If you have would like a copy of this version please contact info@davarpartners.org

Kulvi New Testament, CC-BY-SA-4.0, The Love Fellowship (Text) Kulvi New Testament Audio Bible, CC-BY-SA-4.0, Davar Partners International, 2022 (Audio)

Kulvi New Testament

This work is licensed under Creative Commons Attribution-ShareAlike 4.0 License.

शुरुआती न वचन ती, होर वचन परमेश्वरा सैंघै ती, होर वचन परमेश्वर ती। ऐ शुरुआती न परमेश्वरा सैंघै ती। सारी सृष्टि तेई रै ज़रियै पैदा हुई, होर ज़ो किछ़ पैदा हुआ सा, तिन्हां न कोई भी चीज़ा तेइरै बगैर पैदा नैंई हुई। तेईन ज़िन्दगी ती होर सौ ज़िन्दगी मांहणु रा प्याशा ती। प्याशा निहारै न च़मका सा; होर निहारै सौ ग्रहण नी केरू ऑथि।
एक मांहणु परमेश्वरै री धिरै न एज़िया खड़ा हुआ, ज़ुणिरा नाँ यूहन्ना ती। सौ मांहणु बै प्याशै री गुआही देणै री तैंईंयैं आऊ ती, ताकि सैभ मांहणु तेइरा सन्देश शुणिया बशाह आंणलै। यूहन्ना आपु ता प्याशा नी ऑथि, तैबै भी सौ लोका बै तेई प्याशै री गुआही देणै री तैंईंयैं आऊ ती।
सच़ा प्याशा ज़ो हर एक मांहणु बै प्याशा केरा सा, दुनिया न ऐणु आल़ा ती। सौ दुनिया न ती होर, दुनिया तेई रै ज़रियै पैदा हुई, होर दुनिया रै लोकै सौ नैंई पछ़ियाणु, कि सौ कुण ती। सौ आपणै लोका (यहूदी) मौंझ़ै बै आऊ होर तिन्हैं आपणै लोकै सौ नैंई अपनाऊ। पर ज़ेतरै सौ अपनाऊ, होर बशाह केरू, तेइयै तिन्हां बै परमेश्वरै री औलाद होंणै रा अधिकार धिना, मतलब तिन्हां बै ज़ुण तेइरै नाँ पैंधै बशाह डाहा सी। ते न ता लोहू सैंघै, न शरीरा री इच्छा सैंघै, न मांहणु री इच्छा सैंघै, पर परमेश्वरा न पैदा हुऐ सी।
होर बचनै एक मांहणु रा रूप लेऊ होर अनुग्रह होर सच़ाई न पूरै होईया आसरै बिच़ा न रौहै, होर आसै तिन्हरी ऐण्ढी महिमा हेरी, ज़ैण्ढी बापू रै एकलौते बेटै री महिमा।
यूहन्नै यीशु रै बारै न गुआही धिनी, होर जौरे सैंघै बोलू, “ऐ सौऐ सा, ज़ुणिरै बारै न मैं दसु ती, ज़ो मूँ न बाद ऐन्दा लागा सा, सौ मूँ न बड़ा सा किबैकि सौ मूँ न पैहलै ती।” किबैकि तिन्हरा ज़ो अनुग्रह सा आसै सैभियै पाऊ सा मतलब आशीषा पैंधै आशीष। किबैकि बिधान ता मूसै रै ज़रियै धिनु सा, पर अनुग्रह होर सच़ाई यीशु मसीह रै ज़रियै पूजी। परमेश्वर कोइयै कैधी भी नैंई हेरू, एकलौता बेटा ज़ो सच़िऐ परमेश्वर सा, होर तेइरै सैभी न नेड़ सा, तेइयै आसाबै रिहाऊ कि परमेश्वर कैण्ढा सा।

