Zapotec, Aloápam

La sáhaguaba biría Jesús lheꞌe yoꞌoha güie guadhoe gaxxaba roꞌo indattooha. Cumu de yatterba de reru benni bisína nía, nuarca gopittebe udoe lo ttu barco xua lo indattooha. Ca benni seꞌe nía nna bedaa roꞌo indahaba useꞌecana. Lee nna ixe loba nu utixxiꞌenie cana leni ca ejemplu. Nianna re cana:
—Ttu benni runi sina lo ca yu biríabi diabi güedelha xua xuxtila. Ttiaca atti diabi rudelhabi xuxtilaha nna ttulhe ca benniha nna binnaque lo nedaha, atti bisíntteba ca binni utocana ca benniha. Attu lheque nna biyinnaque lheꞌe ttu ruya atta bittu tte xxeni yu re. Ca benniha nna sattiba beꞌeyuque cumu de bittu te xxeni yu re nía. Ttiaca atti biría tatubisa-na, bequexxuttebe ca benniha, cumu de bittu bedetti lhu benniha lhiꞌu, nuarcala nna ubisque. Attu lhe ca benniha nna biyinnaque lheꞌe atta daa ca ya yitsi, ttiaca atti bixen ca ya yitsiha nna betsenttebaquinna ca benniha. Adí ca benniha nna biyinnaque ttu atta re yu bebi. Ca benniha nna tsapaba tsee lena beteque, ttulhe ca iquiha beteque axtaba ttu gayua (100) xua, attu lheque nna beteque gayuna (60) xua, adí ca iquiha nna beteque rerúa (30) xua. Atta gua rudo nagale gue nu ria, gualun duelha qui sadú lele.
Laniala nna ubiga ca benni rudheti ca tisa ruleꞌe unnaba tisacabi Benniha bixa gue rulise ca benni leni ejemplu. Lee nna becabie re cabi:
—Lebiꞌi nna guarunba Tata Do Iyyabaaha qui sadú lele gue gaxasná rinnabie, nu bittu ritedaani ca benni. Ttiaca adí ca benni nna bittu runie qui ttedaaquinna. Cumu benni gua radú leniha nna dhirla nua elha rieni qui sadúchatti leni. Ttiaca nu bittu radú leniha nna axtala nu saroꞌo chi radú leniha, itúa. Denua nna rulisa ca unná leni ejemplu, qui masquiba tticaxa rugüiacana, bittu iláquinna, masquiguaba tticaxa rudo nagacani, bittu iyienquinna lhe bittuguaba sadú lecani lhe. Leni nu guate ca nua guaxxína ca tisa gue Tata Do Iyyabaaha unne profeta Isaías atti rábi:
Masquiba tticaxa iyienquinna bittu sadú lecani.
Masquiba tticaxa ugüiacana bittu iláquinna.
Cumu lastoo ca benni seꞌe-ni nna chi beacana tsitsi,
Lacana nna chi bedhea nagacani lhe
chi bexxúa locani lhe,
qui bittu iyienquinna lhe bittu iláquinna lhe
aná nna qui bittu eyequicana odaxxucana neda quia,
neti nna eyonia cana.
’Ttiaca lebiꞌi nna carbárule cumu gua ritedaabinle gue nu rugüiale-ni lhe gue nu rieninle-ni lhe. Neti nna gualíbatia ria, ixe tsitsia ca benni uca profeta lhe ca benni beni nu anca tsee lhe udá lecabi ugüiacabi nu rilenle nnanna ttiaca bittu biláquinbi na, uxacacabi iyienquinbi nu rieninle nnanna lhe ttiaca bittu bienquinbi na.
’Nnanna nna gualdo nagale bixa diani ejemplu gue benni rudelha xua xuxtilaha. Atti rienini ttu benni ca tisa rixxiꞌa gue gaxasná rinnabia Tata Do Iyyabaaha, ttiaca bittu ritedeenna gue ca tisa-na, nianna risintteba nu xxegüiha rebeana ca tisa chi bienin nua lheꞌe lastooni. Unní nua ancana attiba ca xuxtila binna lo nedaha. Ca xuxtila biyinna lheꞌe ruyaha nna ancaque attiba ca benni, atti rienquinna ca tisa-na attulade reꞌo lecani recabicana udaxxucana neda gue Tata Do Iyyabaaha, ttiaca cumu läga beꞌan tsitsi ca tisaha lheꞌe lastoocani, nuarca läga isá ria lecani. Larcala gansi chi bixa ratecana o nuxa rusía lencana lo niꞌa gue ca tisa-na, readi gattebacana lo neda gue Tata Do Iyyabaaha. Ca xua xuxtila biyinna lheꞌe yitsiha nna ancaque attiba ca benni rienini ca tisa-ni, ttiaca nu richacha iquicani gue nu anca gue yies lo yu-ni lhe gue nu ridá lecani acacana nu gattaru gueni lhe rudheacana lo ca tisa-na, nuarca bittu raca un ca tisana sina lheꞌe lastoocani. Ttiaca xua xuxtila binna atta re yu bebiha nna anque attiba ca benni rienini ca tisa-na lhe radú lecani gue Ben-na lhe. Denua nna runcana nu anca tsee, attiba ca xuxtila biyinna atta re yu bebiha tseeba bixúe. Ttu lheque betee ttu gayua (100) xua, a díque nna betee gayuna (60) xua, a ttu lheque nna betee rerúa (30) xua.

