ay iŋaa appe ku deeɗineeca lee tiyaw ta laalane ta Pakti.» Maa gu kaatiɗe, guu gassiyya paratti aleŋ maa ga Iisa beneyyiyyoo. Guu leeɗica tiyaw ta laalane ta Pakti.


Gaa maa ga wikinne ka tiyaawi tammiyɗe, gaa Iisa asiɗe nunta ma n̰amaakeetee gu tewɗo. Gaa beneyyiyyoo gaa: «Na aŋke ta tirta na teeɗo ma kuŋ tiyaw ta laalane ta Pakti omma min maa na alɗe deegeyya ɗa missa. Na beneyyatoŋ ƴa: A gata pa naata, akka tee ɗa payya tiyaw ta Pakti namma gu garrarriti paracco asiɗo butulco aattí mulunniti Mellayi.» Gaa icciɗe kuraaka ta mirmi ku mor̰mor̰oskeyyo. Gaa logiyya Mella gaa leeɗiyee barkinti, gaa biriyyooca oko jobookeetee gaa beneyyiyyoo gaa: «Iccoŋca kuraaka teete kuu orricca parattoŋ. Na beneyyatoŋ, min meente na ar̰aa ɗa payya ta kaw mirmi ku mor̰mor̰oskeyyo namma gi mulunniti Mellayi asiɗo asa.»
Gaa icciɗe mappa, gaa leeɗiyee barkinti oko Mellayi, gaa erriyya, gaa biriyyooga oko jobookeetee. Gaa maa ga biriyyooga, ga beneyyiyoo gaa: «Keeke ay ziitu ma birenta oko kuŋ. Leewoŋga keeke ku maa ku moyowɗino!» Gaa maa gu teeɗe, gaa iccicca kulla kuraaka, gaa leeɗiyee barkinti oko Mellayi aleŋ ta mappayyi tee aɗe. Gaa beneyyiyyoo gaa: «Kuraaka teete pa garaa liŋganti Mellayi ta marawta maa ga onne ma kuŋ ma baartaw ma akka n̰aala oko kuŋ. Elloŋ ƴa! Gimu ma beraano picco giimi ma aŋkino ɗa ay gata appe keeke aaye iŋee ga tewɗo ma naa! Ma seene, ga Runti Gimi pa gu akkiya dee aleŋ maa ga Mella caɗee. Raɗɗee soopa oko gimu kaaka ma beraa.» Guu jobookeetee diiliɗe gu enewɗo aacco goo: «Ay we pe min aattine ma leewa liyaw keeke?»

Guu jobookeetee Iisa meeliɗe ta tirta ku maa gu ibiniyya baŋ ga ay we min aacco ma ay ka tatta ƴiila. Gaa Iisa pa beneyyiyyoo gaa: «Salaataŋgee ma hekemeyyiy giimi ku kiɗaayeeco o taattuwee daare ma hekemeyyiy aŋka gu giimi kolowɗiy goo gu giimi ma leewa samaane. A kuŋ soopa aɗoŋ leewa ɗa goŋŋa! Ga ka tatta ƴiila min aattoŋ, lee aleŋ kuu ga ka rootta ƴiila o ma hekemeyye kulla, ga lee aleŋ kuu ga lubaaka ka. A gata pa, gimu ma nowotte ga tewɗo o ma beraa tiyaw ay ŋawwa ma tatta ƴiila? Ay ma teewa ɗa aɗe e? A naa soopa aaye aattoŋ, aleŋ gimu ma lobokkatoŋ ka. Kuŋ pa nunte talta meeni paracco ma naata wikinne maa gu cokoɗɗino. Ay ɗakko appe na berewɗitoŋca mulunne oko kuŋ aleŋ maa ga Tattu biriyyawca. Kuu asiɗo nunta ku tewɗo o ku ar̰awɗo ma naa wikirtu ka tiyaawi aattí mulunnitu, o ku akka nunta wereeriyee ku mulunniti. Kuu asiɗiy hikimiya balleeco giimi ku Isirayel ku orro o seera.»