यूहन्ना री गुआही ऐ सा, कि ज़ैबै यहूदी नेतै यरूश्लेम शैहरा न पुरोहित होर लेवी तिन्हां न ऐ पुछ़णै री तैंईंयैं भेज़ै, “तू कुण सा?” तैबै तिन्हैं ऐ मनू कि होर नाँह नैंई केरू, पर मनू कि, “हांऊँ मसीह नी ऑथि।”
तैबै तिन्हैं यूहन्ना न पुछ़ु,
“तैबै तू कुण सा? कि तू एलिय्याह सा?”
तेइयै बोलू, “हांऊँ नी ऑथि।”
“ता कि तू सौ भविष्यवाणी केरनु आल़ा सा?”
तेइयै ज़वाब धिना, “नैंई।”
तैबै तिन्हैं यूहन्ना न पुछ़ु, “तैबै तू कुण सा? तैबै आसै आपणै भेजणु आल़ै ज़वाब देई सकलै, कि तू आपणै बारै न कि बोला सा?”
यूहन्नै बोलू, “ज़ैण्ढा यशायाह भविष्यवाणी केरनु आल़ै बोलू ती, ‘सुनसान ज़ैगा न एक मांहणु री हाक्क शुणदी लागी सा कि, प्रभु रा स्वागत केरनै री तैंईंयैं आपणै आपा बै त्यार केरा।’ ”
ते किछ़ फरीसियै रै धिरै न भेज़ेंदै ती। तिन्हैं यूहन्ना न ऐ सवाल पुछ़ु, “तू न ता मसीह ऑथि, होर न एलिय्याह, होर न सौ भविष्यवाणी केरनु आल़ा, ता तैबै बपतिस्मा किबै देआ सा?”
यूहन्नै तिन्हां बै ज़वाब धिना, “हांऊँ ता पाणी लाईया बपतिस्मा देआ सा पर तुसरै बीच़ा न एक मांहणु खड़ा सा, ज़ुणिबै तुसै नैंई ज़ाणदै। मतलब मूँ न बाद ऐणु आल़ा सा, जौसरै बूटै रै तस्मै हांऊँ खोलणै रै लायक नैंई ऑथि।”
ऐ गैला यरदन नौई न पारै बैतनिय्याह नगरा न हुई, ज़ौखै यूहन्ना लोका बै बपतिस्मा देआ ती।

दुज़ै रोज़ यूहन्नै प्रभु यीशु आपु धिरै ऐन्दा हेरिया बोलू, “हेरा ऐ परमेश्वरा रा गौभु (मेम्णु) सा, ज़ो दुनिया रा पाप च़किया नेया सा। ऐ सौऐ सा ज़ुणिरै बारै न मैं बोलू ती; एक मांहणु मूँ न पिछ़ै ऐणा सा, ज़ो मूँ न भी बड़ा सा, किबैकि सौ मूँ न पैहलै ती। हांऊँ ता तिन्हां बै नैंई ती पछ़ियाणदा, कि सौ मसीहा ती, पर तैबै हांऊँ पाणी न बपतिस्मा देंदेआ आऊ, कि सौ इस्राएला पैंधै जाहिर होला।”
होर यूहन्नै ऐ गुआही धिनी, “मैं आत्मा कबूतरै रै रूपा स्वर्गा न उतरदा हेरू सा, होर सौ तेई पैंधै बेठा। हांऊँ ता तिन्हां बै पच्छियांणदा नी ती, कि सौ मसीहा ती, पर ज़ुणियै हांऊँ पाणी सैंघै बपतिस्मा देणै री तैंईंयैं भेज़ू सा, तिन्हैं मुँभै बोलू, ‘ज़ुणी पैंधै तू आत्मा बै उतरदा होर बैशदा हेरला, तेइयै पवित्र आत्मा लाईया बपतिस्मा देणा सा।’ होर मैं हेरू होर सच़ बोला सा, कि ऐही परमेश्वरा रा बेटा सा।”