Utixxiꞌaguani Jesús ca benni attu ejemplu, nianna re cana:
—Gue gaxasná rinnabia Tata Do Iyyabaaha ca benni, raxxína len nu uca atti güia ttu unbiyuu guadelhana tagaꞌa xua xuxtila lo yu gueniha. Ttiaca laca tecana tiꞌedhicana, bisíntteba ttu nu bittu raca uyúna benni beaca gueni lo yuha, udana ixxi lheꞌe xua xuxtilaha, atti deyyattebana. Atti chi biyelha xuaha nna biríatteba iquie, ixxiha nna bixenguaba-na. Ca benni riben sinaha nna güiattebacana guayúcana benni beaca guebi lo yuha, rácan bi: “Benni baninna riꞌitu, ¿si läba tagaꞌa xuxtila xa bedelhalu lo yu gueluha? ¿Gala biría ixxiha ganna?” Benni beaca guebi lo yuha nna rábi: “Gaxa ttu nu bittu raca uyúna netiba beni unná.” Ca benni riben sinaha nna rácana: “¿Si guarca lelu tsiatu sattúpitu ixxiha?” Ttiaca benni beaca guebi lo yuha nna becabibi rábi: “Bittu. Cumu atti ilhupile ixxiha nna ilhupiguaba xuxtilaha. Adíla tsee gualugüelhaba ixxi-na ixenna len xuxtila-na. Gansi chi liba bisía sá exú lena bani-na, lania liba nna idhelha ca benni tsia güitsela, neti nna gupeba ca nua echúcana lola ixxi-na qui uxxicacana lheꞌeni, uncan na xxia xxia qui dho gui lheꞌeni. Lania liba nna edícana xuxtilaha qui cua tseecane lheꞌe atta rigúa tseea lena bani quia.”


Utixxiꞌaguani Jesús cana attu ejemplu, re cana:
—Gue gaxasná rinnabia Tata Do Iyyabaaha ca benni raxxína len nu raca atti rada ttu benni ttu besi gue coana murtasa lo yu gueniha. Besiha nna masquiba ancana nu chicaꞌaru gue delo iyá ca besi, ttiaca dequide chi bixenna xxenrula racana atti adí ca coana, attiba ttu yagaꞌa racana, larcala axtaba ca binni-na rusía xcuadi guecani lo ca xiquini.
Utixxiꞌaguani Jesús ca benni attu ejemplu nianna re cana:
—Gue gaxasná rinnabia Tata Do Iyyabaaha ca benni raxxína len nu uca len levadura nu bedaxxu ttu nuila betselana lheꞌe tsunna ya yiedi qui ilhidhana lheꞌe itúba cua gue ttaxtilaha.
Iyába unní utixxiꞌeni Jesús ca benni len ca ejemplu. Lee nna sunruba leni ca ejemplu ruleꞌenie ca benni. Aníaba benie qui guaxxína ca tisa utixxiꞌa benni uca profeta gue Tata Do Iyyabaaha, atti rábi:
Leni ejemplu liba innea ulisa ca benni.
Neti nna quixxiꞌatia cana gue nu te gatsi bittu chi utedaani ca benni
desdeba atti ure yies lo yu-ni.

Dequide bechú tisa Jesús ca benni seꞌe nía nna betaꞌattebe lheꞌe yoꞌoha. Nianna ubigatteba ca benni rudheti ca tisa ruleꞌe, rácabi Benniha:
—Utixxiꞌen riꞌitu bixa dia le ejemplu gue ixxi beꞌeyu lheꞌe xua xuxtilaha.
Laniala nna rá Jesús ca biꞌiniha:
—Neti Benni unbiyuu daa iyyabaaha anca Benni bedelha xua xuxtilaha. Lo yu atta güia xuaha nna ancana yies lo yu-ni. Xuaha nna anque ca benni rinnabia Tata Do Iyyabaaha. Ixxi beꞌeyu lheꞌe xuaha nna ancana ca benni rudo tisa gue nu xxegüiha. Nu bittu raca uyúna benni beaca guebi lo yuha nna ancana nu xxegüiha. Lana nua udána ixxiha. Güitsela-na ancana atti lhuxa yies lo yu-ni. Ca benni echú xuaha nna ancacabi ca ingeli gue Tata Do Iyyabaaha. Attiba guate ixxiha bilupina güiana lo gui, aníaguaba sate ca benni gansi chi bisía sá lhuxa yies lo yu-ni. Neti Benni unbiyuu daa iyyabaaha, idhelha ca ingeli quia atta seꞌe ca benni rinnabiaya qui cueacabi iyába ca benni runi nu lä anca tsee lhe ca nu runi richecu ca benni lo neda gue Tata Do Iyyabaaha lhe. Lacabi nna udelhacabi cana lo gui gue atta lexúaha, atta cuescana lhe go lo layacani lhe. Lania nna ca benni runi nu anca tsee-na tsuꞌu xieni guecabi attiba tatubisa-na atta innabia Tata gueri do iyyabaaha. Lebiꞌi atta guarudo nagale gue nu ria, gualun duelha qui sadú lele.