Gaa Iisa beneyyiyyee oko Simo Piyer gaa: «Simo, Simo, giyyu ƴa! Seetanne inne ga Mella oyyiye ku maa ga yaagittoŋ aleŋ korƴo maa gu dayakka, guu jagicca susuma min korƴo. Naa soopa lollikiyam Mella ku maa gi amannicum alɗo masila ɗa. Wikinne maa kii ase yooka sariptu pa, ki beneyyayo oko seneecam beneyyiŋgee ma beraayo gudirane ku maa gi amannico oko naa deeɗo talta.» Gaa Simo Piyer tiiliyyee oko Iisa gaa: «Miltu, na oyee caŋ gu bakammano kulla daŋayi ma kii o caŋ gu deewano kulla ma kii.» Gaa Iisa beneyyiyyee gaa: «Piyer, na beneyyam ƴa, meente keeke aɗe, kadar ga kokkor bookiɗo ki melaa subbatiŋ kii ki ibinno ɗa.»

Gaa Iisa beneyyiyyoo oko jobookeetee gaa: «Maa na n̰aamittoŋ kee bala gurus o bala karaatalgee o bala n̰uura, ga maatiki koyyitoŋ e?» Guu tiiliyyee goo: «Ya maatiki ma koyyini lekka ɗa.» Gaa beneyyiyyoo gaa: «A haŋka soopa ga maa gaa lekka gurus ga icciya, o maa gaa lekka kurtalle kulla ga iccica, o maa gaa lekka ɗa seepane ga giɗikikii kaɗiyyiti gaa giɗiɗo. A gita pa, Kitamniti Mellayi beneyye gee: “Gata gu gemmiya ma giimi ma leewa ka miɗɗa.” Na beneyyatoŋ ƴa: Beneyyi keeke pa, aŋka ga asiyyaw butulti oko naa. Ma seene pa, gu gaari ku kitipiyenta ma gaartaw paracco asaa butulco.» Guu jobookeetee beneyyiyyee goo: «Miltini, kooko aɗe ay seepigee seera.» Gaa tiiliyyoo gaa: «Kooko kulla maani appe.»


Maa gu teeɗica tiyaw ta laalane ta Pakti, gaa Iisa oomiɗe min ger kaaka. Gaa katawɗo ma jobookeetee dambu ka olibiyeyyi aleŋ ta heeta tee aɗe. Guu jobookeetee joboɗɗiya. Gaa maa ga sarɗe were kaaka, gaa beneyyiyyoo gaa: «Enewwoŋga Mella ku maa ku alɗo gala ɗa sekelkilati.» Gaa saapiɗe min saripco. Saapiti taata pa deewa aleŋ were maa ga dambu galɗo kii uwwiya. Gaa darsiɗe ga enewɗiya Mella gaa: «Baaba, kii aŋka, ki saapawca maaƴi kuraaka ta diiganti teete. Innasoopa gi addo dee ɗa ma aŋko tanni, gi dee soo ma aŋko tancum.» Gaa malaykat beeriɗe min samaani, gaa oomiyyee. Gaa beneyyiyyee beneyyiŋgee ma beree gudirane. Gaa Iisa zorontiyɗe ta tirta, gaa enewɗo payya ta ƴiila Mella. Gii tinniti deeɗe aleŋ baara, gii saɗaɗɗo tec tec kiɗaati. Maa ga inniɗe goŋŋa, gaa waciɗe ga asiɗe wikirco jobookeetee. Gaa asiɗiy gassa guu oƴee, asan gu zorontiyenta pile. Gaa beneyyiyyoo gaa: «Ayme ku oƴowɗo? Wacoŋ ku inniɗo Mella ku maa ku alɗo gala ɗa sekelkilati.»


Iisa ƴa beneyya missa, guu giimi maani asiɗe. Yudas pa ma ay kaƴi min oko jobookeetee Iisa ku orro o seera omokkiko. Gaa saapiyyee katta oko Iisa ku maa ga googiyya aleŋ lanjinti. Gaa Iisa pa beneyyiyyee gaa: «Yudas, ay ma googo ta lanjiguwwi appe ki biriyya Runti Gimi picco giimi ma aŋkiya ɗa e?» Maa gu jobookeetee Iisa elliɗiy gaari kotti ma deewa, guu inniyya goo: «Miltini, ni tammiy giimi kooko ma seepigeetini e?» Gaa kaƴi min oko jobookeetee Iisa uppiyya lubaakati tattuwco oko taattuweeco soƴoowee ku saɗikaŋgeyyo, ga reepiyyeeca diiti ta tiyaawa. Gaa Iisa soopa beneyyiyyoo gaa: «Duwoŋ appe, keeke ku aɗoŋga lee ɗa.» Gaa eesiyyeeca diiti gimu kaaka, ga rayyidiyya. Gaa beneyyiyyoo oko taattuweeco soƴoowee ku saɗikaŋgeyyo o oko taattuweeco taraakee ku girti Mellayi o oko ajaawaŋgeeco Yawudigeyyo kotti ma asee baamiti gaa: «Ku ase baamitu ma seepigee o ma gombolli aleŋ kuu na ay mariŋ ma onokka bottolli! Kulla meene, na aaye ma kuŋ doorane ta girti Mellayi, kuu alɗino baama ɗa. Keeke soopa ay wikinnitoŋ oko kuŋ o ga wikinniti kulla oko Seetanni, gata ma hekemeyye aatti namtuwwi.»