दुज़ै रोज़ भिरी यूहन्ना होर तिन्हरै च़ेले न दुई मांहणु खड़ै हुऐ ती, यूहन्नै प्रभु यीशु पैंधै ज़ो ज़ाँदै लागै ती, हेरू होर बोलू, “हेरा ऐ परमेश्वरा रा गौभु सा।”
तैबै ते दूऐ च़ेले यूहन्नै री ऐ शूणीऐ प्रभु रै पिछ़ै औंढदै लागै। प्रभु यीशु पिछ़ै मुड़िया ते पिछ़ै ऐन्दै हेरे होर तिन्हां बै बोलू,
“तुसै कुणी बै बोलदै लागेन्दे सी?”
तिन्हैं प्रभु यीशु बै बोलू, “ओ गुरू जी, तुसै कौखै रौहा सी?”
प्रभु यीशुऐ तिन्हां बै बोलू, 9 “च़ला, ता हेरा।”
तैबै तिन्हैं जाईया प्रभु री रौहणै री ज़ैगा हेरी, होर तेई रोज़ प्रभु यीशु सैंघै रौहै ऐ सैभ किछ़ लगभग च़ार बाज़ै मौंझ़ै हुआ ती।
तिन्हां दुई न, पिछ़ै यूहन्ना री गैला शूणीया प्रभु यीशु रै पिछ़ै च़लै ती। एक शमौन पतरसा रा भाई अन्द्रियास ती। तेइयै पैहलै आपणै सैंघै भाई शमौना बै मिलिया बोलू, आसाबै प्रभु मतलब मसीह मिलू। अन्द्रियासै शमौन यीशु हागै बै आंणु,
यीशुऐ तेई पैंधै हेरिया बोलू, “तू यूहन्ना रा बेटा शमौन सा, पतरस सा, मतलब पतरस बोलीणा सा।”

दुज़ै रोज़ प्रभु यीशुऐ गलील ज़िला बै ज़ाणा सोच्चु, प्रभु यीशु फिलिप्पुस सैंघै मिलू होर बोलू, “मूँ पिछ़ै न एज़ा।”
फिलिप्पुस, अन्द्रियास होर पतरसा रै बैतसैदा शैहरा रै रौहणु आल़ै ती। फिलिप्पुस नतनऐल सैंघै मिलू होर तेइबै “ज़ुणिरी चर्चा मूसै रै बिधान न होर भविष्यवाणी केरनु आल़ै केरी ती, सौ आसाबै मिलू सा, सौ यूसुफा रा बेटा यीशु नासरी सा।” नतनऐले तेइबै बोलू, “कि कोई शोभली चीज़ नासरता न मिली सका सा?” फिलिप्पुसै तेइबै बोलू, “चौलिया हेरा।”
यीशुऐ नतनऐल आपु धिरै बै ऐन्दा हेरू तेइरै बारै न बोलू, “हेरा, ऐ पक्का इस्राएली सा, ऐईन कोई भी बैर नी ऑथि।”
नतनऐल यीशु बै बोलू, “तुसै मुँभै कैण्ढै ज़ाणा सी?” प्रभु यीशुऐ तेइबै बोलू, “ऐथा न पैहलै कि फिलिप्पुस तौभै शाधदा ज़ैबै तू फेगड़ै रै बुटै हेठै बेठा ती, तैबै मैं तू हेरू ती।”
नतनऐले प्रभु यीशु बै बोलू, “हे गुरू, तुसै परमेश्वरा रै बेटै सी; तू इस्राएला रा महान राज़ा सा।”
यीशुऐ तेइबै ज़वाब धिना, “मैं तौभै बोलू ती, कि मैं तू फेगड़ै रै बुटै हेठै हेरू ती तू कि तैबै बशाह केरा सा? तौ ता ऊँई न भी बड़ै-बड़ै कोम हेरणै।” तैबै प्रभु यीशुऐ तेइबै बोलू, “हांऊँ तुसाबै सच़-सच़ बोला सा तुसा स्वर्गा बै खुला, होर परमेश्वरा रै स्वर्गदूता बै हांऊँ मांहणु रै बेटै सैंघै ओसदै होर ऊझै ज़ाँदै हेरणा।”

گوێگرتن لە यूहन्ना 1