’Atti rinnabia Tata Do Iyyabaaha ca benni raxxína ancana attiba ttu nu texxatta lidhacani guattiꞌa ttu benni yuꞌu gatsina lheꞌe ttu yu. Benni guattiꞌana unnuha nna bocatsi dacabana nua nía, nianna attulade reꞌo leni deyyana guattoꞌona iyába nu te gueni qui uyoꞌona lo yuha.
’Anáguaba atti rinnabia Tata Do Iyyabaaha ca benni, raxxína len nu guate ttu nu requi güettoꞌo, lana nna requina reguilana perla tsee. Atti chi guattiꞌana ttu perla nu dacaxxatta nna deyyattebana guattoꞌona iyába nu te gueniha qui uyoꞌona nua.

’Anáguaba atti rinnabia Tata Do Iyyabaaha ca benni, raxxína len ttu yexxa nu rudaxxu len ca benni belha. Atti rudelha ca benni nua lheꞌe inda nna rudaxxuttebana iyáloba belha. Atti chi risá yexxaha nna rebeatteba ca benni na roꞌo indaha. Nianna ribiattebacana rucuecana lheꞌe nua. Ca belha tseeha nna reguꞌucana lheꞌe ca sumi, ca belha bittu diquixuuha nna riguꞌunacana. Anába aca atti isía sá lhuxa yies lo yu-ni. Lania nna iría ca ingeli-na cuequiescana ca benni runi nu lä anca tsee-na lagüi ca benni runi nu anca tsee-na, atti udelhacabi ca benni runi nu lä anca tsee-na lo gui gue atta lexúaha, nía nua atta cuescana lhe go lo layacani lhe.
Laniala unnaba tisa Jesús ca benni rudheti ca tisa ruleꞌe re cabi:
—¿Si guadú lele iyá nu rpea le-ni?
Lacabi nna becabicabi rácabi:
—Agu, chi guadú letu.
Benniha nna re cabi:
—Larcala iyába ca benni ruleꞌe nu rá lo ca ley bocaꞌana Moisés chi yu gue gaxasná rinnabia Tata Do Iyyabaaha, ancacana attiba ttu benni beaca gueni ttu yoꞌo. Lana nna lheꞌe ca nu tua tseennaha ribeana nu te lidhacani anca cubi lhe nu anca yaxxu lhe.


Atti chi uluxa utixxiꞌa Jesús ca ejemplu-ni nna bedáttebe nía deyye. Besinbe lo yu atta beaca lasie nna udulottebe beleꞌenie ca benni lheꞌe yoꞌo atta rudheticana ca tisa gue Tata Do Iyyabaaha. Atti bienquin nua ca tisa rinne Benniha nna bebanbaquinna. Nianna unnaba tisa loescani rácana:
—¿Ga guaxxí unní elha rieni gueni? ¿Gasná runna raca gueni runna ca milagru-na lhe? ¿Si läba xiꞌini carpintero-naba unní nna? ¿Lä Maríaba lá nan gue unní lhe ca betsini nna lácana Jacobo lhe José lhe Simón lhe Judas lhe? ¿Si läba niguaba seꞌe iyába ca dana unní len riꞌi lheꞌe yies-ni lhe? ¿Gala guaxxí unní iyába nu raca guen-ni ganna?
Lo niꞌa gue unnuha nna useꞌe dittibacana, bittu güia lecana Jesús. Ttiaca Benniha nna ráttebe cana:
—Gaxaba nua nna gua riaba lecani ttu benni ancabi profeta gue Tata Do Iyyabaaha, ttiaca lheꞌe yiesi atta beaca lasbiha nna tsa läga ria lecan bi, niguaba ca nu seꞌe lheꞌe lisbiha lhe.
Nioca nuarca bittu uca uni Jesús ixe ca milagru nía, lo niꞌa gue de bittu güia le ca nua Benniha.

گوێگرتن لە San Mateo 13