Guu baamiyya Iisa, guu kaatikkiki girti tattuwco oko taattuweeco soƴoowee ku saɗikaŋgeyyo. Piyer pa, jobokka min arro ka. Guu zegewɗe okko cigigi ɗaɗɗakiti doorane ta giiri. Gaa Piyer kulla deeɗe nunta kiɗaati ma giimi kotti ma kadarrica okko gu ƴerewɗo. Gii lubaaká kaƴi elliyya Piyer maa ga nowoɗɗe saripti okkati. Gaa ma cembiro ta okkati taata, gi neeɗiya samaane, gii beneyyiɗe gee: «Gimu keeke kulla ay gimti Iisa aɗe.» Gaa Piyer soopa meeliɗe gaa: «Daate na ibinya ɗa gimu kaaka.» Gaa wikinne paalta, ga gimu kaƴi payya elliyya, gaa beneyyiyyee gaa: «Kii kulla ay kaƴi aɗe min oko gimtee Iisa.» Gaa Piyer pa tiiliyyee gaa: «Kaw, naa ay gimti ɗa.» Gaa maa gu nuntiɗe latta ka saha kaƴi omma, gaa kaƴi payya kuddiyiyyee gaa: «Ay ma tirta saa ga gimu keeke aaye ma gata, asan ga ay ka kiɗa ta Galilee.» Gaa Piyer tiiliyyee gaa: «Miiɗi, naa ibinya ɗa beneycum kaaka maa ki beneyya.» Gaa oko wikinne kaaka saa maa ga Piyer beneyɗo missa, ga kokkor bookiɗe. Gaa Miltine kee Iisa jigiriyya Piyer, gaa elelɗiya ƴoy. Gaa Piyer mooyiyya beneyti Miltine kee Iisa maa ga beneyyiyee gaa: «Meente keeke aɗe, kadar ga kokkor bookiɗo, ki melaa subbatiŋ kii ki ibinno ɗa.» Gaa Piyer oomiɗe min iŋaa o ga erecca ta tirta.


Guu giimi ma nowottiyee oko Iisa gu elelɗiya noƴoɗɗe gaari o gu tamannaa. Guu taggiyyeega wigisanti, guu enewɗiya goo: «Gaa ay ma seene aɗe goŋŋa ki ay nabiinice, ki gaaraniiga ƴa gimu ma kondissum!» Guu n̰eleɗɗiya ma beneyyiŋgee maani daare.


Maa ga were walɗe, guu ajaawaŋgeeco Yawudigeyyo o taattuweeco soƴoowee ku saɗikaŋgeyyo o aalimnigee ku Kitamniti Muusa timmiɗe. Guu kaatikkiki Iisa wikirco taattuweeco ku parlanti. Guu inniyya goo: «Kii ay Masi, gata maa ga Mella aparre, ki beneyyani ƴa!» Gaa Iisa pa tiiliyyoo gaa: «Naa beneyyitoŋ kulla, ku amanna ɗa ta kaw oko beneytu, o naa enaatoŋ, ku telaanaw ɗa ta kaw. A min haŋka soopa ga Runti Gimi nowotta tiyaawati Mella Miltí gudiranti.» Guu beneyyiyyee paracco goo: «Caŋgiɗoŋ ki ay Runti Mellayi e?» Gaa Iisa tiiliyyoo gaa: «Ay kunta saa ma beneyyiya ma beneetoŋ kuu na ay Runti Mellayi.» Ay kaaka appe gu beneyyiɗe goo: «Kee saa pe giyyiya beneyyi min biiti, ke aŋka ɗa payya suyuudigee.»

گوێگرتن لە Lik 22